Ukunyamekela Abalupheleyo—Ucelomngeni Nemivuzo
USHINETSU, umlungiseleli ongumKristu, wayesinandipha ngendlela engathethekiyo isabelo sakhe. Intsapho yakhe yabantu abathathu yayiquka umkhwekazi wakhe. Babekuvuyela ukusebenza nebandla elincinane lamaNgqina kaYehova, befundisa abantu iBhayibhile, de ngenye imini wacelwa ukuba akhe acinge ngokuhamba-hamba nomfazi wakhe betyelela amanye amabandla. Oku kwakuza kufuna ukuba batshintsha-tshintshe indawo yokuhlala veki nganye. Esi sabelo sasimchwayitisile, kodwa ngubani owayeza kunyamekela uMkhwekazi wakhe?
Ekugqibeleni iintsapho ezininzi ziya kujamelana nocelomngeni olufanayo—eyona ndlela ilungileyo yokunyamekela abazali abalupheleyo. Ngokuqhelekileyo akucingwa kangako ngalo mbandela ngoxa abazali besesempilweni yaye besasebenza. Noko ke, izinto ezincinane zisenokutyhila ukuba bayaluphala, ezinjengokungcangcazela kwezandla xa befaka umsonto werhali kwinaliti okanye ezinjengokulibala xa bezama ukukhumbula ixesha abagqibele ngalo ukubona into ethile abangayaziyo apho bayibeke khona. Noko ke, ngokufuthi iba yingozi okanye ukugula kwequbuliso okwenza ubani aqonde iintswelo zabo. Kufanele kwenziwe okuthile.
Kwamanye amazwe abazali abanandipha impilo entle ngokwentelekiso bakhetha ukuhlala namaqabane abo kwiminyaka yabo yokugqibela kunokuhlala nabantwana babo. Kwamanye amazwe, njengakumazwe amaninzi aseMpuma naseAfrika, kulisiko ukuba abalupheleyo bahlale nabantwana babo, ngokukhethekileyo unyana omkhulu. Oku kuyinyaniso ngokungakumbi ukuba omnye wabazali ungumlwelwe osoloko esemandlalweni. Ngokomzekelo, eJapan, kwabo baneminyaka engama-65 ubudala nangaphezulu abayimilwelwe esoloko isemandlalweni ukusa kumkhamo othile, malunga nabangama-240 000 banyanyekelwa emakhaya ziintsapho zabo.
Iimbopheleleko Ezifanelekileyo NezingokweZibhalo
Nangona siphila kwisizukulwana apho abaninzi ‘bengabazithandayo,’ “abangenabubele,” ngokucacileyo sineembopheleleko ezifanelekileyo nezingokweZibhalo kwabalupheleyo. (2 Timoti 3:1-5) UTomiko, onyamekela unina owalupheleyo, owathwaxwa sisifo sikaParkinson, wavakalisa imbopheleleko efanelekileyo awayenayo xa wathi ngonina: “Wandinyamekela kangangeminyaka engama-20. Ngoku nam ndifuna ukumenzela okufanayo.” Isilumko uKumkani uSolomon wanikela esi siluleko: “Mphulaphule uyihlo, lowo wakuzalayo, ungamdeli unyoko akuba mkhulu.”—IMizekeliso 23:22.
Inkcaso engokonqulo okanye inzondo yomzali ongakholwayo ayiwenzi ungasebenzi loo myalelo ungokweZibhalo. Umpostile uPawulos ongumKristu waphefumlelwa ukuba abhale oku: “Ukuba ke umntu akabakhathalele abakhe, ngokukodwa abendlu yakhe, ulukhanyele ukholo, unobubi ngaphezu kongakholwayo.” (1 Timoti 5:8) UYesu wasimisela umzekelo xa, njengesinye sezenzo zakhe ngaphambi kokuba afe, walungiselela ukuba kubekho othile onyamekela unina.—Yohane 19:26, 27.
Ukuhlangabezana Nobunzima Obukhoyo
Kufuneka kwenziwe iinguqulelo ezininzi ngabo bonke xa iintsapho ziphinda zimanyana emva kokuhlala ngokwahlukeneyo kangangeminyaka emininzi. Ezi nguqulelo zifuna uthando olugqithiseleyo, umonde nokuqondana. Ukuba unyana omkhulu, okanye omnye unyana okanye intombi, ufudusela intsapho yakhe kwikhaya labazali bakhe, iimeko ziyaguquka ngokupheleleyo. Kusenokuba umsebenzi uza kuba mtsha, izikolo ezitsha ebantwaneni kwaye kusenokufuneka kuqhelwe indawo entsha yokuhlala. Ngokufuthi oku kudla ngokuthetha imisebenzi eyongezelelekileyo emfazini.
Kuya kuba nzima nakubazali ukuhlengahlengisa. Basenokuba bebeqhele ukuba nomlinganiselo othile wokuba bodwa, umlinganiselo othile wenzolo, nowenkululeko; ngoku baza kuphithizeliswa ngabazukulwana nabahlobo babo abaqhathulayo. Bebeqhele ukuzenzela izigqibo zabo yaye basenokuyicekisa nayiphi na imizamo yokubayalela. Abazali abaninzi, belibona kusengaphambili ixesha laxa iintsapho zoonyana babo ziya kuza zizokuhlala nabo, baye bakha izindlu ezisecaleni kufutshane okanye bandisa izindlu zabo zaneepaseji ezizidibanisayo, benikela umlinganiselo wenkululeko kubo bonke.
Apho ikhaya lilincinane khona, kusenokufuneka kwenziwe uhlengahlengiso olukhulu ukuze kuvulwe indawo yabo bafikayo. Omnye umama wahleka njengoko wayekhumbula indlela iintombi zakhe ezine ezazikhathazeke ngayo xa ifanitshala eyongezelelekileyo nezinye izinto zaqhubeka zingena kumagumbi azo okulala ukuze kuvulelwe indawo uninakhulu owayeneminyaka engama-80 ubudala. Sekunjalo, inkoliso yezi ngxaki zizicombulula ngokwazo xa bonke beqonda imfuneko yohlengahlengiso yaye bekhumbula isiluleko seBhayibhile sokuba uthando “alufuni okukokwalo kodwa.”—1 Korinte 13:5.
Ukuphelelwa Yinkululeko
Kusenokubakho ingxaki enzulu ukuba ibhinqa elingumKristu linomyeni ongakholwayo yaye ugqiba kwelokuba afudusele intsapho yakhe kubazali bakhe. Imfuneko yokunyamekela intsapho isenokuba yenza phantse kungenzeki ngaye ukuba alungelelanise iimbopheleleko zakhe zobuKristu neminye imisebenzi yakhe. USetsuko wathi: “Umyeni wam wayevakalelwa kukuba kwakuyingozi ukumshiya yedwa unina endlwini owayebuthathaka engqondweni nasemzimbeni ngenxa yokwaluphala, yaye wayefuna ukuba ndibe sekhaya ngamaxesha onke. Ukuba ndandizama ukuhamba ndiye ezintlanganisweni, wayedla ngokukhathazeka aze akhalaze. Ekuqaleni, ngenxa yemvelaphi yam yaseJapan, nam ndandivakalelwa kukuba kwakuphosakele ukumshiya yedwa. Kodwa ke, ekuhambeni kwexesha ndaqonda ukuba iingxaki zazinokuconjululwa.”
UHisako wayenengxaki efanayo. Unikela le ngxelo: “Xa safudukela kwintsapho yakulo myeni wam, yena, ngenxa yoloyiko loko kuya kucingwa zizalamane, wafuna ukuba nditshintshe unqulo lwam ndize ndiyiyeke imisebenzi yam yonqulo. Okubi nangakumbi yayikukuba ngeeCawa izalamane ezihlala kufuphi zazidla ngokusityelela, nto leyo eyayisenza kube nzima ngam ukuba ndiye kwiintlanganiso. Ukongezelela, abantwana babefuna ukudlala nabaza babo kunokuba baye kwiintlanganiso. Ndandibona ukuba ubumoya bethu babuchaphazeleka. Kwafuneka ndiqine ndize ndichazele umyeni wam ukuba unqulo lwam lwalungeyonto yokutshintshwa njengempahla kodwa lwalubalulekile kum. Ekuhambeni kwexesha, intsapho yenza uhlengahlengiso.”
Abanye baye bayicombulula le ngxaki ngokufumana ixesha elingakumbi abangasebenzi ngalo ngokuba bafumane umntu ococa indlu ngamaxesha athile aze ancedise kanye okanye kabini ngeveki. Abanye baye baba nomlinganiselo wenkululeko yemisebenzi yobuqu nemisebenzi yobuKristu ngokufuna uncedo lwabantwana babo, lwezalamane ezikufuphi kwanolwezihlobo ebandleni. Kwakhona amadoda aye akwazi ukunikela uncedo ngeengokuhlwa nangeempelaveki xa esekhaya.—INtshumayeli 4:9.
Ukubagcina Bexakekile
Ukugcina abalupheleyo bexakekile kukwalolunye ucelomngeni ekufuneka kujanyelwene nalo. Abanye abalupheleyo bayakuvuyela ukuba nesabelo ekuphekeni nakweminye imisebenzi eyenziwa endlwini. Baziva befunwa xa becelwa ukuba bagcine abantwana yaye bafumana nolwaneliseko ekunyamekeleni isitiya esincinane semifuno, ekukhuliseni iintyatyambo okanye ekubeni nesabelo kumsetyenzana othile wokuzonwabisa.
Noko ke, abanye bafuna ukulala phantse imini yonke baze balindele ukufumana yonke into bengqengqe ngomqolo. Kodwa ukubagcina bexakekile kangangoko kunokwenzeka kubonakala kubalulekile kwimpilo yabo, kubomi obude nasekuphapheni kwengqondo. UHideko wafumanisa ukuba nangona unina wayehamba ngesitulo esinamavili, ukumsa kwiintlanganiso kwakuyinto kanye unina awayeyifuna ukuze azive ehlaziyekile. Wayesamkelwa ngokufudumeleyo ngabo bonke yaye wayequkwa ezincokweni. Ekugqibeleni ingqalelo awayeyifumana yamkhokelela ekubeni avume ukufundisisa iBhayibhile nebhinqa elaliselikhulile noko. Esinye isibini, esasinomzali owayenesifo sika-Alzheimer, sasihamba naye ukuya kwiintlanganiso zamaKristu. Saphawula oku: “Ngokuqhelekileyo akafun’ ukwenza nto, kodwa uyonwaba ezintlanganisweni. Wamkelwa ngokufudumeleyo, ngoko uya ngokunentumekelelo. Sivakalelwa kukuba kuyingenelo kakhulu kuye.”
UShinetsu, okhankanywe ekuqaleni kweli nqaku, wayicombulula ingxaki yakhe ngokufumanela umkhwekazi wakhe indawo yokuhlala kwisazulu sommandla awayekhonza kuwo njengomlungiseleli ohambahambayo. Ngaloo ndlela yena nomfazi wakhe babehlala naye phakathi kwamatyelelo akhe akumabandla awahlukahlukeneyo veki nganye. Umfazi wakhe, uKyoko, wathi: “Umama uvakalelwa kukuba uyinxalenye ebalulekileyo kumsebenzi wethu yaye uziva efunwa. Uvuya gqitha xa umyeni wam emcela ukuba amphekele ukudla okukhethekileyo.”
Ukuhlangabezana Nobuthathaka Bengqondo Nomzimba Ngenxa Yokwaluphala
Njengokuba abazali besaluphala, basenokuba nobuthathaka bengqondo nomzimba ngenxa yokwaluphala ngemilinganiselo eyahlukeneyo, ngoko bafuna ingqalelo engakumbi nangakumbi. Bayazilibala iintsuku, amaxesha, amaxesha onyaka nezithembiso. Basenokungazichebi iinwele bangazihlambi neempahla zabo. Basenokude balibale indlela yokuzinxibisa neyokuzihlamba. Abaninzi basenokudideka, ngoxa abanye besenokuphuthelwa ebusuku. Kukho notyekelo lokuphinda-phinda izinto abazithethileyo baze bacaphuke xa oko kuziswa kwingqalelo yabo. Ingqondo yabo iyabakhohlisa. Basenokuma ngelithi babelwe into okanye abaphangi bazama ukuqhekeza endlwini. Enye intsapho enamantombazana amane kwafuneka inyamezele ukutyholwa okungasekelwenga ntweni kwehambo ephosakeleyo engokwesini. Athi, “Kwakuphazamisa kodwa safunda ukunyamezela izityholo size sizame ukuncokola ngomnye umbandela. Ukungavumelani noMakhulu kwakungancedi nto.”—IMizekeliso 17:27.
Iintswelo Zokweemvakalelo Ekufuneka Zizalisiwe
Ubudala buzisa iimvavanyo kwabalupheleyo. Kubakho izigulo ezibuhlungu, ukungakwazi ukuhamba nokubandezeleka kwasengqondweni ekufuneka kunyanyezelwe. Abaninzi bavakalelwa kukuba ubomi babo bulilize okanye abunanjongo. Basenokuvakalelwa kukuba bangumthwalo yaye basenokuvakalisa umnqweno wokufa. Bafuna ukuziva bethandwa, behlonelwa yaye bequkwa xa kusenziwa okuthile. (Levitikus 19:32) UHisako uthi: “Sasisoloko simquka uMamazala kwincoko yethu xa ekunye nathi, simenza umxholo wencoko xa kunokwenzeka.” Enye intsapho yazama ukumenza azihlonele ngakumbi uyisemkhulu ngokumcela ukuba aqhube ingxubusho yemihla ngemihla yetekisi yeBhayibhile.
Ubani ufanele ngamaxesha onke azabalazele ukulondoloza imbono efanelekileyo ngabalupheleyo. Abayimilwelwe esoloko isemandlalweni bayacaphuka xa bevakalelwa kukuba uthetha nabo ngokuziphakamisa okanye baphathwa ngendlela engenasimilo. UKimiko owayehlala noninazala owayenesiphene wathi: “Umama wayeqonda yaye wayesazi xa ndingakhange ndimnyamekele kakuhle okanye xa ndiziphakamisile.” UHideko naye kwafuneka asebenzele kwisimo sakhe sengqondo. “Ekuqaleni ndandinxunguphele xa kwafuneka ndinyamekele umamazala. Ndandinguvulindlela [umlungiseleli wexesha elizeleyo wamaNgqina kaYehova], yaye ndabuyeka ubulungiseleli. Ngoko ndabona ukuba kwakufuneka ndilungelelanise ukucinga kwam. Nangona ubulungiseleli bendlu ngendlu bubalulekile, nako oku kwakuyinxalenye ebalulekileyo yokuthobela imithetho kaThixo. (1 Timoti 5:8) Ndaqonda ukuba kwakufuneka ndibe nothando nolwazelelelo olungakumbi ukuba ndandiza kuba novuyo. Isazela sam sasidla ngokundikhathaza xa ndisenza izinto ngokungakhathali. Xa ndafumana ingozi yaye ndisezintlungwini, ndacinga ngomamazala neentlungu awayekuzo. Emva koko kwaba lula ngam ukuba ndibonise ububele nolwazelelelo.”
Nabo Banyamekela Abanye Bafuna Ukunyanyekelwa
Okungafanele kujongelwe phantsi yimfuneko yokuvakalisa uxabiso kulowo ngokukhethekileyo unomthwalo wokunyamekela abalupheleyo. (Thelekisa IMizekeliso 31:28.) Amabhinqa amaninzi aqhubeka enyamekela iimbopheleleko zawo kungakhathaliseki enokuba kuvakaliswa amazwi oxabiso okanye akunjalo. Noko ke, xa sicinga ngoko kuquka umsebenzi wawo ngokuqinisekileyo amazwi anjalo afanelekile. Ngokunokwenzeka la mabhinqa aya kuba nomsebenzi wokucoca, wokuhlamba nowokupheka ongakumbi ekufuneka ewenzile. Kwakhona, khawucinge ngohambo oluya esibhedlele okanye kwagqirha, kwanokutyisa okanye ukuhlamba umguli owalupheleyo. Elinye ibhinqa, elanyamekela uninazala kangangexesha elide, lathi: “Ndiyazi ukuba kunzima ngomyeni wam ukuba avakalise uxabiso ngamazwi, kodwa ngezinye indlela uyandibonisa ukuba uyakuxabisa oko ndikwenzayo.” Amazwi nje aqhelekileyo ombulelo anokwenza konke ukuba kubonakale kuwufanele umgudu.—IMizekeliso 25:11.
Kukwakho Nemivuzo
Iintsapho ezininzi eziye zanyamekela abazali abalupheleyo kangangeminyaka zithi oku kuye kwazinceda ukuba zihlakulele iimpawu ezibalulekileyo zobuKristu: unyamezelo, ukuzincama, uthando lokungazingci, inkuthalo, intobeko nolwazelelelo. Iintsapho ezininzi ziye zasondelelana ngokweemvakalelo. Umvuzo owongezelelekileyo lithuba lokuncokola ngakumbi nabazali nokubazi ngokungakumbi. UHisako wathetha oku ngoninazala: “Ubomi bakhe babubangel’ umdla. Uye watyhubela iinzima ezininzi. Ndiye ndafikelela ekumazini ngokungakumbi ndaza ndafunda nokuxabisa iimpawu zakhe endandingaziqondi ngaphambili.”
UKimiko owayenyamekela abazali bomyeni wakhe noninakhulu owayengumlwelwe osoloko esemandlalweni wathi: “Kwakukho ixesha ngaphambi kokuba ndifundisise iBhayibhile xa ndandifuna ukuqhawula umtshato ndize ndiyibaleke ngeenyawo loo meko. Ndandula ke ndafunda ukuba sifanele ‘sivelele . . . abahlolokazi embandezelweni yabo.’ (Yakobi 1:27) Ndiyavuya kuba ndenza konke okusemandleni, njengokuba ngoku kungekho namnye entsatsheni unesizathu esifanelekileyo sokukhalazela iinkolelo zam. Isazela sam sicocekile.” Omnye wathi: “Ndiye ndazibonela imiphumo emibi yesono sika-Adam yaye ngoku ndiyiqonda ngakumbi imfuneko yentlawulelo.”
Ngaba kungekudala uza kube usamkela elinye ilungu lentsapho yakho ekhayeni lakho? Okanye ngaba mhlawumbi uza kube ufudukela kubazali bakho abalupheleyo? Ngaba uziva unexhala? Oko kuyaqondakala. Kuya kubakho uhlengahlengiso ekuya kufuneka ulwenzile. Kodwa uya kufumanisa ukuba nawe uvuzwa ngokutyebileyo ngokuhlangabezana nolo celomngeni ngokuphumelelayo.
[Umfanekiso okwiphepha 24]
Abalupheleyo bafuna ukuziva bethandwa yaye behlonelwa