Indoda Efundileyo
“LUBONENI ubizo lwenu, bazalwana, ukuba azizininzi izilumko ngokwenyama, ababaninzi abanamandla, akamaninzi amanene.” (1 Korinte 1:26) Njengokuba la mazwi ebonisa, kukho ingozi ekuthambekeleni kubulumko behlabathi okanye ekubeni nesikhundla esiphezulu ekuhlaleni. Izinto ezinjalo zinokuba sisithintelo ekwamkeleni kukabani iindaba ezilungileyo.—IMizekeliso 16:5; Marko 10:25.
Sekunjalo, ngomhla kaPawulos bambi ababezizilumko ngokwenyama bayamkela inyaniso, yaye omnye kwaba yayinguPawulos. Esisifundiswa yaye kubonakala ngathi wayephuma kwintsapho ebalaseleyo, uPawulos wayengumshumayeli onenzondelelo weendaba ezilungileyo. Ngaloo ndlela wabonisa ukuba abanamalungelo athile kweli hlabathi banokumkhonza uYehova ukuba banentliziyo elungileyo. Bakwanokubusebenzisa ubuchule ababufumene kumsebenzi wempangelo enkonzweni kaYehova.—Luka 16:9.
Inzalelwane YaseTarso
UPawulos wazalelwa eTarso, ‘umzi ongadume kangako,’ njengoko ewuchaza kamva. (IZenzo 21:39) Mhlawumbi kulapho wazuza khona ulwazi ngeelwimi—ngokukhethekileyo ulwazi olubalaseleyo lwesiGrike—olwaluxabiseke kunene kumsebenzi wakhe wobuvangeli. Ubomi baseTarso uPawulos ngebabumqhelanise kungekuphela nje neendlela zobuYuda, kodwa kwanempucuko yabeeNtlanga, mava lawo wawasebenzisayo kwiminyaka yamva njengompostile weentlanga. Wayekwazi ukucacisa inyaniso ngendlela ababenokuyiqonda. (1 Korinte 9:21) Ngokomzekelo, cinga ngentetho awayinikela e-Atene ekunikelwe ingxelo ngayo kwiZenzo isahluko 17. Apho, ngoxa wayethetha ngenyaniso, ngobuchule walukhankanya nonqulo lwama-Atene yaye wada wacaphula namazwi enye yeembongi zawo.
Ummi WaseRoma
UPawulos wayenenye into eyayimnceda ehlabathini. Wayengummi waseRoma, yaye wakusebenzisa oku ekuhanjiselweni phambili kweendaba ezilungileyo. EFilipi, yena namaqabane akhe babethwa baphoswa entolongweni ngaphandle kokuthethwa kwetyala. Kwakungekho mthethweni ukwenza oku kummi waseRoma, yaye xa uPawulos wazisa lo mbandela kwingqalelo yabasemagunyeni, bamvumela ukuba ahlale akhonze ebandleni ngaphambi kokuba aye kwindawo elandelayo.—IZenzo 16:37-40.
Kamva, xa wayemi phambi kweRhuluneli uFesto, uPawulos walisebenzisa ngokunengenelo ilungelo lokuba ngummi waseRoma ngokubhenela kuKesare. Ngaloo ndlela, wazikhusela iindaba ezilungileyo phambi kwelona gunya liphakamileyo loBukhosi baseRoma.—IZenzo 25:11, 12; Filipi 1:7.
UPawulos wafumana uqeqesho olusebenzisekayo olwathi kamva lwangqineka luluncedo. Kusenokwenzeka ukuba, wafundiswa nguyise ukwenza iintente. Ngenxa yoku, wayenokuzigcina ekubulungiseleli naxa wayengenamali ngokwaneleyo. (IZenzo 18:1-3) Kwakhona wafundiswa ngokunzulu ngonqulo. Wakhuliswa ‘engumFarisi, engowomFarisi.’ (IZenzo 23:6) Eneneni, wondlelwa ezinyaweni zikaGamaliyeli, omnye wabona bafundisi babalaseleyo bobuYuda. (IZenzo 22:3) Imfundo elolo hlobo, mhlawumbi enokuthelekiswa nemfundo esemgangathweni yaseyunivesithi namhlanje, ibonisa ukuba wayephuma kwintsapho ebalasele ngokwenene.
Imbono Efanelekileyo
Imvelaphi noqeqesho lukaPawulos zazinokumenzela ikamva eliqaqambileyo kubuYuda. Ngewayeqhubele phambili. Noko ke, akuba emamkele uYesu ukuba unguMesiya, usukelo lukaPawulos lwaguquka. Xa wabhalela abaseFilipi, wagqabaza ngamanye amalungelo awayenawo ehlabathini wathi: “Zona ezo zinto zabe ziyinzuzo kum, zona ezo ndazibalela ekuthini yinkxwaleko ngenxa kaKristu. Ewe, okunene, ndisuka izinto zonke ndizibalele ekuthini ziyinkxwaleko, ngenxa yokongama kokumazi uKristu Yesu iNkosi yam.”—Filipi 3:7, 8.
Le ndoda ifundileyo ayizange ikhangele emva inolangazelelo koko ngeyayikufezile ngemfundo yehlabathi eyayinayo; ingazange isebenzisele “imfundo eninzi” eyayinayo ukwenza abanye bayoyike. (IZenzo 26:24; 1 Korinte 2:1-4) Kunoko, inokholo olupheleleyo kuYehova uThixo, yabhekisela kumathemba angaphambili eyayinawo isithi: “Ndithi, ndizilibala izinto ezisemva, ndisolulela kweziphambili, ndiphuthume ngokoxunele umvuzo wobizo lwaphezulu lukaThixo kuKristu Yesu.” (Filipi 3:13, 14) UPawulos wayezixabisa izinto zokomoya.
Sekunjalo, uPawulos walusebenzisa olo qeqesho lwangaphambili enkonzweni kaYehova. Xa wathetha oku ngamaYuda, “ndiyabangqinela ukuba banokumzondelela uThixo,” wayethetha ngokusuka kumava obuqu. (Roma 10:2) Njengomntu owayeqhelisela ubuFarisi, ngokuqinisekileyo wayenenzondelelo ngoThixo nangeZibhalo. Emva kokuba uPawulos waba ngumKristu, inzondelelo yakhe yalungelelaniswa lulwazi oluchanileyo, yaye imfundo yakhe yangaphambili wayenokuyisebenzisela injongo yobulungisa. Ngokomzekelo, kwincwadi yamaHebhere, wasebenzisa ulwazi olunzulu awayenalo ngembali yamaSirayeli nangonqulo lwasetempileni ekuboniseni ukongama kwenkqubo yobuKristu.
Namhlanje bambi abazizilumko ehlabathini nabo bayasabela kwiindaba ezilungileyo. Abantu abafanelekayo ngazo zonke iindlela kwezemfundo, kwanamalungu azo zonke iindidi zamagcisa namachule, bayamkele inyaniso baza basebenzisa uqeqesho lwabo lwangaphambili enkonzweni kaYehova. Sekunjalo, ingakhathaliseki imfundo yehlabathi anayo, amaKristu akaze alibale ukuba iimfaneleko ezibalulekileyo zezokomoya. Ezi “zizinto eziziincamisa” kuba zinokusikhokelela kubomi obungunaphakade.—Filipi 1:10.