Ngaba Ubusazi?

Kwakutheni ukuze kubekho abananisi ngemali kwitempile yaseYerusalem?

▪ Ngaphambi nje kokuba afe, uYesu wakhalimela abantu ababeqhatha abantu etempileni. IBhayibhile ithi: “UYesu . . . waphosa phandle bonke abo babethengisa nababethenga etempileni, wazibhukuqa iitafile zabatshintshi bemali nezihlalo ezide zabo babethengisa amahobe. Wathi kubo: ‘Kubhaliwe kwathiwa, “Indlu yam iya kubizwa ngokuba yindlu yomthandazo,” kodwa nina niyenza umqolomba wabaphangi.’”—Mateyu 21:12, 13.

AmaYuda enkulungwane yokuqala nabo baguqulele ebuYudeni ayesiya kwitempile eYerusalem evela kumazwe ngamazwe nakwizixeko ngezixeko, esiza nemali yezo ndawo asuka kuzo. Kodwa kwakufuneka asebenzise imali yasekuhlaleni ukuze ahlawule irhafu yonyaka yetempile, athenge izilwanyana zokubingelela aze enze neminye iminikelo. Abatshintshi bemali babehlawulisa imali ethile ukuze batshintshe imali evela kumazwe ngamazwe. Xa imithendeleko yamaYuda isondela, aba batshintshi bemali babedla ngokubeka iitafile etempileni kwiNtendelezo Yeentlanga.

Ukukhalimela kukaYesu abatshintshi bemali ngokuba baguqule itempile yaba ‘ngumqolomba wabaphangi’ kubonisa ukuba babebiza inkuntyula yemali.

Yintoni eyayiyenza ithandwe imithi yomnquma ngamaxesha okubhalwa kweBhayibhile?

▪ Imithi yomnquma neyezidiliya yayiphakathi kwezinto uThixo awayethembise ukubasikelela ngazo abantu bakhe xa bethembekile kuye. (Duteronomi 6:10, 11) Nanamhlanje, imithi yomnquma ithandwa kakhulu kwiindawo ekhula kuzo. Inokuvelisa intabalala yeziqhamo amakhulu eminyaka nokuba ayinyanyekelwa kangako. Umthi wawo ukhula nakumhlaba onamatye yaye uyakwazi ukumelana nembalela. Xa lo mthi ugawuliwe, isiphunzi sawo sivelisa amahlumelo amaninzi akhula abe ngumthi.

Ngamaxesha okubhalwa kweBhayibhile, ixolo namagqabi alo mthi ayebalulekile kuba kwakunyangwa ngawo umkhuhlane. Amagqabi awo amadala anentlaka kwakusenziwa ngawo iziqholo zomzimba. Noko ke, eyona nto wawubaluleke ngayo yayiziziqhamo zawo ezazityiwa, ngokukodwa ioli yawo. Ipete lomnquma ovuthiweyo lineoli eninzi.

Umthi onemveliso, unokuvelisa iilitha ezingama-57 zeoli ngonyaka. Yayisetyenziselwa ukukhanyisa izibane, kumatheko, xa kunqulwa, ukuthambisa umzimba neenwele ize ithanjiswe naxa umntu enenxeba okanye egruzukile.—Eksodus 27:20; Levitikus 2:1-7; 8:1-12; Rute 3:3; Luka 10:33, 34.