IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w93 1/1 iphe. 5-8
  • Ukuzalwa Kwezidalwa Ezitsha!

No video available for this selection.

Sorry, there was an error loading the video.

  • Ukuzalwa Kwezidalwa Ezitsha!
  • IMboniselo Evakalisa UBukumkani BukaYehova—1993
  • Imixholwana
  • Amanqaku Afanayo
  • Indalo ‘Yamazulu Amatsha Nomhlaba Omtsha’
  • Indlela Aqalisa Ngayo “Amazulu Amatsha Nehlabathi Elitsha”
    Ukusindela Kumhlaba Omtsha
  • Ukwenza Izinto Zonke Zibe Ntsha
    IMboniselo Evakalisa UBukumkani BukaYehova—1987
  • Izulu Elitsha Nomhlaba Omtsha
    ISityhilelo—Incopho Yaso Ezukileyo Isondele!
  • Ukwenza Ntsha Zonke Izinto—Njengoko Kwaxelwa Kwangaphambili
    IMboniselo Evakalisa UBukumkani BukaYehova—2000
Khangela Okunye
IMboniselo Evakalisa UBukumkani BukaYehova—1993
w93 1/1 iphe. 5-8

Ukuzalwa Kwezidalwa Ezitsha!

UKUMKANI uSolomon osisilumko wakha wathi: “Akukho nto intsha phantsi kwelanga.” (INtshumayeli 1:9) Oku kuyinyaniso ngehlabathi lokoqobo esihlala kulo, kodwa kuthekani ngommandla omkhulu wendalo yokomoya kaYehova? Kuloo mmandla, lowo umkhulu kunoSolomon, eneneni, owayengoyena mntu ubalaseleyo wakha waphila, waba sisidalwa esitsha esibalaseleyo. Kwenzeka njani oku?

Ngonyaka wama-29 weXesha lethu Eliqhelekileyo, umntu ofezekileyo, uYesu, wazinikezela ukuba abhaptizwe nguYohane kuMlambo iYordan. “Ebhaptiziwe ke uYesu, wenyuka kwaoko emanzini; asuka amazulu avuleka kuye, wambona uMoya kaThixo esihla njengehobe, esiza phezu kwakhe. Nalo izwi liphuma ezulwini, lisithi, Lo nguNyana wam oyintanda, endikholisiweyo nguye.” (Mateyu 3:16, 17) Ngaloo ndlela, umntu onguKristu Yesu waba ngowokuqala kwizidalwa ezitsha, owathanjiselwa ukwenza ukuthanda kukaThixo. Kamva, ngesizinzi sokufa kwakhe njengedini, uYesu waba nguMlamleli womnqophiso omtsha phakathi kukaThixo neqela labantu abakhethiweyo. Ngamnye waba uye waba ‘sisidalwa esitsha,’ ngokuthi ngomoya kaThixo azalelwe kwithemba lasezulwini, enethemba lokulawula noYesu kuBukumkani bakhe basezulwini.—2 Korinte 5:17; 1 Timoti 2:5, 6; Hebhere 9:15.

Ebudeni beenkulungwane, aba bathanjiswa, bangamaKristu azelwe ngomoya baye bahlanganiswa noKristu njengebandla lokwenyaniso lamaKristu, elisisidalwa esitsha. UThixo walinyula apha kweli hlabathi ngenjongo, njengokuba umpostile uPetros esithi: “Nina nisisizukulwana esinyuliweyo, isibingeleli esibukumkani, uhlanga olungcwele, abantu abayinqobo, ukuze nivakalise isidima salowo wanibizayo ukuba niphume ebumnyameni, ningene ekukhanyeni kwakhe okungummangaliso.” (1 Petros 2:9) NjengoKristu Yesu isidalwa esitsha sikaThixo sokuqala, ezi zidalwa zitsha zivele kamva zinembopheleleko eyintloko yokushumayela iindaba ezilungileyo. (Luka 4:18, 19) Lungu ngalinye, ekuthi xa edibene onke abe li-144 000, limele ‘lambathe umntu omtsha, othe ngokukaThixo wadalelwa ebulungiseni, nasebungcweleni benyaniso.’ (Efese 4:24; ISityhilelo 14:1, 3) Oku kufuna ukuba lihlakulele ‘iziqhamo zomoya,’ ezichazwe kweyabaseGalati 5:22, 23, lize ngokuthembeka linyamekele ubugosa balo.—1 Korinte 4:2; 9:16.

Kuthekani ngesi sidalwa sitsha kumaxesha angoku? Ngonyaka we-1914, njengokuba ubalo-maxesha lweBhayibhile lubonisa, amazwi akwiSityhilelo 11:15 azaliseka: “Izikumkani zehlabathi zithe zaba zezeNkosi yethu [uYehova] nezikaKristu wayo. Wayeya kuba nguKumkani kuse emaphakadeni asemaphakadeni.” Isenzo sokuqala sikaKristu njengoKumkani osandul’ ukumiselwa sasiya kuba kukukhupha uSathana nezithunywa zakhe eziziidemon ezulwini eziphosela kummandla wasemhlabeni. Oku kwazisa ‘uyeha emhlabeni,’ ngemfazwe yehlabathi yokuqala namalandela ayo abangela unxunguphalo.—ISityhilelo 12:9, 12, 17.

Oku kwasebenza njengesaziso kwizidalwa ezitsha ezisasele emhlabeni sokuba zimele zibe nesabelo ekuzalisekiseni isiprofeto sikaYesu: “Ezi ndaba zilungileyo zobukumkani [obumiselweyo] ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.” Kuyintoni oko “kuphela”? UYesu uhlabela mgama ecacisa esithi: “Kuya kubakho imbandezelo enkulu, ekungazanga kubekho injalo kwasekuqalekeni kwehlabathi, kwada kwaba kalokunje, ekungasayi kubuye kubekho injalo. Kanjalo ukuba ibingayi kuthi loo mihla inqanyulelwe, bekungayi kubakho nyama isindayo; ngenxa ke yabanyuliweyo, loo mihla iya kunqanyulelwa.”—Mateyu 24:3-14, 21, 22.

Umoya kaYehova washukumisela abo bathanjiswa abazizidalwa zakhe ezitsha ukuba baxakeke kowona msebenzi mkhulu wokushumayela owawuza kwenziwa kulo mhlaba. Ukususela kumawaka ambalwa ngowe-1919, inani laba bavakalisi boBukumkani abanenzondelelo lanyuka laya kufikelela kuma-50 000 phakathi kwiminyaka yee-1930. Njengokuba kwakuprofetiwe, “intlokoma yabo yaphuma, yaya kulo lonke ihlabathi, namazwi abo aya eziphelweni zelimiweyo.”—Roma 10:18.

Ngaba abasaseleyo bezidalwa ezitsha ngabo kuphela abahlanganiselwa usindiso? Akunjalo, kuba isiprofeto sachaza ukuba izithunywa zikaThixo zaziya kuyibamba imimoya yembandezelo enkulu de kugqitywe ukuhlanganiswa kungekuphela koSirayeli wokomoya osezulwini kodwa kwanabanye, “isihlwele esikhulu, ebekungekho namnye unako ukusibala, siphuma kuzo zonke iintlanga, nezizwe, nabantu, neelwimi.” Sasiya kuphelela phi? Kaloku, sasiya kuphuma singenawo nomkrwelo “embandezelweni enkulu” ukuze sinandiphe ubomi obungunaphakade kumhlaba oyiparadisi!—ISityhilelo 7:1-4, 9, 14.

Okuvuyisayo kukuba esi sihlwele sikhulu, esihlanganiswe kumazwe angama-229, siye sanda sangamaNgqina akhutheleyo anokuba zizi-4 500 000. Abangakumbi bayeza, njengokuba kuboniswa ngabantu abali-11 431 171 ababezile kwiSikhumbuzo sokufa kukaYesu ngoApril 17 nyakenye. Kuzo zonke ezi zigidi, kuphela bangama-8 683, abazibanga njengabasaseleyo emhlabeni kwizidalwa ezitsha, abathabathileyo kwimifuziselo yeSikhumbuzo. Aba bakweli qela lincinane bebengasokuze, bebodwa, bawufeze umsebenzi omkhulu wokushumayela namhlanje. Izigidi ezibumba isihlwele esikhulu ngoku zisebenza ngaxhatha linye kunye nabo ekwenzeni lo msebenzi. (Zefaniya 3:9) Ngaphezu koko, amalungu aqeqeshwe kakuhle esihlwele esikhulu ngoku enza imisebenzi yokwalathisa neminye ebalulekileyo kunye neQumrhu Elilawulayo elithanjisiweyo loSirayeli wokomoya, kanye njengokuba amaNethini angengomaSirayeli asebenza nababingeleli ekulungiseni iindonga zaseYerusalem.—Nehemiya 3:22:-26.

Indalo ‘Yamazulu Amatsha Nomhlaba Omtsha’

Olunjani lona uvuyo oluphelekwa koku kuhlanganisa! Lunjengokuba kanye uYehova wathi lwaluya kuba njalo: “Niyabona, ndidala amazulu amatsha nehlabathi elitsha; angakhunjulwa awokuqala, angenyuki athi qatha entliziyweni. Hayi, yibani nemihlali, nigcobe nanini yiloo nto ndiyidalayo; ngokuba, yabonani, ndiyayidala iYerusalem ukuba igcobe, nabantu bayo ukuba babe nemihlali. Ndiya kugcoba ngeYerusalem, ndibe nemihlali ngabantu bam, lingabi savakala khona ilizwi lokulila nelizwi lokukhala.” (Isaya 65:17-19) Amazulu amatsha endalo kaYehova ekugqibeleni aya kubunjwa nguKristu Yesu namalungu ezidalwa ezitsha avusiweyo ali-144 000 aye athengwa ebantwini kwiinkulungwane ezili-19 ezidluleyo. La mazulu azuke ngakumbi kunaye nawuphi na urhulumnte wasemhlabeni owawulawula kwiYerusalem yokoqobo, kwanalowo womhla kaSolomon. Aquka iYerusalem Entsha, isixeko sasezulwini, ekuchazwe ubuhle baso obuzukileyo kwiSityhilelo isahluko 21.

IYerusalem Entsha ingumtshakazi wokomoya kaKristu, abalandeli bakhe abathanjisiweyo abali-144 000, abathelela uMyeni ezulwini emva kokufa kwabo nasemva kokuvuswa kwabo njengezidalwa zokomoya. KwiSityhilelo 21:1-4 bachazwe ‘njengabehla bevela kuThixo,’ oko kukuthi, besetyenziswa nguye ekuziseni iintsikelelo kuluntu apha emhlabeni. Ngale ndlela kuzaliseka esi siprofeto: “Yabona, umnquba lo kaThixo unabantu; uya kuhlala nabo emnqubeni, bona babe ngabantu bakhe, enguThixo wabo; azisule uThixo zonke iinyembezi emehlweni abo, kungabi sabakho kufa, kungabi sabakho nasijwili nakukhala, nantlungu; ngokuba izinto zokuqala zigqithile.”

Hayi indlela esinokuba nombulelo ngayo ngendalo kaThixo yamazulu amatsha! Ngokungafaniyo nolawulo oludlulayo, nolunganyanisekanga oluye kangangexesha elide lwanxunguphalisa uluntu, eli lungiselelo lorhulumente kaThixo liya kuhlala ngokusisigxina. Izidalwa ezitsha nenzala yazo yokomoya, isihlwele esikhulu, ziyavuyiswa sisithembiso sikaThixo esihlabela mgama sisithi: “Kuba njengoko amazulu amatsha nehlabathi elitsha endiza kuwenza, amiyo phambi kwam, utsho uYehova, iya kwenjenjalo ukuma imbewu yenu negama lenu.”—Isaya 66:22.

“Umhlaba omtsha” uqalisa ngale nzala yabathanjiswa bezidalwa ezitsha. Libutho loluntu elitsha eloyika uThixo emhlabeni. Intiyo, ulwaphulo-mthetho, ukunganyaniseki nokuziphatha okubi kwebutho labantu lanamhlanje ngokuqinisekileyo kugxininisa imfuneko yehlabathi elitsha elahluke ngokupheleleyo, eliphantsi kolwalathiso lwamazulu amatsha anolwazelelelo. Oko koko kuyinjongo kaYehova. Kanye njengokuba edale amazulu amatsha, ngoku udala umhlaba omtsha, ehlanganisa isihlwele esikhulu njengesiseko sebutho labantu behlabathi elitsha elinoxolo. Leli butho kuphela eliya kuphumela liphila “embandezelweni enkulu.”—ISityhilelo 7:14.

Yintoni esinokuyilindela emva kwembandezelo enkulu? Ethetha nabapostile bakhe, abokuqala kwabo babumba amazulu amatsha aya kulawula umhlaba omtsha, uYesu wathembisa oku: “Inene, ndithi kuni, nina nindilandelayo, ekuzalweni okutsha, xa athe wahlala uNyana woMntu phezu kwetrone yozuko lwakhe, niya kuhlala nani phezu kweetrone ezilishumi elinambini.” (Mateyu 19:28) Bonke abali-144 000 bale Yerusalem Intsha baya kuba nesabelo noYesu ekugwebeni uluntu. Luya kwandula uthando luthabathel’ indawo ukuzingca nentiyo njengesiseko ekuya kwakhelwa phezu kwaso ibutho labantu. Iingxaki zezithethe, zobuhlanga nezobuzwe ziya kube zisusiwe. Uvuko luya kubuyisa abathandekayo ngokuthe ngcembe. Uluntu oluthembekileyo lungamawaka ezigidi luya kuba yintsapho enye enkulu nemanyeneyo, ephakanyiselwe ubomi obungunaphakade kumhlaba oguqulelwe kwiparadisi.

Oku kuya kuba ngaphezulu kuneLatakisa okanye kuneMalandalahla. Iya kuba yindalo eya kuhlala ngokusisigxina—‘izulu elitsha, nomtsha umhlaba, esiwulindeleyo, apho kumi ubulungisa.’! (2 Petros 3:13) Ngokuqinisekileyo, eli lithemba elimangalisayo, ithemba elizukileyo lalowo wathi, “Uyabona, izinto zonke ndizenza ntsha” nowongezelela le ngxelo yomeleza ukholo esithi: “Lawo ngamazwi ayinyaniso, athembekileyo.”—ISityhilelo 21:5.

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share