Iindawo Ezithile Zelizwe Ledinga

Vuyani! Imikhombe Iyaphuphuma Yioli

UMPROFETI uYoweli wabongoza ‘oonyana baseZiyon ukuba bagcobe bavuye kuYehova.’ Wasebenzisa ioli yomnquma ukuchaza uvuyo nokuchuma kwabo: “Zozala izanda yingqolowa, iphalale yiwayini entsha nayioli imikhombe yokukhongozela.”—Yoweli 2:23, 24.

Ukuba wawuhlala kwaSirayeli kumaxesha okubhalwa kweBhayibhile, wawuya kuvuyiswa kukubakho komthi womnquma onjengalo uboniswe ngasentla kufuphi nendlu yakho, okanye kumasimi akho.a Wawuya kubenza ubomi bakho bube lula, bube myoli ngakumbi. Yintoni eyayiya kwenza umthi womnquma ubaluleke kangako?—Thelekisa ABagwebi 9:8, 9.

Okokuqala, khawuqwalasele umthi wakho. Imithi yomnquma isenokuphila kangangeenkulungwane, yimbi isenokuphila ngaphezu kweminyaka eliwaka, ngoko xa uhlolisiswa kusenokubonakala isiqu esinamaqhuqhutye, esinombala oluthuthu. Lo mthi wakho usenokuba uziimitha ezintandathu ukuphakama, ngokuqinisekileyo ungenakuba mde njengomsedare okanye ube newonga njengomthi wesundu. Amagqabi awo asoloko eluhlaza, akhazimla okwesilivere, enza kubekho umthunzi unyaka wonke. Sekunjalo, inkangeleko okanye umthunzi wawo asinto engakwenza uwuxabise ngakumbi lo mthi. Ngokuqinisekileyo akunjalo.

Eyona nto ibalulekileyo kuwo sisiqhamo, loo mawakawaka eziqhamo zomnquma eziluhlaza okanye ezimnyama! Leyo yinto eyayiza kuwenza umthi womnquma ube sisiseko sobomi nesokwenziwa kwemisebenzi ethile kwaSirayeli. Kwinyanga kaMeyi lo mthi uyayokozela ziintyatyambo eziqaqambileyo, ukulungiselela iziqhamo zomnquma. (Yobhi 15:33) Njengoko ezi zivuthwa, zisenokuguquka ukusuka kumbala oluhlaza-bumthubi zibe mdaka okanye zibe mnyama.

Ukuvuna iziqhamo zomnquma kwinyanga kaOktobha nekaNovemba yayingumsebenzi onzima. Kwakufuneka umthi uwubethe ngeentonga ukuze iziqhamo ezivuthiweyo ziwele kumalaphu andlalwe ngaphantsi komthi. (Duteronomi 24:20) Iziqhamo zomnquma kwakufuneka zihlanjwe ngaphambi kokuba kwenziwe nantonina ngazo, njengokuzifaka kumanzi anetyuwa uze uziyeke kuwo kangangethuba elithile ukuze kuphele laa ncasa yazo ikrakra. Yintoni eyayisenziwa ngazo emva koko?

Oko kwakuxhomekeke kwindlela owawufuna ukuzitya ngayo okanye ukungenelwa ngayo kwisivuno sakho esichumileyo. Wawunokuzitya zikrwada iziqhamo zomnquma, okanye uzinonge ukuze intsapho yakho ifumane isixhaso esiluncuthu kangangeenyanga ezininzi. Iziqhamo zomnquma zazinokuba kukutya okungundoqo, mhlawumbi isidlo seziqhamo ezithile zomnquma eziqholiweyo zityiwa namaqebengwana erhasi.

Noko ke, mhlawumbi ngenkoliso yeziqhamo zomnquma wawuya kulandela inkqubo eyimfuneko ukuze ufumane loo mveliso iluncedo nexabiseke gqitha—ioli yomnquma. Wawunokufumana iindidi zeoli ekumgangatho owahlukahlukeneyo, yaye ezi unokuzisebenzisela izinto ezininzi. Okokuqala, iziqhamo ezivuthiweyo zomnquma wawunokuzingqusha kancinane okanye uzixovule esixovulelweni okanye ude uzixovule nangeenyawo. (Mika 6:15) Oko kwakuvelisa eyona oli ikumgangatho ophakamileyo, ngoku ebizwa ngokuba yioli esulungeke ngokwenene, eyayikufanelekela ukusetyenziselwa ukukhanyisa izibane zomnquba. (Eksodus 25:37; 27:20, 21) Khawuthekelele indlela owawuya kusonga ngayo isixa sale oli yodidi oluphezulu ukuze upheke ngayo kwizihlandlo ezikhethekileyo!

Iziqhamo zomnquma, kwanezo zolona didi luphantsi, zazinokufakwa kwisixovulelo ukuze kukhanywe ioli engakumbi kwintsalela ethambileyo yeziqhamo, nangona yayisenokuba yeyomgangatho ophantsi. Intsalela ethambileyo yesiqhamo ineoli emalunga nama-50 ekhulwini. Kwakunokusetyenziswa izixovulelo ezahlukahlukeneyo, kodwa sinye esiboniswe apha. Iziqhamo zomnquma ezixovulwe ngokupheleleyo okanye ngokuyinxenye zazifakwa kwinto ebumphanda. Ilitye lokusila, elalijikeleziswa liesile okanye ngumntu, laligangatha phezu kwazo, ukuze zikhuphe ioli, eyayikhongozelwa ngeengqayi.—Mateyu 18:6.

Ioli yomnquma isenokufaniswa negolide enyibilikisiweyo—yayixabiseke gqitha yaye yayisetyenziselwa izinto ezininzi. Umthi nje omnye wawunokuvelisa ioli eyayingaxhasa intsapho yabantu abahlanu okanye abathandathu unyaka wonke. Yayisiba kokona kutya kwabo kungundoqo, ekubeni yayisetyiswa lula yaye inika amandla. (Thelekisa uYeremiya 41:8; Hezekile 16:13.) Enye ioli wawusenokuyiqhola uze uyisebenzise njengesithambiso okanye ethile uyigalele kwintloko yondwendwe njengembonakaliso yokubuk’ iindwendwe. (2 Samuweli 12:20; INdumiso 45:7; Luka 7:46) Wawunokuyisebenzisa njengeyeza lokudambisa iintlungu emanxebeni.—Isaya 1:6; Marko 6:13; Luka 10:34.

Ezi yayingenakuba kuphela kweendlela owawunokusisebenzisa ngazo isixhaso esityebileyo seoli yomnquma. Kwakhona wawunokuyisebenzisela ukukhanyisa ikhaya lakho, njengenxalenye yomnikelo oya kuThixo, okanye njengemveliso owawunokufumana inzuzo ngayo ngokuyithengisa. Ewe, kumaxesha okubhalwa kweBhayibhile umthi womnquma wawusesona sityalo sixabisekileyo, ngoko uYoweli wayenokuwusebenzisa ngokufanelekileyo ukuchaza ukuchuma novuyo.—Duteronomi 6:11; INdumiso 52:8; Yeremiya 11:16; Mateyu 25:3-8.

[Umbhalo osemazantsi]

[Inkcazelo Ngomfanekiso okwiphepha 24]

Pictorial Archive (Near Eastern History) Est.