IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w00 7/1 iphe. 28-31
  • Balusi AbangamaKristu, ‘Yiphangalaliseni Intliziyo Yenu’!

No video available for this selection.

Sorry, there was an error loading the video.

  • Balusi AbangamaKristu, ‘Yiphangalaliseni Intliziyo Yenu’!
  • IMboniselo Evakalisa UBukumkani BukaYehova—2000
  • Imixholwana
  • Amanqaku Afanayo
  • Intshukumisa Efanelekileyo
  • Ukuqeqesha Abanye Ukuze Babe Ngabalusi
  • Bangabalusi Nabafundisi Ngalo Lonke Ixesha
  • Ukongezelela Kumatyelelo Okwalusa
  • Indlela Abakunceda Ngayo Abalusi AbangamaKristu
    IMboniselo Evakalisa UBukumkani BukaYehova—1996
  • Abelusi ‘Abangumzekelo Emhlambini’
    IMboniselo Evakalisa UBukumkani BukaYehova—2006
  • Ukuzalusa Ngothantamiso Izimvu Ezixabisekileyo ZikaYehova
    IMboniselo Evakalisa UBukumkani BukaYehova—1993
  • Bazalusa Ngentumekelelo Izimvu Ezincinane
    IMboniselo Evakalisa UBukumkani BukaYehova—1993
Khangela Okunye
IMboniselo Evakalisa UBukumkani BukaYehova—2000
w00 7/1 iphe. 28-31

Balusi AbangamaKristu, ‘Yiphangalaliseni Intliziyo Yenu’!

“UYEHOVA nguMalusi wam. Andiyi kuswela nto.” Ngala mazwi, uDavide wayevakalisa intembelo epheleleyo awayenayo ngoThixo wakhe. Ngokomoya, uYehova wayemkhaphele “kumadlelo anengca” ‘nakwiindawo zokuphumla ezinamanzi amaninzi,’ emkhokelela “kumkhondo wobulungisa.” Xa wayengqongwe ziintshaba, uDavide waxhaswa waza wakhuthazwa, nto leyo eyamshukumisela ekubeni athi kuYehova: “Andoyiki nto imbi, kuba unam wena.” Ekubeni wayenoMalusi Ophakame ngolo hlobo, uDavide wazimisela ‘ukuhlala endlwini kaYehova imihla emide.’—INdumiso 23:1-6.

Okuphela koNyana ozelwe nguThixo naye wayifumana inyameko enothando kaYehova, kwaye wayixelisa loo nyameko xa wayeqhubana nabafundi bakhe xa wayetyelele apha emhlabeni. Ngenxa yoko iZibhalo zimchaza ‘njengomalusi omhle,’ “umalusi omkhulu,” kunye ‘nomalusi oyintloko.’—Yohane 10:11; Hebhere 13:20; 1 Petros 5:2-4.

UYehova noYesu Kristu basaqhubeka bebalusa abo babathandayo. Ngokuyinxenye, ukwalusa kwabo kubonakala ngelungiselelo lothando labalusi abangaphantsi abasebandleni. UPawulos wayethetha nabo balusi bangaphantsi xa wayesithi: “Zilumkeleni nina nawo wonke umhlambi, ekuthe phakathi kwawo umoya oyingcwele wanimisela nangabaveleli, ukuba nilaluse ibandla likaThixo, elo walithenga ngegazi lowakhe uNyana.”—IZenzo 20:28.

Ukwalusa umhlambi ngokuvisisana nomzekelo omiselwe nguYehova noKristu uYesu akuyondlwan’ iyanetha, kodwa ke kubaluleke ngakumbi ngoku kunanini na ngaphambili. Khawucinge nje ngamaNgqina angaphezu kwesigidi aye abhaptizwa kule minyaka mithathu idluleyo! Abasebatsha abanjalo abanayo imvelaphi yokomoya esekelwe kwiminyaka eliqela yokusebenza ngenkuthalo. Kwakhona, cinga ngamaNgqina asengabantwana okanye akwishumi elivisayo. Akaneli kufuna ingqalelo yabazali bawo nje kuphela kodwa akwafuna neyabalusi abangaphantsi bebandla.

Okunene, onke amaKristu ayachanabeka kwiingcinezelo ezivela ngaphandle, kuquka nengcinezelo yoontanga. Onke amele axomoloze exhathisa ingcinezelo enamandla yokulandela indlela yehlabathi yokuzifica. Kwamanye amazwe, abavakalisi boBukumkani basenokudinyazwa kukungabikho kwentsabelo kwisigidimi sawo. Impilo yabavakalisi abaninzi inkenenkene. Iingxaki zemali zisenokuhlutha abaninzi intshukumisa yokufuna uBukumkani kuqala. Enyanisweni sonke—kuquka nabo kukudala besenyanisweni—siyalufuna kwaye sifanelwe luncedo lwabalusi abanothando.

Intshukumisa Efanelekileyo

AmaKristu enkulungwane yokuqala abongozwa: ‘Phangalalisani iintliziyo zenu!’ (2 Korinte 6:11-13) Abadala abangamaKristu bayatyapha xa belandela eli cebiso xa benyamekela iimbopheleleko zabo zokwalusa. Banokukwenza njani oku? Kwaye kuthekani ngezicaka zolungiselelo, uninzi lwazo olusenokuba ngabalusi kwixa elizayo?

Ukuze abadala abangamaKristu babe yintsikelelo kumhlambi, abamele bashukunyiswe nje kukuziva bebophelelekile. Nasi isiluleko esibhekiswa kubo: “Waluseni umhlambi kaThixo eniwunyamekelayo, kungengakunyanzelwa, kodwa ngokuzithandela; kungekhona ngokuthanda inzuzo yokunganyaniseki, kodwa ngentumekelelo.” (1 Petros 5:2) Ngoko ukuze ubani aphumelele ekwaluseni kufuneka akhonze abanye ngokuzithandela nangentumekelelo. (Yohane 21:15-17) Kuthetha ukubona iimfuno zezimvu nokusabela msinya kuzo. Kuthetha ukubonakalisa iimpawu ezintle zobuKristu ezaziwa njengesiqhamo somoya kaThixo xa eqhubana nabanye.—Galati 5:22, 23.

Maxa wambi ukwalusa kubandakanya ukutyelela abazalwana kumakhaya abo.a Kodwa abalusi ‘abayiphangalalisayo intliziyo yabo’ bayazixhamla. Ngamany’ amazwi, benza okungaphaya kokwenza nje utyelelo lokwalusa ngamathub’ athile. Basebenzisa onke amathuba avelayo ukuze baluse abanye abasemhlambini.

Ukuqeqesha Abanye Ukuze Babe Ngabalusi

Nawuphi na umzalwana, kungakhathaliseki ukuba mdala kangakanani, ‘ozabalazela isigxina sobuveleli, unqwenela umsebenzi omhle.’ (1 Timoti 3:1) Izicaka zolungiselelo ezininzi ziye zabonakalisa ukukulungela ukufikelela amalungelo awongezelelekileyo. Ngaloo ndlela, abadala bayakuvuyela ukubanceda aba bazalwana basebenza ngokuzithandela ukuba balithabathe eli nyathelo libalulekileyo ‘lokuzabalazela isigxina sobuveleli.’ Oku kuthetha ukubaqeqesha ukuze babe ngabalusi abaphumelelayo.

Ngenxa yokunamathela ngokusondeleyo kwimilinganiselo kaThixo ephakamileyo, ibandla lamaKristu likaYehova alikhange lithityazwe ngabalusi bobuxoki abafana nabo bachazwe kuHezekile 34:2-6. Aba balusi babelizothe emehlweni kaYehova kwaye befanele ke phofu. Kunokuba bondle umhlambi, babengoohlohl’ esakhe. Basilela ukomeleza abagulayo, ukunyanga imilwelwe, ukubopha abaphukileyo, okanye ukubuyisa abachithakeleyo okanye abalahlekileyo. Bezenza iingcuka kunokuba babe ngabalusi, bazicinezela izimvu. Izimvu ezazingakhathalelwanga zathi saa, ziyabula esithubeni kungekho mntu uzikhathaleleyo.—Yeremiya 23:1, 2; Nahum 3:18; Mateyu 9:36.

Ngokwahlukileyo kwabo balusi bangathembekanga, abalusi abangamaKristu balandela umzekelo kaYehova. Bayanceda ekukhapheleni izimvu ‘kumadlelo okomoya anengca’ ‘nakwiindawo zokuphumla ezinamanzi amaninzi.’ Bazabalazela ukuzikhokelela “kumkhondo wamalungisa” ngokuzinceda ziliqonde kakuhle iLizwi likaYehova zize zilisebenzise. Zinokukwenza ngempumelelo oku kuba ‘ziyakufanelekela ukufundisa.’—1 Timoti 3:2.

Ubukhulu becala abadala bafundisa eqongeni ebudeni beentlanganiso. Noko ke, abadala bakwafundisa nabantu ngabanye. Kakade ke, abanye banobuchule bokufundisa umntu omnye, ngoxa abanye benesiphiwo sokunikela iintetho. Kodwa ke xa ubani engenabuchule bungako kwinkalo ethile yokufundisa loo nto ayithethi kuthi akafaneleki njengomfundisi. Abadala bayafundisa besebenzisa iindlela abanokuzisebenzisa, kuquka ukwalusa. Ngamanye amaxesha ukwalusa kuyacwangciswa, ngokomzekelo, kulungiselelwe ukutyelela abantu. Kodwa ubukhulu becala ukwalusa kunokwenziwa ngendlela engacwangciswanga, nayo eyingenelo kakhulu.

Bangabalusi Nabafundisi Ngalo Lonke Ixesha

Ugqirha uye afune ulwazi namava ukuze enze umsebenzi wakhe. Kodwa abantu abanyangwa nguye bayayixabisa into yokuba abe nobubele, nemfesane, nenkathalo nomdla onyanisekileyo. Ezi mpawu zimele zibe yinxalenye yobuntu bakhe. Zinjalo ke neempawu ezimele zibe yinxalenye yobuntu bomfundisi nomalusi olungileyo, zibe yinxalenye yobuntu bakhe yonke imihla. Umfundisi wokwenene uya kukulungela ukufundisa abo bamngqongileyo xa kuyimfuneko. “Hayi indlela elilunge ngayo ilizwi elithethwa ngexesha elifanelekileyo!” itsho iMizekeliso 15:23. ‘Ixesha elifanelekileyo’ lisenokuba xa ethetha eqongeni, xa eshumayela kwindlu ngendlu, okanye xa encokola kwiHolo yoBukumkani okanye emnxebeni. Ngokufanayo, umalusi olungileyo uzabalazela ukuba neempawu ezintle, nezibonakalisa inkathalo ngalo lonke ixesha, angakwenzi oko xa esenza amatyelelo okwalusa kuphela. Ekubeni ‘eyiphangalalisile intliziyo yakhe,’ uya kusebenzisa onke amathuba avelayo ukuze aluse izimvu, azinike inyameko eziyifunayo ngexesha elililo. Yiloo nto ke emenza athandeke emehlweni ezimvu.—Marko 10:43.

UWolfgang, ngoku ongumdala, ukhumbula utyelelo nje lokubutha olwenziwa sesinye isicaka solungiselelo nenkosikazi yaso kwintsapho yakhe. Uthi: “Abantwana bethu bayivuyela gqitha ingqalelo abayifumanayo kunye nexesha elimnandi esaba nalo. Nangoku basathetha ngalo.” Ewe, esi sicaka solungiselelo sabonisa ukuba siyakhathala; ‘sasiyiphangalalisa intliziyo yaso.’

Elinye ithuba ‘lokuphangalalisa intliziyo kabani’ kukutyelela abagulayo, ukubabhalela imidana nje yokubakhuthaza, okanye ukubatsalela umnxeba—nayiphi na into ebonisa ukuba uyakhathala! Nceda xa kuyimfuneko. Xa befuna ukuthetha, phulaphula ngenyameko. Ncokola ngemisebenzi eyakhayo nechulumancisayo yobuthixo eyenziwa kwibandla lasekuhlaleni nakwezinye iindawo. Bancede bakhangele phambili kwikamva elizukileyo elibekelwe abo bathanda uYehova.—2 Korinte 4:16-18.

Ukongezelela Kumatyelelo Okwalusa

Ngoxa siyikhumbula injongo yokwalusa, kuyacaca ukuba ukwenza amatyelelo okwalusa acwangcisiweyo kumakhaya abazalwana, nangona kubalulekile, kuyinxalenye nje yoko kubandakanyekileyo. Umalusi onothando ‘uyayiphangalalisa intliziyo yakhe’ ngokungeneka phantsi kwazo zonke iimeko nangawo onke amaxesha. Ulwalamano olunothando aluhlakulelayo kubazalwana bakhe luyabaqinisekisa ukuba ngamaxesha eengxaki, akukho mfuneko yakuba boyike, besazi ukuba umzalwana wabo onothando, umalusi ongumKristu, uyabakhathalela.—INdumiso 23:4.

Ewe, ‘phangalalisani iintliziyo zenu’ nonke nina balusi abangamaKristu. Bathandeni ngokunyaniseka abazalwana benu—bakhuthazeni, bahlaziyeni, bakheni ngokomoya ngazo zonke iindlela eninokukwazi ngazo. Bancedeni baqine elukholweni. (Kolose 1:23) Zakuba zisikelelwe ngabalusi abangamaKristu ‘abaphangalalisa intliziyo yabo,’ izimvu aziyi kuswela nto. NjengoDavide ziya kuzimisela ukuhlala endlwini kaYehova imihla emide. (INdumiso 23:1, 6) Ngaba yintoni enye enokufunwa ngumalusi onothando?

[Umbhalo osemazantsi]

a Amacebiso aphathelele ukwenza amatyelelo okwalusa anokufunyanwa kwiMboniselo kaSeptemba 15, 1993, iphepha 20-3, nekaMatshi 15, 1996, iphepha 24-7.

[Ibhokisi ekwiphepha 30]

Abalusi AbangamaKristu

• Bakhonza ngenzondelelo nangokuzithandela

• Bayawondla baze bawunyamekele umhlambi

• Banceda abanye ukuze bazabalazele ukuba ngabalusi

• Batyelela abagulayo baze babanyamekele

• Bakuphaphele ukubanceda abazalwana babo ngamaxesha onke

[Imifanekiso ekwiphepha 31]

Abadala basoloko bengabalusi, enoba kukwinkonzo yasentsimini, ezintlanganisweni okanye ezimbuthweni

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share