Sisiphi Isithebe Ozondla Kuso?
“Aninako ukwabelana ngesithebe seNkosi nesithebe seedemon.”—1 KORINTE 10:21.
1. Ziziphi izithebe ezibekwe phambi kwethu, ibe umpostile uPawulos ulumkisa athini ngazo?
LA MAZWI aphefumlelweyo ompostile uPawulos abonisa ukuba kukho izithebe ezibini zokomfuziselo ezilungisiweyophambikoluntu.Isithebe ngasinye sahlulwa kukutya kokomfuziselo okubekwe kuso, yaye sonke sitya kwesinye sazo. Noko ke, ukuba sifuna ukukholisa uThixo, asinakutya esithebeni sakhe size kwangaxeshanye silume kancinane esithebeni seedemon. Umpostile uPawulos walumkisa: “Amadini eziwenzayo iintlanga, ziwenzela iidemon, aziwenzeli uThixo. Andithandi ke ukuba nibe ngamadlelane needemon nina. Aninako ukusela indebe yeNkosi nendebe yeedemon; aninako ukwabelana ngesithebe seNkosi nesithebe seedemon.”—1 Korinte 10:20, 21.
2. (a) Sisiphi isithebe sikaYehova esasikho ngemihla yamaSirayeli amandulo, ibe ngoobani ababesiba nesabelo kwimibingelelo yoxolo? (b) Kuthetha ntoni ukudla esithebeni sikaYehova namhlanje?
2 Amazwi kaPawulos asikhumbuza ngemibingelelo yoxolo amaSirayeli amandulo awayeyenza ngaphantsi koMthetho kaYehova. Isibingelelo sikaThixo sasibizwa ngokuba sisithebe, yaye lowo wayesizisa isilwanyana ukuba kubingelelwe ngaso kwakusithiwa unobudlelane noYehova nababingeleli. Njani? Okokuqala, uYehova wayenesabelo kuloo mbingelelo ngenxa yokuba igazi lalitshizwa esibingelelweni sakhe yaye amanqatha ayetshiswa kumlilo ongaphantsi. Okwesibini, umbingeleli wayenesabelo kuba yena (nentsapho yakhe) wayesidla incum eyojiweyo nomlenze wasekunene wesilwanyana ekwakubingelelwa ngaso. Yaye okwesithathu, lowo wayebingelela wayesiba nesabelo ngokudla konke okuseleyo. (Levitikus 7:11-36) Namhlanje, ukudla esithebeni sikaYehova kuthetha ukuba simnqula ngendlela afuna ngayo, njengoko uYesu nabapostile bakhe basimisela umzekelo. Ukuze senze oku, simele sizondle ngokomoya koko uYehova asilungiselele kona ngeLizwi nentlangano yakhe. AmaSirayeli, awayenobudlelane obukhethekileyo noYehova kwisithebe sakhe, ayengavumelekanga ukubingelela kwiidemon kwisithebe sazo. AmaSirayeli okomoya namaqabane awo ‘azezinye izimvu’ nawo uThixo akawavumeli.—Yohane 10:16.
3. Ubani unokuba netyala lokudla esithebeni seedemon njani kulo mhla wethu?
3 Ubani unokuba netyala lokudla esithebeni seedemon njani kulo mhla wethu? Ngokuhambisela phambili izilangazelelo zayo nantoni na ayichasileyo uYehova. Isithebe seedemon siquka bonke ubuxoki beedemon, obenzelwe ukusilahlekisa nokusikhukulisa simke kuYehova. Ngubani obengathanda ukondla intliziyo nengqondo yakhe ngetyhefu enjalo? AmaKristu okwenyaniso akavumi kuba nesabelo kwimibingelelo abantu abaninzi namhlanje abayenza koothixo bemfazwe nabobutyebi.—Mateyu 6:24.
Ukuphepha ‘Isithebe Seedemon’
4. Nguwuphi umbuzo sonke esijamelene nawo, yaye kutheni singenakuthi ngabom sifune ukudla esithebeni seedemon?
4 Umbuzo sonke esijamelene nawo ngothi, Sisiphi isithebe endizondla kuso? Asinakusiphepha isibakala sokuba sinyanzelekile ukuba sibekho isithebe esitya kuso. (Thelekisa uMateyu 12:30.) Asinakuthi ngabom sifune ukutya esithebeni seedemon. Ukwenjenjalo kungabangela ukuba silahlekelwe yinkoliseko yokuphela koThixo oyinyaniso nophilayo, uYehova. Kwelinye icala, kuphela kukutya ukudla okusesithebeni sikaYehova okukhokelela ekubeni sifumane ubomi obungunaphakade elonwabeni! (Yohane 17:3) Kukho intetho ethi umntu uyiloo nto ayityayo. Ngoko ke, wonk’ ubani ofuna ukuzigcina esempilweni entle emzimbeni nasengqondweni umele azilumkele izinto azityayo. Kanye njengokuba ukutya ukudla okungenazondlo nokunamafutha kakhulu, nangona kulungiswa kube nencasa ngemichiza yakhona, kungenagalelo ekubeni sihlale siphilile ngokomzimba, ngokufanayo ubuxoki beli hlabathi obungumtya nethunga neengcamango zobudemon kukutya kokomfuziselo okungenazondlo okungalunganga okuya kuzonakalisa iingqondo zethu.
5. Sinokukuphepha njani ukuzondla ngeemfundiso zeedemon namhlanje?
5 Umpostile uPawulos waxela kwangaphambili ukuba ngemihla yokugqibela, abantu babeya kuphambukiswa ‘ziimfundiso zeedemon.’ (1 Timoti 4:1) Iimfundiso zeedemon ezinjalo azifumaneki kwiinkolelo zonqulo lobuxoki kuphela kodwa zikwasasazwa ngokubanzi nangezinye iindlela. Ngokomzekelo, kufuneka sihlolisise iincwadi namaphephancwadi thina nabantwana bethu esiwafundayo, iinkqubo zikamabonwakude esizibukelayo, nemidlalo yeqonga nemifanekiso eshukumayo esiyibukelayo. (IMizekeliso 14:15) Ukuba sizihlaziya ngokufunda amabali, ngaba ngawogonyamelo, isini esigqwethekileyo, okanye izenzo zobugqi? Ukuba sifunda iincwadi ezinemfundiso, ngaba zicacisa intanda-bulumko okanye indlela yobomi ‘engekho ngokukaKristu’? (Kolose 2:8) Ngaba ichaza iingcamango ezibubudenge, okanye ngaba ikhuthaza ukubandakanyeka kwimibutho yehlabathi yasentlalweni? Ngaba ikhuthaza usukelo lokuba sisityebi kakhulu? (1 Timoti 6:9) Ngaba yincwadi ngobuqhophololo echaza iimfundiso ezahlukanisayo ezingafaniyo nezikaKristu? Ukuba siphendula ngokuthi ewe yaye siyaqhubeka sizifunda okanye sizibukela izinto ezinjalo, sizichanaba engozini yokuzondla esithebeni seedemon. Namhlanje kukho amakhulu amawaka eempapasho ezikhuthaza iintanda-bulumko ezibonakala zichubekile yaye zisexesheni. (INtshumayeli 12:12) Kodwa akukho nabunye kobu buxoki obutsha ngokwenene; ibe abuyongenelo yaye bungaphuculi nabani na, kanye njengokuba kwaba njalo ngoko uSathana ngobuqhophololo wakuxelela uEva esithi kwakuya kumphucula.—2 Korinte 11:3.
6. Xa uSathana esikhuthaza ukuba singcamle ukudla kwakhe okungenazondlo kweedemon, eneneni, sifanele sisabele njani?
6 Ngoko, xa uSathana esikhuthaza ukuba singcamle ukutya kwakhe okungenazondlo kobudemon, sifanele sisabele njani? Kanye ngendlela awasabela ngayo uYesu xa wayehendwa nguSathana ukuba aguqule amatye abe zizonka. UYesu waphendula: “Kubhaliwe kwathiwa, Akaphili ngasonka sodwa umntu, uphila ngamazwi onke aphuma emlonyeni kaThixo.” Ibe xa uMtyholi wathembisa uYesu ngokumnika “zonke izikumkani zehlabathi, nozuko lwazo” ukuba nje wayenokuqubuda kuSathana kube kanye amnqule, uYesu waphendula: “Suka umke, Sathana; kuba kubhaliwe kwathiwa, YiNkosi uThixo wakho oya kuqubuda kuyo, ukhonze yona yodwa.”—Mateyu 4:3, 4, 8-10.
7. Kutheni siya kuba siyazikhohlisa ukuba sicinga ukuba sinokuphumelela ukuzondla esithebeni sikaYehova nasesithebeni seedemon?
7 Isithebe sikaYehova nesithebe esilungiselelwe ziintshaba zakhe eziziidemon azisayi kuze zidibane! Ewe, kaloku, oku sekukhe kwazanywa ngaphambili. Khumbula amaSirayeli amandulo ngemihla yomprofeti uEliya. Abantu babezibanga benqula uYehova, kodwa babekholelwa ukuba abanye oothixo, abanjengoBhahali, babenokubenza baphumelele. UEliya wafika ebantwini wathi: “Koda kube nini na nimbaxa? Ukuba uYehova nguThixo, landelani yena; ke ukuba nguBhahali uThixo, landelani yena.” Ngokungathandabuzekiyo, amaSirayeli ayengcileza “ngomlenze omnye aze ke aphinde ngomnye.” (1 Kumkani 18:21; The Jerusalem Bible) UEliya wabacel’ umngeni ababingeleli bakaBhahali ukuba bangqine ukuba lowo bamnqulayo unguthixo. UThixo owayenokuhlisa umlilo ezulwini udle idini wayeya kungqineka enguThixo oyinyaniso. Phezu kwemigudu emininzi, ababingeleli bakaBhahali abazange baphumelele. Wandula ke uEliya ngokulula nje wathandaza wathi: “Yehova, ndiphendule, bazi aba bantu ukuba wena Yehova unguThixo [oyinyaniso, NW].” Kwangoko kwehla umlilo ezulwini uvela kuYehova wasidla eso silwanyana silidini sasigxiza amanzi. Bechukunyiswe yindlela engenakukhanyelwa uYehova awabonakalisa ngayo ukuba unguThixo, abantu bamthobela uEliya baza bababulala bonke abaprofeti bakaBhahali abangama-450. (1 Kumkani 18:24-40) Ngoko namhlanje, simele simgqale uYehova njengoThixo oyinyaniso size ngokuqinisekileyo siguqukele ekuzondleni esithebeni sakhe ukuba asikakwenzi oko.
‘Umkhonzi Othembekileyo’ Ulungisa Isithebe SikaYehova
8. Nguwuphi umkhonzi uYesu awaxela kwangaphambili ukuba wayeya kumsebenzisa ukondla abafundi bakhe ngokomoya ebudeni bobukho bakhe, yaye ungubani loo mkhonzi?
8 INkosi uYesu Kristu yaxela kwangaphambili ukuba ebudeni bobukho bayo ‘umkhonzi othembekileyo noqondayo’ wayeya kulungiselela abafundi bayo ukudla kokomoya: “Unoyolo loo mkhonzi, iya kuthi yakufika inkosi yakhe imfumane esenjenjalo. Inene ndithi kuni, iya kummisa phezu kwayo yonke impahla yayo.” (Mateyu 24:45-47) Lo mkhonzi uye wangqineka, engenguye nawuphi umntu omnye, kodwa eludidi lwamaKristu azahluleleyo nathanjisiweyo. Olu didi lubeke esithebeni sikaYehova okona kutya kulungileyo kokomoya ukwenzela intsalela ethanjisiweyo ‘nesihlwele esikhulu.’ Ngoku, isihlwele esikhulu esingaphezu kwezigidi ezine sikunye nentsalela ethanjisiweyo, siye samela ulongamo lukaYehova uThixo lwendalo iphela noBukumkani bakhe aya kulingcwalisa ngabo igama lakhe elingcwele.—ISityhilelo 7:9-17.
9. Sisiphi isixhobo ebesisetyenziswa ludidi lomkhonzi ukulungiselela ukudla kokomoya kumaNgqina kaYehova, yaye ukudla kwawo ngokuyintabalala kukudla kokomoya kuchazwa njani ngokwesiprofeto?
9 Olu didi lomkhonzi othembekileyo belusebenzisa iWatch Tower Bible and Tract Society ukuze londle ngokomoya onke amaNgqina kaYehova. Ngoxa iNgqobhoko nayo yonke le nkqubo yezinto zilamba ngenxa yokunqongophala kokutya kokomoya okunik’ ubomi, abantu bakaYehova banentabalala yokudla. (Amosi 8:11) Oku kuzalisekisa isiprofeto esikuIsaya 25:6: “UYehova wemikhosi uya kuzenzela zonke izizwe isidlo sezinto ezityebileyo kule ntaba, isidlo sewayini egcinwe ngeentsipho, sezinto ezityebileyo ezinomongo, sewayini egcinwe ngeentsipho, yaza yahluzwa.” Njengokuba Isa 25 indinyana 7 neyesi-8 zibonisa, esi sidlo siya kuqhubeka ngonaphakade. Hayi indlela oku okuyintsikelelo ngayo kuyo yonke intlangano kaYehova ebonakalayo ngoku, yaye hayi indlela okuya kuqhubeka kuyintsikelelo ngayo kwixesha elizayo!
Kulumkele Ukudla Okunetyhefu Kwisithebe Seedemon
10. (a) Udidi lomkhonzi ongendawo lusasaza ukudla okunjani, ibe lushukunyiswa yintoni? (b) Udidi lomkhonzi ongendawo lubaphatha njani abo lwalufudula lukhonza nabo?
10 Ukudla okukwisithebe seedemon kunetyhefu. Ngokomzekelo, qwalasela ukudla okukhutshwa ludidi lomkhonzi ongendawo nabawexuki. Akondli yaye akwakhi; akunampilo. Akunakuba njalo, kuba abawexuki bayekile ukutya esithebeni sikaYehova. Ngenxa yoko, nabuphi na ubuntu obutsha ababenabo buphelile. Abashukunyiswa ngumoya oyingcwele, kodwa bashukunyiswa yingqumbo ekrakra. Banosukelo olunye kuphela—ukubetha abo babefudula bekhonza nabo, njengoko uYesu waxela kwangaphambili.—Mateyu 24:48, 49.
11. Wabhala wathini uC. T. Russell ngokhetho lukabani lokudla kokomoya, ibe wabachaza njani abo basishiyayo isithebe sikaYehova?
11 Ngokomzekelo, emva phayaa ngowe-1909, owayengumongameli weWatch Tower Society ngoko, uC. T. Russell, wabhala ngabo babesishiyile isithebe sikaYehova baza baqalisa ukubaphatha kakubi ababefudula bekhonza nabo. IThe Watch Tower kaOktobha 1, 1909, yathi: “Bonke abo bawushiyayo uMbutho nomsebenzi wawo, kunokuba baphumelele okanye bakhe abanye elukholweni nakubabalo lomoya, kubonakala ngathi benza okuchasene noko—balinga ukwenzakalisa iNdlela ababesakuyikhonza, yaye, bengayekanga ukungxola, bayanyamalala, bezenzakalisa bona nabanye abanomoya ofanayo wosukuzwano. . . . Ukuba abathile bacinga ukuba banokufumana ukutya okufanayo okanye okulunge ngakumbi kwezinye izithebe, okanye bona banokuvelisa okufanayo okanye okulunge ngakumbi—mabenjenjalo. . . . Kodwa nangona sibavumela abanye ukuba bangaya naphi na ukuze bafumane ukutya nokukhanya okuya kubanelisa, okumangalisayo kukuba, abo basichasayo benza okwahlukileyo. Kunokuba bathethe njengamadoda bathi, ‘Ndifumene enye into endiyithandileyo; salani kakuhle!’ aba babonakalisa umsindo, ulunya, intiyo, imbambano, ‘imisebenzi yenyama nekaMtyholi’ ngendlela engaphezu nakweyabantu behlabathi. Babonakala bezaliswe yimpambano, umgada onobuSathana. Bambi babo bazama ukusenzakalisa bajike bathi sithi abazama ukubenzakalisa. Bahlala bekulungele ukuthetha okanye ukubhala ubuxoki bokusinyemba nokuzithoba ukuze benze inkohlakalo.”
12. (a) Abawexuki bababetha njani abo babefudula bekhonza kunye nabo? (b) Kutheni kuyingozi ukuzondla koko kubhalwa ngabawexuki ngenxa yokufun’ ulwazi?
12 Ewe, abawexuki bapapasha uncwadi olubhenela ekugqwetheni izinto, kwiinyaniso ezingaphelelanga nakubuxoki obuphandle. Bade baphazamise iindibano zamaNgqina, bezama ukubambisa abangaphaphanga. Ngenxa yoko, bekungaba yingozi ukuvumela ukufuna ukwazi kusishukumisele ekuzondleni ngeencwadi ezinjalo okanye ekuphulaphuleni intetho yabo eyonakeleyo! Ngoxa sisenokungacingi ukuba oku kuyingozi kuthi ngokobuqu, ingozi isekho. Ngoba? Phakathi kwezinye izinto, kukuba uncwadi lwabawexuki luthetha ubuxoki “ngamazwi anencasa” kunye ‘namazwi alalanisayo.’ (Roma 16:17, 18; 2 Petros 2:3) Ubunokulindela ntoni kakade kwisithebe seedemon? Yaye nangona abawexuki besenokunikela iinyaniso ezithile, ngokuqhelekileyo ezi zisetyenziswa ngendlela egqwethekileyo ngenjongo yokushenxisa abanye kwisithebe sikaYehova. Konke abakubhalayo kuphela nje kuyagxeka kuze kudilize! Akunanto yakhayo.
13, 14. Ziziphi iziqhamo zabawexuki nobuxoki babo?
13 UYesu wathi: “Nobaqonda ngeziqhamo zabo.” (Mateyu 7:16) Ngoku, ziziphi iziqhamo zabawexuki neempapasho zabo? Ubuxoki babo buphawulwa ngezinto ezine. (1) Ubuqili. AmaEfese 4:14 athi ‘banobuqhetseba obusemaqhingeni olahlekiso.’ (2) Ubukrelekrele bekratshi. (3) Ukungabi naluthando. (4) Ukunganyaniseki ngeendlela ezahlukahlukeneyo. Ezi zizithako zokutya okusesithebeni seedemon, konke okulungiselelwe ukusingela phantsi ukholo lwabantu bakaYehova.
14 Yaye kukho enye inkalo. Abawexuki babuyele entwenini? Kwiimeko ezininzi, babuye bangena ebumnyameni beNgqobhoko neemfundiso zayo, njengenkolelo yokuba onke amaKristu aya ezulwini. Ngaphezu koko, abaninzi bakuyekile ukuma okuqinileyo okusekelwe eZibhalweni kumba wegazi, ubundilele, nemfuneko yokunikela ubungqina ngoBukumkani bukaThixo. Noko ke, thina sibubalekile ubumnyama beBhabhiloni Enkulu, ibe asifuni kubuyela kubo kwakhona. (ISityhilelo 18:2, 4) Njengabakhonzi abanyanisekileyo bakaYehova, yintoni enokubangela sifune kwaukubukrwaqula ubuxoki baba bantu basishiyileyo isithebe sikaYehova ngoku ababetha ngamazwi abo basinceda sifumane “amazwi aphilileyo”?—2 Timoti 1:13.
15. Nguwuphi umgaqo weBhayibhile osinceda sihambe ngekhondo lobulumko xa sisiva izityholo ezenziwa ngabawexuki?
15 Bambi basenokufuna ukwazi izityholo ezenziwa ngabawexuki. Kodwa sifanele sinikel’ ingqalelo kumgaqo okwiDuteronomi 12:30, 31. Apha uYehova esebenzisa uMoses walumkisa amaSirayeli ngoko ayemele akuphephe akuba elihluthile iLizwe Ledinga kubahedeni ababemi kulo. “Zigcine, hleze uthiyelwe uzilandele, emveni kokutshatyalaliswa kwazo phambi kwakho; hleze uquqele koothixo bazo, uthi, Zibe zisithini na ezi ntlanga ukubakhonza oothixo bazo? Ndiya kwenjenjalo nam. Uze ungenjenjalo kuYehova uThixo wakho.” Ewe, uYehova uThixo uyayazi indlela abantu abathand’ ukwazi ngayo. Khumbula uEva kwanomkaLote! (Luka 17:32; 1 Timoti 2:14) Masingaze sikuphulaphule oko kuthethwa okanye kwenziwa ngabawexuki. Kunoko, masixakeke sisakha abantu yaye ngokunyaniseka sizondla esithebeni sikaYehova!
Sisithebe SikaYehova Kuphela Esiya Kusala
16. (a) Yintoni eza kwenzeka kungekudala kuSathana, iidemon zakhe, nesithebe sokomfuziselo iintlanga zehlabathi ebezizondla kuso? (b) Kuya kwenzeka ntoni kubo bonke abantu abaqhubeka bezondla esithebeni seedemon?
16 Kungekudala, kuza kuqhambuka imbandezelo enkulu, ikhawuleze ifikelele incopho yayo “emfazweni yaloo mini inkulu kaThixo, uSomandla.” (ISityhilelo 16:14, 16) Iya kufikelela uvuthondaba njengoko uYehova etshabalalisa le nkqubo yezinto nesithebe sokomfuziselo izizwe zehlabathi ebezizondla kuso. Kwakhona uYehova uya kuyibhukuqa yonke intlangano ebonakalayo kaSathana uMtyholi nendimbane yeedemon zayo. Abo bebeqhubeka bezondla kwisithebe sokomoya sikaSathana, isithebe seedemon, baya kunyanzeleka ukuba baye kwisidlo sokoqobo, kungekhona ukuze badle, kodwa ukuze kudliwe bona—ukuze batshatyalaliswe!—Bona uHezekile 39:4; ISityhilelo 19:17, 18.
17. Ziziphi iintsikelelo ezifunyanwa ngabo bazondla esithebeni sikaYehova kuphela?
17 Kuya kusala isithebe sikaYehova kuphela. Abo ngoxabiso bazondla kuso baya kulondolozwa baze babe nelungelo lokutya kuso kuse emaphakadeni. Abasayi kuphinde babe nengxaki yokunqongophala kokudla. (INdumiso 67:6; 72:16) Beyimiqabaqaba baya kukhonza uYehova uThixo eParadisi! Ekugqibeleni amazwi achukumisayo eSityhilelo 21:4 aya kuzaliseka ngokumangalisayo: “Azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.” Ekubeni inkcaso iya kuba ingasekho, ulongamo lukaYehova uThixo lwendalo iphela luya kusebenza kuyo yonke indawo ngonaphakade kanaphakade njengoko ubabalo lukaThixo olungaphele ndawo luthululelwa phezu koluntu olukhululiweyo oluhleli kumhlaba oyiParadisi. Ukuze sizuze lo mvuzo, sonke masizimisele ukudla esithebeni sikaYehova kuphela, esiphuphuma kokona kudla kokomoya kulungileyo!
Ubuya Kuphendula Uthini?
◻ Sinokukuphepha njani ukulahlekiswa ziimfundiso zeedemon?
◻ Kutheni singenakuzondla kwisithebe sikaYehova nakwisithebe seedemon ngokunempumelelo?
◻ Kukudla okunjani okunikelwa ngabawexuki?
◻ Kutheni kuyingozi ukufuna ukwazi izityholo zabawexuki?
◻ Ziziphi iziqhamo zabawexuki?
[Umfanekiso okwiphepha 10]
Isithebe sikaYehova siphuphuma kokona kutya kulungileyo kokomoya