Yintoni Efunekayo Ukuze Wonwabe?

ABEZOPOLITIKO abanyulwe ngabantu bazabalazela ukwenza abo bantu bonwabe. Ngapha koko, umsebenzi wabo uxhomekeke ekwenzeni oko. Kodwa iphephandaba elithile lithetha “ngabanyuli abangakholisekanga nabaziva bengakhathalelwanga” basePoland. Omnye umcholacholi weendaba ucacisa ukuba iUnited States lilizwe “elizaliswe kukungathembeki kwezopolitiko ezimiselwa ngokwasemthethweni.” Omnye umbhali usixelela “ngokukhula kokungakhathali okukhoyo kwezopolitiko eFransi.” Ukungakhathali nokunganeliseki okunjalo okwandileyo—okungapheleliselwanga kuphela kula mazwe mathathu—kubonisa ukuba abezopolitiko bayasilela kumgudu wabo wokwenza abantu bonwabe.

Kwaneenkokeli zonqulo zithembisa ngolonwabo, ukuba alufumaneki kobu bomi, ngoko luya kufumaneka kubomi obuzayo. Oku bakuxhasa ngebango lokuba abantu banomphefumlo ongafiyo okanye odlulela kwesinye isiqu emva kokufa, mbono leyo engamkelwayo ngabantu abaninzi ngenxa yezizathu ezahlukahlukeneyo yaye leyo iBhayibhile iyichasa ngokucacileyo njengebubuxoki. Iicawa ezikhal’ ibhungane noludwe olunciphayo lwamarhamente azo zibonisa ukuba izigidi zabantu azisalujongi unqulo njengento ebalulekileyo esa elonwabeni.—Thelekisa iGenesis 2:7, 17; Hezekile 18:4, 20.

Abathandi Besilivere Abanganelisekanga

Ukuba alufumaneki kwezopolitiko okanye kwezonqulo, luya kufunyanwa phi ke ulonwabo? Mhlawumbi phantsi kolawulo lwenkqubo yezorhwebo? Kwanalo lubanga ukuba lungaluzisa ulonwabo. Lubonisa imeko yalo ngoncedo lokubhengeza, luchaza ngokucacileyo ukuba: Ulonwabo lubangelwa kukuba nazo zonke izinto eziphathekayo nezinto onokuzenzelwa ukuba uza kuhlawula imali.

Inani labantu abalufuna ngolu hlobo ulonwabo libonakala lisanda. Kwiminyaka eliqela edluleyo kwanikelwa ingxelo yokuba eJamani isiqingatha seentsapho sasitshone ematyaleni. Ngoko, akumangalisi ukuba iphephandaba elidumileyo laseJamani iDie Zeit labonisa kwangaphambili ukuba “uninzi [lwezi] akubonakali nakancinane ukuba lungaze luphume ematyaleni.” Lathi: “Kulula kakhulu ukutsala ude ugqithise kwimali ibhanki ekumisela ukuba utsale yona—yaye kunzima ukuphuma kumgibe wokuba netyala.”

Imeko iyafana nakwamanye amazwe ahambele phambili kwezoshishino. Kwiminyaka embalwa edluleyo, ingcali ngezentlalo kwiCity University of New York, uDavid Caplovitz, wathelekelela ukuba eUnited States, iintsapho eziphakathi kwama-20 nama-25 ezigidi zazitshone ematyaleni. Wathi: “Abantu batshone abavela nangonwele ematyaleni, yaye oko konakalisa ubomi babo.”

Oko akubonakali njengento ezisa ulonwabo! Kodwa ngaba sinokulindela ukuba ezorhwebo zingakwazi ukuzalisekisa oko ngokucacileyo kungenakufezekiswa zezi nkqubo zimbini (ezopolitiko nezonqulo)? UKumkani uSolomon owayesisityebi wakha wabhala oku: “Othanda isilivere akaneliswa yisilivere; nalowo uthanda intabalala, akangenelwa nto. Kwanaloo nto ingamampunge.”—INtshumayeli 5:10.

Ukufuna ulonwabo ngokuba nezinto eziphathekayo kufana nokuphupha ngobutyebi nolonwabo. Kusenokubangela imincili ukucinga ngezi zinto, kodwa uya kuba neengxaki ukuba uzama ukuphila ngokungathi unazo.

Ulonwabo Luyafumaneka Kodwa Njani?

Umpostile uPawulos umbiza uYehova ngokuba “nguThixo owonwabileyo.” (1 Timoti 1:11, NW) Ngokudala abantu ngokomfanekiselo wakhe, uThixo owonwabileyo wabenza ukuba bakwazi ukuzuza ulonwabo. (Genesis 1:26) Kodwa ulonwabo lwabo lwaluza kuxhomekeka ekukhonzeni kwabo uThixo, njengoko umdumisi wabonisayo: “Hayi, uyolo lwabantu abaThixo unguYehova!” (INdumiso 144:15b) Oko kuqukwa yinkonzo yethu kuThixo nendlela ukumkhonza kwethu okukhokelela ngayo kulonwabo lokwenene sinokuyiqonda ngokulula ukuba siqwalasela iindawo ezimbalwa kwezili-110 kwiNew World Translation apho igama elithi “konwaba” nelithi “lonwabo” abonakala kuzo.

Ukuphaphela Iintswelo Zokomoya

UYesu Kristu, uNyana kaThixo, kwiNtshumayelo yakhe edumileyo yaseNtabeni wathi: “Banoyolo abangamahlwempu ngomoya.” (Mateyu 5:3) Inkqubo yezorhwebo izama ukusilahlekisa ngokucinga ukuba ukuze sonwabe sifanele sithenge izinto zobunewunewu. Isixelela ukuba ukuze wonwabe kufuneka ube nendlu ezaliswe zizinto zekhompyutha, ikamera yevideo, umnxeba, inqwelo-mafutha, izixhobo zemidlalo zala maxesha, iimpahla ezisefashonini. Oko ingasixeleli kona kukuba amashumi ezigidi abantu ehlabathini abanazo ezi zinto kanti oko akuthethi kuthi abonwabanga. Ngoxa kusenokwenzeka zibenze ubomi bube mnandi yaye bube lula ngakumbi, ezi zinto azibalulekanga ekuziseni ulonwabo.

Njengoko wenzayo uPawulos, abo bayiphaphele intswelo yabo yokomoya bathi: “Sinento ke edliwayo neyambathwayo, masanele zezo zinto.” (1 Timoti 6:8) Ngoba? Kuba kukwanelisa iintswelo zokomoya okukhokelela kubomi obungunaphakade.—Yohane 17:3.

Ngaba kukho into ephosakeleyo ngokunandipha izinto ezilungileyo xa sinemali yokuzithenga? Kusenokwenzeka ukuba akunjalo. Sekunjalo, komeleza ubumoya bethu ukufunda ukungavumeli iminqweno efika ngequbuliso okanye ukuthenga okuthile kuba nje sinako ukukuthenga. Ngaloo ndlela sifunda ukwaneliseka nokulondoloza ulowabo lwethu, njengoko uYesu wenjenjalo, nangona imeko yakhe yezoqoqosho yayingabalaselanga ngokwemilinganiselo yehlabathi. (Mateyu 8:20) Yaye uPawulos wayengathethi kuthi akonwabanga xa wabhala oku: “Kuba mna ndafunda ukuthi entlalweni endikuyo ndanele. Ndiyazana nobuhlwempu, ndiyazana nobutyebi; kuko konke, nasezintweni zonke, ndiqhelanisiwe nokuhlutha kwanokulamba, nokutyeba kwanokuswela.”—Filipi 4:11, 12.

Ukukholosa NgoYehova

Ukuhlala uyiphaphele intswelo yakho yokomoya kubonisa indlela okulangazelela ngayo ukukholosa ngoThixo. Oku kwenza wonwabe, njengoko uKumkani uSolomon wathi: “Okholose ngoYehova, hayi, uyolo lwakhe!”—IMizekeliso 16:20.

Noko ke, aliyonyaniso na elokuba uninzi lwabantu lukholose kakhulu ngemali yalo nangezinto olunazo ngaphezu kokukholosa ngoThixo? Ngokwale mbono, kunokungafaneleki ngakumbi ukubonakalisa umgaqo othi “Sikholose ngoThixo” ngaphezu kokukholosa ngemali, nangona elo binzana libonakala kwimali yaseUnited States.

UKumkani uSolomon, owayengaswele nto inokuthengwa yimali, waqonda ukuba ukukholosa ngezinto eziphathekayo akukhokeleli kulonwabo olungunaphakade. (INtshumayeli 5:12-15) Imali esebhankini isenokumka namanzi ngenxa yokutshona kwebhanki okanye ngenxa yokunyuka kwamaxabiso entengo. Umhlaba nezinto zikabani zinokutshatyalaliswa zizikhukula ezinkulu. Ngoxa i-inshorensi iyeyokubuyisela izinto ezonakeleyo ayinakukwazi ukulungisa iimvakalelo ezonakeleyo. Izabelo zoshishino kunye neebond zinokuphelelwa lixabiso nje ngobusuku obunye ngenxa yokudodobala kwezentengiso. Kwanomsebenzi ohlawula kakuhle—ngenxa yezizathu ezininzi—unokubakho namhlanje uphele ngomso.

Ngenxa yezi zizathu okholose ngoYehova uyabuqonda ubulumko bokuphulaphula isilumkiso sikaYesu: “Ningaziqwebeli ubutyebi emhlabeni, apho konakalisa inundu nomhlwa, nalapho amasela agqobhozayo ebe; ziqwebeleni ke ubutyebi emazulwini, apho kungonakalisi nundu namhlwa, nalapho amasela angagqobhoziyo ebe.”—Mateyu 6:19, 20.

Yintoni enokwenza ubani azive enqabisekile yaye onwabile ngaphandle kokwazi ukuba ukholose ngoThixo uSomandla, osoloko esilungiselela?—INdumiso 94:14; Hebhere 13:5, 6.

Ukwamkela Ukululekwa NguThixo

Icebiso, kwanokululekwa kwamkelekile xa kusenziwa ngomoya wothando ngumhlobo wokwenene. Ngasihlandlo sithile owayezibanga njengomhlobo womkhonzi kaThixo uYobhi ehanahanisa wamxelela oku: “Yabona, unoyolo umntu owohlwaywa nguThixo!” Nangona kuyinyaniso oko, okwakuthethwa nguElifazi ngala mazwi—okuba uYobhi wayenetyala lesenzo esinzulu nesiphosakeleyo—kwakungachananga. Onjani ukuba yindinisa ‘yena umthuthuzeli’! Noko ke, xa kamva uYehova wohlwaya uYobhi ngendlela yothando, ngokuthobekileyo uYobhi wakwamkela ukululekwa waza wazimisa kwindlela esa ekuzuzeni ulonwabo olungakumbi.—Yobhi 5:17; 16:2; 42:6, 10-17.

Namhlanje, uThixo akathethi ngokungqalileyo kubakhonzi bakhe njengoko wenzayo kuYobhi. Kunoko, ubaluleka ngeLizwi lakhe nangentlangano ayikhokela ngomoya wakhe. Noko ke, amaKristu anosukelo lwezinto eziphathekayo, ngokufuthi awabi naxesha, amandla, okanye utyekelo lokufundisisa iBhayibhile nokuya kuzo zonke iintlanganiso ezilungiselelwa yintlangano kaYehova.

Ngokuvumelana neMizekeliso 3:11-18, umntu olulekwa nguThixo, uyabuqonda ubulumko bokwamkela ukululekwa okunjalo kuba ithi: “Hayi, uyolo lomntu ofumene ubulumko, lomntu ozuze ingqondo! Kuba lulungile urhwebo lwabo ngaphezu korhwebo lwesilivere, nongeniselo lwabo ngaphezu kwegolide embiweyo. Bunqabile bona ngaphezu kwekorale, nezinto zakho zonke ezinqwenelekayo azilingani nabo. Imihla emide isesandleni sabo sokunene, kwesokhohlo sabo bubutyebi nozuko. Iindlela zabo ziindlela ezimnandi, wonke umendo wabo uluxolo. Bungumthi wobomi kwababambelela kubo, unoyolo obubambayo.”

Ukuba Ngohlambulukileyo Nomthandi Woxolo

UYesu wabachaza abantu abanoyolo ‘njengabahlambuluke iintliziyo’ ‘nabaxolisi.’ (Mateyu 5:8, 9) Kodwa kwihlabathi elikhuthaza ukuphila ubomi bokuthanda izinto eziphathekayo, hayi indlela ekulula ngayo ukuba iminqweno yokuzingca, kwanengekho nyulu yendele ezintliziyweni zethu! Ukuba asikhokelwa bubulumko bukaThixo, hayi indlela ekulula ngayo ukuba silahlekiswe ngokufuna ukuba ngabami kakuhle ngokwemali ngeendlela ezithandabuzekayo ebeziya kutshabalalisa ulwalamano lwethu oluseluxolweni kunye nabanye! Ngenxa yeso sizathu, iBhayibhile iyasilumkisa: “Kuba ukuthanda imali yingcambu yeento zonke ezimbi: abathe abathile, ngokuzolulela kuko, balahlekana nokholo, bazibhodloza ngobuhlungu obuninzi.”—1 Timoti 6:10.

Ukuthanda imali kukhulisa imbono yokuzigwagwisa ekhuthaza ukungoneliseki, ukungabi nambulelo, nokubawa. Ukuthintela ukuba umoya ophosakele ngolo hlobo uhambele phambili, wambi amaKristu ngaphambi kokuba enze izigqibo ezibalulekileyo ngemali aye azibuza imibuzo enjengale: Ngaba ndiyifuna ngokwenene? Ngaba ndifuna ukuthenga into eziindleko okanye umsebenzi ohlawula kakuhle nodla ixesha elininzi abanye abantu abangaphezu kwezigidi abasenokuphila ngaphandle kwayo? Mhlawumbi ngaba ndinokuchitha imali okanye ixesha lam ekuhambiseleni phambili isabelo sam kunqulo lokwenyaniso, ngokuxhasa umsebenzi wokushumayela wazwenibanzi okanye ekuncedeni abantu abangenazinto zingako kunam?

Ukubonakalisa Unyamezelo

Esinye sezilingo ekwakunyanzelekile ukuba uYobhi asinyamezele yayisesokulahlekelwa zizinto zakhe eziphathekayo. (Yobhi 1:14-17) Njengoko kuboniswa ngumzekelo wakhe, unyamezelo luyafuneka kuzo zonke iinkalo zobomi. Wambi amaKristu afanele anyamezele intshutshiso; amanye, anyamezele isilingo; sekunjalo amanye, awamanga kakuhle ngokweemeko zoqoqosho. Kodwa konke ukunyamezela kwethu kuya kuvuzwa nguYehova, njengoko umfundi ongumKristu uYakobi wabhala oku ngokubhekisele kuYobhi: “Yabonani, sithi, banoyolo abo banyamezelayo.”—Yakobi 5:11.

Ukutyeshela izilangazelelo zokomoya ukuze siphucule imeko yethu yezoqoqosho kusenokusizisela isiqabu sokomzuzwana ngakwimeko yezoqoqosho kodwa ngaba kuya kusinceda sigcine imbono yethu yemeko yezoqoqosho ehlala ihleli iqaqambile phantsi koBukumkani bukaThixo? Ngaba oko kukuzibeka esichengeni okufanelekileyo?—2 Korinte 4:18.

Ukufumana Ulonwabo Ngoku Nangonaphakade

Ngokucacileyo bambi abantu bayayichasa imbono kaYehova ngoko kunokwenza abantu bonwabe. Bengacingi nokucinga ngeengenelo zikanaphakade ezibaluleke ngokugqithisileyo, ababoni ncedo lukhawulezileyo lomntu siqu ekwenzeni okuthethwa nguThixo. Bayasilela ukuqonda ukuba ukuthembela kwizinto eziphathekayo kulilize yaye kukhokelela kudano. Ngokuchanileyo umbhali weBhayibhile ubuza oku: “Ekwandeni kwezinto ezilungileyo bayanda abazidlayo zona, abe umninizo enempumelelo eyini na, ingekuko ukwanela ukuzibona ngamehlo?” (INtshumayeli 5:11; bona kwaneNtshumayeli 2:4-11; 7:12.) Hayi indlela esikhawuleza ngayo ukuphelelwa ngumdla kunye nezinto esasicinga ukuba siyazifuna zigqibela ngokungasebenzi zigqiba nje indawo yaye zifumba uthuli!

UmKristu wokwenyaniso akasoze azinyanzelele ekubeni ‘abe nayo yonke into abamelwane bakhe abanayo’ ngokwezinto eziphathekayo. Uyazi ukuba uxabiso lokwenene lulinganiselwe, kungekuko kwinto umntu anayo, kodwa kuhlobo lomntu anguye. Akukho kuthandabuza engqondweni yakhe ngoko umntu anokukwenza ukuze onwabe—ulonwabo lokwenene: ukunandipha ulwalamano oluhle noYehova nokuzigcina uxakekile enkonzweni Yakhe.

[Umfanekiso okwiphepha 20]

Zizodwa izinto eziphathekayo azinakukuzisela ulonwabo olungunaphakade

[Umfanekiso okwiphepha 22]

IBhayibhile ithi: “Banoyolo abangamahlwempu ngomoya”