“Bhota! Ngaba Uyazi Ukuba Lingubani Igama LikaThixo?”
KWIOFISI yesebe yamaNgqina kaYehova eBrazil, kwafunyanwa le leta ilandelayo ivela kumantombazana amabini angamawele aneminyaka eli-12 ubudala akwisixeko saseFortaleza:
“Emva phaya ngonyaka we-1990 xa sasikwibanga lesithathu, isikolo sethu salungiselela umboniso wemveliso zorhwebo kwezenzululwazi, ezobugcisa, nezempucuko. Umfundisi-ntsapho wethu samchazela ukuba sasifuna ukubonisa okwahlukileyo koko abanye abafundi babeceba ukukulungiselela. Ekubeni wayekhe wasiva ngaphambili sithetha ngoYehova nangeBhayibhile, wathi: ‘Ngoko ningabhala ngoThixo wenu!’
“Sakubona oku njengethuba lokunikela ubungqina yaye sagqiba ekubeni sibeke ndaweninye uncwadi lweBhayibhile olwalathisela ingqalelo kwigama likaYehova. Salungiselela umbhalo owenziwe wamkhulu wamazwi eNdumiso 83:18 saza sawuncamathisela kumfanekiso weBhayibhile evuliweyo. Kwakhona, sabeka etafileni iinguqulelo zeBhayibhile ezahlukahlukeneyo eziqulethe igama likaYehova. Kwakwitafile ekwanye, sabeka ingqokolela yeentlobo ngeentlobo zoncwadi lweBhayibhile. Ekupheleni kwetafile, samisa umatshini wevideo nomabonwakude ukuze sibonise iindwendwe omnye umzekelo apho igama elithi Yehova lalisetyenziswa khona kumdlalo weqonga othandwa gqitha.
“Ebudeni bomboniso weemveliso zorhwebo, xa umntu esiza kwitafile yethu, sasisithi: ‘Bhota! Ngaba uyazi ukuba lingubani igama likaThixo?’ Emva kokuba sinike undwendwe ithuba lokuphendula, sasihlabela mgama sithi: ‘Khangela! Iinguqulelo ezahlukahlukeneyo zeBhayibhile zibonisa ukuba igama lakhe nguYehova,’ sitsho sisalatha eli gama kwiBhayibhile ezahlukeneyo, njengaleyo kaJoão Ferreira de Almeida, iThe Jerusalem Bible, neNew World Translation. Emva koku sasibonisa umboniso apho umdlali ophambili kumdlalo weqonga ebalaselisa uYehova njengegama likaThixo. Xa abantu babebonakalisa umdla, sasibanika iphephancwadi okanye iphecana elalinenkcazelo engakumbi.
“Omnye kwabaselula oweza etafileni yethu wafuna incwadi ethi Imibuzo Yabantu Abaselula—Iimpendulo Eziluncedo. Umfundisi-ntsapho wethu wayihlolisisa incwadi ethi Ukwenza Ubomi Bentsapho Yakho Bonwabe waza wakhuza esithi: ‘Sii! Enjani yona ukubangel’ umdla incwadi!’ Ngasekupheleni komboniso, sasesihambise iincwadi ezisi-7 amaphecana ali-18, namaphephancwadi angama-67. Saphumelela kwindawo yesithathu embonisweni. Kodwa ngaphezu kwako konke, eyona nto yayisivuyise gqitha kukufumana ilungelo lokwazisa abanye igama likaThixo, uYehova.”