Intobelo—Ngaba Sisifundo Esibalulekileyo Ebuntwaneni?
“ABAZALI Bafuna Abantu, Kungekhona Abantwana Abathobelayo Nje.” Wawufundeka njalo umxholo wephephandaba. Le ngxelo yayisekelwe kwiziphumo zohlolisiso olwenziwa eNew Zealand, ezabonisa ukuba kuphela “ngabantu abangama-22 ekhulwini ababecinga ukuba abantwana bafanele bafundiswe intobelo ekhaya.” Olu hlolisiso lwafumanisa ukuba abazali namhlanje bakholelwa ukuba kubaluleke kakhulu ukufundisa abantwana izinto ezifana nokuba nesimilo, ukuzimela nembopheleleko.
Kweli xesha lokuzimela-geqe nokuzingca, akumangalisi ukuba inkoliso yabantu ingaqiniseki ncam ngentobelo nokufundisa abantwana ngayo. Kodwa ngaba intobelo yabantwana inokugqalwa njengento ephelelwe lixesha? Okanye ngaba iphakathi kwezifundo ezibalulekileyo abantwana abanokuzifunda baze bangenelwe kuzo? Okubaluleke ngakumbi, uYehova uThixo, uMsunguli welungiselelo lentsapho, ukujonga njani ukuthobela abazali, yaye ziziphi ezinye zeengenelo ezifumanekayo ngenxa yentobelo?—IZenzo 17:28; Efese 3:14, 15.
“Oku Kububulungisa”
Umpostile uPawulos wabhalela ibandla lamaKristu enkulungwane yokuqala elalise-Efese esithi: “Bantwana, bathobeleni abazali benu ngokumanyene neNkosi, kuba oku kububulungisa.” (Efese 6:1) Ngoko ke, isizathu esiyintloko sokuba kufuneke intobelo kukuba iyavisisana nomlinganiselo wobuthixo woko kulungileyo. Njengokuba uPawulos esitsho, “oku kububulungisa.”
Ngokuphathelele oku, siyaphawula ukuba iLizwi likaThixo lichaza ingqeqesho yabazali ngothando njengento entle, ‘izidanga ezinomtsalane entlokweni yakho nentsimbi yomqala entle emqaleni wakho,’ nanjengento ‘ekholekileyo eNkosini.’ (IMizekeliso 1:8, 9; Kolose 3:20) Ngokwahlukileyo koko, ukungathobeli abazali akumkholisi uThixo.—Roma 1:30, 32.
“Ukuze Kulunge Kuwe”
UPawulos walatha komnye umvuzo wentobelo xa wabhala esithi: “‘Beka uyihlo nonyoko’; wona lowo ngumyalelo wokuqala onesithembiso esithi: ‘Ukuze kulunge kuwe uze uhlale ixesha elide emhlabeni.’” (Efese 6:2, 3; Eksodus 20:12) Ziziphi iindlela umntu anokungenelwa ngazo xa ethobela abazali?
Okokuqala, ngaba akuyonyaniso ukuba abazali bakhulile yaye banamava? Nangona besenokungazi kangako ngeekhompyutha okanye ngeminye imibandela efundiswa esikolweni, bazi okuninzi ngokuphila nokuhlangabezana neengxaki ebomini. Kwelinye icala, abantu abaselula abakwazi ukucinga ngokulungeleleneyo okubangelwa kukuqola. Ngaloo ndlela, batyekele ekwenzeni izigqibo ngokungxama, ngokufuthi beyekelela kwingcinezelo yoontanga, baze benzakale. Ngokusengqiqweni, iBhayibhile ithi: “Ubudenge bubotshiwe entliziyweni yenkwenkwe.” Siyintoni isicombululo? “Intonga yengqeqesho iya kubushenxisela kude kuyo.”—IMizekeliso 22:15.
Iingenelo zentobelo azipheleli nje kulwalamano oluphakathi komzali nomntwana. Ukuze abantu basebenze ngokulula nangokuphumelelayo, kumele kubekho intsebenziswano, nto leyo efuna umlinganiselo othile wentobelo. Ngokomzekelo, emtshatweni, kukulungela ukuyekelela, kunokuba unyanzele uze ungawakhathaleli amalungelo neemvakalelo zabanye, okuphumela kuxolo, imvisiswano nolonwabo. Emsebenzini, ukuzithoba komqeshwa kuyafuneka ukuze naliphi na ishishini okanye umgudu uphumelele. Ngokuphathelele imithetho nemimiselo karhulumente, intobelo ayibangeli ukuba ubani angagwetywa nje kuphela kodwa ikwazisa umlinganiselo othile wokukhuseleka.—Roma 13:1-7; Efese 5:21-25; 6:5-8.
Abantu abaselula abangathobeli gunya ngokufuthi baba ziinjubaqa phakathi koluntu. Ngokwahlukileyo koko, isifundo sentobelo esafundwa ebuntwaneni sinokuba nemivuzo kubo bonke ubomi bukabani. Hayi indlela okuyingenelo ngayo ukufunda oku usengumntwana!
Umvuzo Omkhulu Wentobelo
Intobelo ayizisi ulwalamano lwentsapho eyonwabileyo nezinye iingenelo ezihlala ixesha elide kuphela kodwa ikwanikela isiseko okunokwakhelwa kuso olona lwalamano lubalulekileyo—oluphakathi komntu noMdali wakhe. ‘NjengoMdali Ozukileyo’ ‘onomthombo wobomi,’ uYehova uThixo ngokufanelekileyo ufanele azuze intobelo yethu epheleleyo.—INtshumayeli 12:1; INdumiso 36:9.
Igama elithi “ukuthobela” livela ngeendlela ezahlukahlukeneyo ngaphezu kwezihlandlo azili-160 eBhayibhileni. Ngaphezu koko, kukho iimbekiselo ezingamakhulu zemithetho, imiyalelo, izigqibo, nemimiselo kaThixo, konke kufuna ukuzithoba. Kucacile ukuba uThixo ujonga intobelo njengento efunekayo ukuze simkholise. Ewe, intobelo ibalulekile ekwakheni ulwalamano noYehova. (1 Samuweli 15:22) Okubuhlungu kukuba, umntu akatyekelanga ekuthobeleni. IBhayibhile ithi: “Intliziyo yomntu ityekele ebubini kwasebutsheni bakhe.” (Genesis 8:21) Ngoko ke, isifundo sentobelo asifundwa kuphela ebuntwaneni kodwa kubo bonke ubomi. Ukwenjenjalo kuzisa umvuzo omkhulu.
Khumbula ukuba, njengokuba umpostile uPawulos esitsho, umyalelo wokuthobela abazali uhamba nethemba elintlu-mbini, oko kukuthi, ukuze “kulunge kuwe uze uhlale ixesha elide emhlabeni.” Isiqinisekiso seli themba sifumaneka kwiMizekeliso 3:1, 2: “Nyana wam, musa ukuwulibala umthetho wam, yaye ngamana intliziyo yakho ingayigcina imiyalelo yam, ngenxa yokuba kuya kongezelelwa kuwe imihla emide neminyaka yobomi noxolo.” Umvuzo omkhulu oza kufunyanwa ngabo bathobelayo lulwalamano olusondeleyo noYehova ngoku nobomi obungunaphakade kwihlabathi elitsha elinoxolo.—ISityhilelo 21:3, 4.
[Imifanekiso ekwiphepha 30, 31]
Intobelo izisa ulwalamano oluhle entsatsheni, emsebenzini, nakuYehova