“Umtshato Mawubekeke Kubo Bonke”
“Umtshato mawubekeke kubo bonke, nesilili masingadyojwa.”—HEBHERE 13:4, NW.
1. Yintoni abantu abaninzi abayifundileyo ngomtshato ophumelelayo?
IZIGIDI zabantu, kwanakwesi sizukulwana siwuqhawula ngokulula umtshato, zinemitshato ehlala ihleli. Ziyifumene indlela yempumelelo, phezu kwako nje ukwahlukana ngeempawu zobuntu nangemvelaphi. Imitshato enjalo ikho phakathi kwamaNgqina kaYehova. Ezi zibini zitshatileyo ziya kuvuma ukuba kwiimeko ezininzi ziye zahlangabezana namahla-ndinyuka, kwanezizathu zokukhalazelana. Sekunjalo, ziye zafunda indlela yokumelana nemimoya engephi ebhudlayo ukuze zigcine inqanawa yazo yomtshato isendleleni. Ngabaphi abanye boothunywashe abaye bazinceda zakwazi ukuqhubela phambili?—Kolose 3:13.
2. (a) Ngabaphi abanye oothunywashe abawuxhasayo umtshato? (b) Ngabaphi abanye oothunywashe abanokuwubhukuqa umtshato? (Bona ibhokisi kwiphepha 14.)
2 Abanye babo batyhilwa ngamagqabaza enziwa ngabathile abaye banemitshato yobuKristu eyonwabileyo nehlala ihleli. Omnye umyeni owayeneminyaka eli-16 etshatile wathi: “Ngalo naliphi na ixesha kuvela ingxaki, siye senza umzamo wokwenene wokuba siphulaphulane izimvo zethu.” Oku kubalaselisa enye inkalo eyomelezayo kwimitshato emininzi—ukuncokolisana ngokukhululekileyo. Omnye umfazi, owayeneminyaka engama-31 etshatile, wathi: “Ukubambana ngezandla nokwenza izinto zokusonwabisa ukuze sigcine uthando luvutha phakathi kwethu bekusoloko kuyinto ephambili.” Yaye leyo yinkalo eyongezelelekileyo yokuncokolisana. Esinye isibini, esiphantse sibe neminyaka engama-40 sitshatile, sabethelela ukubaluleka kokulondoloza uburharha, ukukwazi ukuzihleka nokuhlekana. Kwakhona sathi oko kwasinceda ukuba sikwazi ukubona ezona mpawu zintle nezona zimbi komnye nomnye size sekunjalo sibonakalise uthando lokunyaniseka. Umyeni wakhankanya ukukulungela ukuvuma iimpazamo uze ucele uxolo. Apho kukho umoya wokuyekelela, umtshato uya kuba bhetyebhetye kunokuba uqhekeke.—Filipi 2:1-4; 4:5, Kingdom Interlinear.
Iimeko Eziguquguqukayo
3, 4. Kukuphi ukuguquka okuye kwakho kwizimo zengqondo ngokuphathelele ukunyaniseka emtshatweni? Ngaba unokunikela imizekelo?
3 Kumashumi ambalwa eminyaka adluleyo, ehlabathini jikelele, izimo zengqondo ngokuphathelele ukuthembeka emtshatweni ziye zaguquka. Abanye abantu abatshatileyo bakholelwa ukuba akukho nto iphosakeleyo ngokuthandana nomnye umntu osecaleni, indlela ephucukileyo okuchazwa ngayo ukukrexeza, ngokukodwa ukuba elinye iqabane liyakwazi yaye liyakwamkela oko.
4 Omnye umveleli ongumKristu wathi ngale meko: “Phantse ihlabathi liyekile ukwenza nawuphi na umgudu onyanisekileyo wokuphila ngemilinganiselo yokuziphatha okuhle. Ihambo enyulu iye yagqalwa njengeshiywe lixesha.” Abantu abaphambili kwezobupolitika, kwezemidlalo nakwezolonwabo bayivukela ngokuphandle imilinganiselo yeBhayibhile yokuziphatha okuhle, yaye abantu abanjalo bayaqhubeka bethatyathelwa phezulu. Phantse kube akukho nto iluhlabayo naluphi na uhlobo lokuziphatha okubi okanye okugqwethekileyo. Kunqabile ukuba ubunyulu nengqibelelo zixatyiswe phakathi kwebutho labantu bodidi oluphakamileyo. Izihlwele zabantu zilandela umgaqo wokuba ‘okumlungelayo omnye kuyamlungela nomnye,’ zize zikubethe ngoyaba oko uThixo akuthiyileyo. Kunjengokuba uPawulos watshoyo: “Abathe bona, bengasaziva, bazinikela eburheletyweni, ukuze basebenze ukungcola konke, bebawa.”—Efese 4:19; IMizekeliso 17:15; Roma 1:24-28; 1 Korinte 5:11.
5. (a) UThixo ukujonga njani ukukrexeza? (b) Yintoni ebandakanywa kukusebenzisa kweBhayibhile igama elithi “ukuhenyuza”?
5 Imilinganiselo kaThixo ayiguqukanga. Ukujonga ukuhlalisana ngaphandle komtshato njengokuhenyuza. Ukunganyaniseki emtshatweni isekukukrexeza.a Umpostile uPawulos wakwenza kwacaca oku: “Anazi na, ukuba abangemalungisa abayi kubudla ilifa ubukumkani bukaThixo? Musani ukulahlekiswa; abenza umbulo [“abahenyuzayo,” NW], nabakhonzi bezithixo, nabakrexezi, nezifebe, namadoda alalanayo . . . abayi kubudla ilifa ubukumkani bukaThixo. Naye ninjalo ke inxenye yenu; kuloko nahlanjululwayo, kuloko nangcwaliswayo, kuloko nagwetyelwayo egameni leNkosi uYesu, nangoMoya kaThixo wethu.”—1 Korinte 6:9-11.
6. Sisiphi isikhuthazo esinokusifumana kumazwi kaPawulos akweyoku-1 kwabaseKorinte 6:9-11?
6 Ingongoma ekhuthazayo kweso sibhalo ngamazwi kaPawulos athi, “Naye ninjalo ke inxenye yenu; kuloko nahlanjululwayo.” Ewe, abaninzi ababekhe ngaphambili babaleka ‘kumelelo wokuzibhubhisa’ kavula-zibhuqe wehlabathi baye babuyela ezingqondweni, baye bamamkela uKristu nedini lakhe, yaye baye bahlanjululwa. Baye bakhetha ukukholisa uThixo ngokuphila ngokuziphatha okuhle yaye ngenxa yoko bonwabe ngakumbi.—1 Petros 4:3, 4.
7. Kukuphi ukungqubana okukhoyo kwindlela eliqondwa ngayo ibinzana elithi “ukuziphatha okubi,” yaye iyintoni imbono yeBhayibhile?
7 Kwelinye icala, indlela ihlabathi elikuchaza ngayo ukuziphatha okubi ingxengwe ngokokude ingahambisani nembono kaThixo. Esinye isichazi-magama sichaza “ukuziphatha okubi” ngokuthi “ukungahambisani nokuziphatha okuhle okumiselweyo.” ‘Ukuziphatha okuhle okumiselweyo’ kwanamhlanje, okuvumela isini ngaphambi komtshato nangaphandle komtshato ndawonye nobufanasini, koko iBhayibhile ikugweba njengokuziphatha okubi. Ewe, ngokwembono yeBhayibhile, ukuziphatha okubi kukwaphulwa kakubi kakhulu komlinganiselo kaThixo wokuziphatha okuhle.—Eksodus 20:14, 17; 1 Korinte 6:18.
Ibandla LamaKristu Liyachaphazeleka
8. Ukuziphatha okubi kunokubachaphazela njani abo basebandleni lamaKristu?
8 Namhlanje ukuziphatha okubi kuxhaphake gqitha kangangokuba kusekwanokuba yingcinezelo kwabo basebandleni lamaKristu. Kunokubaphembelela ngeenkqubo zikamabonwakude ezithob’ isidima, iivideo nezinto ezifundwayo ezingamanyala, zinto ezo ezikho kuyo yonke indawo. Nakuba ingamaKristu ambalwa kuphela achaphazelekayo, kufanele kuqondwe ukuba inkoliso yeemeko zokususwa kubudlelwane phakathi kwamaNgqina kaYehova ngenxa yehambo yokungaguquki engawafanelanga amaKristu zinxulumene nohlobo oluthile lokuziphatha okubi ngokwesini. Okuhle kukuba umlinganiselo omkhulu wabo basuswayo kubudlelwane ekugqibeleni bayaziqonda iimpazamo zabo, babuyele kwindlela ecocekileyo yobomi, yaye ekuhambeni kwexesha bayabuyiselwa ebandleni.—Thelekisa uLuka 15:11-32.
9. USathana ubarhintyela njani abangalumkanga?
9 Alithandabuzeki elokuba uSathana uhamba njengengonyama egqumayo, elungele ukuqwenga abangalumkanga. Iindlela azisebenzisayo, okanye “amacebo akhe achuliweyo,” zirhintyela amaKristu angalumkanga nyaka ngamnye. Kwihlabathi lakhe kuhlala kukho umoya wokuzingca, wokuzonwabisa nowokungcola. Ukhuthaza iinkanuko zenyama. Uchasene nokuzeyisa.—Efese 2:1, 2; 6:11, 12, umbhalo osemazantsi weNW; 1 Petros 5:8.
10. Ngoobani abachanabeke ekulingweni, yaye ngoba?
10 Ngoobani ebandleni abanokuchanabeka kwizilingo zokuziphatha okubi? Yinkoliso yamaKristu, enoba ngabadala kwibandla lasekuhlaleni, abaveleli abahambahambayo, amalungu entsapho yaseBheteli, oovulindlela abashumayela iiyure ezininzi nyanga nganye, abazali abaxakekileyo abakhulisa abantwana, okanye abantu abaselula abajamelene nengcinezelo yoontanga. Isilingo sokwenyama siqhelekile kuthi sonke. Umtsalane wesini unokuvuseleleka ungalindelwanga. Ngaloo ndlela uPawulos wayenokubhala athi: “Lowo uba umi, makalumke angawi. Anibanjwanga silingo singesesabantu.” Sekunjalo, okubuhlungu kukuba amanye amaKristu akwizikhundla zembopheleleko aye anikezela kulo mtsalane wokuziphatha okubi.—1 Korinte 10:12, 13.
Abatsalwayo Baza Babambiseka
11-13. Ziziphi ezinye iimeko eziye zakhokelela ekuziphatheni okubi?
11 Ziziphi izilingo neemeko eziye zakhokelela abanye kwikhondo lobudenge lokukrexeza nelokuhenyuza? Zininzi yaye zintsonkothile ibe zinokwahlukahlukana ngokwamazwe okanye izithethe ezahlukahlukeneyo. Noko ke, kukho iimeko ezithile ezisisiseko ezivelayo kumazwe amaninzi. Ngokomzekelo, kuthiwa bambi baye balungiselela amatheko apho utywala budlal’ abantwana khona. Abanye baye bathanda umculo wehlabathi nomdaniso ovuselela inkanuko. Kweminye imimandla yaseAfrika, kukho amadoda azizityebi—angakholwayo—anamashweshwe; wambi amabhinqa aye alingelwa ekufuneni unqabiseko ngokwezoqoqosho kwimeko enjalo nakuba ibandakanya ukuziphatha okubi. Kweminye imimandla abayeni abangamaKristu baye bazishiya iintsapho zabo ukuze bayokufuna iindlela zokuphila emigodini okanye kwezinye iindawo. Ngoko ukuthembeka nokunyaniseka kwawo kuye kuvavanywe ukusa kumlinganiselo okanye ngeendlela ebezingayi kufunyanwa emva ekhaya.
12 Kumazwe asakhasayo bambi baye bawela kumgibe kaSathana ngokusoloko benomntu wesini esahlukileyo kungekho mntu wesithathu okhoyo—njengokusoloko besondelelene kunye rhoqo kwinqwelo-mafutha ukwenzela ukufundisana ukuqhuba.b Abadala abenza amatyelelo okwalusa bafanele balumke ukuba bangabi bodwa nodade xa bemluleka. Iincoko zisenokuvuselela iimvakalelo zize ziphumele kwimeko ebangel’ iintloni kubo bobabini.—Thelekisa uMarko 6:7; IZenzo 15:40.
13 Iimeko ezikhankanywe ngaphambili ziye zakhokelela ekubeni amanye amaKristu ayekelele umxakatho ekuzilindeni aza abandakanyeka kwizenzo zokuziphatha okubi. Kwananjengokuba kwenzeka ngenkulungwane yokuqala, baye bazivumela ukuba ‘bahendwe baze batsalwe yeyabo inkanuko,’ eye yakhokelela kwisono.—Yakobi 1:14, 15; 1 Korinte 5:1; Galati 5:19-21.
14. Kutheni ukuzingca kungunobangela osisiseko kwiimeko zokukrexeza?
14 Ukuqwalasela ngenyameko iimeko zokususwa kubudlelwane kubonisa ukuba izenzo zokuziphatha okubi zibangelwa zizinto ezithile ezifanayo. Kwiimeko ezinjalo kukho ukuzingca ngandlel’ ithile. Kutheni sithetha oko nje? Kuba kwiimeko zokukrexeza, omnye umntu okanye abantu abangenatyala baza kuba buhlungu. Kusenokuba liqabane elingokwasemthethweni. Ngokuqinisekileyo iya kuba ngabantwana, ukuba bakho, kuba ukuba ukukrexeza kukhokelela kuqhawulo-mtshato, abantwana, abanqwenela unqabiseko lwentsapho emanyeneyo, basenokuba ngabona babandezelekayo. Into ephambili umntu okrexezayo acinga ngayo lulonwabo nengenelo yakhe yobuqu. Oko kukuzingca.—Filipi 2:1-4.
15. Isenokuba ngabaphi abanye oonobangela abakhokelela ekukrexezeni?
15 Ngokufuthi ukukrexeza akusosenzo sobuthathaka belo xesha. Ngokuthe ngcembe umtshato ngokwawo ubuwohloka ngokuwohloka, oko kungaqondwa nokuqondwa. Mhlawumbi ukuncokolisana kuye kwayinto yaloo maxesha okanye kwaphela kudala. Kusenokuba bebengakhuthazani kakhulu. Ngamnye wabo usenokuba ebembetha ngoyaba omnye. Amaqabane asenokuba ebenganelisani ngokwesini ixesha elide. Ngokuqinisekileyo xa kuvela ukukrexeza, kwakhona ulwalamano noThixo luye lwancipha. Ngokucacileyo uYehova akagqalwa njengoThixo ophilayo ozibonayo zonke iingcinga nezenzo zethu. Kwakhona kusenokuba engqondweni yomntu okrexezayo, “uThixo” uye waligama nje elingenamsebenzi, umntu oqikelelwayo ongeyiyo inxalenye yobomi bemihla ngemihla. Ngoko kuba lula ukona uThixo.—INdumiso 51:3, 4; 1 Korinte 7:3-5; Hebhere 4:13; 11:27.
Isikhokelo Sokuxhathisa
16. UmKristu angasixhathisa njani isilingo sokungathembeki?
16 Ukuba nawuphi na umKristu uzifumanisa elingelwa kwindlela yokungathembeki, ziziphi iinkalo afanele azicinge? Okokuqala, ufanele acinge ngentsingiselo yothando lobuKristu, olusekelwe ngokomeleleyo kwimigaqo yeBhayibhile. Akafanele aze avumele uthando lomzimba okanye lwenkanuko yenyama lulawule iimvakalelo zakhe luze lumkhokelele ngokuthe ngcembe ekuweleni kukuzingca, ezisela abanye ukubandezeleka. Kunoko, imeko ifanele igqalwe ngokwembono kaYehova. Ifanele igqalwe kucingwa kakhulu ngebandla nehlazo ihambo embi enokulizisa kulo nakwigama likaYehova. (INdumiso 101:3) Intlekele isenokuphetshwa ngokuzuza ingqondo kaKristu ngalo mbandela size senze ngokuvisisana noko. Khumbula ukuba uthando olunjengolukaKristu lokungazingci aluze lutshitshe.—IMizekeliso 6:32, 33; Mateyu 22:37-40; 1 Korinte 13:5, 8.
17. Yiyiphi imizekelo yokuthembeka esinayo?
17 Isikhokelo sokuxhathisa kukomeleza ukholo nombono kabani wethemba elingaphambili. Oko kuthetha ukugcina kwindawo yokuqala entliziyweni imizekelo ebalaseleyo yengqibelelo leyo amadoda namabhinqa athembekileyo amandulo, noYesu ngokwakhe, awayishiyayo. UPawulos wabhala oku: “Ngako oko ke, sinelifu elingakanana nje elisingqongileyo lamangqina, masithi nathi, siwubekile nxamnye wonke umthwalo, naso isono esinokusirhintyela ngokusisulu, silubaleke ngomonde ugqatso olubekwe phambi kwethu; sise amehlo kuyo iMbangi noMgqibelelisi wokholo lwethu, uYesu, owathi, ngenxa yovuyo olwalubekwe phambi kwakhe, wawunyamezela [umthi wentuthumbo, NW], elidelile ihlazo, waza wahlala phantsi ngasekunene kwetrone kaThixo. Ewe, mqondeni lowo ukunyamezeleyo ukumphikisa okungaka kwaboni, ukuze ningadinwa, ingatyhafi imiphefumlo yenu.” (Hebhere 12:1-3) Kunokuba ayihlakaze inqanawa yomtshato, umntu osisilumko uya kucinga ngeendlela zokulungisa nawuphi na umonakalo ukuze ayihlangule, ngaloo ndlela ephepha umgibe wokukhohlisa nokuqhatha.—Yobhi 24:15.
18. (a) Kutheni ukukhohlisa kungelobinzana libi gqitha lokuchaza ukukrexeza? (b) UThixo ukugqala njani ukuzalisekiswa kwezibhambathiso?
18 Ngaba ukukhohlisa, okukukungcatsha, kulibinzana elibi gqitha lokuchaza ukuziphatha okubi? Ukungcatsha kukuphelisa intembelo. Ngokuqinisekileyo isibhambathiso somtshato siquka intembelo nokwenziwa kwedinga lokuthanda nokuxabisa, enoba sekumnyam’ entla, kumaxesha amnandi namabi. Sibandakanya okuthile abaninzi abasenokukugqala kushiywe lixesha kumaxesha esiphila kuwo—isifungo esivakaliswayo kwisibhambathiso somtshato. Ukuphelisa eso sithembiso kukwenza uhlobo oluthile lokungcatsha iqabane likabani. Imbono kaThixo ngezibhambathiso ichazwe ngokucacileyo eBhayibhileni: “Xeshikweni uthe wabhambathisa isibhambathiso kuThixo, musa ukuzekelela ukusizalisa; ngokuba azinanzwa izidenge; loo nto uyibhambathisileyo yizalise.”—INtshumayeli 5:4.
19. USathana uvuya ngokuchasene nantoni xa iNgqina lisilela?
19 Oku akufanele kuthandabuzeke nakancinane. Kanye njengokuba kubakho uvuyo olukhulu ezulwini ngomoni omnye oguqukayo, ngoko kubakho uvuyo olukhulu emhlabeni phakathi kwezihlwele ezilandela uSathana, ezibonakalayo nezingabonakaliyo, xa omnye wamaNgqina kaYehova esilela ukugcina ingqibelelo yakhe.—Luka 15:7; ISityhilelo 12:12.
Izilingo Eziqhelekileyo Kubantu Bonke
20. Sinokusixhathisa njani isilingo? (2 Petros 2:9, 10)
20 Ngaba ukuziphatha okubi akunakuphepheka kwiimeko ezithile? Ngaba inyama noSathana banamandla gqitha ngokokude amaKristu angabi nakuxhathisa aze agcine ingqibelelo yawo? UPawulos unikela ukhuthazo ngala mazwi: “Uthembekile ke uThixo, ongayi kuvumela ukuba nilingwe ngaphezu kweninako; owothi, kunye nesilingo eso, avelise ithuba lokuphuma kuso, ukuba nibe nako ukuthwala.” Kwihlabathi lanamhlanje asinakuziphepha kwaphela izilingo, kodwa ngokuphethukela kuThixo ngomthandazo, ngokuqinisekileyo sinokusinyamezela size sisoyise nasiphi na isilingo.—1 Korinte 10:13.
21. Yiyiphi imibuzo eya kuphendulwa kwisifundo sethu esilandelayo?
21 Yintoni uThixo asinika yona ukuze asincede sinyamezele izilingo size sizoyise? Yintoni thina ngabanye esiyifunayo ukuze sikhusele imitshato yethu, iintsapho zethu, kwakunye nodumo oluhle lwegama likaYehova nolwebandla? Loo mibuzo masiyiyekele kwinqaku lethu elilandelayo.
[Imibhalo esemazantsi]
a “‘Uhenyuzo’ ngengqiqo ephangaleleyo, yaye njengokuba luchazwa kuMateyu 5:32 (NW) nakwese-19:9, lubhekisela kwiintlobano zesini ezingekho mthethweni okanye ezivakalala ngaphandle komtshato. Iporneia [igama lesiGrike elisetyenziswe kwezo ndinyana] iquka ukusebenzisa ngendlela yokuziphatha okubi ngokunzulu ilungu/amalungu lokuzala ubuncinane lomntu omnye (enoba kungendlela yemvelo okanye kungokugqwethwa); kwakhona, kumele kubekho nomnye umntu okwenziwa naye ukuziphatha okubi—umntu waso nasiphi na isini, okanye irhamncwa.” (IMboniselo kaSeptemba 1, 1983, iphepha 30) Ukukrexeza: “Iintlobano zesini phakathi komntu otshatileyo neqabane elingenguye umyeni okanye umfazi wakhe ongokwasemthethweni.”—The American Heritage Dictionary of the English Language.
b Ngokucacileyo, kuya kubakho amathuba afanelekileyo apho umzalwana eya kukhwelisa udade kwisithuthi, yaye iimeko ezinjalo azifanele ziqondwe phosakeleyo.
Uyakhumbula Na?
◻ Ngabaphi abanye boothunywashe abafak’ isandla ekomelezeni umtshato?
◻ Kutheni sifanele siyiphephe indlela ihlabathi elikujonga ngayo ukuziphatha okuhle?
◻ Ziziphi ezinye izilingo neemeko ezikhokelela ekuziphatheni okubi?
◻ Uyintoni undoqo wokuxhathisa isono?
◻ UThixo usinceda njani ngamaxesha okulingwa?
[Ibhokisi ekwiphepha 14]
IINKALO EZISISISEKO KWIMITSHATO EHLALA IHLELI
◻ Ukubambelela ngokuqinileyo kwimigaqo yeBhayibhile
◻ Omabini amaqabane abe nolwalamano olomeleleyo noYehova
◻ Umyeni amhlonele umfazi wakhe, iimvakalelo zakhe nezimvo zakhe
◻ Ukuncokolisana okuhle kwemihla ngemihla
◻ Funani ukukholisana
◻ Uburharha; ukukwazi ukuzihleka
◻ Ukuvuma ngokukhululekileyo iimpazamo; ukuxolela ngokukhululekileyo
◻ Ukuhlala nithandana
◻ Manyanani ekukhuliseni nasekuqeqesheni abantwana
◻ Ukumanyana rhoqo emthandazweni kuYehova
IINKALO EZINGAFUNEKIYO EZIWONAKALISAYO UMTSHATO
◻ Ukuzingca nokuba neenkani
◻ Ukusilela ukwenza kunye izinto
◻ Ukuqhwalela kokuncokolisana
◻ Ukungancokolisani ngokusenyongweni okwaneleyo kwamaqabane
◻ Ukungasetyenziswa kakuhle kwemali
◻ Ukwahlukana kwezimvo ekuqhubaneni nabantwana benu kunye/okanye nabantwana bomtshato wokuqala
◻ Umyeni osebenza de kube sebusuku okanye oyityeshelayo intsapho ngenxa yeminye imisebenzi
◻ Ukusilela ukunyamekela iintswelo zokomoya zentsapho
[Umfanekiso okwiphepha 15]
Ukugcina umtshato ubekekile kuzisa ulonwabo oluhlala luhleli