Imibuzo Evela Kubafundi
Ukuba umKristu uyagula okanye useluhambeni yaye ngenxa yoko akanakukwazi ukubakho eSikhumbuzweni, ngaba angasenza kwinyanga elandelayo?
KwaSirayeli wamandulo iPasika yayiqhutywa minyaka le ngosuku lwe-14 lwenyanga yokuqala, ebizwa ngokuthi nguNisan (okanye, uAbib). Kodwa sifumana ilungiselelo elikhethekileyo kwiNumeri 9:10, 11: “Thetha koonyana bakaSirayeli, uthi, Umntu ngomntu, xa athe wayinqambi ngofileyo, mhlawumbi waseluhambeni ehambele kude, engowakuni, nokuba ngowezizukulwana zenu, woyenza ipasika kuYehova. Boyenza ngenyanga yesibini [ebizwa ngokuthi nguIyyar, okanye uZiv], ngomhla weshumi elinesine, lakutshona ilanga, kunye nezonka ezingenagwele bayidle inemithana ekrakra.”
Phawula ukuba oku akuzange kumisele imihla emibini ekunokukhethwa kuyo ukwenza iPasika (uNisan 14 okanye uZiv 14), ukuze nawuphi na umSirayeli okanye intsapho ikhululeke ukukhetha, ngokuvunyelwa ziimeko. Ilungiselelo lokwenziwa kwesidlo sePasika ngenyanga yesibini lalisikelwe umda. Lalinokwenziwa kuphela ngumSirayeli owayeyinqambi ngomhla kaNisan 14 okanye owayekude kakhulu nendawo eqhelekileyo ekwakuqhutyelwa kuyo isikhumbuzo.
Ekuphela komzekelo ekunikelwe ingxelo yawo ngendlela ekwakusetyenziswa ngokubanzi ngayo oku ngulowo wexesha laxa uKumkani othembekileyo uHezekiya wahlaziya ukugcinwa koMthendeleko weZonka Ezingenagwele. Kwakungasekho xesha lokuba balungiselele ukuwenza ngenyanga yokuqala (ababingeleli babengazilungiselelanga nabantu bengahlanganisananga), ngoko waqhutywa ngosuku lwe-14 lwenyanga yesibini.—2 Kronike 29:17; 30:1-5.
Ngaphandle kwezo meko zikhethekileyo, amaYuda ayigcina iPasika ngomhla owawumiswe nguThixo. (Eksodus 12:17-20, 41, 42; Levitikus 23:5) UYesu nabafundi bakhe bawukhumbula lo mhla njengoko uMthetho wawufuna njalo, bengawuthabathi nje njengomhla oqhelekileyo. ULuka unikela le ngxelo: “Wafika ke umhla wezonka ezingenagwele, ekwakumele ukuthi ngawo kubingwe imvana yepasika. [UYesu] wesusa uPetros noYohane, wathi, Hambani niye kusilungiselela ipasika, ukuze sidle.”—Luka 22:7, 8.
Ngeso sihlandlo uYesu wasungula isikhumbuzo saminyaka le eso amaKristu asazi ngokuba siSidlo seNkosi Sangokuhlwa. Kwakubaluleke gqitha ukuba amaKristu abekho. Esi sesona siganeko sibalulekileyo enyakeni kumaNgqina kaYehova. Amazwi kaYesu abonisa isizathu sokuba sibaluleke; xa wathi: “Oku kwenzeleni ukundikhumbula.” (Luka 22:19) Ngaloo ndlela, ngamnye kumaNgqina kaYehova ufanele acebe kusasele iinyanga ngaphambili ukuba angenzi malungiselelo okuya naphi na ngomhla wesikhumbuzo. Isikhumbuzo seSidlo seNkosi Sangokuhlwa siya kuba ngoLwesibini, ngoAprili 6, 1993, emva kokutshona kwelanga kwindawo yasekuhlaleni.
Kwiimeko ezingafane zenzeke kusenokuvela imeko ebingabonwanga ngaphambili, enjengokugula okanye imeko equbulayo yohambo, esenokumthintela umKristu ukuba abekho njengoko ebecebile. Yintoni enokwenziwa kwimeko elolo hlobo?
Ebudeni besikhumbuzo kudluliswa isonka esingenagwele newayini ebomvu, yaye abo bathanjiswe ngomoya oyingcwele kaThixo nabanyulelwe ukuphila ezulwini bayathabatha. (Mateyu 26:26-29; Luka 22:28-30) Ukuba umntu obesoloko ethabatha nyaka ngamnye ulele ngandletyana nye ekhaya okanye esibhedlele kulo nyaka, abadala bebandla lasekuhlaleni baya kwenza ilungiselelo lokuba omnye kubo ase isonka newayini kulowo ugulayo, axubushe iindinyana zeBhayibhile ezingombandela lowo, aze adlulise imifuziselo. Ukuba umKristu othanjisiweyo ukude nebandla lakhe lasekuhlaleni, ufanele azilungiselele ukuya kwibandla elikummandla aza kuba ekuwo ngaloo mhla.
Ngenxa yoku, kuphela kuya kuba phantsi kweemeko ezikhetheke gqitha apho umKristu othanjisiweyo kuya kufuneka enze isikhumbuzo seSidlo seNkosi Sangokuhlwa kwiintsuku ezingama-30 kamva (umjikelo omnye wenyanga), ngokuvisisana nomyalelo okwiNumeri 9:10, 11 nomzekelo okweyesi-2 yeziKronike 30:1-3, 15.
Abo bodidi ‘lwezinye izimvu’ zikaYesu, abanethemba lobomi obungunaphakade kwiparadisi esemhlabeni, abayalelwanga ukuthabatha kwisonka newayini. (Yohane 10:16) Kubalulekile ukuba babekho kwisikhumbuzo saminyaka le, kodwa abathabathi kwimifuziselo. Ngoko ukuba omnye wabo uyagula okanye useluhambeni yaye ngaloo ndlela akayi kuba kulo naliphi na ibandla ngaloo ngokuhlwa, unokuzifundela eyedwa iZibhalo ezifanelekileyo (eziquka ingxelo yokusungula kukaYesu isikhumbuzo) aze athandazele ukuba intsikelelo kaYehova ibe kweso siganeko esiqhutywa ehlabathini lonke. Kodwa kule meko akukho mfuneko yalo naliphi na ilungiselelo elongezelelekileyo lentlanganiso okanye ingxubusho ekhethekileyo yeBhayibhile elinokuqhutywa kwinyanga kamva.