Badala—Yabelani Abanye Imisebenzi!

WAYEYINDODA enomonde, elulamileyo, eyayizimisele ukwenza okusesikweni neyayiqhutywa ngamava ayo ebomini. Ngaloo ndlela, amadoda abafazi nabantwana abangaphezu kwezigidi ezithathu, babekhangele kuye ngentembelo ukuze bafumane amacebiso. Wayezama ukungabadanisi. Ukususela kusasa de liye kutshona, wayephulaphula iingxaki zabo aze ngomonde abancede ukuba babone indlela imithetho kaThixo esebenza ngayo kwimeko yabo. Ewe, okwethuba elincinane, kwiminyaka enokuba ngama-3 500 eyadlulayo, izizwe ezili-12 zakwaSirayeli zazigwetywa yindoda enye kuphela—uMoses.

Noko ke, uYitro, umkhwe kaMoses, wayekuxhalabele oku. UMoses wayenokuze alindele ukuba unokukwazi njani ukusebenza ngolu hlobo? Ngoko uYitro wathi: “Ayilungile le nto uyenzayo. Uya kuzigqiba uphele amandla, naba bantu unabo; kuba lo msebenzi unzima kuwe, akunakuwenza wedwa.” (Eksodus 18:17, 18) Sasiyintoni isicombululo? UYitro wacebisa uMoses ukuba abele abanye ezinye zeembopheleleko zakhe. (Eksodus 18:19-23) Elinjani ukuba lihle lona icebiso!

Phakathi kwebandla lamaKristu namhlanje, kukho abadala abaninzi abathi, njengoMoses, bazame ukusingatha okungaphaya kwamandla abo bebodwa. Balungelelanisa iintlanganiso ibe bafanele balungiselele baze banikele iinxalenye ezithile zocwangciso ngendlela elungeleleneyo nephumelelayo. (1 Korinte 14:26, 33, 40; 1 Timoti 4:13) Kwakhona abadala banyamekela iintswelo zamalungu ngamanye ebandla. (Galati 6:1; 1 Tesalonika 5:14; Yakobi 5:14) Bayakhokela kowona msebenzi ubalulekileyo wokushumayela iindaba ezilungileyo zoBukumkani. (Mateyu 24:14; Hebhere 13:7) Kwakhona, balungiselela ibandla ukuba lifumane izixa zoncwadi olunokusasazwa ebantwini.

Ukongezelela, abanye abadala babelwa iinxalenye ezithile kucwangciso lweendibano zesiphaluka nezesithili. Basebenze kumalungiselelo eendibano nakwiikomiti zokunxibelelana nezibhedlele. Bambi bafak’ isandla ekwakhiweni kweeHolo zoBukumkani. Yaye konke oku kongezelela kwiimbopheleleko zabo zentsapho nemfuneko yokuzondla kwabo ngokomoya. (Thelekisa uYoshuwa 1:8; INdumiso 110:3; 1 Timoti 3:4, 5; 4:15, 16.) Amadoda anjalo angamaKristu akuphumeza njani konke oku? NjengoMoses amele afumane uncedo. Amele afunde ukwabela abanye imisebenzi. Enyanisweni, umntu ongababeliyo abanye umsebenziu ngumlungelelanisi ongenabuchule.

Ukuxabiseka Kokuqeqesha Abanye

Kukho izizathu ezingakumbi zokwabela abanye iimbopheleleko. Kumzekeliso kaYesu weetalente, inkosi, ngaphambi kokuba ihambele kwilizwe elikude, yabiza abakhonzi bayo yaza yababela iimbopheleleko ezahlukahlukeneyo. (Mateyu 25:14, 15) Ngokwenjenjalo, le nkosi yakwazi ukuphumeza izinto eziliqela eyayinosukelo lwazo. Okokuqala, ngoxa yayingekho, abakhonzi bayo basebenza endaweni yayo ibe umsebenzi oyimfuneko awuzange uye uthotha uze unqumame ngoxa yayimkile. Okwesibini, ekubeni ukwenza kubaluleke ngaphezu kokuthetha, le nkosi yakwazi ukuqwalasela oko abakhonzi bayo babenokukwenza nokunyaniseka kwabo. Okwesithathu, le nkosi yanika abakhonzi bayo ithuba lokuzuza amava ababewafuna kakhulu.

Lo mzekeliso unentsingiselo kuthi namhlanje. Xa uYesu wemkayo emhlabeni, wanika abafundi bakhe abathanjisiweyo imbopheleleko. Abaseleyo kwaba basenembopheleleko ngezilangazelelo zoBukumkani ehlabathini lonke. (Luka 12:42) Ebudeni bokukhokela kwegosa elithanjisiweyo lanamhlanje, intsikelelo kaYehova iye yabonakala kwintlangano yakhe. Ngokomphumo, iye yanda ngokumangalisayo. Khawufan’ ucinge, kwiminyaka nje emihlanu edluleyo, abatsha abangaphezu kuhle kwesigidi baye bafuzisela uzahlulelo lwabo ngobhaptizo lwamanzi! Oku kuye kwaphumela ekusekweni kwamawaka amabandla amatsha namakhulu eziphaluka ezitsha.

Kanye njengokuba uYesu Kristu eye wabela ‘umkhonzi othembekileyo noqondayo’ iimbopheleleko ezithile, naye uye wabela abadala nezicaka zolungiselelo ‘zezinye izimvu’ iimbopheleleko ezithile zebandla. (Mateyu 24:45-47; Yohane 10:16) Sekunjalo, kufuneka amadoda angakumbi azahluleleyo okunyamekela ulwando olukhulu. Aza kuvela phi? Abadala bafanele bawaqeqeshe. Kodwa abadala banokuwaqeqesha njani amadoda anjalo ukuba abawabeli amadoda athembisayo iimbopheleleko ezifanelekileyo? Yiyiphi enye indlela abadala abanayo yokuqwalasela oko kunokwenziwa ngamadoda aselula nendlela athembeke ngayo?

Kuthetha Ntoni Ukwabela Abanye Imisebenzi?

Kwabanye, “ukwabela abanye imisebenzi” kuthetha ukuthula emagxeni, ukuphepha, ukutyeshela, okanye ukurhoxobisa kwiimbopheleleko zabo. Noko ke, xa kusetyenziswa ngendlela efanelekileyo, “ukwabela abanye imisebenzi” ngokwenene kuyindlela yokuphumeza iimbopheleleko. Isenzi sesiNgesi esithi “to delegate” (ukwaba) sichazwa ngokuthi, “ukuphathisa omnye; ukunyula njengommeli wakho; ukumthi jize ngembopheleleko okanye igunya.” Sekunjalo, ekugqibeleni umabi uba nembopheleleko ngoko kwenziwayo.

Bambi basenokungafuni ukwaba ngenxa yokoyika ukuphulukana nolawulo. Kanti, ukwaba umsebenzi akuthethi ukuphulukana nolawulo. Nangona engabonakali yaye elawula esemazulwini, eneneni nguKristu Yesu olawula ibandla lamaKristu. Yena uye waphathisa amadoda anamava imbopheleleko yokunyamekela ibandla.—Efese 5:23-27; Kolose 1:13.

Abanye basenokungatyekeli ekwabeleni abanye imisebenzi kuba bevakalelwa kukuba banokuwukhawulezisa umsebenzi xa bewenza ngokwabo. Noko ke, uYesu wakubona ukubaluleka kokuqeqesha abanye. Akukho namnye emhlabeni owayefundisa ngokunempumelelo ngaphezu koYesu. (Yohane 7:46) Sekunjalo, emva kokunika abafundi bakhe abangama-70 imiyalelo, wabathuma kumsebenzi wokushumayela. Nangona babengenakulingana noYesu ngobuchule bokufundisa, babuya bevuya yimpumelelo ababa nayo. UYesu wavuyisana nabo waza wabancoma, kuba wayesazi ukuba babeya kuqhubeka nalo msebenzi ixesha elide emva kokuba emkile baze ekugqibeleni bafeze okungakumbi kunoko wayenokukufeza eyedwa.—Luka 10:1-24; Yohane 14:12.

Kwakhona ukwaba imisebenzi kuthetha ukufumana uncedo ngeenkcukacha ezifunekayo. Ngosuku lwangaphambi kokufa kwakhe, uYesu wabela uPetros noYohane ukuba benze amalungiselelo ayimfuneko esidlo sakhe sokugqibela sePasika. (Luka 22:7-13) Akuzange kufuneke ukuba uYesu azikhathaze ngokuthenga ixhwane, iwayini, isonka esingenagwele nemithana ekrakra; ibe akuzange kufuneke aqokelele izitya, iinkuni zokubasa nokufanayo. UPetros noYohane bazilungiselela ezo zinto.

Abadala namhlanje banokunandipha iingenelo ezifanayo ukuba baxelisa umzekelo kaYesu. Ngokomzekelo, lowo unyamekela uncwadi usenokucelwa ukuba aodole izixa ezifunekayo ukwenzela uhlaselo oluzayo. Usenokuyalelwa ukuba ahlole iingxelo zakhe ukuze abone indlela uncwadi olufanayo oluye lwasetyenziswa ngayo kuhlaselo oludluleyo. Kwakhona usenokuqwalasela ubunjani bentsimi yebandla ngaphambi kokuzalisa ifomu efanelekileyo yokuodola. Uya kwandula adlulisele le fomu kunobhala webandla ukuba ayihlole. Sisakuba ke isicaka soncwadi siwufundile umsebenzi waso, akusayi kuba yimfuneko ngonobhala ukuba azihlole okwesibini iingxelo zexa elidluleyo ngoxa nje izimbuku ezikwifomu yokuodola zisengqiqweni. Ngokucacileyo, esi senzo silula sokwaba umsebenzi siya kwenza kube lula ngakumbi kubo bonke ababandakanyekileyo ukuhambisa uncwadi oluodoliweyo.

Ngenxa yeengenelo ezinjalo ezisebenzisekayo, ubani unokuwaba njani umsebenzi ngokunempumelelo?

Indlela Yokwaba Umsebenzi

Wuchaze umsebenzi. Okokuqala, yenze icace imiphumo elindelekileyo. “Umntu othile olinene” okumzekeliso kaYesu weemina wabaxelela oku abakhonzi bakhe abalishumi, “Rhwebani, ndide ndifike.” (Luka 19:12, 13) Le nkosi yayilindele ukuba abo bakhonzi barhwebe ngokunengeniso ngemina yakhe baze banikele iingxelo ngengeniso yabo ekubuyeni kwakhe. Babekwazi oko babemele bakwenze. Lo mgaqo unokusebenza njani xa kusakhiwa iHolo zoBukumkani namhlanje? Ngokomzekelo, umzalwana othile owabelwe ukulungisa uphahla ngokuqhelekileyo uya kuxelelwa ngezixhobo amakazisebenzise, apho anokuzifumana khona nangexesha anokuwuqalisa ngalo umsebenzi, ngokuvuma kwemozulu. Imiyalelo engqale ngolo hlobo ibangela izinto zilungelelaniswe kakuhle.

Kubalulekile ukuchaza ingekuphela nje okubandakanywa ngumsebenzi othile kodwa kwanezigqibo umntu avumelekileyo ukuzenza nemibandela emele isiwe komnye umntu. UMoses wabaxelela abo wayebakhethile ukuba babemele bagwebe amatyala amancinane, kodwa lawo anzima ayemele aziswe kuye.—Eksodus 18:22.

Xa usaba iimbopheleleko, kuphaphele ukuba unganiki abantu ababini umsebenzi omnye. Xa kusabelwa abantu abaninzi umsebenzi ofanayo, kubakho ukudideka. Khawufan’ ucinge oko bekuya kwenzeka ukuba kwindibano enkulu yamaNgqina kaYehova, iSebe Lokucoca neSebe Lokutya ebenikwe imbopheleleko yokucoca iitafile zokutya, okanye ukuba iSebe Labalindi neSebe Lontywiliselo ebabelwe ukwalathisa ababukeli ebudeni bobhaptizo.

Khetha amadoda afanelekileyo. UYitro wamcebisa oku uMoses: “Wena ngokwakho umele ufune amadoda afanelekileyo, amoyikayo uThixo phakathi kwabantu bonke, amadoda anyanisekileyo ayithiyileyo inzuzo embi, uze uwamise phezu kwabantu.” (Eksodus 18:21, The New English Bible) Licacile elokuba indoda imele kuqala ifikelele iimfaneleko zokomoya. Ukuze kuqondwe ukuba ubani ‘ukufanelekele’ ukwenza umsebenzi othile okhoyo, kumele kuqwalaselwe iinkalo ezinjengemizila yobuntu, amava, uqeqesho neziphiwo zakhe. Ngaloo ndlela, umKristu onobuntu obuthandekayo nobuluncedo usenokusebenza kakuhle kwitafile yamaphephancwadi okanye njengomlindi. Ngendlela efanayo, xa kukhethwa umntu oza kunceda unobhala webandla, kumele kuqwalaselwe indlela alungelelene ngayo. Ngaba unikela ingqalelo kwiinkcukacha, ngaba unokuthenjwa, ibe ngaba unokuyigcina imibandela eyimfihlo? (Luka 16:10) Ukunikela ingqalelo kwiinkalo ezinjalo ukongezelela kwiimfaneleko zokomoya kuya kunceda ekunikeni indoda efanelekileyo umsebenzi onokuyifanela.

Mnike izinto ezaneleyo. Umntu owenza umsebenzi othile uya kufuna ukuba izinto ezithile zifumaneke lula ukuze awugqibe umsebenzi awabelweyo. Mhlawumbi uya kufuna izixhobo zokusebenza, imali, okanye uncedo. Mnike izinto ezaneleyo. Ngokomzekelo, umzalwana usenokucelwa ukuba alungise izinto ezithile kwiHolo yoBukumkani. Ngokucacileyo, uya kuxelelwa izinto amele azenze, kodwa usenokufuna imadlana ethile yokuthenga izinto ezifuneka ngequbuliso. Mhlawumbi uya kufuna uncedo. Ngoko abadala basenokucela abanye ukuba bamncede okanye basenokwenza isaziso ebandleni sokuba ‘uMzalwana Uzibani-bani uya kuba esenza umsebenzi onje nanje eholweni, ibe usenokucela abanye benu ukuba bamncede.’ Ukucinga kwangaphambili okunjalo kuya kuthintela ubani ukuba abe umsebenzi othile ngaphandle kokunikela izinto ezaneleyo. “Musa ukwaba ngokungaphelelanga” utsho njalo omnye umcebisi wabaphathi bamashishini.

Xa usaba iimbopheleleko, yazisa abanye ukuba loo mntu usebenza endaweni yakho. Kwakhona igunya lokusebenza endaweni yakho liluncedo. UYoshuwa wamiswa njengenkokeli entsha kaSirayeli phambi “kwebandla lonke.” UMoses wayalelwa ukuba ‘athabathe kwindili yakhe ayibeke phezu koYoshuwa.’ (Numeri 27:18-23) Kwilungiselelo lebandla, kusenokufezwa okufanayo ngokusuka nje kuxhonywe kwibhodi yezaziso uludwe lwabo babelwe ukwenza imisebenzi ethile.

Zixhase izigqibo zabo. Ngoku lowo wabelweyo unokuqhubeka nomsebenzi awunikiweyo. Noko, khumbula ukuba unokuba ngumthombo wokhuthazo kuye ukuba uyazixhasa izigqibo ezihle azenzayo. Ngokomzekelo, wena njengomdala usenokuba nokhetho lwakho ngendlela yokubeka imibhobho yesandisi-lizwi nempahla ekwiqonga leHolo yoBukumkani, mhlawumbi ukhetho olwahlukileyo ngandlel’ ithile kwindlela enza ngayo umzalwana owabelwe oko. Noko ke, ukuba umzalwana onyamekela iqonga unikwa inkululeko ethile emsebenzini wakhe, kusenokwenzeka ukuba azuze intembelo namava. Ngaphezu koko, usenokuphucula. Omnye umcebisi ngezoshishino wathi: “Yaba umsebenzi, hayi indlela owenziwa ngayo. . . . Ngokufuthi, isiphiwo esihle siyavela.”

Ngokubhekele phaya, umzalwana owenza umsebenzi othile obeke isandla sakhe epuluweni, ngokungathi kunjalo, ngokufuthi usondelelene nemeko ethile ibe ngaloo ndlela usenokuziqonda ngakumbi iingxaki ezibandakanyekileyo. Usenokusabela kwiingxaki ngezicombululo ezisebenza ngokwenene. Kusenokwenzeka ukuba ujamelene noothunywashe abangacacanga kubabukeli. Ngoko ke, omnye umveleli ongumKristu wathi ngomzalwana onamava owayemncedisa: “Ukuba uthi la mhlaba unamatye, ndimele ndimthembe.”

Ewe, olona ncedo luxabiseke gqitha kubadala abangamaKristu ngamadoda namabhinqa azahluleleyo akulungeleyo nakwaziyo ukufak’ isandla ngayo nayiphi na indlela alathiswa ngayo. Badala, sebenzisani olu ncedo lubalaseleyo! Ukwaba imisebenzi kuluphawu lokuthobeka ibe kunokunciphisa ukucinezeleka nodandatheko. Ngaloo ndlela ayiyi kuba nguwe kuphela oya kwazi ukwenza okungakumbi kodwa uya kunika nabanye ithuba lokuzuza amava afunekayo.