Iintsikelelo ZoBukumkani Zinokuba Zezakho

UMPOSTILE UPAWULOS ongumKristu wayezazi iilwimi ezithile ezaziphambili ngexesha lakhe. Wayefumene imfundo elinganayo neyeyunivesithi yanamhlanje. Wayenandipha zonke iingenelo namalungelo ommi waseRoma. (IZenzo 21:37-40; 22:3, 28) Ezi mfaneleko zazinokumenza abe sisityebi aze adume. Sekunjalo wathi: “Izinto ebeziyinzuzo kum, ndazigqala ziyilahleko ngenxa kaKristu. . . yaye ndizigqala njengenkunkuma eninzi, ukuze ndimzuze uKristu.” (Filipi 3:7, 8) Kwakutheni ukuze uPawulos athethe ngolo hlobo?

UPawulos owayefudula esaziwa njengoSawule waseTarso nanjengomtshutshisi wabo “abangabale Ndlela,” waba likholwa emva kokufumana umbono kaYesu ovusiweyo nozukisiweyo. (IZenzo 9:1-19) KuPawulos, la mava enzeka kwindlela eya eDamasko aqinisekisa ukuba uYesu wayenguMesiya othenjisiweyo, okanye uKristu, umlawuli wexesha elizayo woBukumkani obuthenjisiweyo. Kwakhona aliguqula ngokuphawulekayo ikhondo lobomi likaPawulos, njengokuba kuboniswe ngamazwi anamandla akhankanywe ngasentla. Ngamanye amazwi, uPawulos waguquka ngentliziyo enyanisekileyo.—Galati 1:13-16.

EBhayibhileni, isenzi esithi “guquka” ngokufuthi siguqulelwe ngokusuka kwigama lesiGrike elithetha “emva kokwazi,” ngokwahlukileyo kwelithi “ngaphambi kokwazi.” Ngaloo ndlela, ukuguquka kuquka ukutshintsha ingqondo, isimo sengqondo, okanye injongo kabani, ukulahla iindlela zangaphambili zikabani njengezinganelisiyo. (IZenzo 3:19; ISityhilelo 2:5) UPawulos, akazange ayeke isiganeko esibalulekileyo esenzeka kwindlela eya eDamasko saba ngamava nje abangel’ imincili okanye amava okomoya. Oku kwamenza wabona ukuba indlela ebephila ngayo ngaphambili, yokungamazi uKristu, yayibubuyatha. Kwakhona, waqonda ukuba, ukuze angenelwe kulwazi asandul’ ukulufumana ngoKristu, umele enze okuthile ukuze alungise ikhondo lakhe lobomi.—Roma 2:4; Efese 4:24.

Inguquko Eyazisa Iintsikelelo

Ngaphambili, ulwazi lukaPawulos ngoThixo ubukhulu becala walufumana kubaFarisi, owayelilungu labo. Iinkolelo zabo zaziquka intanda-bulumko nesithethe sabantu. Ngenxa yekhethe lonqulo, inzondelelo nemigudu kaPawulos yayiphosakele. Nangona wayecinga ukuba ukhonza uThixo, eneneni wayesenza ngokunxamnye naye.—Filipi 3:5, 6.

Emva kokufumana ulwazi oluchanileyo ngoKristu nendima yakhe kwinjongo kaThixo, uPawulos wabona ukuba ufanele enze ukhetho: Ngaba ufanele ahlale engumFarisi aze aqhubeke enandipha isikhundla sakhe nendlela ajongwa ngayo njengothile, okanye ufanele atshintshe ubomi bakhe aze aqalise ukwenza nantoni na efunekayo ukuze akholise uThixo? Okuvuyisayo kukuba, uPawulos wenza ukhetho olufanelekileyo, kuba wathi: “Kuba andinazintloni ngazo iindaba ezilungileyo; zona, enyanisweni, zingamandla kaThixo osindiso kuye wonk’ ubani onokholo, kumYuda kuqala kwanakumGrike.” (Roma 1:16) UPawulos waba ngumshumayeli onenzondelelo weendaba ezilungileyo ezingoKristu noBukumkani.

Kwiminyaka emininzi kamva, uPawulos waxelela amaKristu akholwa nawo oku: “Andizigqali njengosele ekuzuzile; kodwa kukho into enye ngako: Ndiyazilibala izinto ezingasemva ndize ndolulele kwizinto ezingaphambili, ndisukela umvuzo wobizo lwaphezulu lukaThixo ngoKristu Yesu.” (Filipi 3:13, 14) UPawulos wangenelwa kwiindaba ezilungileyo kuba wakulungela ukushiya oko kwakumahlukanisa noThixo yaye ngentliziyo yonke waba nosukelo oluvisisana neenjongo zikaThixo.

Yintoni Oya Kuyenza?

Mhlawumbi usandul’ ukuva kutshanje ngeendaba ezilungileyo zoBukumkani. Ngaba ithemba lokuphila ngonaphakade kwiparadesi esemhlabeni libangel’ umdla kuwe? Lifanele libe njalo, kuba sonke sizelwe sinomnqweno wokuphila size sinandiphe ubomi boxolo nonqabiseko. IBhayibhile ithi uThixo ubeke ‘ixesha elingenammiselo’ ezintliziyweni zethu. (INtshumayeli 3:11) Ngoko yimvelo ukuba sibe nethemba laxa abantu benokuphila ngonaphakade ngoxolo nangolonwabo. Yaye iindaba ezilungileyo zoBukumkani zinikela kanye oko.

Noko ke, ukuze elo themba libe yinto yokwenene, umele uphengulule uze ufumanise oko kuthethwa ziindaba ezilungileyo. Umpostile uPawulos wabongoza esithi: ‘Kungqine ngokwakho ukulunga nokwamkeleka nokugqibelela kokuthanda kukaThixo.’ (Roma 12:2) Ngoko, njengoPawulos, emva kokufumana ulwazi nokuqonda, umele wenze ukhetho.

Kwelinye icala, usenokuba sele uneenkolelo ezithile ngokuphathelele ikamva lakho. Khumbula ukuba uSawule wayeneembono zakhe ngokuthanda kukaThixo ngaphambi kokuba abe ngumpostile uPawulos. Kodwa kunokuba ulindele isityhilelo esimangalisayo esivela kuThixo, kutheni ungawujongi ngokunyanisekileyo lo mbandela? Zibuze: ‘Ngaba ngokwenene ndiyakwazi ukuthanda kukaThixo ngokuphathelele uluntu nomhlaba? Bubuphi ubungqina endinabo bokuqinisekisa iinkolelo zam? Ngaba ubungqina endinabo ndinokubuxhasa ngeLizwi likaThixo, iBhayibhile?’ Akukho nto onokuphulukana nayo xa uhlolisisa iinkolelo zakho zonqulo ngale ndlela. Enyanisweni, ufanele ufune ukwenjenjalo kuba iBhayibhile iyasibongoza: “Qinisekani ngezinto zonke; nibambelele nkqi koko kuhle.” (1 Tesalonika 5:21) Ngapha koko, ngaba asikokukholisa uThixo okubalulekileyo?—Yohane 17:3; 1 Timoti 2:3, 4.

Iinkokeli zonqulo zinokusithembisa ikamva elingunaphakade. Kodwa ngaphandle kokuba eso sithembiso sisekelwe kwiimfundiso zeBhayibhile, asinakusinceda ukuze sifumane iintsikelelo zoBukumkani bukaThixo. KwiNtshumayelo yakhe edumileyo yaseNtabeni, ngamandla uYesu walumkisa esithi: “Asingabo bonke abathi kum, ‘Nkosi, Nkosi,’ abaya kungena ebukumkanini bamazulu, kodwa ngulowo wenza ukuthanda kukaBawo osemazulwini oya kungena.”—Mateyu 7:21.

Phawula indlela uYesu agxininisa ngayo ekwenzeni ukuthanda kukaYise njengesibakala sokufumana iintsikelelo zoBukumkani bukaThixo. Ngamany’ amazwi, oko kubonakala ingathi kukuhlonel’ uThixo akuthethi ukuba kuyamkholisa uThixo. Enyanisweni, uYesu waqhubeka esithi: “Abaninzi baya kuthi kum ngaloo mini, ‘Nkosi, Nkosi, asizange na siprofete egameni lakho, sakhupha iidemon egameni lakho, senza imisebenzi emininzi yamandla egameni lakho?’ Ukanti ndiya kwandula ndivume kubo ndithi: Andizange ndinazi! Mkani kum, nina benzi bokuchasene nomthetho.” (Mateyu 7:22, 23) Ngokucacileyo, into ebalulekileyo kukuba siqiniseke ukuba sikuqonda ngokuchanileyo oko iindaba ezilungileyo zoBukumkani zikuko size senze ngokuvisisana nazo.— Mateyu 7:24, 25.

Uncedo Luyafumaneka

Ngaphezu kweminyaka eli-100, amaNgqina kaYehova ebeshumayela iindaba ezilungileyo zoBukumkani bukaThixo. Ngoncwadi olushicilelweyo nangomlomo, anceda abantu ehlabathini lonke ukuba bazuze ulwazi oluchanileyo loko uBukumkani bukuko, iintsikelelo obuza kuzizisa, noko ubani amele akwenze ukuze azuze ezo ntsikelelo.

Siyakukhuthaza ukuba usabele kwisigidimi esishunyayelwa ngamaNgqina kaYehova. Ngokwamkela iindaba ezilungileyo uze uthabathe amanyathelo ayimfuneko, unokufumana iintsikelelo ezininzi kungekuphela ngoku kodwa nakwikamva xa uBukumkani bukaThixo bulawula umhlaba wonke.—1 Timoti 4:8.

Thabatha amanyathelo ngoku, kuba iintsikelelo zoBukumkani bukaThixo zisondele!

[Imifanekiso ekwiphepha 7]

Ngoncwadi olushicilelweyo nangomlomo, amaNgqina kaYehova ashumayela iindaba ezilungileyo zoBukumkani bukaThixo