UYehova Akabekek’ Ityala
“Kunjengokusikwa yimfesane koyise kubantwana, ukusikwa yimfesane kukaYehova kwabamoyikayo. Ngokuba uyakwazi yena ukubunjwa kwethu, ekhumbula ukuba siluthuli.”—INDUMISO 103:13, 14.
1, 2. Wayengubani uAbraham, yaye kwenzeka njani ukuba umtshana wakhe uLote aye kuhlala kwisixeko esingendawo saseSodom?
UYEHOVA akabekek’ ityala ngobunzima esibuvayo ngenxa yeempazamo zethu. Kule nkalo qwalasela oko kwenzeka kwiminyaka enokuba ngama-3 900 eyadlulayo. UAbraham (uAbram) umhlobo kaThixo nomtshana wakhe uLote baphumelela gqitha. (Yakobi 2:23) Enyanisweni, izinto ababenazo nemfuyo yabo zazininzi gqitha ngokokude ‘ilizwe lingabi nakubathwala ukuba bahlale ndawonye.’ Ngaphezu koko, kwabakho ingxabano phakathi kwabelusi bemfuyo yala madoda. (Genesis 13:5-7) Yintoni eyayinokwenziwa ngako oku?
2 Ukuze aphelise le ngxabano, uAbraham wacebisa ukuba kwahlukanwe, yaye wavumela uLote ukuba akhethe kuqala. Nakuba yayinguAbraham omdala ibe kwakuya kuba yinto efanelekileyo ngomtshana wakhe ukumnika owona mmandla mhle, uLote wakhetha owona mmandla mhle—yonke ingingqi enamanzi ekuMazantsi eYordan. Imbonakalo yangaphandle yayikhohlisa, kuba kufutshane naloo mmandla kwakukho isixeko seSodom nesaseGomora ezazingcolile ngokokuziphatha. Ekugqibeleni uLote nentsapho yakhe bafudukela eSodom, yaye oku kwababeka engozini yokomoya. Ngokubhekele phaya, bathinjwa xa uKumkani uKedorlahomere nookumkani ababenaye bamoyisayo umlawuli waseSodom. UAbraham namadoda akhe babakhulula, kodwa uLote nentsapho yakhe babuyela eSodom.—Genesis 13:8-13; 14:4-16.
3, 4. Yintoni eyenzekayo kuLote nakumalungu entsapho yakhe xa uThixo watshabalalisa iSodom neGomora?
3 Ngenxa yoqheliselo lwesini esigqwethekileyo nokuwohloka kokuziphatha kwaseSodom naseGomora, uYehova wagqiba kwelokuba azitshabalalise ezo zixeko. Ngenceba wathumela izithunywa zezulu ezibini ezakhokela uLote, umkakhe neentombi zakhe ukuphuma eSodom. Babengafanele bakhangele emva, kodwa umkaLote wakhangela, mhlawumbi enqwenela izinto eziphathekayo ezazishiyeke ngemva. Ngoko nangoko, waba yintsika yetyuwa.—Genesis 19:1-26.
4 Enjani yona ilahleko uLote neentombi zakhe abayinyamezelayo! La mantombazana kwafuneka eshiye amadoda awayeza kutshata nawo. Ngoku uLote wayephulukene nomkakhe nezinto zakhe eziphathekayo. Enyanisweni, ekugqibeleni wazibona sele epheleliselwe ukuphila emqolombeni neentombi zakhe. (Genesis 19:30-38) Okwakubonakala kulunge gqitha kuye kwangqineka kuyinto eyahluke ngokupheleleyo. Nakuba kubonakala ukuba wenza iimpazamo ezithile ezinzulu, kamva wabizwa ngokuba ‘nguLote olilungisa.’ (2 Petros 2:7, 8) Ibe ngokuqinisekileyo uYehova uThixo wayengabekek’ ityala ngeempazamo zikaLote.
“Iimpazamo—Ngubani Na Onokuziqonda?”
5. UDavide wavakalelwa njani ngeempazamo nokuzikhukhumalisa?
5 Ekubeni singafezekanga yaye sinesono, sonke siyazenza iimpazamo. (Roma 5:12; Yakobi 3:2) NjengoLote, sisenokukhohliswa yinkangeleko yangaphandle yaye sinokuphazama ekwenzeni isigqibo. Ngaloo ndlela, umdumisi uDavide wabongoza: “Ukulahleka [“iimpazamo,” NW], ngubani na okuqondayo? Ndenze msulwa kokusitheleyo. Kwanasekukhukhumaleni mnqande umkhonzi wakho; makungandilawuli; ukuze ndandule ukuba ngogqibeleleyo, ndibe msulwa ekukreqeni okukhulu.” (INdumiso 19:12, 13) UDavide wayesazi ukuba wayenokwenza izono awayesenokuba wayengazazi kwaukuzazi. Ngenxa yoko, wacela ukuba axolelwe izikreqo ezazisenokuba zifihlakele kwanakuye. Xa wenza impazamo enzulu ngenxa yokuba inyama yakhe engafezekanga yayimqhubela ekuthabatheni ikhondo eliphosakeleyo, wayelunqwenela ngamandla uncedo lukaYehova. Wayefuna ukuba uThixo amnqande kwizenzo zokukhukhumala. UDavide akazange afune ukulawulwa kukukhukhumala. Kunoko, wanqwenela ukuba agqibelele ekuzinikeleni kwakhe kuYehova uThixo.
6. Inokusithuthuzela njani INdumiso 103:10-14?
6 Njengabakhonzi bakaYehova banamhlanje abazahluleleyo, nathi asifezekanga ibe ngenxa yoko senza iimpazamo. Ngokomzekelo, njengoLote, sinokwenza ukhetho olubi ngokuphathelele indawo yethu yokuhlala. Mhlawumbi silityeshele ithuba lokwandisa inkonzo yethu engcwele kuThixo. Nangona uYehova ezibona iimpazamo ezinjalo, uyabazi abo banentliziyo etyekele ebulungiseni. Nokuba sona ngokunzulu kodwa siguquke, uYehova uyasixolela aze asincede yaye uyaqhubeka esigqala njengabantu abahlonela uThixo. UDavide wathi: “Akenzi kuthi ngokwezono zethu, akasiphathi ngokobugwenxa bethu, ngokuba injengokuphakama kwezulu phezu komhlaba, ukuba namandla, inceba yakhe kwabamoyikayo; kunjengokuba kude kwempumalanga entshonalanga, ukulukhwelelisa kwakhe kuthi ukreqo lwethu; kunjengokusikwa yimfesane koyise kubantwana, ukusikwa yimfesane kukaYehova kwabamoyikayo. Ngokuba uyakwazi yena ukubunjwa kwethu, ekhumbula ukuba siluthuli.” (INdumiso 103:10-14) Kwakhona uBawo wethu wasezulwini onenceba usenza sikwazi ukuzilungisa iziphoso zethu okanye usenokusinika elinye ithuba lokwandisa inkonzo yethu engcwele, ukuze kudunyiswe yena.
Impazamo Yokumbek’ Ityala UThixo
7. Kutheni sithwaxwa zizinto ezinzima?
7 Xa izinto zingabahambeli kakuhle, abantu batyekele ekubekeni ityala komnye umntu okanye kwinto ethile. Bambi bade balibeke kuThixo ityala. Kodwa uYehova akabangeli bunzima bunjalo ebantwini. Wenza izinto ezilungileyo, kungekhona ezimbi. Ewe, “ilanga lakhe [ulenza] liphume phezu kwabakhohlakeleyo nabalungileyo; nemvula eyinisa phezu kwabalungisayo nabangalungisiyo”! (Mateyu 5:45) Isizathu esiyintloko sokuba sithwaxwe zizinto ezinzima sikukuba siphila kwihlabathi elisebenza ngemigaqo yokuzingca nelisemandleni kaSathana uMtyholi.—1 Yohane 5:19.
8. Wenza ntoni uAdam xa izinto zazingamhambeli kakuhle?
8 Akubobulumko yaye kuyingozi ukubek’ ityala uYehova uThixo ngobunzima obubangelwa ziimpazamo zethu. Ukwenjenjalo kusenokusiphulukanisa kwanobomi bethu. Umntu wokuqala, uAdam, wayefanele amncome uThixo ngazo zonke izinto ezilungileyo awayezifumana. Ewe, uAdam wayefanele ambulele gqitha uYehova ngobomi nangeentsikelelo awayezinandipha kwikhaya elifana nepaki, umyezo wase-Eden. (Genesis 2:7-9) Wenza ntoni uAdam xa izinto zazingamhambeli kakuhle kuba engamthobelanga uYehova waza watya isiqhamo esalelweyo? UAdam wamkhalazela uThixo esithi: “Umfazi owandinikayo ukuba abe nam, nguye ondinikileyo kuwo umthi, ndadla ke.” (Genesis 2:15-17; 3:1-12) Ngokuqinisekileyo, asifanele simbek’ ityala uYehova, njengoko uAdam wenzayo.
9. (a) Ukuba sitsala nzima ngenxa yokuba singenzanga ngabulumko, yintoni enokusithuthuzela? (b) Ngokutsho kweMizekeliso 19:3, yintoni abanye abayenzayo xa bezizisela ubunzima?
9 Ukuba sitsala nzima ngenxa yokuba singenzanga ngabulumko, sinokuthuthuzeleka kukwazi ukuba uYehova ubuqonda ubuthathaka bethu ngaphezu kokuba thina sibuqonda yaye uya kusihlangula ekubandezelekeni kwethu ukuba sizinikela ngokupheleleyo kuye. Sifanele siluxabise uncedo lukaThixo esilufumanayo, singaze simbek’ ityala uThixo ngeenkxwaleko nobunzima esizizisela bona. Kule nkalo umzekeliso wobulumko uthi: “Ukumatha komntu kuphenula indlela yakhe; ijalele uYehova intliziyo yakhe.” (IMizekeliso 19:3) Enye inguqulelo ithi: “Abanye abantu bayazonakalisa ngezenzo zabo zobudenge baze bayibek’ ityala INKOSI.” (Today’s English Version) Sekunjalo enye inguqulelo ithi: “Ukungakhathali komntu kuyazonakalisa izinto zakhe aze afuthekele uYehova.”—Byington.
10. Ubudenge buka-Adam ‘bayiphenula njani indlela yakhe’?
10 Ngokuvumelana nomgaqo walo mzekeliso, uAdam wenza ngokuzingca yaye ukucinga kwakhe kobudenge ‘kwayiphenula indlela yakhe.’ Intliziyo yakhe yemka kuYehova uThixo, yaye waqhubeka nenyathelo lakhe lokuzingca nelokuzimela geqe. Ewe, uAdam akazange abe nambulelo kangangokuba wambek’ ityala uMdali wakhe waba ngaloo ndlela uzenza utshaba lOsenyangweni! Isono sika-Adam sayonakalisa indlela yakhe neyentsapho yakhe. Esinjani sona isilumkiso esisifumanayo apha! Abo batyekele ekumbekeni ityala uYehova ngenxa yeemeko ezinganqwenelekiyo basenokwenza kakuhle ukuzibuza oku: Ngaba ndiyamncoma uThixo ngezinto ezintle endizinandiphayo? Ngaba ndiyambulela kuba ndinobomi njengesinye sezidalwa zakhe? Ngaba kunokwenzeka ukuba ziimpazamo zam ezindizisela ubunzima? Ngaba ndiyafaneleka ukuba uYehova angakholiswa ndim ngenxa yokulandela ukhokelo lwakhe, njengoko lwandlalwe eLizwini lakhe, iBhayibhile?
Ingozi Kwanakubakhonzi BakaThixo
11. Ngokuphathelele uThixo, yintoni iinkokeli zonqulo ezingamaYuda zenkulungwane yokuqala ezazinetyala layo?
11 Iinkokeli zonqulo ezingamaYuda zenkulungwane yokuqala yeXesha lethu Eliqhelekileyo zazizibanga zikhonza uThixo kodwa zalityeshela ilizwi lakhe lenyaniso zaza zayama ngokwazo ukuqonda. (Mateyu 15:8, 9) Ngenxa yokuba uYesu Kristu wabhenca ukucinga kwazo phosakeleyo, zambulala. Kamva, zabonakalisa umsindo omkhulu ngakubafundi bakhe. (IZenzo 7:54-60) Indlela yala madoda yayonakele kangangokuba amqumbela uYehova.—Thelekisa IZenzo 5:34, 38, 39.
12. Nguwuphi umzekelo obonisa ukuba kwanabathile abanxulumene nebandla lamaKristu bazama ukumbek’ ityala uYehova ngenxa yobunzima ababufumanayo?
12 Kwanabantu abathile kwibandla lamaKristu baye baziqhelisa ukucinga ngendlela eyingozi, bezama ukumbek’ ityala uThixo ngobunzima abaye babufumana. Ngokomzekelo, kwelinye ibandla abadala bafumisa kuyimfuneko ukuba ngobubele kodwa ngokungqongqo baluleke ngeZibhalo ibhinqa elithile eliselula elitshatileyo elalinxulumana nendoda yehlabathi. Ebudeni benye ingxubusho ababenayo, eli bhinqa lambek’ ityala uThixo ngokungalincedi limelane nesilingo elasiziselwa kukuqhubeka linxulumana nale ndoda. Eneneni lathi lalingafuni nokuva nto ngoThixo! Ukuqiqa ngezibhalo nemigudu ephindaphindiweyo yokulinceda yatsho phantsi, yaye kamva ikhondo lokuziphatha okubi lalikhokelela ekugxothweni kwibandla lamaKristu.
13. Kutheni simele sisiphephe isimo sengqondo sokukhalaza?
13 Umoya wokukhalaza unokumkhokelela umntu ekumbekeni ityala uYehova. “Abangahloneli Thixo” abangena kwibandla lenkulungwane yokuqala babenomoya ombi onjengalowo, yaye wawuhamba nezinye iindlela zokucinga okonakeleyo ngokomoya. Kunjengokuba umfundi uYuda wathi, aba bantu ‘babelujika ubabalo lukaThixo wethu balwenze into yokusithelisa ihambo yabo ephosakeleyo yaye bemkhanyela okuphela koMnini neNkosi yethu, uYesu Kristu.’ Kwakhona uYuda wathi: “Aba ngabakrokri abasolayo, behamba ngokweenkanuko zabo.” (Yuda 3, 4, 16, NW) Abakhonzi abanyanisekileyo bakaYehova banomoya woxabiso, kungekhona isimo sengqondo sokukhalaza esinokuthi ekugqibeleni sibenze buhlungu ukusa kwinqanaba lokuba baphulukane nokholo kuThixo baze balonakalise ulwalamano lwabo naye.
14. Ubani usenokusabela njani xa oniwe ngumKristu akhonza kunye naye, kodwa kutheni oku kungayi kuba likhondo elifanelekileyo?
14 Usenokuvakalelwa kukuba oku akusayi kwenzeka kuwe. Sekunjalo, izinto ezingahambi kakuhle ngenxa yeempazamo zethu okanye ezabanye zisenokuthi ekugqibeleni zisibangele simbek’ ityala uThixo. Ngokomzekelo, umntu usenokucatshukiswa koko kuthethwa okanye kwenziwa ngothile okholwa kunye naye. Ngoko lowo woniweyo—mhlawumbi lowo ubekhonza uYehova kangangeminyaka emininzi—usenokuthi: ‘Esekho loo mntu ebandleni, andizukuya kwiintlanganiso.’ Umntu usenokucaphuka kangangokuba unokuthi entliziyweni yakhe: ‘Ukuba kuqhubeka izinto ezinjengezi, andifuni ukuba yinxalenye yebandla.’ Kodwa ngaba umKristu ufanele abe nesimo sengqondo esinjalo? Ukuba ucatshukiswe ngomnye umntu ongafezekanga, kutheni uqumbela lonke ibandla labantu abamkelekileyo kuThixo nabamkhonza ngokunyaniseka? Kutheni umntu ozahluleleyo kuYehova eyeka ukwenza ukuthanda kukaThixo aze ngaloo ndlela aqumbele uThixo? Kububulumko kangakanani ukuvumela umntu okanye iimeko ezithile ziluphelise ulwalamano oluhle lukabani noYehova? Ngokuqinisekileyo, kuya kuba bubudenge nesono ukuyeka ukunqula uYehova uThixo ngaso nasiphi na isizathu.—Yakobi 4:17.
15, 16. UDiyotrefe wayenetyala lantoni, kodwa waziphatha njani uGayo?
15 Zithelekelele ukwibandla elinye nomKristu onothando uGayo. ‘Wayesenza okuthembekileyo’ ekubonakaliseni ukubuk’ iindwendwe kubantu awayenqula nabo ababemtyelela—kungakhathaliseki nokuba akabazi! Kodwa kubonakala ukuba kwakwibandla elinye, kwakukho indoda eyayizikhukhumalisa egama linguDiyotrefe. Wayengayamkeli ngentlonelo nayiphi na into eyayisuka kuYohane, omnye wabapostile bakaYesu Kristu. Enyanisweni, uDiyotrefe wade wathetha amazwi angendawo ngoYohane. Lo mpostile wathi: “Enganeli koko, [uDiyotrefe] usuka angabamkeli abazalwana bakhe ngokwakhe, abalele abanga bangenjenjalo, abakhuphe ebandleni.”—3 Yohane 1, 5-10.
16 Xa uYohane wayefika kwelo bandla, wayefuna ukukhumbula oko uDiyotrefe wayekwenza. Ngelo xesha, uGayo namanye amaKristu abuk’ iindwendwe awayekwelo bandla asabela njani? Akukho nanye ingxelo engokweZibhalo ebonisa ukuba omnye wabo wathi: ‘Ngoxa nje uDiyotrefe esebandleni, andifuni ukuba yinxalenye yalo. Akusayi kundibona kwiintlanganiso.’ Ngokungathandabuzekiyo uGayo nabanye bema beqinile. Abazange bavumele nayiphi na into ukuba ibayekise ukwenza ukuthanda kukaThixo, yaye ngokuqinisekileyo abazange bamqumbele uYehova. Ngokwenene abazange benjenjalo, yaye abazange banikezele kumacebo achuliweyo kaSathana uMtyholi, owayeya kuvuya ukuba babengathembekanga kuYehova baza bambek’ ityala uThixo.—Efese 6:10-18.
Ungaze Umqumbele UYehova!
17. Sifanele senze ntoni ukuba sicatshukiswa okanye asikholiswa ngumntu okanye yimeko ethile?
17 Nokuba umkhonzi kaThixo uye akakholiswa okanye wacatshukiswa ngumntu okanye yimeko ethile ebandleni, ngokwenene lowo ucaphukayo uya kuba uyayonakalisa indlela yakhe ukuba uyayeka ukunxulumana nabantu bakaYehova. Umntu onjalo akayi kuba uwasebenzisa kakuhle amandla akhe engqiqo. (Hebhere 5:14, NW) Ngoko zimisele ukujamelana nazo zonke iimeko ezilingayo njengomgcini wengqibelelo. Hlala unyanisekile kuYehova uThixo, kuYesu Kristu nakwibandla lamaKristu. (Hebhere 10:24, 25) Ayikho enye indawo enokufunyanwa kuyo inyaniso ekhokelela kubomi obungunaphakade.
18. Nangona singasoloko siziqonda iinkqubano zikaThixo, yintoni esinokuqiniseka ngayo ngokuphathelele uYehova uThixo?
18 Kwakhona, khumbula ukuba uYehova akaze alinge nabani na ngezinto ezimbi. (Yakobi 1:13) UThixo, osisimntwiso sothando, wenza okulungileyo, ingakumbi kwabo bamthandayo. (1 Yohane 4:8) Nangona singasoloko siziqonda iinkqubano zikaThixo, sinokuba nentembelo yokuba uYehova uThixo akasayi kuze asilele ukwenzela abakhonzi bakhe okona kulungileyo. Kunjengokuba uPetros watshoyo: “Zithobeni ngoko ngaphantsi kwesandla esinamandla sikaThixo, ukuze aniphakamise ngexesha elifanelekileyo. Lonke ixhala lenu liphoseni phezu kwakhe, ngokuba yena enikhathalele.” (1 Petros 5:6, 7) Ewe, uYehova ubakhathalele ngokwenene abantu bakhe.—INdumiso 94:14.
19, 20. Sifanele senze ntoni, kwanokuba maxa wambi izilingo zethu ziyasidandathekisa?
19 Ngoko ke, ungavumeli nantoni na okanye umntu akukhubekise. Kunjengokuba umdumisi wathetha ngokufanelekileyo la mazwi, “banoxolo olukhulu abawuthandayo umyalelo [kaYehova uThixo]; akukho sikhubekiso kubo.” (INdumiso 119:165) Sonke siyazifumana izilingo, yaye maxa wambi ezi zisenokusibangela sizive sidandathekile yaye sibuhlungu. Kodwa ungaze uvumele ubukrakra bukhule entliziyweni yakho, ngokukodwa ngokunxamnye noYehova. (IMizekeliso 4:23) Ngoncedo lwakhe nangokusekelwe eZibhalweni, zisingathe iingxaki onokuzicombulula uze uzinyamezele ezo zizingisayo.—Mateyu 18:15-17; Efese 4:26, 27.
20 Ungaze uyekele iimvakalelo zakho zikubangele ukuba wenze ngobudenge uze ngaloo ndlela uyonakalise indlela yakho. Thetha uze wenze izinto ngendlela eya kuvuyisa intliziyo kaThixo. (IMizekeliso 27:11) Yiya kuYehova ngomthandazo onyanisekileyo, usazi ukuba ukukhathalele ngokwenene njengomnye wabakhonzi bakhe yaye uya kukunika ukuqonda okufunekayo ukuze uhlale usendleleni yobomi kunye nabantu bakhe. (IMizekeliso 3:5, 6) Ngaphezu koko, ungamqumbeli uThixo. Xa izinto zingakuhambeli kakuhle, hlala ukhumbula ukuba uYehova akabekek’ ityala.
Unokuphendula Njani?
◻ Yiyiphi impazamo uLote awayenzayo, kodwa uThixo wamgqala njani?
◻ UDavide wavakalelwa njani ngeempazamo nokuzikhukhumalisa?
◻ Xa izinto zingasihambeli kakuhle, kutheni singafanele simbek’ ityala uThixo?
◻ Yintoni eya kusinceda ukuba siphephe ukuqumbela uYehova?
[Umfanekiso okwiphepha 15]
Xa wayesahlukana noAbraham, uLote wenza ukhetho olubi ngokuphathelele indawo yakhe yokuhlala