Isizathu Sokuba Ubomi Bomntu Okhalazayo Bungebubo Obonwabisayo
IMINCILI yayijike yakukuphelelwa lithemba kwiiveki nje ezimbalwa. Imincili awayenayo ekuqaleni amaSirayeli ngenkululeko awayesandul’ ukuyifumana kubukhoboka baseYiputa yaphethukela ekubeni zizikhalazo ezingavakaliyo ngokutya. Ebudeni benyanga yesibini emva kokuphuma kwalo eYiputa, olu hlanga lunganelisekiyo lwathi lukhetha ubomi bobukhoboka kunokuhlala kubomi obunzima basentlango. Kwiinyanga ezalandelayo, lo moya wokukhalaza walwenza buthathaka uzimiselo lwalo lokuthobela uYehova waza wawaphelisa amathemba eso sizukulwana okungena kwiLizwe Ledinga.—Eksodus 16:1-3; Numeri 14:26-30.
Kakade ke, ukukhalaza akuzange kupheleliselwe kwisizukulwana esinye okanye kuhlanga olunye. Ngubani ongathi maxa wambi akhalaze ngomsebenzi, ukutya, imozulu, abantwana, abamelwane okanye iindleko zokuphila? Kubonakala ngathi ukungafezeki koluntu kuye kwafaka isandla ekukhalazeni.—Roma 5:12; Yakobi 3:2.
Kutheni sikhalaza ngokulula? Mhlawumbi siziva sidimazekile, siphoxekile okanye sigula. Ukukhalaza kusenokuba yindlela yokwahlukana nonxunguphalo lwethu, okanye kusenokuba yindlela engangqalanga yokuthi: “Ndinokuwenza ngokulunge ngakumbi lo msebenzi!” Maxa wambi izikhalazo ziphenjelelwa kukungqubana kweempawu zobuntu. Ukanti kwakhona kukwakho nezikhalazo zokwenene.
Enoba uyintoni na unobangela, njengoko umzekelo wamaSirayeli ongasentla ubonisa, ukukhalaza kunokuba yingozi xa kuzingisa. Umntu unokuba ngokhalaza ngalo lonke ixesha, ade akhalazele nendlela uYehova azenza ngayo izinto. Kutheni oko kuyingozi? Yaye zinokusingathwa njani ngokuchanileyo izikhalazo ezifanelekileyo?
Izikhalazo Ezifanelekileyo
Ukuba isikhalazo asikho nzulu, umbuzo wokuqala esifanele siwubuze ngulo, Ngaba uthando lungandibangela ndisibethe ngoyaba? Liyinyaniso elokuba sisenokuba nesizathu esivakalayo sokukhalazela mntu uthile, mhlawumbi kusenokuba ngumzalwana wethu. Usenokuba ubesiphethe ngendlela engeyoyabubele okanye ngokungafanelekanga. Sekunjalo, ngaba ukukhalaza kwabanye ngempatho embi kunokuziphucula iimeko? IBhayibhile incomela ukuba senze njani? EyabaseKolose 3:13 ithi: “Ninyamezelana, nixolelana, ukuba ubani uthi abe nokusola ngakubani; njengokuba naye [uYehova, NW] wanixolelayo, yenjani njalo nani.” Ngoko nokuba isikhalazo sinokuba sesifanelekileyo, iZibhalo zincomela isimo sengqondo sokuxolela kunomoya wokukhalaza.—Mateyu 18:21, 22.
Kuthekani ukuba umcimbi unzulu kakhulu ukuba ungabethwa ngoyaba? Kusenokubakho isizathu esilungileyo sokuvakalisa isikhalazo. Xa “isikhalo” esivakalayo sasiwa kuYehova ngokuphathelele iSodom neGomora, wathabatha amanyathelo okuqhubana naloo meko ihlazisayo kwezo zixeko zonakeleyo. (Genesis 18:20, 21) Esinye isikhalazo esifanelekileyo sabakho ngokukhawuleza emva kwePentekoste yowama-33 C.E. Xa ukutya kwakusabelwa abahlolokazi abasweleyo, kwabonakaliswa umkhethe kubafazi ababethetha isiHebhere. Kuyaqondakala ukuba, oku kwabacaphukisa abahlolokazi ababethetha isiGrike. Ekugqibeleni, esi sikhalazo safikelela ezindlebeni zabapostile, yaye ngokukhawuleza balungiselela iqela lamadoda awayenembopheleleko ukuba alungise le ngxaki.—IZenzo 6:1-6.
Namhlanje abadala abamiselweyo abangamaKristu ngokufanayo abafanele balibazise ekuthabatheni amanyathelo afunekayo xa imicimbi enzulu iziswa engqalelweni yabo. IMizekeliso 21:13 ithi: “Ovingca iindlebe zakhe ekukhaleni kwesisweli, naye uya kubiza, angaviwa.” Kunokungasisi so isikhalazo esifanelekileyo, abadala bafanele baphulaphule ngovelwano. Kwelinye icala, sonke sinokusebenzisana ngokuchaza izikhalazo ezinzulu kubadala, endaweni yokuzicengceleza kuye nabani na oya kuphulaphula.
Sekunjalo, uninzi lwethu lunokuvuma ngokuphandle ukuba kukho amaxesha apho ukungafezeki kobuntu kusibangela ukuba sikhalaze ngokungeyomfuneko. Ukukhangela ngokusondeleyo kwindlela amaSirayeli awayeziphethe ngayo entlango kuya kusinceda sibone ingozi yokuvumela ukumbombozela ngamathuba athile kukhulele ekubeni ngumoya wokukhalaza.
Imbono KaThixo Ngabantu Abakhalazayo
Ukukhalaza kwamaSirayeli ngamalungiselelo okutya kutyhila iingozi ezimbini ezihambisana nokukhalaza. Okokuqala, ukukhalaza kuyosulela. Ingxelo ichaza ukuba “labakrokrela [“labakhalazelayo,” NW] ooMoses noAron lonke ibandla loonyana bakaSirayeli entlango apho.” (Eksodus 16:2) Kusenokwenzeka ukuba, imbinana yaqalisa ukukhalaza ngokunqongophala kokutya, yaye kungekudala wonke umntu wayekhalaza.
Okwesibini, umntu okhalazayo ngokufuthi uyayibaxa ingxaki. Kule meko, amaSirayeli ema ngelithi kwakulunge ngakumbi eYiputa, apho ayenokutya isonka nenyama kangangoko ayefuna. Akhalaza ngelithi ayesiwe entlango kuphela ukuze afe yindlala.—Eksodus 16:3.
Ngaba imeko yaloo maSirayeli yayimbi ngolo hlobo ngenene? Kunokwenzeka ukuba ukutya kwabo kwakushokoxeka, kodwa uYehova wayeyibone kwangaphambili loo ngxaki, yaye ngexesha elifanelekileyo walungiselela imana ukwanelisa iintswelo zabo zokwenyama. Izikhalazo zabo ezibaxiweyo zazintama ukuswela kwabo ngokupheleleyo intembelo kuThixo. Ngoxa babeseYiputa bakhalaza ngokufanelekileyo ngemeko yempatho embi. (Eksodus 2:23) Kodwa xa uYehova wabakhululayo ebukhobokeni, baqalisa ukukhalazela ukutya. Eso yayisisikhalazo esingekho ngqiqweni. UMoses walumkisa wathi, “Anikrokreli [“anikhalazeli,” NW] thina, nikrokrela [“nikhalazela,” NW] uYehova.”—Eksodus 16:8.
Loo moya wokukhalaza wamaSirayeli wazibonakalisa ngokuphindaphindiweyo. Kwithutyana elingangonyaka imana yaba ngunobangela wokukhalaza. (Numeri 11:4-6) Kungabanga thuba lide emva koko ingxelo embi evela kwiintlola ezili-10 kwezili-12 zamaSirayeli yabangela izikhalazo malunga neengozi ezibandakanyekileyo ezazisenokubahlela ekuzuzeni iLizwe Ledinga. Abantu bade bathi: “Akwaba besifele ezweni laseYiputa! Akwaba besifele nakule ntlango!” (Numeri 14:2) Hayi indlela ababeluswele ngokupheleleyo ngayo uxabiso! Akumangalisi ukuba uYehova abe wathi kuMoses: “Kuya kuda kube nini na bendigiba aba bantu? Kuya kude kube nini na bengakholwa kum?” (Numeri 14:11) Abo bakhalazi bangenambulelo bagwetyelwa ukubhadula entlango iminyaka engama-40 de kwadlula eso sizukulwana.
Umpostile uPawulos usikhumbuza ngalo mzekelo. Ulumkisa amaKristu ukuba angaze afane naloo maSirayeli awaba ngabakhalazi, nto leyo eyathi yabangela afela entlango. (1 Korinte 10:10, 11) Licacile elokuba, ukukhalaza okungafanelekanga nomoya wokukhalaza kunokulwenza buthathaka ukholo lwethu kuze kusikhokelele ekubeni uYehova angakholiswa sithi.
Sekunjalo, uYehova unomonde ngabakhonzi bakhe abo bathi maxa wambi bakhalaze ngenxa yeemeko ezidimazayo. Xa uEliya wabalekela kwiNtaba yaseHorebhe ngenxa yokutshutshiswa nguKumkanikazi uIzebhele ongendawo, wayeyisekile lelokuba umsebenzi wakhe njengomprofeti wawufikelele esiphelweni. Ngempazamo wacinga ukuba wayekuphela komnquli kaYehova owayesele kwelo lizwe. Ukuze omeleze ukholo lukaEliya, uThixo waqala ngokumbonisa amandla Akhe obuthixo. Lo mprofeti wandula waxelelwa ukuba kwakusekho abakhonzi bakaYehova abathembekileyo abangama-7 000 kwaSirayeli yaye kwakukho umsebenzi ongakumbi awayefanele awenze. Ngokomphumo, uEliya wazilibala izikhalazo zakhe waza waqhubela phambili ehlaziyekile emandleni. (1 Kumkani 19:4, 10-12, 15-18) Njengoko abadala abangamaKristu bebonakalisa ukuqonda, nabo ngokukwanjalo banokuthetha ngokuthuthuzelayo nabo bathembekileyo, bebanceda babone indima yabo ekuzalisekeni kwenjongo kaThixo.—1 Tesalonika 5:14.
Ukoyisa Umoya Wokukhalaza
Unokoyiswa njani umoya wokukhalaza? Kaloku, abo baboniswe ubungqina ngeengozi elizenzayo icuba emzimbeni banokhuthazo olunamandla lokuyeka ukutshaya. Ngokufanayo, ukuqonda isizathu sokuba umoya wokukhalaza ube yingozi kunokusikhuthazela ekubeni siyeke nawuphi na umkhwa wokukhalaza.
Ziziphi iingenelo eziba ngumphumo kwabo boyisa umoya wokukhalaza? Enye ingenelo ebalulekileyo enanditshwa ngabo bakuphephayo ukukhalaza kukuba bayijonga imicimbi ngokweZibhalo ibe abathabath’ icala. Kuyinto enqabileyo ngomntu okhalazayo ukucinga ngengxaki ngokwendlela uYehova azijonga ngayo izinto. AmaSirayeli akhalazayo alibala ukuba uYehova uThixo wayewakhulule ebukhobokeni nokuba ngenxa yawo wohlukanisa amanzi oLwandle Olubomvu ngokungummangaliso. Ukucinga kwabo ngendlela ephosakeleyo kwenza abakubona ukusebenza kwamandla kaThixo yaye kwabaphulukanisa novuyo lwabo. Ngenxa yoko, intembelo yabo kuYehova yaphela.
Ngokubhekele phaya, umntu ozijonga ngendlela echanileyo iingxaki zakhe uyaqonda xa iimpazamo zakhe zibe ngunobangela weenzima zakhe. Usenokungaphindi enze impazamo efanayo kwakhona. UYeremiya wawalumkisa amaSirayeli ukuba angakhalazi ngobunzima awayethubeleza kubo emva kokutshatyalaliswa kweYerusalem. Abandezeleka ngenxa yezono zawo, yaye oko koko kwakufuneka akuqonde ukuze aguquke aze abuyele kuYehova. (IZililo 3:39, 40) Ngokufanayo, umfundi uYuda wawakhalimela ‘amadoda angahloneli Thixo’ awalulahlayo ulwalathiso lukaYehova aza aba “ngabakrokri [“ngabakhalazi,” NW] abasolayo” ngalo lonke ixesha.—Yuda 3, 4, 16.
Kunjengokuba uKumkani uSolomon osisilumko wakha waphawula oku, “Intliziyo evuyileyo iyalungisa, ichachise; umoya odakumbileyo uyawomisa amathambo.” (IMizekeliso 17:22) Umoya wokukhalaza uyasenzakalisa ngokweemvakalelo yaye uphanga uvuyo lwethu. Ubonakalisa isimo sengqondo sokungakhangeli kwikamva ngentembelo. Kodwa abo bafunda ukucinga nokuthetha ‘ngezinto eziludumo lulungileyo’ banentliziyo evuyayo, enokubenza bazive belunge ngakumbi.—Filipi 4:8.
Ngokungathandabuzekiyo, ubomi bethu buya kulunga ngakumbi ukuba siphawula iimpawu ezintle zabantu kunokujonga iintsilelo zabo. Ukuzamkela ngovuyo iimeko ezivavanyayo kunokukhalaza ngezinto ezisibuyisel’ umva kunokusikhuthaza. Nkqu neemvavanyo zinokuba ngunobangela wovuyo ukuba sizijonga njengethuba lokomeleza ukholo lwethu nokuqinisa unyamezelo lwethu.—Yakobi 1:2, 3.
Kwakhona, kubalulekile ukukhumbula ukuba xa sikhalaza, asenzakalisi thina kuphela. Ngokusoloko sivakalisa izikhalazo, sinokulwenza buthathaka ukholo lwabanye. Ingxelo embi yeentlola ezilishumi zakwaSirayeli yabangela lonke uhlanga lwakugqala ukoyisa kwiLizwe Ledinga njengephulo elinganiki themba. (Numeri 13:25–14:4) Ngesinye isihlandlo, uMoses waziva edakumbile ngenxa yezikhalazo ezingapheliyo zabantu kangangokuba wacela uYehova ukuba athabathe ubomi bakhe. (Numeri 11:4, 13-15) Kwelinye icala, xa sithetha ngemicimbi ngendlela eyakhayo, sisenokukwazi ukomeleza ukholo lwabanye yaye sifake isandla kuvuyo lwabo.—IZenzo 14:21, 22.
Nangona sisenokulingelwa ukukhalazela abantu esisebenza nabo, abahlobo bethu, intsapho yethu, kwanabadala bebandla, uYehova ufuna ukuba ‘abantu bakhe babe nothandano olunyamekileyo.’ Uthando olunjalo lusishukumisela ukuzigubungela iimpazamo zabanye kunokuzibalaselisa. (1 Petros 4:8) Okuvuyisayo kukuba, uYehova uyakhumbula ukuba siluthuli yaye akajongi iimpazamo zethu. (INdumiso 103:13, 14; 130:3) Ukuba thina sonke besizama ukulandela umzekelo wakhe, ngokungathandabuzekiyo besiya kuba nezikhalazo ezimbalwa gqitha.
Xa uluntu lubuyiselwe kwimfezeko, akukho namnye oya kukhalaza ngeemeko zethu ezilingayo. Lide lifike elo thuba, kufuneka sixhathise isilingo sokukhalazela abanye okanye iimeko zethu ezilingayo. Ukubonakalisa ukuba sithembele kuYehova yaye siwathanda ngenene amanye amakholwa, ‘izinto zonke masizenze singenakukhalaza.’ (Filipi 2:14) Oku kuya kumkholisa uYehova yaye siya kungenelwa kakhulu. Ngoko, ngenxa yentlalontle yethu neyabanye, masingaze silibale ukuba ubomi bomntu okhalazayo abonwabisi.
[Umfanekiso okwiphepha 20]
Kwanelungiselelo likaThixo elingummangaliso lemana laba ngunobangela wokukhalaza