Ukwalusa NoMdali Wethu Ozukileyo
“UYehova ngumalusi wam, andisweli lutho. Uyawubuyisa umphefumlo wam; undikhaphela ezindleleni zobulungisa ngenxa yegama lakhe.”—INDUMISO 23:1, 3.
1. Kukuphi ukuphumza kothando uYehova akulungiselelayo?
INDUMISO 23, “umhobe kaDavide,” iye yaphumza imiphefumlo emininzi ediniweyo. Iye yayinceda ukuba ibe nentembelo echazwe kwindinyana 6 ethi: “Inene, ndiya kulandelwa kokulungileyo nenceba yonke imihla yobomi bam, ndihlale endlwini kaYehova imihla emide.” Ngaba uyakunqwenela oko, ukuhlala ngalo lonke ixesha endlwini kaYehova yonqulo, umanyene nabantu bakhe ngoku abahlanganiswayo bephuma kuzo zonke iintlanga zomhlaba? “UMalusi noMveleli wemiphefumlo yenu,” uMdali wethu Ozukileyo, uYehova uThixo, uya kukunceda ukuba ulufikelele olo sukelo.—1 Petros 2:25.
2, 3. (a) UYehova ubalusa njani ngothando abantu bakhe? (b) “Umhlambi” kaYehova uye wanda njani ngokuphawulekayo?
2 UMdali ‘wamazulu amatsha nomhlaba omtsha’ ukwanguMlungelelanisi noMveleli Owongamileyo webandla, lamaKristu ‘eliyindlu kaThixo.’ (2 Petros 3:13; 1 Timoti 3:15) Unomdla onzulu wokwalusa abantu bakhe, njengoko uIsaya 40:10, 11 ebonisa ngokucacileyo: “Uyabona, iNkosi uYehova iya kuza, ingowomeleleyo, ingalo yayo iyilawulela. Uyabona, umvuzo wayo inawo, nomsebenzi wayo uphambi kwayo. Iya kuwalusa umhlambi wayo njengomalusi; iya kuwabutha ngeengalo zayo amatakane, iwathwale ngesifuba sayo, izithundeze ezanyisayo.”
3 Ngengqiqo eyongezelelekileyo, lo ‘mhlambi’ uquka abo banethuba elide behamba enyanisweni yobuKristu ‘namatakane’ aye aqokelelwa kumaxesha akutshanje—njengabantu abaninzi ngoku abhaptizwayo eAfrika naseMpuma Yurophu. Ingalo kaYehova eyomeleleyo nekhuselayo ibahlanganisela esifubeni sakhe. Nangona bebenjengezimvu ezilahlekileyo, ngoku baye baba nolwalamano olusondeleyo noThixo wabo othandekayo nonguMalusi.
Umalusi Onxulumene NoYehova
4, 5. (a) Ngubani “umalusi olungileyo,” yaye isiprofeto salatha njani kuye? (b) Nguwuphi umsebenzi wokwahlula uYesu awuvelelayo, ngawuphi umphumo obalaseleyo?
4 Ekhonza ngasekunene kukaYise ezulwini, “umalusi olungileyo,” uYesu Kristu, ukwanikela ingqalelo ngovelwano ‘kwizimvu.’ Wanikela ngobomi bakhe ukuze kuqale kungenelwe ‘umhlambi omncinane’ wabathanjiswa kwandule ke, namhlanje, kungenelwe isihlwele esikhulu ‘sezinye izimvu’ zakhe. (Luka 12:32; Yohane 10:14, 16) UMalusi Omkhulu, uYehova uThixo, uthetha nazo zonke ezi zimvu, esithi: “Yabonani, mna ndiya kugweba . . . phakathi kweegusha neegusha. Ndomisa phezu kwawo umalusi abe mnye, awaluse, umkhonzi wam uDavide; yena uya kuwalusa, abe ngumalusi wawo yena; mna Yehova ndibe nguThixo wawo, umkhonzi wam uDavide abe sisikhulu phakathi kwawo; mna Yehova ndithethile.”—Hezekile 34:20-24.
5 Ibinzana elithi “umkhonzi wam uDavide” lalatha ngokuprofetayo kuKristu uYesu, “imbewu” eyindlalifa kwitrone kaDavide. (INdumiso 89:35, 36) Kule mini yomgwebo weentlanga, uMalusi noKumkani onxulumene noYehova, uKristu Yesu, uNyana kaDavide, uyaqhubeka esahlula “izimvu” zoluntu kwabo basenokuzibiza ngokuba ‘bazizimvu’ kodwa ‘beziibhokhwe.’ (Mateyu 25:31-33) Lo ‘malusi mnye’ ukwaveliselwe ukondla izimvu. Hayi ukuzuka kwenzaliseko yesi siprofeto esiyibonayo namhlanje! Ngoxa abezobupolitika bethetha ngokumanyanisa uluntu ngolungelelwaniso olutsha lwehlabathi, kanye ngoku uMalusi omnye umanyanisa izimvu zazo zonke iintlanga ngephulo lokunikela ubungqina ngeelwimi ezininzi nto leyo enokwenziwa yintlangano kaThixo kuphela emhlabeni.
6, 7. “Umkhonzi othembekileyo noqondayo” uye waqinisekisa njani ukuba “ukudla ngexesha elifanelekileyo” kwenziwa kufumaneke kwizimvu?
6 Njengoko isigidimi soBukumkani siqhubeka sinwenwela kwimimandla emitsha, ‘umkhonzi othembekileyo noqondayo’ wamaKristu athanjisiweyo, njengoko uyalelwe nguMalusi omnye, uyaqinisekisa ukuba kwenziwa onke amalungiselelo okuthumela “ukudla ngexesha elililo.” (Mateyu 24:45) Kumasebe okushicilela eWatch Tower Society angama-33 emhlabeni jikelele, amaninzi ayayikhawulezisa imveliso ukuze ahlangabezane nokufunwa okwandayo koncwadi namaphephancwadi alunge ngakumbi okufundisisa iBhayibhile.
7 IQumrhu Elilawulayo lamaNgqina kaYehova lenza unako nako wokuphucula umgangatho wokuguqulela kwiilwimi ezinokuba ngama-200 nokuqalisa ukuguqulela kwiilwimi ezongezelelekileyo njengoko kuyimfuneko ukuze kugutyungelwe yonke intsimi yehlabathi. Oku kuvisisana nomyalelo uYesu awawunika abafundi bakhe kwiZenzo 1:8 othi: “Niya kwamkela ke amandla, akubon’ ukuba uMoya oyiNgcwele uhlile phezu kwenu; nibe ngamangqina am . . . kude kuse nasekupheleni komhlaba.” Ngaphezu koko, iNew World Translation of the Holy Scriptures, esele ishicilelwe ngokupheleleyo okanye ngokuyinxenye ngeelwimi ezili-14, ngoku iguqulelwa kwezinye iilwimi ezili-16 zaseYurophu, zaseAfrika nezaseMpuma.
Ukunandipha “Uxolo LukaThixo”
8. Izimvu ziye zasikelelwa njani ngokutyebileyo ngomnqophiso woxolo uYehova awawenza nazo?
8 NgoMalusi wakhe omnye, uKristu Yesu, uYehova wenza ‘umnqophiso woxolo’ nezimvu Zakhe ezondlekileyo. (Isaya 54:10) Zinokholo kwigazi likaYesu elaphalalayo, izimvu ziyakwazi ukuhamba ekukhanyeni. (1 Yohane 1:7) Zinandipha ‘uxolo lukaThixo olugqithisele kuko konke ukuqonda, nolugcina iintliziyo zazo kuKristu Yesu.’ (Filipi 4:7) Njengoko uHezekile 34:25-28 eqhubeka echaza, uYehova walusa izimvu zakhe ukungena kwiparadisi yokomoya, imeko eyonwabisayo yonqabiseko, impumelelo ephumzayo neneziqhamo. Lo Malusi onothando uthi ngezimvu zakhe: “Bazi ukuba ndinguYehova, ekuzaphuleni kwam izikeyi zedyokhwe, ndibahlangule esandleni sabo babebakhonzisa. Abayi kuba saba lixhoba leentlanga, . . . bahlale bekholosile [“benqabisekile,” NW], kungabikho ubothusayo.”
9. Ngawaphi amathuba aye avulelekela abantu bakaThixo ‘ngokwaphulwa kwezikeyi zedyokhwe’?
9 Kwiminyaka yakutshanje, amaNgqina kaYehova kumazwe amaninzi sele ekubonile ukwaphulwa ‘kwezikeyi zedyokhwe yawo.’ Akhululekile ukushumayela kunanini na ngaphambili. Yaye ngamana sonke, kwilizwe ngalinye, sinokulusebenzisa kakuhle unqabiseko uYehova asilungiselele lona njengoko siwuhambisela phambili umsebenzi. Esinjani sona isiqinisekiso uYehova asinika sona njengoko sisondela kwixesha leyona mbandezelo enkulu uluntu oluya kuze luyibone!—Daniyeli 12:1; Mateyu 24:21, 22.
10. Ngoobani uYehova aye wabalungiselela ukuncedisa uMalusi Olungileyo, uKristu Yesu, yaye umpostile uPawulos wathini ngabanye baba?
10 Elungiselela loo mhla wempindezelo yakhe kwabangendawo, uYehova uye walungiselela abalusi abangaphantsi ukuze bancedisane noMalusi Olungileyo, uKristu Yesu, ekunyamekeleni umhlambi. Aba bachazwe kwincwadi yeSityhilelo 1:16 njengenani elipheleleyo ‘leenkwenkwezi ezisixhenxe’ kwisandla sokunene sikaYesu. Ngenkulungwane yokuqala, umpostile uPawulos wathetha nequmrhu elalimela aba balusi bangaphantsi, esithi: “Zilumkeleni ngoko, nawo wonke umhlambi, athe uMoya oyiNgcwele wanimisa ukuba ngabaveleli bawo, ukuba nilaluse ibandla likaThixo, awazizuzelayo [ngeloNyana wakhe, NW] igazi.” (IZenzo 20:28) Namhlanje, kukho abalusi abangaphantsi abangamashumi amawaka abakhonza kumabandla angama-69 558 emhlabeni wonke.
Phambili Balusi Abangaphantsi!
11. Abanye abalusi baye bakhokela njani kumasimi agutyungelwa ngokufuthi?
11 Kwiindawo ezininzi aba balusi bafanele bakhokele kumasimi aye agutyungelwa ngokuphindaphindiweyo ebudeni bale mihla yokugqibela. Banokuyilondoloza njani inzondelelo yomhlambi ikumgangatho ophakamileyo? Indlela aba balusi abaye benza ngayo incomeka gqitha, yaye enye yeendlela abaye baphumelela ngazo kungokukhuthaza umsebenzi wobuvulindlela bobuncedani nobuthe ngxi. Abalusi abaninzi nabo baye banesabelo kule nkonzo, kwanabo bavakalisi abaye abakwazi ukwenjenjalo baye babonakalisa umoya wobuvulindlela, bekhonza ngovuyo olubanceda boyise ukungabikho komdla entsimini. (INdumiso 100:2; 104:33, 34; Filipi 4:4, 5) Ngaloo ndlela, njengoko ihlabathi ligutyungelwa bubungendawo yaye phantse libe alilawuleki, abantu abaninzi abanjengezimvu bayancedwa bakhangele kwithemba loBukumkani.—Mateyu 12:18, 21; Roma 15:12.
12. Yiyiphi ingxaki enzulu evelayo kumasimi akhula ngokukhawuleza, yaye oku kudla ngokusingathwa njani?
12 Enye ingxaki kukuba ngokufuthi baye bangabikho abalusi abaneleyo abafanelekayo bokunyamekela umhlambi. Apho kukho ulwando olukhawulezayo, njengaseMpuma Yurophu, kukho amabandla amaninzi amatsha angenabadala bamiselweyo. Umthwalo usemagxeni ezimvu ezizinikeleyo, kodwa azinamava, yaye kufuneka uncedo ukuze kuqeqeshwe izimvu ezithontelanayo ukungena emabandleni. Kumazwe anjengeBrazil, iMexico neZaire, apho ulwando lukhawuleza gqitha, kuye kunyazeleke ukuba kusetyenziswe amaNgqina akhangeleka eselula ukuze alungelelanise inkonzo nokuqeqesha abanye abasebatsha. Oovulindlela banikela uncedo olukhulu, yaye le yindlela oodade abanokubaqeqesha ngayo oodade abatsha. Ngomoya wakhe, uYehova uyayisikelela imiphumo yoko. Ulwando luyaqhubeka.—Isaya 54:2, 3.
13. (a) Ekubeni isivuno sisikhulu kangaka, yintoni afanele ayithandazele onke amaNgqina? (b) Imithandazo yabantu bakaThixo yaphendulwa njani ngaphambi nasebudeni bemfazwe yehlabathi yesibini?
13 Kwimimandla umsebenzi wokushumayela omiselwe ngokuqinileyo kuyo, kumazwe apho imiqathango isandul’ ukurhoxiswa khona nakwimimandla esandul’ ukuvulwa, amazwi kaYesu akuMateyu 9:37, 38 asasebenza: “Ukuvuna okunene kuninzi, kodwa bona abasebenzi bambalwa. Khungani ngoko eNkosini yokuvuna, ikhuphe abasebenzi, baye ekuvuneni kwayo.” Kwakhona, sifanele sithandazele ukuba uYehova avelise abalusi abangakumbi. Uye wabonakalisa ukuba unokukwenza oku. Ngaphambi nasebudeni beMfazwe Yehlabathi II, oozwilakhe abanjengama-Asiriya bazama ukuwaphelisa amaNgqina kaYehova. Kodwa ephendula imithandazo yawo, uYehova uye wayihlambulula intlangano yawo, eyenza ukuba ngokwenene ilawulwe ngokobuthixo, yaye evelisa “abalusi” abafunekayo.a Oku bekuvumelana nesi siprofeto: “Xa uAsiriya azileyo ezweni lakowethu, xa anyathelayo ezingxandeni zethu ezinde, siya kumisela abalusi abasixhenxe, neenkosi zabantu ezisibhozo, zimelane naye.”—abadala abazinikeyo bokukhokela abaninzi ngakumbi ukuze bahlangabezane nentswelo.—Mika 5:5.
14. Yiyiphi intswelo ebalaseleyo ekhoyo entlanganweni, yaye luluphi ukhuthazo abazalwana abalunikwayo?
14 Kukho imfuneko enkulu yokuba onke amadoda angamaNgqina azabalazele amalungelo angakumbi. (1 Timoti 3:1) Oku kungxamisekile. Isiphelo sale nkqubo asifikanga sigalelekile. UHabhakuki 2:3 uthi: “Umbono usaya kuba ngowexesha elimisiweyo, ukhawulezela ekupheleni, angathethi wona amanga; . . . uya kuza awuyi kubuya umva.” Bazalwana, ngaba ninokuzabalazela ukufanelekela amalungelo angakumbi kulo msebenzi wokwalusa—ngaphambi kokuba isiphelo sifike?—Tito 1:6-9.
Ukwalusa Kobuthixo
15. Abantu bakaYehova balawulwa njani ngokobuthixo?
15 Ukuze babe nesabelo ngokuzeleyo kulwando lwentlangano kaYehova, abantu bakhe bafanele babe nembono yobuthixo. Banokukuphumeza njani oku? Kaloku, lithetha ntoni ibinzana elithi “yobuthixo”? IWebster’s New Twentieth Century Dictionary ichaza igama elithi “ubuthixo” ngokuthi “ukulawulwa kwelizwe nguThixo.” Kungale ngqiqo oluthi “uhlanga olungcwele” lwabantu bakaYehova lube lulawulwa ngokobuthixo. (1 Petros 2:9; Isaya 33:22) Njengamalungu okanye izinxulumani zolo hlanga lulawulwa ngokobuthixo, amaKristu okwenyaniso afanele aphile aze akhonze ngokuthobela iLizwi likaThixo nemigaqo yalo.
16. Ngokusisiseko, singazibonakalisa njani ukuba silawulwa ngokobuthixo?
16 Umpostile uPawulos uyichaza ngokucacileyo indlela amaKristu afanele alawulwe ngayo ngokobuthixo. Okokuqala, uthi ‘afanele ambathe ubuntu obutsha obadalwa ngokuvisisana nokuthanda kukaThixo kubulungisa benyaniso nasekunyanisekeni.’ Ubuntu bomKristu bufanele bubunjwe ngokuvisisana nemigaqo kaThixo yobulungisa eyandlalwe eLizwini lakhe. Ufanele anyaniseke kuYehova nakwimithetho Yakhe. Emva kokuba ebonise indlela oku okunokwenziwa ngayo, uPawulos uyabongoza: “Yibani ngabaxelisa uThixo, ngokwabantwana abaziintanda.” (Efese 4:24–5:1) Njengabantwana abathobelayo, sifanele sixelise uThixo. Leyo yimbonakaliso yobuthixo bokwenene, okubonisa ukuba ngokwenene silawulwa nguThixo!—Bona neyabaseKolose 3:10, 12-14.
17, 18. (a) Luluphi uphawu olubalaseleyo lukaThixo amaKristu alawulwa ngokobuthixo aluxelisayo? (b) Kumazwi awawathetha kuMoses, uYehova uye walubethelela njani uphawu Lwakhe oluyintloko, kodwa wongezelela siphi isilumkiso?
17 Luluphi uphawu lukaThixo oluyintloko esifanele siluxelise? Umpostile uYohane uyaphendula kweyoku-1 kaYohane 4:8 xa esithi: “UThixo uluthando.” Emva kweendinyana ezisibhozo, kwindinyana 16, uyawuphinda lo mgaqo ubalulekileyo: “UThixo uluthando; lowo uhleli eluthandweni uhleli kuye uThixo, noThixo uhleli kuye.” UMalusi Omkhulu, uYehova, usisimntwiso sothando. Abalusi abalawulwa ngokobuthixo bayamxelisa ngokubonakalisa uthando olunzulu ngezimvu zikaYehova.—Thelekisa eyoku-1 kaYohane 3:16, 18; 4:7-11.
18 UThixo Omkhulu wazityhila kuMoses ‘njengoYehova, uYehova, uThixo onemfesane, onobabalo, ozeka kade umsindo, omninzi ngenceba nenyaniso; olondolozela amawaka inceba, oxolela ubugwenxa, nokreqo, nesono; ongakhe amenze msulwa onetyala, obuvelelelayo ubugwenxa booyise kooonyana, nakoonyana boonyana kwesesithathu nakwesesine isizukulwana!’ (Eksodus 34:6, 7) Ngaloo ndlela uYehova ubethelela iinkalo ezahlukeneyo zophawu lwakhe olubalaseleyo lobuthixo, uthando, ngoxa elumkisa ngokungqongqo ukuba uya kubohlwaya ubugwenxa xa kuyimfuneko.
19. Ngokwahlukileyo kubaFarisi, abalusi abangamaKristu bafanele baqhube njani ngendlela yobuthixo?
19 Kwabo banezikhundla zembopheleleko entlanganweni, kuthetha ukuthini ukulawulwa ngokobuthixo? UYesu wathi ngababhali nangabaFarisi bomhla wakhe: “Babopha imithwalo enzima, esindayo, bayibeke emagxeni abantu, babe ke bona bengathandi kuyishukumisa nangomnwe lo wabo.” (Mateyu 23:4) Hayi indlela ababecinezela nababengenaluthando ngayo! Ubuthixo bokwenene, okanye ulawulo lukaThixo, bufuna ukwaluswa komhlambi kusetyenziswa imigaqo yothando yeBhayibhile, izimvu zingathwaliswa uxanduva ngemithetho yabantu emininzi. (Thelekisa uMateyu 15:1-9.) Kwangaxeshanye, abalusi bobuthixo baxelisa uThixo ngokongezelela kuthando lwabo ubungqongqo ukuze kulondolozwe ubunyulu bebandla.—Thelekisa amaRoma 2:11; 1 Petros 1:17.
20. Ngawaphi amalungiselelo entlangano abalusi bobuthixo abawaqondayo?
20 Abalusi bokwenyaniso bayaqonda ukuba ebudeni bale mihla yokugqibela, uYesu uye wamisela umkhonzi wakhe othembekileyo noqondayo phezu kwayo yonke impahla yakhe nokuba lo mkhonzi uye walathiswa ngumoya oyingcwele ekumiseleni abadala bokwalusa izimvu. (Mateyu 24:3, 47; IZenzo 20:28) Ngenxa yoko, ukulawulwa ngokobuthixo kubandakanya ukuba nentlonelo enzulu ngalo mkhonzi, ngamalungiselelo entlangano lo mkhonzi oye wawamisela nangelungiselelo labadala abasebandleni.—Hebhere 13:7, 17.
21. Nguwuphi umzekelo omhle uYesu awawubekela abalusi abangaphantsi?
21 UYesu wamisela umzekelo omhle, wokusoloko ekhangele kuYehova nakwiLizwi Lakhe ngokhokelo. Wathi: “Mna ngokwam andinakwenza nto; njengoko ndivayo, ndigweba ngako, nomgwebo wam ububulungisa; ngokuba andifuni kuthanda kwam, ndifuna ukuthanda kukaBawo owandithumayo.” (Yohane 5:30) Abalusi abangaphantsi beNkosi uYesu Kristu bafanele bahlakulele isimo sengqondo esifanayo sokuthobeka. Ukuba umdala usoloko esiya eLizwini likaThixo ukuze afumane ukhokelo, njengoko uYesu wenzayo, ngoko ulawulwa ngokobuthixo ngokwenene.—Mateyu 4:1-11; Yohane 6:38.
22. (a) Kungayiphi indlela esifanele sonke sizabalazele ukuthobela ulawulo lobuthixo? (b) UYesu uzinika siphi isimemo sobubele izimvu?
22 Madoda abhaptiziweyo, zabalazelani ukufanelekela amalungelo ebandleni! Nonke nina zimvu zithandekayo, zabalazelani ukuthobela ulawulo lobuthixo, xelisani uThixo noKristu ekubonakaliseni uthando! Ngamana abalusi nomhlambi bangavuya kuba besabele kwisimemo sikaYesu esithi: “Yizani kum nonke nina nibulalekayo, nisindwayo ngumthwalo, ndoninika ukuphumla. Thabathani idyokhwe yam niyithwale, nifunde kum; ngokuba ndinobulali, ndithobekile ngentliziyo; noyifumanela ukuphumla imiphefumlo yenu. Kuba idyokhwe yam imnandi, nomthwalo wam ulula.”—Mateyu 11:28-30.
[Umbhalo osemazantsi]
a Bona amanqaku eMboniselo (yesiNgesi) anomxholo othi “Organization” (INtlangano), kwinkupho kaJuni 1 nekaJuni 15, 1938.
Ngaba Unokucacisa?
◻ Uyintoni “umhlambi” kaYehova, ibe uquka oobani?
◻ UYesu wasebenza njani ‘njengomalusi olungileyo’ ngenkulungwane yokuqala, yaye usebenza njani namhlanje?
◻ Yiyiphi indima eyintloko abalusi abangaphantsi abanayo ekunyamekeleni umhlambi?
◻ Lithetha ntoni igama elithi “ubuthixo”?
◻ UmKristu—ngokukodwa umalusi ongaphantsi—ufanele enze njani ukuze abe ulawulwa ngokobuthixo?
[Umfanekiso okwiphepha 20]
Njengomalusi ozinikeleyo, uYehova uyawunyamekela umhlambi wakhe
[Umfanekiso okwiphepha 23]
Ukuxelisa uphawu lukaYehova uThixo lothando yimbonakaliso yobuthixo