Abavakalisi BoBukumkani Bayabalisa
Iindaba Ezilungileyo Ezivela ENorway
ABAVAKALISI boBukumkani abangaphezu kwama-9 500 baye banamava amaninzi avuyisayo ngeendaba ezilungileyo eNorway. Abo baneentliziyo ezinyanisekileyo bayasiqonda ukuba siyinyaniso isigidimi seBhayibhile esivakaliswa ngamaNgqina kaYehova yaye basigqala sikukuphendulwa kwemithandazo yabo, njengokuba kuphawulwe kumava alandelayo.
◻ Isibini esiselula sathandaza kuThixo ukuba asincede sibe nenjongo ebomini. Kwiveki enye emva koko amaNgqina kaYehova atyelela apho, kwaye umfazi wawamemela ngaphakathi. Indoda yayihlohlwe umoya wokuba ize iwalumkele amaNgqina, ngoko yaphuma endlwini yaya kuhlamba inqwelo-mafutha yayo. Umfazi wayezalelwe eLebanon yaye wayenengxaki yolwimi oluthethwayo apho, ngoko amaNgqina ambonisa igama likaYehova kwiBhayibhile yakhe yesiArabhu. Kwiiveki ezimbini kamva amaNgqina abuya, yaye kwakhona indoda yaphuma phandle isiya kuhlamba inqwelo-mafutha yayo. AmaNgqina ambuza lo mfazi enoba wayecinga ukuba inokubakho kusini na indoda yakhe kwixesha elizayo ukuze ikwazi ukutolika, yaye wathembisa ukuba wayeza kuyicela.
Kutyelelo lwesithathu, inqwelo-mafutha yayicoceke kangangokuba le ndoda yavakalelwa kukuba ayinakusebenzisa oku njengesingxengxezo sokuphuma, ngoko yahlala yaza yabuza imibuzo eliqela ukuze ibone umahluko phakathi kwamaNgqina necawa yasebuRhulumenteni. Olu tyelelo lwathabatha iiyure ezintathu yaye kwashiywa incwadana enemifanekiso kwesi sibini. Xa la maNgqina ahambayo, umfazi waya kulala kodwa indoda yaqalisa ukufunda le ncwadana inemifanekiso, izikhangela zonke izibhalo. Ezinzulwini zobusuku yavusa umfazi wayo yaza yathi: “Unyanzelekile ukuba ukufunde oku.” Wavuka, baza bafunda bobabini de kwayintsimbi yesihlanu kusasa. Beqonda ukuba babeyifumene inyaniso, balila luvuyo baza bathandaza kuYehova, besebenzisa igama lakhe. Kwaqaliswa isifundo seBhayibhile esithe rhoqo nabo, yaye baqalisa ukuya ezintlanganisweni. Indoda yawushiya umsebenzi wayo wezasemkhosini, yaye barhoxa ecaweni yaza yayeka nokutshaya. Ngoku babhaptiziwe yaye ngovuyo bakhonza uYehova ndawonye nabazalwana noodade babo abakulo lonke ihlabathi.
◻ Oodade ababini kubulungiseleli babo bendlu ngendlu eNorway badibana nebhinqa elithile elabonakalisa umdla. Labamema ukuba babuye laza labuza enoba linokumema namanye amabhinqa kusini na. Kutyelelo olulandelayo, kwakukho amanye amabhinqa amane. Elinye lawo lalikhuthele gqitha ecaweni. Lavakalisa ukuba ukususela oko laliselula, lalisoloko lifuna ukuthobela umyalelo kaYesu wokwenza abafundi. Oku kwalikhokelela ekubeni lize eAfrika nomyeni walo kwiphulo lokunceda abantu kumazwe angaphandle. Onke la mabhinqa ayenemibuzo emininzi, yaye kwalungiselelwa ukuba aba dade baye kuwatyelela kwiveki nganye yesibini. Kwamenywa abamelwane abatsha, yaye abanye baqhubeka besiza ngoxa abanye berhoxa, kodwa ilungu lecawa elalikhuthele laqonda ukuba lalifunda inyaniso. Ngenye imini, xa umfundisi wecawa yalo wavakalisa ukuba wayeya kuyixhasa imfazwe yaye wayekholelwa kwimfundiso kaBathathu Emnye, larhoxa ecaweni. Laqalisa ukuya ezintlanganisweni zamaNgqina kaYehova yaye kungekudala laqalisa ukuba nesabelo kumsebenzi wokushumayela. Kungekudala emva koko labhaptizwa. Ekugqibeleni ngoku, emva kweminyaka engama-30, liyakuvuyela ukuwuthobela ngokunyanisekileyo umyalelo kaYesu wokwenza abafundi.—Mateyu 28:19.
UYehova uyabasikelela abazalwana eNorway kwinkonzo yabo engcwele ndawonye nabo baphulaphula iindaba ezilungileyo!