Abavakalisi BoBukumkani Bayabalisa
Bayiguqula Indlela Ababephila Ngayo
ALITHANDABUZEKI elokuba ubabonile bethetha nabanye ezitratweni, betyelela kwizindlu ngezindlu, okanye besiya kwiintlanganiso zamaKristu kwiiHolo zawo zoBukumkani. Sithetha ngolutsha oluzilungisa ngokufanelekileyo lwamaNgqina kaYehova. Usenokuba ugqibe kwelokuba olu lutsha lungamaNgqina kuba abazali balo belufundise ukuba lube ngawo yaye oko kunjalo ngoninzi lwalo. Kwelinye icala, kukho abathile kwaba bantu baselula abanemvelaphi eyahluke gqitha nabaphila ngendlela eyahluke ngokupheleleyo kwindlela ababephila ngayo ngaphambili. Enyanisweni, abo baboniswe kwiphepha elilandelayo ngaphambili babenxulumana namaqela awayekwenza ukwaphul’ umthetho nokusebenzisa kakubi iziyobisi isonka sawo semihla ngemihla. Yintoni eyabenza baguqula ubomi babo ngokupheleleyo ngolu hlobo? Makhe sityelele kwidolophu yaseNorway size sidibane nabathile baba bantu baselula abaye benza iinguqulelo ezinjalo.
Isiseko Sokwenza Iinguqulelo
Xa amaNgqina amabini adibana noAnnette kumsebenzi wendlu ngendlu, wayeneminyaka eli-19 ubudala. Ukhumbula oku: “Ngokufuthi ndandixelelwe ukuba ndingaze ndithethe namaNgqina kaYehova, kodwa ndandifun’ ukwazi ndaza ndawamemela endlwini.” Wayesebenzisa iziyobisi ukususela kubudala beminyaka eli-11 yaye wayebandakanyeke kwizenzo eziliqela zokuqhekeza nokubiwa kwee-nqwelo-mafutha.
Iindaba ezilungileyo zoBukumkani zaba nomtsalane kuye. Wakhuthazwa ngokukodwa lithemba lovuko, ekubeni wayefelwe ngunina xa wayeneminyaka emihlanu ubudala. Ngoko wasamkela isifundo seBhayibhile sesisa waza waqalisa ukuya kwiintlanganiso kwiHolo yoBukumkani. Waxelela umfana awayethandana naye nabanye oko wayekufunda. Basabela njani? Abazange bafune nokuva baza bamtyhola uAnnette ngelithi udyojwe ngentshongo emehlweni. Sekunjalo, kamva bambi babo babengabona bachasayo baqalisa ukufundisisa iBhayibhile.
Thabatha ngokomzekelo uEspen, umfana oneminyaka engama-20 ubudala. Waziva iindaba ezilungileyo zoBukumkani ngomfana owayethandana noAnnette yaye engaphozisanga maseko wafuna ukuqhutyelwa isifundo seBhayibhile. Noko ke, wayelindele ukuba sentolongweni kangangeenyanga ezine, njengoko wayebandakanyeke ekungeniseni ngokungekho mthethweni iziyobisi yaye, njengoAnnette, wayebandakanyeke kwizenzo eziliqela zokuqhekeza. Wayekwasebenzisa icuba, umya, nezinye iziyobisi. Ngoko ke, yintoni ebingenza umntu owayebandakanyeke kwizinto ezilolo hlobo afune ukuqalisa ukufundisisa iBhayibhile? UEspen waqalisa ukuqonda indlela elilize nengenanjongo ngayo indlela awayephila ngayo. Ubalisa esenjenje: “Ndatsalwa ngamadinga ekamva aseBhayibhileni awandinika injongo ebomini. Ngoko ndaqalisa ukufundisisa ukuze ndifumanise enoba oko ndandikuxelelwe kwakuyinyaniso kusini na.”
Abanye Bafuna Ukufundisisa IBhayibhile
Malunga neli xesha, omnye umfana ophuma kwakwiqela elikwalinye laba bantu baselula waziva iindaba ezilungileyo, yaye naye ngokunjalo waqalisa ukufundisisa nokuya kwiintlanganiso. Ngokulandelayo, kwaqaliswa isifundo nomnye waba bantu baselula, yaye naye waqalisa ukuya kwiintlanganiso. Kungekudala emva koko, omnye umfana wathelela abahlobo bakhe ekufundisiseni iBhayibhile nasekwenzeni inkqubela ngokomoya. Kwakhona omnye oselula kwakweli qela likwalinye wachukunyiswa ziinguqulelo zokwenene ezazisenziwa ngabahlobo bakhe, yaye ngethuba nje elifutshane, wafuna ukufundisisa iBhayibhile.
UGilbert, imvumi eselula ephuma kwakwiqela elikwalinye, waqalisa ukufundisisa iBhayibhile. Abazali bakhe bobabini babulawa sisifo somhlaza, ngoko wathuthuzelwa lithemba lovuko eliseBhayibhileni. (Yohane 5:28, 29) Naye wayekwasebenzisa umya yaye ephila ubomi bokuzibhubhisa, yaye wayeneminqweno yokuba ngumntu odumileyo kumculo werock. Noko ke, ekuhambeni kwexesha, wenza inkqubela entle ngokomoya waza kungekudala wafikelela kwisigqibo sokuba abe liNgqina likaYehova. Ekugqibeleni, umninawa kaEspen waqalisa ukuhlolisisa iBhayibhile nokunxulumana namaNgqina.
Inyaniso YeBhayibhile Iguqula Ubomi Babantu
Kwabakho inguqulelo enkulu eyenzekayo kwaba bantu baselula ababenxiba ngokungakhathali ngaphambili, beneenwele ezingachazwanga, bebandakanyeke ekusebenziseni iziyobisi, kubusela, nakwezinye izenzo zolwaphulo-mthetho. UAnnette ungumvakalisi ofanelekileyo woBukumkani yaye uye wakhonza njengovulindlela ithuba elingangonyaka. UEspen noGilbert baye bakhonza njengoovulindlela abangabancedani, yaye bazizicaka zolungiselelo. Bobabini batshate ebandleni lamaKristu. Abanye abane abangakumbi beqela langaphambili nabo bangabavakalisi boBukumkani abanenzondelelo!
Kuthekani ngesigwebo senyanga ezine ekwakufuneka sifunyanwe nguEspen? Ngenxa yeenguqulelo awazenzayo ebomini bakhe, isigwebo sakhe saguqulelwa ekubeni asebenze iiyure ezingama-80 kumsebenzi wasentlalweni. Ngenxa yesivumelwano esenziwa ngamapolisa nabanye, ezi yure wazichithela ekusebenzeni kwiHolo yoBukumkani yamaNgqina kaYehova yasekuhlaleni. Amapolisa ayekholiswe gqitha leli lungiselelo.
Ewe, abanye abantu abaselula abaninzi ehlabathini jikelele banemvelaphi yokuba zizaphuli-mthetho. Kodwa inyaniso yeLizwi likaThixo ibanike iimpendulo kwimibuzo ebalulekileyo nethemba eliqinisekileyo ngekamva. Ngenxa yoko, abasezizo izaphuli-mthetho okanye abasebenzisi beziyobisi, yaye abasahambi benxibe nje ngokungakhathali. Ekubeni beguqule indlela abaphila ngayo, bafana twatse nabantu abakhankanywe ngasentla—abaselula, abazilungisa ngokufanelekileyo, nabangamaNgqina kaYehova akhutheleyo. Bafuna ukwazisa abanye ngezicombululo zeBhayibhile ezihlala zihleli kwiingxaki zabantu abaselula abaninzi namhlanje.—Bona eyoku-1 yabaseKorinte 6:9-11.
[Umfanekiso okwiphepha 8]
Ulutsha lwaseNorway luyasabela kwinyaniso