Ukwenza Izinto Zonke Zibe Ntsha
“Lowo uhleli phezu kwetrone wathi, Uyabona, izinto zonke ndizenza ntsha. Athi kum, Bhala; ngokuba lawo ngamazwi ayinyaniso, athembekileyo.”—ISITYHILELO 21:5.
1, 2. (a) Nguwuphi umbuzo awawubuzayo uSolomon kwiminyaka engamawaka amathathu eyadlulayo? (b) Namhlanje yintoni ebonakala ichasene namazwi kaSolomon?
“AKUKHO nto intsha phantsi kwelanga.” Lawo ngamazwi oKumkani uSolomon owayesisilumko. Eqhubeka, wabuza wathi: “Kukho nto intsha na ekunokuthiwa, ‘Yabona, le intsha’?” (INtshumayeli 1:9, 10, NW) Besingawuphendula njani loo mbuzo namhlanje?
2 Ayithanga na inzululwazi nobugcisa bayo yezisa izinto ezininzi ezintsha ebudeni bale nkulungwane yama-20? Khangela nje kwicala lezithuthi, iinqwelomoya ezizii-jet, iinqwelo-mafutha ezinamandla kakhulu noololiwe abaphaphathekayo. Ibe kukho uhambelo-phambili olumangalisayo kwizinto zonxibelelwano, ukusetyenziswa kweesatellites ezijikelezayo, nokuthunyelwa kweziphekepheke ezithe ngokoqobo zenza ukuba abantu babeke imicondo yabo enyangeni. Yaye kuthekani ngezinto zale mihla ezisetyenziswa kwigumbi lokuphekela, izibandisi noomatshini bokuhlamba abahombisa amakhaya amaninzi kangaka? Bambi abantu basenokutyekela ekuthini, ‘Yonk’ into intsha phantsi kwelanga!’
3. Yiyiphi imeko eyothusayo eye yabonakala apha “phantsi kwelanga”? (Luka 21:25, 26; INdumiso 53:1)
3 Kodwa khawume nje kancinane! Kukwakho into eyoyikekayo, ephazamisa gqitha, ekumele ibonwe phantsi kwelanga. Yintoni leyo? Ewe, umhlaba uye waba yikampu ezele zizixhobo! Oku kwaqala ngowe-1914 xa kwathi kwaqhambuka iMfazwe Yehlabathi I. Okwesihlandlo sokuqala, oombayimbayi, iinqwelo-moya, iitanki neenkwili zasetyenziswa emfazweni. Kwithuba elingaphantsi kweminyaka engama-30 kwalandela iMfazwe Yehlabathi II. Amandla ayo okutshabalalisa ubomi nezinto ayewaphindaphinda kane awemfazwe yehlabathi yokuqala. Kuye kwasetyenziswa ngendlela eyothusayo kwanezixhobo ezibulala ngakumbi—izithuli malangatye, iibhombu zepetroli, yaye ekugqibeleni ibhombu yeathom—eyatshayelela izixhobo zenyukliya zobudemon ngoku ezisongela kanye ukuphila koluntu apha emhlabeni.
4. (a) USolomon wayebhekisela kuyiphi inxalenye yezinto ezisemhlabeni xa wayesithi “akukho nto intsha”? (b) Ubulumko nothando lukaThixo bubonakala njani koko akwenzileyo noko asaya kukwenza “phantsi kwelanga”?
4 Ngaba ngokwenyaniso singatsho ke ukuthi “akukho nto intsha phantsi kwelanga”? Ewe, sinokutsho, kuba zonke ezi zinto zivelisiweyo ziyinxalenye yezinto ezisehlabathini obeluhleli luphila kuzo uluntu. Naxa abantu beqhushumbisa izinto ezenziwe ngehydrogen, oko akunto intsha. Amandla ehydrogen ebeqhubeka elangeni kangangamawaka ezigidi zeminyaka. Oku kungumthombo wamandla azingisileyo elangatye elikhanyisayo, elifudumezayo, nelihlaziyayo emhlabeni wethu. Ukukhanya okuvela elangeni kukwasebenziselana nechlorophyll ekwizityalo eziluhlaza, kusakha iiswekile nestarch ezingumthombo osisiseko wokudla kwinyambalala yezinto eziphilayo ezisingqongileyo. Hayi indlela esinokuba nombulelo ngayo kuba uMdali womhlaba olumke konke walungiselela amandla enyukliya anokulawulwa nanokuvulelwa ngokuyingenelo kumhlaba wethu! (INdumiso 104:24) Nangona abantu abangahloneli Thixo beceba ukusebenzisa amandla enyukliya ukwenzela indyikitya yokufa, okuvuyisayo kukuba uThixo uya “konakalisa abo bawonakalisayo umhlaba.”—ISityhilelo 11:18.
5. (a) Kutheni le nto wayechan’ ucwethe nje uSolomon ngokuthi: “Akukho nto intsha phantsi kwelanga”? (b) Indlela yobomi yabantu abangafezekanga iwangqinela njani amazwi kaSolomon?
5 USolomon wayechan’ ucwethe ngokuthi: “Akukho nto intsha phantsi kwelanga.” Kuba akukho nto intsha ngezinto ezisemhlabeni, imithombo yamandla nemithetho yemvelo ebumba isiseko senkqubo yezinto ezisemhlabeni. Ezi kudala ziyinxalenye yendalo kaThixo. (INdumiso 24:1; ISityhilelo 4:11) Akukho nto intsha ngokuvela nokutshona kwelanga, ngokuguquka kwemozulu, nangomjikelezo wemvelo wokuna kwemvula kuze kuhlaziyeke umhlaba. Yaye ngokuphathelele indlela yobomi yomntu ongafezekanga nofayo, akukho nto intsha ngokwenene, phezu kwako nje ukuguquguquka kwazo. Kwanakwiindawo ezifumileyo, kwabaninzi ubomi buba yinto eziphindaphindayo buze ekugqibeleni bube “kukuzixhamla.” Kwiminyaka enokuba ngama-70 okanye ama-80, umntu odyojwe sisono ‘uya ekhayeni lakhe laphakade’—ingcwaba. Kunjengokuba uSolomon esithi: “Into eyayikho yeya kubuya ibekho; into eyenzekayo yeya kubuya yenzeke yona. Akukho nto intsha phantsi kwelanga.”—INtshumayeli 1:4-9; 12:5.
“Isidalwa Esitsha” Phantsi Kwelanga
6. (a) Kutheni le nto indalo entsha yezinto ezibonakala emhlabeni ingamele ilindelwe kwikamva elingekude? (b) UYehova waqhubeka esizisa into ‘entsha phantsi kwelanga’ njani yaye nini?
6 Kuyinyaniso ukuba, ngokwezinto ezisemhlabeni “akukho nto intsha phantsi kwelanga”; ibe noYehova akasayi kuvelisa izinto ezintsha ebudeni beminyaka ekhoyo yama-7 000 elusuku lokuphumla kwakhe kwimisebenzi yakhe yokudala. Kodwa kuye kwavela into entsha phantsi kwelanga. Nini? Kwakungonyaka wesi-2 B.C.E. esathi isithunywa sikaYehova sabonakala ngesiquphe kubalusi abadelekileyo ngaseBhetelehem ukuvakalisa isibhengezo esitsha ngendlela emangalisayo. Sathi: “Yabonani, ndinishumayeza iindaba ezilungileyo zovuyo olukhulu, oluya kuba kubo bonke abantu; ngokuba nizalelwe namhlanje emzini kaDavide umsindisi onguKristu iNkosi.” Inkitha yezithunywa ezingcwele zasithelela ekudumiseni uThixo zisithi: “Uzuko kuThixo enyangweni, uxolo emhlabeni, inkolelo ebantwini.”—Luka 2:8-14.
7. (a) Yiyiphi into entsha eyenzekayo ekubhaptizweni kukaYesu? (b) UYesu wayivulela njani indlela yokuvela kwezinto okubhekele phaya?
7 Xa wayeneminyaka engama-30 ubudala, lo Msindisi wabhaptizwa kumanzi aseYordan. Kungekudala, kwenzeka enye into entsha phantsi kwelanga. ULuka 3:21, 22 ukuchaza oku ngala mazwi: “UYesu, ethandaza nokuthandaza, lasuka lavuleka izulu, wehla phezu kwakhe uMoya oyiNgcwele, enembonakalo yomzimba onjengehobe. Kweza nezwi eliphuma ezulwini lisithi, Wena unguNyana wam oyintanda, endikholisiweyo nguwe.” Ngeso sihlandlo uYesu waba “sisidalwa esitsha,” uNyana kaThixo ozelwe ngomoya. (2 Korinte 5:17) Ebudeni beminyaka emithathu enesiqingatha elandelayo, uYesu wanikela ubungqina obunamandla ngoBukumkani bukaThixo, ehlanganisa abafundi bakhe bokuqala. Kwandula ke, ngowama-33 C.E., emva kokufa kwakhe okulidini nasekuvukeni kwakhe ekwimeko yokomoya, uYesu wabonakala “ebusweni bukaThixo” ukuze avulele indlela izinto ezimangalisayo ezingakumbi ezaziza kwenzeka apha “phantsi kwelanga.”—Hebhere 9:24; 1 Petros 3:18.
8. Saziswa njani “isidalwa esitsha”?
8 Ngomhla wePentekoste ngaloo nyaka, uYesu waqalisa ukuthulula umoya oyingcwele kubafundi bakhe abathembekileyo, ebonisa ukuba babemanyaniswe kunye naye njengoonyana bakaThixo. Umpostile uPawulos uthetha ngesi ‘sidalwa sitsha’ kweyesi-2 yabaseKorinte 5:17, 18, esithi: “Ukuba ubani ukuKristu, usisidalwa esitsha; izinto ezindala zidlule; bonani ke, zisuke zaba ntsha izinto zonke zakhe. Zonke izinto ke ziphuma kuThixo, owasixolelanisa naye ngokwakhe ngoYesu Kristu, wasinika ulungiselelo loxolelaniso.”
9. Yiyiphi injongo ephunyezwa sesi ‘sidalwa sitsha’?
9 Umpostile uPetros ubhekisa kwesi ‘sidaIwa sitsha,’ esithi: “Nina nisisizukulwana esinyuliweyo, isibingeleli esibukumkani, uhlanga olungcwele, abantu abayinqobo, ukuze nivakalise isidima salowo wanibizayo ukuba niphume ebumnyameni, ningene ekukhanyeni kwakhe okungummangaliso.” (1 Petros 2:9) Ngoxa silapha emhlabeni, esi sibingeleli sibubukumkani ngenzondelelo siye savakalisa “izinto ezinkulu zikaThixo” ezinxulumene neenjongo zakhe zoBukumkani. Abo ‘basisidalwa esitsha’ abathi bagqibe ikhondo labo lasemhlabeni ngengqibelelo bavuswa emva kokuba uYesu engene kwitempile kaYehova.—IZenzo 2:11; Roma 8:14-17; Malaki 3:1, 2.
“Ukuzalwa Okutsha”
10. (a) UYesu wathini ‘ngokuzalwa okutsha’? (b) Abo ‘basisidalwa esitsha’ bamenyelwa ukuba babe nesabelo entwenini?
10 Noko ke, ngaba esi ‘sidalwa sitsha’ siqalisa ngoYesu Kristu sikuphela kwento ‘entsha’ evela “phantsi kwelanga”? Nakanye! Ngoxa wayesesemhlabeni, uYesu wathi kubafundi bakhe: “Inene, ndithi kuni, Nina nindilandeleyo, ekuzalweni okutsha, xa athe wahlala uNyana woMntu phezu kwetrone yozuko lwakhe, niya kuhlala nani phezu kweetrone ezilishumi elinambini, nigweba ezizweni ezilishumi elinazibini zakwaSirayeli.” (Mateyu 19:28) ‘Umhlambi omncinane’ wabafundi bakaYesu abaye balingwa baza bacikidwa—i-144 000 labo—ngaloo ndlela bamenyelwa ukuba babe nesabelo noYesu kuBukumkani bakhe baze ‘bahlale ezitroneni ukuze bagwebe izizwe ezilishumi elinazibini zakwaSirayeli.’—Luka 12:32; 22:28-30; ISityhilelo 14:1-5.
11. Ziziphi iinkalo ezimbini zedini likaYesu ezafanekiselwa ngoMhla Wocamagushelo, yaye njani?
11 Ziingobani ke ezi ‘zizwe zilishumi elinazibini’? Ilungiselelo elenziwa nguYehova ngoMhla Wocamagushelo kuSirayeli wamandulo lisinika umfanekiso. Nyaka ngamnye, kumhla weshumi wenyanga yesixhenxe, umbingeleli omkhulu kwakufuneka ebingelele inkunzi yenkomo njengedini lesono “azicamagushele okwakhe nokwendlu yakhe.” Oku kwafanekisela idini likaYesu njengoko lisetyenziswa ‘kwabendlu yakhe’ abangababingeleli abangaphantsi kwakhe. Kodwa kuthekani ngamanye amaSirayeli? Umbingeleli omkhulu wayesithi ngokulandelayo enze amaqashiso kwiibhokhwe ezimbini. Enye yezi wayeyixhela ‘njengebhokhwe yedini lesono eyeyabantu.’ Emva kokuba evume izono zabantu phezu kwebhokhwe yesibini, wayeyithumela entlango. Ngaloo ndlela ukusetyenziswa kwezi bhokhwe zimbini kwakufanekisela ukuphalaza kukaYesu igazi lakhe lobomi njengedini nangokushenxisa kwakhe ngokupheleleyo izono zalo lonke uluntu ukongezelela kwezo zendlu yababingeleli.—Levitikus 16:6-10, 15.
12. Esinye isichazi-magama siyichaza njani intsingiselo yegama elithi “ukuzalwa okutsha”?
12 “Izizwe ezilishumi elinazibini zakwaSirayeli” zinentsingiselo efanayo kuMateyu 19:28. Ukukhankanywa kwazo apha kuthi kudlulele ngaphaya kwababingeleli abazelwe ngomoya abangaphantsi ukuze kuquke bonke abanye boluntu. IAn Expository Dictionary of New Testament Words, nguW. E. Vine, igama lesiGrike elisetyenziswe apha elithi “ekuzalweni okutsha,” pa·lin·ge·ne·siʹa, ilichaza ngokuthi “ukuzalwa ngokutsha . . . ukuzalwa kwakhona ngokomoya,” ize yongezelele ngokuthi: “KuMateyu 19:28 eli gama lisetyenziswa kwintshumayelo yeNkosi, ngengqiqo ebanzi, ‘yokubuyiswa kwezinto zonke’ (IZenzo 3:21, R.V.), xa, ngenxa yokuBuya kweSibini kukaKristu, uYehova ‘emisa uKumkani Wakhe phezu kwentaba Yakhe engcwele eyiZiyon’ (INdu. 2:6) . . . Ngaloo ndlela kuya kuhlangulwa ihlabathi kumandla nakwinkohliso kaSathana nakubalawuli beentlanga abanogonyamelo nabachase amaKristu.”
13. (a) Iinguqulelo ezahlukahlukeneyo zeBhayibhile ziyibonisa njani intsingiselo yegama elithi pa·lin·ge·ne·siʹa? (b) Ngoko yintoni eya kwenzeka “phantsi kwelanga”?
13 Ngokuhambisana noku, iinguqulelo zeeBhayibhile igama elithi pa·lin·ge·ne·siʹa ziliguqulela ngeendlela ezahlukahlukeneyo ngokuthi: ukuphinda uzalwe, ihlabathi elitsha, ukuzalwa ngokutsha, ihlabathi elizelwe ngokutsha, ihlabathi eliza kubakho, iNdalo Entsha, ulungelelwaniso olutsha lobomi, isizukulwana esitsha. Ngaba uyakuqonda oko? “Izizwe ezilishumi elinazibini zakwaSirayeli,” ezimela bonke abantu boluntu, ziza kugwetywa nguKristu nangababingeleli abangaphantsi kwakhe abanyanisekileyo. Oku kuya kuba nento yokwenza nokuzalwa ngokutsha, ukuhlaziyeka okuzukileyo kwako konke oko uYehova anenjongo yako ngalo mhlaba, apha “phantsi kwelanga.”
“Amaxesha Okubuyiswa”
14. (a) NgokweZenzo 3:20, 21, yintoni amele ayilindele uYesu? (b) UYesu ubekwa njani yaye nini ukuba abe nguKumkani?
14 Oko kuzalwa ngokutsha kwenzeka nini? KwiZenzo 3:20, 21, uPetros uthetha ‘ngoYesu, nokwakumele okunene ukuba amazulu amamkele, kude kufike amaxesha okubuyiswa kwezinto zonke, awathethayo uThixo ngomlomo wabo bonke abaprofeti bakhe bonke abangcwele, kususela ngonaphakade.’ Oku kwalatha ekulindeni kukaYesu ngasekunene kukaThixo emazulwini “ade azaliseke amaxesha eentlanga.” (Luka 21:24; INdumiso 110:1, 2) Kuthi ke, ngowe-1914, uYehova eneneni ‘amise uKumkani wakhe phezu kweZiyon, intaba yakhe engcwele.’ Kukuphi ukubuyiselwa okuthi kulandele?—INdumiso 2:6.
15. (a) Yintoni eyenzekayo “phantsi kwelanga” emva kokubekwa etroneni kukaYesu? (b) UMateyu 25:31-34 noIsaya 11:6-9 baye bazaliseka njani?
15 Okokuqala, kubonwa into entsha phantsi kwelanga, kwinto yokuba ababingeleli abaseleyo nabathembekileyo abangaphantsi kwakhe—abokugqibela kwabo ‘basisidalwa esitsha’—bayahlanganiswa baze basetyenziswe ‘ekushumayeleni ezi ndaba zilungileyo zoBukumkani obumiselweyo.’ Ngokulandelayo, “isihlwele esikhulu” siyahlanganiswa “siphuma kuzo zonke iintlanga” ukuze sisindiswe “embandezelweni enkulu.” (Mateyu 24:14; ISityhilelo 7:9, 14) Ngeli xesha sikulo uKumkani osetroneni, uYesu Kristu, wahlulahlula abantu, “njengokuba umalusi ezahlula izimvu ezibhokhweni.” “Izimvu” zingabo bazibonakalisa bethanda ubulungisa ngakuKumkani nakubazalwana bakhe abazelwe ngokomoya ‘abasisidalwa esitsha.’ Ngoko ke ezi “zimvu” zimenyelwa ukuba zidle ilifa ubomi obungunaphakade kummandla wasemhlabeni woBukumkani bukaYehova. Sele zinandipha iparadisi yokomoya ebuyiselwe emhlabeni.—Mateyu 25:31-34, 46; Isaya 11:6-9.
16. (a) Nguwuphi umgwebo oqhubekayo ngoku? (b) Nguwuphi omnye umgwebo oya kwenzeka emva kweArmagedon?
16 Ukugwetywa kweentlanga ‘nokwezimvu’ ngeli xesha kunokuthanani nokufanelekela ukusinda ebudeni ‘bembandezelo enkulu.’ (Mateyu 24:21, 22) Noko ke, ngaba oku kugweba koko kubhekiselwe kuko kuMateyu 19:28? Hayi, kuba ukugweba okubhekele phaya kuya kuphunyezwa nguKristu nababingeleli bakhe abangaphantsi kwakhe emva kwaloo mbandezelo. Lo ngumgwebo ‘wezizwe ezilishumi elinambini zakwaSirayeli’ ezingokomfuziselo, abantu abangaphandle kwabo basisibingeleli esibukumkani. Inani elithi “ishumi elinesibini” libonisa ukuphelela kwabo boluntu oluya kugwetywa. Oku kuquka abo basinde ‘kwimbandezelo enkulu,’ nayiphi na inzala abasenokuba basenayo, namawaka ezigidi zoluntu oluya kubuyiselwa emhlabeni ngovuko.
17. Emva koko ngoobani abaya kugwetywa, ibe ngokwaziphi ‘izenzo’?
17 Ngokubhekisele koku, uPawulos kwiZenzo 17:31 uthi uThixo ‘umise umhla, aza kuligweba ngawo elimiweyo ngobulungisa, ngendoda [uKristu Yesu] awayimisayo, ebanike bonke ukholo ngokuyivusa kwabafileyo.’ “Elimiweyo” lasemva kweArmagedon, elibunjwa lulo lonke uluntu olobe lusemhlabeni ngoko, alisayi kugwetywa ngokwezono zangaphambili ezenziwa kule nkqubo yezinto ikhoyo. Kunoko, baya ‘kugwetywa elowo ngokwemisebenzi yakhe’ ayenza kumhlaba omtsha njengoko besebenzisa ilungiselelo lentlawulelo kaKristu.—ISityhilelo 20:13; Mateyu 20:28; 1 Yohane 2:2.
18. (a) Njengoko kubonisiwe ngulsaya, emva koko kuya kuvela ntoni “phantsi kwelanga”? (b) Ngawaphi amazwi esithembiso aya kuthi ke azaliseke, ibe yintoni esingayilindela ephakadeni elizayo? (Roma 8:21)
18 Ezinjani zona izinto ezincamisileyo eziya kubonakala phantsi kwelanga ngelo xesha! Iparadisi yokomoya iya kunabela ekubeni yiparadisi yokoqobo, kuzaliseka injongo yantlandlolo kaYehova ngomhlaba. UThixo wethu usixelela ukuba ‘umhlaba usisihlalo seenyawo zakhe,’ ingcwele ekufuneka enqulwe kuyo, yaye ukwavakalisa esithi: “Ndiyizukise indawo yeenyawo zam.” (Isaya 66:1; 60:13) Ngoko apha phantsi kwelanga, umhlaba uza kwenziwa iparadisi ezukileyo, umyezo wemigcobo, apho uluntu olufezekileyo, olunoxolo nolumanyeneyo luya kuthi ngonaphakade ludumise uThixo noMdali walo. ‘Ayinyaniso yaye athembekile’ amazwi kaYehova achwayitisayo edinga elithi: “Uyabona, izinto zonke ndizenza ntsha”! (ISityhilelo 21:5) Yaye ephakadeni elizayo, hayi indlela eya kumangalisa ngayo indalo entsha asenokuthi uThixo wethu onothando ayizise apha phantsi kwelanga ukuze iyolise intsapho yakhe engabantu!
Ubungaphendula Njani, Mayela Neziganeko ‘Eziphantsi Kwelanga’?—
◻ “Akukho nto intsha” ngokwayiphi ingqiqo?
◻ “Isidalwa esitsha” savela nini yaye njani?
◻ Kuquka ntoni “ukuzalwa okutsha”?
◻ Aqhubeka njani “amaxesha okubuyiswa?” enayiphi imiphumo ezukileyo?
[Umfanekiso okwiphepha 26]
Anjani wona ukothusa amagqabaza koko kubizwa ngokuthi yimpucuko ukuva ukuba ihlabathi ngoku liye lachithela kwizixhobo zemfazwe intywenka yemali engange-4,2 yezigidi zeerandi mzuzu ngamnye! Le yimali ethe Chatha kwimali yokondla, yokunxiba nokunikela ikhusi kuso sonke isizwe soluntu oluhlwempuzekileyo namhlanje. Kwelinye icala, ukufunjwa kweebhombu ezinamandla okuqhushumba azizigidi zeetoni bekungatshabalalisa bonke abantu abasemhlabeni—amawaka ama-5 ezigidi zethu—ngokuphindwe kali-12. Kanti, kunikelwa ingxelo yokuba isiqingatha sesigidi sabantu behlabathi abaneyona ngqondo ikrelekrele basetyenziswa ekuveliseni izixhobo ezinokwenza imbuqe ede yangakumbi ekutshabalaliseni.
[Inkcazelo]
Umfanekiso womkhosi waseU.S.