Ukufuna Izinto Ezaxelwa Kwangaphambili Ezinokuthenjwa
“UMNTU onako ukubona izinto eziya kwenzeka kwiintsuku ezintathu ngaphambi kokuba zenzeke unokutyeba kangangeminyaka engamawaka.” Litsho njalo iqhalo lamaTshayina.
Abantu bayafuna ukwazi oko kufunjethwe likamva, yaye abaninzi bangakuvuyela ukuhlawula nantoni na ukuze bafumane inkcazelo enokuthenjwa enjalo. Bafuna izinto ezixelwe kwangaphambili ezinokuthenjwa. Njengoko oku kunokubonwa ukusuka kuqikelelo lwemozulu nakwimeko yezoqoqosho, sinomdla kwiziganeko ezizayo. Ngaphezu koko, ulwazi olunokuthenjwa ngekamva lunokusinceda sicebe size silungelelanise ubomi bethu.
Umnqweno wokwazi oko kuya kwenzeka kwikamva ubangela ukuba abaninzi baye kubaxeli-thamsanqa, kubefundisi bamaHindu, kubavumisi ngeenkwenkwezi nasemagqirheni. Iivenkile ezithengisa iincwadi namathala amaphephancwadi azele yimibhalo yamandulo neyanamhlanje yabo bazibanga bexel’ ikamva kusengaphambili. Kodwa kukho ukungaqiniseki ngezi ntlobo zokuxela izinto kusengaphambili. Igosa laseburhulumenteni elingumRoma uCato lanikela ingxelo ethi: ‘Kuyandimangalisa ukuba umxeli-thamsanqa angahleki xa ebona omnye umxeli-thamsanqa.’
Eneneni, zininzi iintlobo zezinto ezaxelwa kusengaphambili. Ngowe-1972 iqela leenkcuba buchopho noosomashishini bezizwe ngezizwe elaziwa ngokuba yiClub of Rome lapapasha uhlolisiso olwaxela kusengaphambili ukuba kungekudala ihlabathi laliya kuphelelwa zizimbiwa. Laliza kuphelelwa yigolide ngowe-1981, yimercury ngowe-1985, yizinc ngowe-1990, yipetroleum ngowe-1992, njalo njalo. Ngoku siyabona ukuba ezi zinto zazixelwe kusengaphambili azikhange zenzeke.
Izinto ezininzi ezixelwe kusengaphambili bezisekelwe kwiimbono zonqulo. Ngokomzekelo: Ubhishophu waseSaxon uWulfstan wayekholelwa ukuba ukuhlaselwa kweNgilani yiDenmark ekuqaleni kwenkulungwane ye-11 kwakungumqondiso wokuba isiphelo sehlabathi sasikufuphi. Ngowe-1525, uThomas Münzer wakhokela imvukelo yabantu abakudidi oluphantsi baseJamani ngenxa yokuba embonweni wabona izithunywa zezulu zilola iirhengqa ukulungiselela oko wayecinga ukuba yayiyakuba sisivuno esikhulu. Ngokucacileyo, ezi zinto zaxelwa kusengaphambili zazingachananga.
Njengoko usenokuba uyazi, iBhayibhile iqulethe izinto ezaxelwa kusengaphambili. Ngaphezu koko, ababhali beBhayibhile bathi babephefumlelwe nguThixo. Umpostile ongumKristu uPetros wathi: “Sonke isiprofeto sesibhalo asibikho ngokuzicombululela. Kuba akukhanga kubekho siprofeto ngokuthanda komntu; bathi abantu abangcwele bakaThixo bathetha beqhutywa nguMoya oyiNgcwele.”—2 Petros 1:20, 21.
Phakathi kwezinye izinto, iBhayibhile yaxela kusengaphambili iziganeko ezahlukahlukeneyo ezibonisa isizukulwana esasiya kuba namava obukho bukaYesu Kristu ekumandla oBukumkani basezulwini. Umlinganiselo ongazanga ubonwe ngaphambili wemfazwe, indlala, iinyikima zomhlaba, nokuwohloka kwemilinganiselo yokuziphatha yabantu kwakuya kuba ngumqondiso woko iBhayibhile ikuchaza ngokuba ‘yimihla yokugqibela.’ (2 Timoti 3:1-5; Mateyu 24:3-14, 34) Ngokutsho kweBhayibhile, ukushenxiswa kwale nkqubo ikhoyo yezinto kwakuya kuvulela uluntu indlela eya elonwabeni kwihlabathi elitsha elineentsikelelo ezingenasiphelo.—2 Petros 3:13; ISityhilelo 21:1-4.
Uzijonga njani izinto ezinjalo ezaxelwa yiBhayibhile kusengaphambili? Njengezinye izinto ezininzi ezixelwa kusengaphambili, ngaba ziyintelekelelo nje? Sinokukuvavanya ukuthembeka kweziprofeto zeBhayibhile ezingekazaliseki ngokuhlola enoba izinto ezaxelwa kusengaphambili yiBhayibhile ngokuphathelele iziganeko ezidluleyo kwakunokuthenjelwa kuzo kusini na. Kwinqaku elilandelayo, siza kuqwalasela ezinye zezi.
[Inkcazelo Ngomfanekiso okwiphepha 3]
Courtesy National Weather Service