Iindawo Ezithile Zelizwe Ledinga

ISinayi—INtaba kaMoses Neyenceba

XA UCINGA ngeNtaba yeSinayi, mhlawumbi kuthi qatha uMoses engqondweni yakho. Ngoba? Kuba uMoses wafumana uMthetho kaThixo eNtabeni yoSingasiqithi weSinayi. Yiyiphi loo ntaba? Ngokunokwenzeka yileyo iboniswe ngasentla.a

Emazantsi osingasiqithi, malunga nasembindini phakathi kwemijelo emibini engena kuLwandle Olubomvu, kukho induli eneencopho ezimbini. Inkangeleko yayo yonke le ndawo ivisisana neengxelo zeBhayibhile ezibandakanya uMoses. Enye incopho ibizwa ngokuba yiJebel Musa, okuthetha ukuthi “INtaba kaMoses.”

Iingxelo ezahlukeneyo zeBhayibhile zilenza elo gama lifaneleke kakuhle. Ngaba uyakhumbula ukuba uMoses wayesalusa umhlambi weegusha zikaYitro xa kwabonakala isithunywa sezulu kwityholo elitshayo? Kwenzeka phi oko? IBhayibhile ithi kwenzeka “entabeni kaThixo eHorebhe,” ekwabizwa ngokuba yiNtaba yeSinayi. (Eksodus 3:1-10; 1 Kumkani 19:8) Emva kokuba uMoses ekhokele abantu bakaThixo ebakhupha eYiputa, wabazisa kule ntaba. IEksodus 19:2, 3 ithi “amisa iintente apho amaSirayeli malunga nentaba. UMoses wenyuka waya kuThixo, uYehova wadanduluka kuye esentabeni apho.”

Eso yayisisihlandlo sokuqala sokunyuka kukaMoses iNtaba yeSinayi, yaye wenza okungakumbi kunokuthabatha indlela enqumlayo enyukela kwiindawo ezithambekileyo. Sifunda oku: “Wehla ke uYehova phezu kwentaba yeSinayi, encotsheni yentaba; uYehova wambizela uMoses encotsheni yentaba leyo; wenyuka ke uMoses.”—Eksodus 19:20.

Amawaka abakhenkethi banamhlanje bazame ngamandla ukunyuka intaba ngobusuku beqwalasele imizila ephawulweyo ukuze bafikelele encotsheni yentaba, belinde ukubona ukuphuma kwelanga, baze emini babuyele ezantsi. Kwakungenjalo ngoMoses. UThixo wamxelela oku: “Nyuka uze kum entabeni, ube [“uhlale,” NW] khona, ndikunike amacwecwe amatye enomyalelo nomthetho, endiwubhalele ukuze bayalwe ngawo.” Ngeso sihlandlo “uMoses waba sentabeni apho iimini ezimashumi mane, nobusuku obumashumi mane.”—Eksodus 24:12-18.

Ngoko siyaqondakala isizathu sokuba igama likaMoses linxulunyaniswe nale ntaba, kodwa kutheni “inceba” inxulunyaniswa neli gama? Kaloku njengoko uMoses wayesentabeni esamkela uMthetho, kwithafa elisezantsi kwentaba (mhlawumbi kwiThafa lase-er-Raha elikulo mfanekiso) abantu bathabatha ikhondo lobudenge. Banyanzela umntakwaboMoses ukuba enze isithixo. UAron wathi: “Qhawulani amajikazi egolide . . . niwazise kum.” Ngaloo ndlela benza ithole legolide ukuze balinqule. Oku kwamenza wanomsindo uThixo oyinyaniso kwaza kwakhokelela ekufeni kwabangamawaka. (Eksodus 32:1-35) Kodwa uAron wenzelwa inceba yaye wahlangulwa. Kwakutheni?

Oko kuthethwa nguThixo kwiEksodus 32:10 kubonisa ukuba akazange amjonge uAron njengophembelele amaSirayeli ukuba enze ububi. Yaye xa kwafika ixesha lokuzinziswa komcimbi, “bonke oonyana bakaLevi,” ngokungathandabuzekiyo kuquka noAron, bakhetha ukuba ngakwicala likaThixo. (Eksodus 32:26) Ngoko phezu kwako nje ukuba ngandlel’ ithile uAron wayenetyala, uThixo wamenzela inceba emazantsi eNtaba yeSinayi.

Kamva, uMoses wavakalisa umnqweno wokumazi kakuhle uYehova nokubona ubuqaqawuli Bakhe. (Eksodus 33:13, 18) Nangona uMoses wayengenakububona ubuso bukaThixo, uYehova wambonisa inxalenye yobuqaqawuli Bakhe, egxininisa ukuba ‘Uya kusikwa yimfesane kulowo asenokusikwa yimfesane ngaye.’ (Eksodus 33:17–34:7) Kwakufaneleke ngakumbi ukuba uThixo agxininise inceba yakhe, kuba ngokufuthi iBhayibhile isebenzisa igama elithi “inceba” xa ithetha ngeenkqubano zikaThixo namaSirayeli, awenza nawo umnqophiso eSinayi.—INdumiso 103:7-13, 18.

Namhlanje abakhenkethi bafumanise ukuba kukho umzi woonongendi emazantsi eNtaba yeSinayi, ongenakukhumbuza namnye ngonqulo lokwenyaniso owaxelelwa ngalo uMoses encotsheni yale ntaba. Kunoko, kulo mzi woonongendi kunqulwa imifanekiso. Lo uboniswe apha ubizwa ngokuba yi-“The Ladder to Paradise [Izinyuko Zokuya eParadisi].” Usekelwe kwincwadi ebhalwe yimonki yaseByzantine uJohn Climacus. Emva kokuchitha iminyaka enokuba ngama-40 kwindlu encinane yokunqula yoonongendi, wongamela kulo mzi woonongendi, yaye wabhala ngezinyuko zokomfuziselo zokuya ezulwini. Kodwa phawula ukuba bambi abefundisi bachazwa njengabatsalwa ziidemon ezibasa kwintuthumbo kanaphakade esihogweni somlilo. Lo ngumfuziselo ocacileyo, kodwa awukho ngokwezibhalo!—INtshumayeli 9:5, 10, Yeremiya 7:31.

Ngokwahlukileyo kuloo mfundiso yobuxoki, inyaniso yeyokuba uSomandla ‘nguThixo onemfesane, onobabalo, ozeka kade umsindo, omninzi ngenceba nenyaniso.’ (Eksodus 34:6) UMoses wasondela ngakumbi kulo Thixo unemfesane eNtabeni yeSinayi.

[Umbhalo osemazantsi]

[Inkcazelo Ngomfanekiso okwiphepha 8]

Pictorial Archive (Near Eastern History) Est.

[Inkcazelo Ngomfanekiso okwiphepha 9]

Pictorial Archive (Near Eastern History) Est.

[Inkcazelo Ngomfanekiso okwiphepha 9]

Pictorial Archive (Near Eastern History) Est.