Ngaba Konke Ukukhalaza Akulunganga?
Ziziphi izinto ezisicaphukisayo ezibuhlungu ngakumbi kunezo singenakuzikhalazela?—UMarquis De Custine, 1790-1857.
KANGANGEMINYAKA emibini wayenyamezele ukukhathazwa ngokwesini ngowayesebenza naye. Ukungahambisani kwakhe noku kwaphumela ekubeni kuthethwe kakubi ngaye nokuba angakhathalelwa. Uxinezeleko olungamandla lwayichaphazela impilo yakhe, kodwa wayeza kwenza ntoni? Ngokufanayo, umfundi owaphumelela emagqabini eklasini yakhe wagxothwa ngenxa yokuba isazela sakhe sasingamvumeli ukuba abe nenxaxheba kubugcisa bokulwa nto leyo ekwakufuneka ayenze esikolweni. Bobabini babevakalelwa kukuba boniwe, kodwa ngaba babefanele bakhalaze? Ukuba babekhalazile, ngaba babenethemba lokuba kwakuya kubakho isiqabu okanye ngaba oko kwakuya kuzenza izinto zibe mbi ngakumbi?
Izikhalazo ezinjengezi nezinye zixhaphakile namhlanje, njengokuba siphila phakathi kwabantu abangafezekanga nakwihlabathi elonakeleyo. Ukukhalaza kuquka ukuvakalisa ukunganeliseki, intlungu neengqaqambo, okanye ingqumbo ngenxa yokutyholwa ngothile. Abantu abaninzi bakhetha ukukuphepha ukukhalaza nongquzulwano; sekunjalo, ngaba ubani umele athule ngamaxesha onke? Yintoni imbono yeBhayibhile?
Imiphumo Emibi Kubani Nakwabanye
Alithandabuzeki elokuba umoya wokukhalaza ngokugqithiseleyo uyenzakalisa, yaye uyagwetywa yiBhayibhile. Lowo ukhalazayo uya kuzenzakalisa ngokwasenyameni nangokwasemoyeni aze abangele imbandezelo kwabo abakhalazelayo. Ubhekisela kumfazi okhalazayo, umzekeliso weBhayibhile uthi: “Uqhoqhozo oluxikileyo mini ngemvula, nomfazi onengxabano, kuyafana.” (IMizekeliso 27:15) Ukukhalazela uYehova okanye elinye lamalungiselelo akhe kulityala elingakumbi. Xa uhlanga lwakwaSirayeli lwakhalazela imana eyayilungiselelwe ngommangaliso ebudeni bohambo lwasentlango olwathabatha iminyaka engama-40, luyibiza ngokuba ‘sisonka esinkatshunkatshu,’ uYehova wathumela iinyoka ezinobuhlungu ukuze zilume abo bakhalazi bangathobeliyo, yaye uninzi lwabo lwafa.—Numeri 21:5, 6.
Ngokubhekele phaya, uYesu wabaluleka abalandeli bakhe, ukuba bangakhalazi ‘ngesitroyi’ seempazamo ezibonakala ebantwini, kodwa bamele baphawule ngakumbi ‘umqadi’ wokusilela kwabo. (Mateyu 7:1-5) Ngokufanayo, uPawulos wagxeka ukugweba (uhlobo oluthile lokukhalaza) omnye ‘njengongenakungxengxezeleka kwanjengokuba wena lo ugwebayo uqhelisela izinto ezifanayo.’ Ezi zilumkiso ngokuphathelele ukukhalaza zimele zisishukumisele ekubeni sikuphephe ukugxeka ngokungeyomfuneko nokuba nesimo sengqondo sokukhalaza.—Roma 2:1.
Ngaba Zonke Iindlela Zokukhalaza Azilunganga?
Ngoko, ngaba sifanele sigqibe kwelokuba, zonke iindlela zokukhalaza azilunganga? Akunjalo, asifanele sigqibe ngokutsho. IBhayibhile ibonisa ukuba kuninzi ukungabikho kokusesikweni kweli hlabathi lingagqibelelanga siphila kulo okufuna ukulungiswa. Kumzekeliso wakhe, uYesu wathetha ngomgwebi ongendawo owathi ekrikriza wenza okusesikweni kumhlolokazi owayecinezelekile ukuze ‘angahlali esiza kuye aze amqobe amgqibe.’ (Luka 18:1-8) Kwezinye iimeko nathi kusenokufuneka sizingise ekukhalazeni kwethu de oko kuphosakeleyo kulungiswe.
Ngokusikhuthaza ukuba sithandazele uBukumkani bukaThixo ukuba bufike, ngaba uYesu wayengasibongozi ukuba sibuqonde ubuthathaka beli hlabathi size ‘sikhalele’ isicombululo sikaThixo? (Mateyu 6:10) Xa weva “isikhalo” ngobungendawo beSodom neGomora zamandulo, uYehova wathumela abathunywa bakhe ukuze ‘bakhangele ukuba baphelelisile na ngokwesikhalo sabo’ baze bazise isicombululo. (Genesis 18:20, 21) Ukuze kuncedakale abo babekhalaze kuye uYehova wakwazi ukulungisa iimeko ngokutshabalalisa izixeko ezibini nabemi abahlala kuzo ababeziphethe kakubi.
Ibandla LobuKristu
Ngaba kufanele kubekho umahluko kubazalwana abasebandleni lobuKristu? Nangona engamadoda namabhinqa angafezekanga, amaKristu azama ngokwenene ukukhonza uThixo ngoxolo nangomanyano. Sekunjalo, kuya kuphakama iimeko eziya kubangela ukuba kubekho ukukhalaza okuya kufuna ukulungiswa. Ngenkulungwane yokuqala, kwaphakama ingxaki ebandleni labathanjiswa kungekudala nje emva kwePentekoste. Uninzi lwabo babesandul’ ukuguqukela kubuKristu bahlala eYerusalem ukuze bafundiswe ngakumbi nokuze bakhuthazwe. Kwakusabelwana ngokutya okwakukho. Noko ke, “kwavela ukumbombozela kuwo amaYuda athetha isiGrike nxamnye namaYuda athetha isiHebhere, ngenxa yokuba abahlolokazi bawo babengananzwa kulwabiwo lwamihla le.” Kunokuba babagatye abo babekhalaza njengabanenkathazo, abapostile bathabatha amanyathelo okuyilungisa le ngxaki. Ewe, izikhalazo ezisengqiqweni ezenziwe ngentlonelo efanelekileyo nangomoya ofanelekileyo ziya kuphulaphulwa ngenyameko zize zithatyathelwe ingqalelo ngabo bavelelayo ebandleni.—IZenzo 6:1-6; 1 Petros 5:3.
Kumagunya Afanelekileyo
Ngaba uphawule kule mizekelo ingasentla ukuba izikhalazo zimele zenziwe ngomoya ofanelekileyo nakwabo banegunya elifanelekileyo? Ngokomzekelo, bekungayi kuba sengqiqweni ukukhalaza emapoliseni ngenxa yomthwalo werhafu enkulu okanye kwijaji ngobulwelwe bukabani. Ngoko, kwakhona bekungayi kufaneleka ukukhalazela imeko ethile enoba kusebandleni okanye akukho sebandleni kumntu ongenagunya okanye ongenakukwazi ukunceda.
Namhlanje kumazwe amaninzi, kukho iinkundla namanye amagunya afanelekileyo ekusenokubhenelwa kuwo ngethemba lokufumana isiqabu esithile. Xa umfundi okhankanywe ekuqaleni kweli nqaku wasa isikhalazo sakhe enkundleni, iijaji zaba ngakwicala lakhe, yaye waphinda wabuyiselwa yaye nesikolo sacela uxolo. Ngokufanayo, umsebenzi olibhinqa owayekhathazwa ngokwesini wafumana isiqabu ngoku encedwa ngumbutho wabasebenzi. Ibhodi yesikolo yacela uxolo. Abaqeshi bakhe bayeka ukumkhathaza ngokwesini.
Ngoko ke, akumele kulindelwe ukuba zonke izikhalazo ziya kuba nomphumo ofanayo. UKumkani uSolomon osisilumko ngokusengqiqweni wathi: “Into egoso ayinakolulwa; into engekhoyo ayinakubalwa.” (INtshumayeli 1:15) Senza kakuhle xa siqonda ukuba ezinye iimeko ziya kufuneka silinde uThixo ukuba azilungise ngexesha lakhe elifanelekileyo.
[Umfanekiso okwiphepha 31]
Badala phulaphulani nize nithabathe amanyathelo ngezikhalazo ezifanelekileyo