UThixo Akalulibali ‘Uthando Enalubonakalisa Kulo Igama Lakhe’
“KUBA akanantswela-bulungisa uThixo, ukude awulibale umsebenzi wenu, nomzamo wothando enalubonakalalisa kulo igama lakhe, nabalungiselelayo nje abangcwele, nisamana nibalungiselela.” (Hebhere 6:10) La mazwi ompostile uPawulos ayinyaniso kumaNgqina kaYehova aseMpuma Yurophu. Ekhonza ngokuthembekileyo ngenxa yegama likaThixo, aye asebenza nzima ixesha elide kangangamashumi eminyaka phantsi kwemiqathango eyayimiselwe ngoorhulumente bangaphambili ababelawulwa yiSoviet. UYehova uyazikhumbula izenzo zabo ezilungileyo yaye ubathululela iintsikelelo zoBukumkani. Ngokomzekelo, makhe siphos’ iliso kwingxelo yonyaka wenkonzo odluleyo yamazwe nje amathathu aloo mimandla.
Imimandla Eyayisakuba Ngaphantsi KweSoviet Union
Imimandla eyayisakuba ngaphantsi kweSoviet Union inikela ingxelo yokuba ebudeni bonyaka wenkonzo we-1992, incopho yenani labavakalisi boBukumkani iye yanda ngama-35 ekhulwini—ukusuka kuma-49 171 ukusa kuma-66 211! Kodwa akuphelelanga apho, ekubeni abo bavakalisi bebekhuthele gqitha, njengoko kunokubonwa kulwando oluhle loncwadi lweBhayibhile oluhanjisiweyo, kuquka namaphephancwadi. Kwakhona baye bazisebenzisa kakuhle iincwadana ezinemifanekiso neencwadana, ekubeni behambise ezili-1 654 559. Oku kuliphindaphinda kathathu inani lonyaka ophelileyo ebelingama-477 235! Iye yanjani intsabelo ngenxa yokuhanjiswa kwazo zonke ezi ncwadi? Inani lezifundo zeBhayibhile zamakhaya liye laphindaphindeka. Ngoku kuqhutywa izifundo zeBhayibhile ezingama-38 484.
Kwakhona, ababa nenxaxheba kwinkonzo yobuvulindlela bobuncedani baye banda ngama-94 ekhulwini. Ngokucacileyo oku kube negalelo kwisimbuku esiphawulekayo sabafundi abatsha ababhaptiziweyo, abali-26 986, xa kuthelekiswa nenani lonyaka ophelileyo elingama-6 570, ulwando olumangalisayo lwama-311 ekhulwini!
Okokuqala kwenzeka njani ukuba bambi baba bantu batsha babhaptiziweyo babe nomdla kwiindaba ezilungileyo? Maxa wambi inkxalabo enzulu yeNgqina eliqhuba isifundo yaba ngunobangela woku. Umveleli owongamelayo waseMoldova ubalisa oku:
“Mna nomfazi wam satyelela ibhinqa elithile elalibonakalise umdla ngaphambili kwinyaniso yeBhayibhile. Saqalisa isifundo seBhayibhile kunye nalo. Noko ke, umyeni walo akazange abonakalise mdla kwaphela. Ngenye imini xa sasisendleleni sisiya kuqhuba isifundo emzini weli bhinqa, imozulu yayiqhaqhazelis’ amazinyo yaye kukhithika. Phantse ukuba kwakungekho namnye umntu ezitratweni, kodwa sakwazi ukufika emzini wakhe kanye ngexesha elimisiweyo. Eli bhinqa layixelela oku indoda yalo: ‘Ngaba uyayibona indlela abasikhathalele ngayo aba bantu? Bayalibamba ixesha nangona likhithika.’ Esi siganeko samenza umyeni wakhe wacingisisa nzulu. Wayiguqula ingqondo yakhe waza wangenelela esifundweni, yaye ngoku yena nomfazi wakhe bangamaNgqina abhaptiziweyo.”
Ngamanye amaxesha ukuba nomoya ozolileyo kweNgqina kunokuvusa umdla kwiindaba ezilungileyo. Umdala othile, okwangowaseMoldova, waba nala mava:
“Indoda endayityelelayo kwintsimi endandiyisebenza yayingenamdla kumaNgqina kaYehova. Yandixelela ukuba yayingum-Othodoki, icawa kayise noyisemkhulu. Ngoko yandicela ukuba ndiphume ndiphele kumasango omzi wayo. Noko ke, ngaphambi kokuba ndihambe, yandinika ithuba lokuba ndiyixelele injongo yotyelelo lwam. Ndayibonisa uMateyu 28:19, othi: ‘Hambani ngoko niye kuzenza abafundi zonke iintlanga, nibabhaptizela egameni loYise, loNyana, loMoya oyiNgcwele.’ Ngoko ndayinika idilesi yendawo esiqhubela kuyo iintlanganiso ndaza ndahamba. Okwandimangalisayo kukuba, kwiveki kamva le ndoda yeza kwiintlanganiso zethu! Yahlala de lwaphela ucwangciso. Yachaza ukuba ebudeni beveki, yayizive ibuhlungu ngenxa yokuba ingakhange ibonakalise buhlobo kum. Kwaqaliswa isifundo seBhayibhile ngoko nangoko, yaye ngoku ingomnye wabazalwana bethu.”
Enye imbalasane ephawulekayo yonyaka wenkonzo ibe yintsabelo enkulu kakhulu kwiintswelo zabazalwana bethu kuloo mmandla. Ebudeni bobusika bowe-1991 ukuya kowe-1992 kwathunyelwa malunga neetoni ezingama-400 zokutya nempahla eninzi yokunxiba yamadoda, yabafazi, neyabantwana kwabo babeswele. Le mpahla ngokusisiseko yasasazwa kuzo zonke iindawo ezazisakuba ngummandla waseSoviet Union, ukuya kuthi xhaxhe ngeIrkutsk eSiberia kunye naseKhabarovsk, kufuphi neJapan. Ngokwenene obu bubungqina obuchukumisayo bokuba uYehova akalulibalanga uthando abazalwana bethu abalubonakalisileyo kulo igama lakhe! Obu bungqina bothando lobuzalwana olushukunyiswa ngumoya kaYehova kwakhona buye baphumela ekubamanyaniseni nentsapho yabo yasemhlabeni wonke. Ngokomzekelo, omnye udade waseUkraine wabhalela iofisi yesebe esithi:
“Indlela enisincede ngayo iye yasichukumisa ngokunzulu. Siye sachukumiseka kangangokuba siye sacela kule nto yabantwana saza sambulela uYehova uThixo kuba engasilibalanga. Liyinyaniso elokuba, kwanangoku sitsala nzima ngokwezinto eziphathekayo, kodwa ngenxa yoncedo esilufumene kubazalwana bethu baseNtshona, siye safumana izinto ezithile eziphathekayo. Ngoku, ngenxa yoncedo lwenu, intsapho yethu iya kukwazi ukunikela ixesha elingakumbi enkonzweni kaYehova. Ukuba uYehova uyathanda, mna nentombi yam siya kungenela inkonzo yobuvulindlela bobuncedani ebudeni beenyanga zehlobo.”
Ukongezelela koku, umgudu wokunceda wanikela ubungqina kwabangaphandle kuba ababukeli babenokubona ukuba amaNgqina ayebonakalisa uthando ngezenzo zawo. Intsapho esuka kwelinye ibandla yabhala oku: “Siye safumana uncedo lwezinto eziphathekayo eziquka ukutya nempahla yokunxiba. Luncedo olukhulu kakhulu! Inkxaso nokhuthazo lwenu zisisifundo kuthi sokuba nathi ngokufanayo sifanele senze okulungileyo kwabanye. Esi senzo sothando asizange sibe sesingaphawulekiyo kwabangakholwayo, kwanakubantu abanomdla kunye neentsapho zabo; sibe bubungqina obukhulu ngobuzalwana bokwenyaniso.”
Iindibano ezintlanu zesithili kwakunye nendibano enye yezizwe ngezizwe eziqhutywe kwinyanga kaJuni nekaJulayi odluleyo, ebezinomxholo othi “Abathwali Bokukhanya,” zibe bobunye ubungqina bentsikelelo uYehova ayithulula phezu kwamaNgqina akhe ngenxa yomsebenzi onzima awenzileyo nothando alubonakalisileyo ekwenzeni ukuba igama lakhe laziwe. Kwezi ndibano bekukho abantu abangama-91 673, yaye kuye kwabhaptizwa abangama-8 562. Olona ziwo lukhulu lwaba seSt Petersburg, isixeko ebekuqhutyelwa kuso indibano yezizwe ngezizwe, apho abangama-46 214—kuquka neendwendwe ezivela kumazwe amalunga nama-30 ehlabathini jikelele—bebehlanganisene kwiBala Lemidlalo laseKirov.
ESiberia enye indoda emalunga nama-60 eminyaka ubudala yeza kumabala ebekuqhutyelwa kuwo indibano eIrkutsk ukuza kutyebisa nje iliso. Yathetha oku: “Bonke abakhoyo apha banxibe kakuhle, banobuso obuzele luncumo, yaye banobubele omnye komnye. Aba bantu banjengentsapho enye emanyeneyo. Ubani unokuba noluvo lokuba bangabahlobo kungekuphela nje apha ebaleni kodwa kwanakubomi babo bemihla ngemihla. Ndifumene uncwadi lweBhayibhile olusemagqabini yaye ndifunde okungakumbi ngohlobo elulo le ntlangano. Ndifuna ukudibana namaNgqina kaYehova ndize ndifundisise iBhayibhile kunye nawo.”
Kwakwindibano ekwanye eIrkutsk, apho bekukho abantu abangama-5 051 abezileyo, ibhinqa elithile ebelivela kwiRiphabliki yaseYakut, eSiberia, lagqabaza lisenjenje: “Xa ndikhangela kwaba bantu, zisuka zifun’ ukuhla iinyembezi ngenxa yovuyo. Ndinombulelo ongazenzisiyo kuYehova kuba endincedile ukuze ndazi olu hlobo lwabantu. Apha endibanweni, ndifumene uncwadi, yaye ndifuna ukuthetha nabanye ngalo. Ndikufuna gqitha ukuba ngumnquli kaYehova.”
Umphathi weCentral Stadium eAlma Ata, eKazakhstan, apho bekukho abantu abangama-6 605 endibanweni, wathetha oku kulandelayo: “Isimo senu sengqondo sindichukumisile. Ngoku ndeyisekile lelokuba nonke, abancinane nabakhulu, ningabantu ababekekileyo. Andinakuthi ndiyakholelwa kuThixo, kodwa ndiyakholelwa kwizinto ezingcwele ezibonakaliswa bubuzalwana benu, kwisimo senu sengqondo ngakwizinto zokomoya nakwizinto eziphathekayo.”
Elinye ipolisa ebelikwindibano ebiseAlma Ata lathi: “Kokwesibini ndidibana nani, sihlandlo ngasinye sidibana endibanweni. Kumnandi gqitha ukusebenza namaNgqina kaYehova.”
ERomania
UYehova akalulibalanga uthando abazalwana baseRomania abalubonakalisileyo kulo igama lakhe. Lo nyaka wenkonzo odluleyo uphawuleke ngeziganeko ezininzi ezivuyisayo kumaNgqina. Okokuqala, iofisi yesebe yamiswa kwakhona eBucharest. Ukusebenza okokugqibela ngokwasemthethweni kwanqunyanyiswa ngowe-1949. Kule ofisi kukho abazalwana noodade abamalunga nama-20 abasebenza kwezi zakhiwo zitsha. Iofisi yesebe ikhonza abavakalisi abangama-24 752—kwaye kufikelelwe incopho entsha nebonisa ulwando lwama-21 ekhulwini ngaphezu komlinganiselo wonyaka ophelileyo.
Emva kweminyaka emininzi beshumayela ngokufihlakeleyo, abavakalisi baqhelana ngokulunge ngakumbi nomsebenzi wasesidlangalaleni wokunikela ubungqina kwindlu ngendlu. Amava avela eMureş County abonisa indlela wambi amaNgqina alisebenzisa ngokuyingenelo ngayo naliphi na ithuba ekushumayeleni kwabanye, naxa eseluhambeni. Iofisi yesebe ibhala isenjenje:
“Omnye umvakalisi wagqiba ekubeni awagqogqe onke amagumbi kaloliwe eshumayela. Abantu ngokubanzi babesabela kakuhle, kodwa kwigumbi lokugqibela likaloliwe, kwabakho iingxaki. Akuzange kubekho namnye kubahambi owafuna ukwamkela umbhalo wamaphephancwadi ethu. Ekugqibeleni, enye indoda, inomsindo gqitha, yaphakama yaza yadanduluka isithi: ‘Ndiza kuwalahla ngefestile onke la maphephancwadi akho! Kutheni le nto usikhathaza kangaka ngolu nqulo lwakho?’ Lo mvakalisi waphendula ngobubele echaza ukuba nokuba wayewalahle phandle amaphephancwadi, abantu abathile basenokungenelwa ngenxa yesenzo sakhe—abo babeza kuwachola amaphephancwadi. Iphawula ukuzola kwalo mvakalisi, le ndoda yachukumiseka kakhulu kangangokuba yathabatha amaphephancwadi yaza yaqalisa ukuwasasaza kubahambi ababekwelo gumbi likaloliwe. Okumangalisayo kukuba, bonke bawathabatha amaphephancwadi. Emva kokuba iwasasazile, le ndoda yashiyeka ingenayo imibhalo yayo yobuqu. Ngenxa yoko, lo mzalwana wayibuza esithi: ‘Mhlekazi, ngaba akuyifuni eyakho imibhalo yobuqu?’ Ngelo xesha le ndoda yathabatha elinye iphephancwadi komnye umhambi owayenemibhalo emibini yaza yathi: ‘Ngoku nam ndinawo umbhalo wobuqu!’”
Kumazwe amaninzi umsebenzi wokushumayela owenziwa ngamaNgqina kaYehova maxa wambi uye wavusa inkcaso kubefundisi beNgqobhoko. ERomania, abefundisi beCawa yamaOthodoki ngokufuthi bayajwaqeka ngumsindo xa bebona amaNgqina. Kodwa oku akunakumthintela uYehova ukuba asikelele abantu bakhe ngenxa yothando abalubonakalise kulo igama lakhe. Omnye umveleli wesiphaluka ubhala esenjenje:
“Ndikunye nebandla lasekuhlaleni, sahamba ukuya kukhonza emaphandleni. Kwakukho abazalwana abalikhulu. Saqesha uduladula owahamba nathi malunga neekhilomitha ezingama-50 ukuya kufika emaphandleni, kwidolophu encinane. Samema abantu abaninzi ukuba beze kuphulaphula intetho yesidlangalala eyayiza kunikelwa kwiHolo Yemicimbi Yasekuhlaleni. Yakuba nje iqalisile intlanganiso, umfundisi wamaOthodoki wagaleleka eze kuphelisa le ntlanganiso yethu. Amapolisa azama ukumthintela lo mfundisi. Sekunjalo, akazange afune ukuzola. Waphumelela ekuyipheliseni intlanganiso xa waphula iglasi yocango lwangaphambili ekwakungenwa ngalo. Noko ke, uninzi lwabemi basekuhlaleni aluzange luvumelane konke konke nendlela umfundisi awaziphatha ngayo. Ngoko kwanikelwa ubungqina obucokisekileyo kubo bonke ababezile, yaye kwasasazwa uncwadi oluninzi.”
Okulusizi kukuba, kwimimandla ethile yeli lizwe, kukho amaNgqina ambalwa gqitha. Xa kwafika uvulindlela othile othe ngxi kwisiphaluka saseOlt okwesihlandlo sokuqala, wafika kukho abazalwana abasithoba kuphela kuso sonke isiphaluka nentsimi enkulu ekufanele kushunyayelwe kuyo. Emva konyaka inani lamaNgqina landa laya kutsho kuma-27, abahlanu kuwo yayingabavakalisi abavuselelweyo. Lo vulindlela wafumana indawo yokuhlala kwisixeko saseCorabia, apho kwakungekho maNgqina konke konke. Emva kokuba amaNgqina ayelapho kangangeentsuku ezingama-45 kuphela, umfundisi owongamela icawa yasekuhlaleni wavakalisa kwijelo losasazo laseCraiova inkcaso awayenayo nxamnye nomsebenzi wawo. Wawatyhola ngelithi “ayehlasele” isixeko saseCorabia ngeemfundiso zawo, ezama ukwenza abantu bashiye unqulo lwabo. Iintlaselo zaqhubela phambili, ngenjongo yokuthintela umsebenzi nokutshabalalisa udumo oluhle lwamaNgqina kuloo mmandla. Konke kwafikelela incopho yako xa abazalwana babekwindibano yesithili eBucharest. Umfundisi owongamela icawa yamaOthodoki eCorabia wenza isaziso esingqongqo emva kwentshumayelo yakhe ecaweni esithi: “Sonke sifanele senze umngcelele woqhankqalazo oza kushukumisa amapolisa ukuba athabathe amanyathelo nxamnye namaNgqina, abantu abasulele wonke ummandla ngeempapasho zabo baza bafaka ityhefu ebantwini.” Kodwa kanye ngobusuku bangaphambi kokuba indibano iqale, kwenzeka into ethile engaqhelekanga. Iqela leendlavini latshabalalisa indlu yecawa kamfundisi kwakunye neHolo yeSixeko Yemicimbi Yasekuhlaleni. Ngoko ke, intlanganiso yokuqhankqalaza ayizange iqhubeke!
Imimandla Eyayisakuba Ngaphantsi KweYugoslavia
Unyaka wenkonzo we-1992 ube ngowona nyaka unzima kubazalwana abakummandla waseYugoslavia. Noko ke, kwangaxeshanye, baye baba namava athile avuyisayo. Okuvuyisayo kukuba, uYehova akawulibali umsebenzi wabo nothando abalubonakalise kulo igama lakhe.
Imfazwe yaqalisa eSlovenia, yanabela eCroatia, yaza kamva yaqalisa eBosnia naseHerzegovina. Kwisithuba nje sonyaka, amaZwana amatsha amahlanu aphuma kwiriphabliki enye ayezabalazela ukumisa imida yawo, imithetho, nohlobo lwawo lwemali. Kwafuneka ukuba amaNgqina kaYehova amaninzi ashiye amakhaya awo aze afumane ikhusi kubazalwana bawo abakwezinye iindawo. Njengakwamanye amazwe aseMpuma Yurophu, kwamiselwa iikomiti zongxamiseko kwizixeko ezikhulu, ezaziza kunyamekela abazalwana bethu abaswele indawo yokuhlala, ukutya, nempahla enxitywayo. Ebudeni bonyaka wenkonzo, kwabelwa abazalwana abasemabandleni akwimimandla ethwaxwe yimfazwe malunga neetoni ezingama-55 zokutya. Kufunyenwe iileta ezininzi ezivakalisa uxabiso.
Abazalwana baseDubrovnik babalisa indlela ababenombulelo ngayo ngoncedo olunikelweyo. Njengoko omnye udade wafika ekhaya ephethe ipasile yokutya, ummelwane wakhe wambuza apho wayewathenge khona amaqanda. Lo dade wamxelela ukuba wayewathunyelelwe ngabazalwana bakhe bokomoya abakwenye indawo. Ummelwane wakhwankqiswa. Kwenye imeko indoda engaziwayo eSlovenia yabiza umdala othile yaza yamxelela oku: “Ndivile ukuba amaNgqina kaYehova asasaza ukutya akufumene kubazalwana bawo ngendlela efanelekileyo. Noko ke, ndithumele iipasile eziliqela ebantwini; abazange bazifumane. Ngaba ndingazithumela kuni iimpahla ezinjalo zoncedo, ukuze nizisasaze?” Kwakhona, amaphephandaba noonomathotholo banikela ingxelo entle ngomsebenzi wethu wokunceda.
Umzalwana othile owabhaptizwa kwindibano yezizwe ngezizwe eyayiseZagreb ngowe-1991 wabuqonda obu bunzima obabukho waza wathenga ivenkile yonke yokutya. Oku kutya wakuthabathela emzini wakhe owawukufuphi nommandla ekuliwa kuwo. Njengoko ukutya kwakusiya kunqongophala ngakumbi, eli lungiselelo langqineka liyintsikelelo yokwenene kubazalwana.
Lafumaneka iphepha-mvume lokuba ilori enkulu iphathele abazalwana ababevaleleke eSarajevo okona kutya kusetyenziswa gqitha apho. Siyavuyiswa kukuthi oko kutya kwahanjiswa ngokuphumelelayo.
Umlo ubangele ilahleko enkulu nakubemi nje abaqhelekileyo. Okubuhlungu kukuba ngasekupheleni konyaka wenkonzo, abazalwana noodade wethu abathandathu nabantu ababini abanomdla baye balahlekelwa bubomi babo, yaye abathile baye benzakala.
Noko ke, amava amaninzi abonisa ukuba ngokuyintloko, ukuba ngomnye wamaNgqina kaYehova kuyakhusela. Kwenye imeko abazalwana babekuhambo oluya kwindibano yesithili eBelgrade xa uduladula ababehamba ngawo wamiswa ngamajoni, awayebuza enoba kwakukho amalungu onqulo oluthile phakathi kwabo. Abazalwana baphendula ngelithi kwakungekho namnye. Kwafuneka babonise amaqweqwe abo ofaniso, yaye bambi kubo babenamagama awayebonisa ukuba babesenokuba bangamalungu olo nqulo. Amajoni ababek’ ityala ngokuxoka, kodwa abazalwana babephethe okuthile okubhaliweyo okungqina ukurhoxa kwabo ecaweni; nakubeni babezalelwe kolo nqulo, bachaza ukuba, ngoku babengamaNgqina kaYehova, bakuhambo oluya endibanweni yabo. Ekuvile oku amajoni abayeka baqhubeka nohambo lwabo.
Oovulindlela baqhubeka nenkonzo yabo ngokungenamikhinkqi, yaye oku kungqineke kulukhuthazo ngenene emsebenzini. IMboniselo, enamaphepha amahle anemibala emine, iguqulelwa ngaxeshanye ngazo zonke iilwimi eziphambili kuloo mmandla. Rhoqo ibonelela abathandi benyaniso nobulungisa ‘ngomamkelo wabo wokudla kokomoya ngexesha elifanelekileyo.’ (Luka 12:42) Ebudeni bonyaka wenkonzo we-1992, kubhaptizwe abazalwana noodade abatsha abangama-674.
Ngokuqinisekileyo, uThixo akawulibalanga umsebenzi wabazalwana baseMpuma Yurophu nothando abalubonakalise kulo igama lakhe. Ngokubhekele phaya, unqwenela ukuba bonke abanquli bakhe, kungakhathaliseki apho bahlala khona, balandele isiluleko esihle sikaPawulos esinikelwe ngokulandelayo, kumaHebhere 6:11, esithi: “Sinqwenela ke, ukuba ulowo kuni alubonakalalise kwaolo lukhuthalo, asingise kwinzaliseko yethemba, ade ase ekupheleni.”