Mazi UYehova Ngokusuka KwiLizwi Lakhe
“Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.”—YOHANE 17:3.
1, 2. (a) Lithetha ukuthini igama elithi “yazi” nelithi “ulwazi” njengokuba lisetyenziswe eZibhalweni? (b) Yiyiphi imizekelo ecacisa le ntsingiselo?
UKUMQHELA nje umntu othile okanye ukuyazi nje phezulu into ethile akuyifikeleli intsingiselo yegama elithi “yazi” nelithi “ulwazi” njengoko lisetyenziswa eZibhalweni. EBhayibhileni oku kubandakanya “isenzo sokwazi ngokusuka kumava,” ulwazi olubonakalisa “ulwalamano lokuthembana phakathi kwabantu.” (The New International Dictionary of New Testament Theology) Oko kuquka ukumazi uYehova ngokugqala izenzo zakhe ezithile, njengeemeko ezininzi kwincwadi kaHezekile apho uThixo wayephumeza umgwebo kubenzi bobubi, evakalisa oku: ‘Niya kwazi ukuba ndinguYehova.’—Hezekile 38:23.
2 Iindlela ezahlukeneyo elinokusetyenziswa ngazo igama elithi “yazi” nelithi “ulwazi” inokucaciswa ngemizekelo eliqela. Kwabaninzi ababezibanga benze izenzo ezithile egameni lakhe, uYesu wathi, “Andizange ndinazi;” wayethetha ukuba akazange abe nanto yakwenza nabo. (Mateyu 7:23) EyeSibini kwabaseKorinte 5:21 ithi uKristu ‘akazani nasono.’ Oku akuthethi ukuba akazi ukuba kukho into esisono kodwa, kunoko, yena akazange abandakanyeke kuso. Ngokufanayo, xa uYesu wathi: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo,” kwakubandakanyeke okungaphezulu kunokwazi nje okuthile ngoThixo noKristu.—Thelekisa uMateyu 7:21.
3. Yintoni engqina ukuba uYehova unalo uphawu olumngqina enguThixo oyinyaniso?
3 Iimpawu zikaYehova ezininzi zinokwaziwa ngokusuka kwiLizwi lakhe, iBhayibhile. Enye yazo ngamandla akhe okuprofeta ngokuchanileyo. Olu luphawu loThixo wokwenyaniso: “Mabazizise, basixelele okuza kuhla; mabaxele izinto zangaphambili, ubunjani bazo, sizigqale ngeentliziyo, silazi ikamva lazo; nokuba zezizayo siviseni. Xelani izinto ezizayo ngasemva, ukuze sazi ukuba ningoothixo.” (Isaya 41:22, 23) KwiLizwi lakhe, uYehova usixelela izinto zokuqala ngokuphathelele ukudalwa komhlaba nezinto eziphila kuwo. Waxela kusengaphambili gqitha izinto ezaziza kwenzeka kamva yaye ezo zinto zenzeka. Ibe nangoku ‘usixelela izinto ezizayo,’ ingakumbi izinto eziza kwenzeka kule “mihla yokugqibela.”—2 Timoti 3:1-5, 13; Genesis 1:1-30; Isaya 53:1-12; Daniyeli 8:3-12, 20-25; Mateyu 24:3-21; ISityhilelo 6:1-8; 11:18.
4. UYehova uwasebenzise njani amandla akhe, yaye usaya kuwasebenzisa njani?
4 Olunye uphawu uYehova analo ngamandla. Oku kungqinwa ziinkwenkwezi ezisesibhakabhakeni ezithi ngenkqubo yazo yokuhlanganisana kweeathom zazo zibangele ukuba kubekho ukukhanya nobushushu. Xa abantu okanye izithunywa zezulu zicel’ umngeni ulongamo lukaYehova, usebenzisa amandla akhe ‘njengendoda elwayo,’ ekhusela igama lakhe elihle nemigaqo yakhe yobulungisa. Kwizihlandlo ezinjalo akalibazisi ukusebenzisa amandla akhe ngokutshabalalisayo, njengakuMkhukula womhla kaNowa, ekutshatyalalisweni kweSodom neGomora, nasekusindisweni kwamaSirayeli ngokuwela kuLwandle Olubomvu. (Eksodus 15:3-7; Genesis 7:11, 12, 24; 19:24, 25) Kungekudala, uThixo uza kusebenzisa amandla akhe ukuze ‘atyumze uSathana phantsi kweenyawo zenu.’—Roma 16:20.
5. Ndawonye namandla anawo, luluphi olunye uphawu uYehova analo?
5 Kanti, nangona enamandla angapheliyo, uthobekile. INdumiso 18:35, 36 ithi: “Ululamo [“ukuthobeka,” NW] lwakho lwandikhulisa. Wawenzela indawo ebanzi amanyathela am phantsi kwam.” Ukuthobeka kukaThixo kumenza akwazi ‘ukuqondela phantsi, ezulwini nasemhlabeni. Amvuse eluthulini osweleyo, amphakamise ezaleni olihlwempu.’—INdumiso 113:6, 7.
6. Luluphi uphawu lukaYehova olusindis’ ubomi?
6 Inceba kaYehova ngendlela asebenzisana ngayo nabantu isindis’ ubomi. Enjani yona inceba eyabonakaliswa kuManase xa waxolelwayo, nangona wayenze ububi obukhulu gqitha! UYehova uthi: “Ndakuthi kongendawo, Inene, uya kufa; abuye ekoneni kwakhe, enze ngokusesikweni nangobulungisa. Zonke izono zakhe awona ngazo aziyi kukhunjulelwa kuye; wenze ngokusesikweni nangobulungisa; inene, wophila.” (Hezekile 33:14, 16; 2 Kronike 33:1-6, 10-13) UYesu wayebonakalisa iimpawu zikaYehova xa wabongoza ukuba ubani ufanele axolele izihlandlo eziphindwe ngama-77, kude kube kasi-7 ngosuku olunye!—INdumiso 103:8-14; Mateyu 18:21, 22; Luka 17:4.
UThixo Oneemvakalelo
7. UYehova wahluke njani koothixo bamaGrike, yaye liliphi ilungelo elizukileyo esinalo?
7 Izithandi zobulumko ezingamaGrike, njengamaEpikure, zazikholelwa koothixo kodwa zikholelwa kwelokuba babengenamdla kwaphela ebantwini okanye bachatshazelwe ziimvakalelo zabo. Hayi indlela ekwahluke ngayo oku kuYehova namaNgqina akhe athembekileyo! “Ngokuba uYehova uyakholiswa ngabantu bakhe.” (INdumiso 149:4) Abantu abangendawo ngexesha langaphambi koMkhukula bamenza wazisola yaye ‘waba buhlungu.’ USirayeli wamenza buhlungu uYehova ngokungathembeki kwakhe. Ukungathobeli kwamaKristu kusenokuwenza buhlungu umoya kaYehova; noko ke, ukuthembeka kwawo, kusenokumvuyisa. Hayi indlela ekumangalisa ngayo ukucinga ukuba abantu abayimicikwana apha emhlabeni basenokumenza buhlungu uMdali wendalo iphela okanye bamvuyise! Ngenxa yako konke asenzela kona, hayi indlela ekuvuyisa ngayo ukufumana eli lungelo lizukileyo lokumvuyisa!—Genesis 6:6; INdumiso 78:40, 41; IMizekeliso 27:11; Isaya 63:10; Efese 4:30.
8. UAbraham wakusebenzisa njani ukuthetha ngokungafihlisi xa wayethetha noYehova?
8 ILizwi likaThixo libonisa ukuba uthando lukaYehova lusivumela ukuba “sibe nokungafihlisi.” (1 Yohane 4:17) Phawula imeko ka-Abraham xa uThixo wayeze kutshabalalisa iSodom. UAbraham wathi kuYehova: “Ungade ubhebhethe olilungisa kunye nongendawo yini na? Hi, kwakho amashumi amahlanu phakathi komzi; ungade uyibhebhethe, ungayixoleli, loo ndawo yini na, ngenxa yamalungisa amashumi mahlanu akuyo? . . . Makube lee kuwe. Umgwebi wehlabathi lonke akayi kwenza okusesikweni yini na?” Anjani wona amazwi ukuba athethwe kuThixo! Kanti uYehova wavuma ukuyisindisa iSodom ukuba apho kwakukho abantu abangama-50 abangamalungisa. UAbraham waqhubeka elihlisa inani ukususela kuma-50 de laya kufikelela kuma-20. Wade waqonda ngoku ukuba ucela gqitha. Wathi: “Mayingabi namsindo iNkosi, khendithethe esi sihlandlo sodwa. Hi ke, kwafunyanwa khona ishumi elinye?” Kwakhona uYehova wavuma: “Andiyi kuwonakalisa ngenxa yeshumi elinye.”—Genesis 18:23-33.
9. Kwakutheni ukuze uYehova avumele uAbraham ukuba athethe ngendlela awathetha ngayo, yaye yintoni esingayifunda koku?
9 Kwakutheni ukuze uYehova avumele uAbraham ukuba athethe ngokungafihlisi ngolu hlobo? Phakathi kwezinye izinto, uYehova wayeyazi indlela awayenxunguphele ngayo uAbraham. Wayesazi ukuba umtshana ka-Abraham uLote wayehlala eSodom, yaye uAbraham wayexhalabele ukusinda kwakhe. Kwakhona, uAbraham wayengumhlobo kaThixo. (Yakobi 2:23) Xa umntu othile ethetha nathi rhabaxa, ngaba siyazama ukuziqonda iimvakalelo ezibangele ukuba athethe loo mazwi size sibonakalise ulwazelelelo, ingakumbi ukuba ngumhlobo ngandlel’ ithile ocinezekileyo ngokweemvakalelo? Ngaba akusithuthuzeli ukubona ukuba uYehova uya kusiqonda isizathu sokuthetha kwethu ngokungafihlisi, njengokuba wayenjalo uAbraham?
10. Ukuthetha ngokufihlisi kusinceda njani xa sithandaza?
10 Ingakumbi xa sisiza kuye ‘njengoMphulaphuli wemithandazo’ yethu sizabalazela ukuthetha naye ngokungafihlisi sizityand’ igila kuye, naxa sibandezeleke ngokunzulu kwaye sicinezelekile ngokweemvakalelo. (INdumiso 51:17; 65:2, 3) Kwanangamaxesha esiziva siphelelwe ngamazwi, ‘uMoya ngokwakhe uyasithethelela ngezincwino ezingathethekiyo,’ yaye uYehova uyaphulaphula. Uyazazi iingcinga zethu: “Uyaziqonda izicamango zam nakude. Ngokuba akukho lizwi elulwimini lwam ongalaziyo ke, Yehova, kanye.” Sekunjalo, sifanele siqhubeke sicela, sifuna, sinkqonkqoza.—Roma 8:26; INdumiso 139:2, 4; Mateyu 7:7, 8.
11. Yintoni ebonisa ukuba uYehova ngokwenene usikhathalele?
11 UYehova usikhathalele. Uyazilungiselela izinto eziphilayo azidalileyo. “Amehlo eento zonke akhangele kuwe, wena ke uzinika ukudla kwazo ngexesha elililo; uyasivula isandla sakho, uzihluthise iinto zonke eziphilileyo ngeento ezikholekileyo.” (INdumiso 145:15, 16) Sikhuthazwa ukuba sikhe sibone indlela azondla ngayo iintaka emahlathini. Khawubone iinyibiba zasendle, indlela azambesa kakuhle ngayo. UYesu wongezelela ngokuthi uThixo uya kwenza okungakumbi gqitha kuthi kunokuba esenza kuzo. Ngoko kutheni sizixhalabisa nje? (Duteronomi 32:10; Mateyu 6:26-32; 10:29-31) EyokuQala kaPetros 5:7 ikhuthaza ukuba “lonke ixhala lenu liphoseni phezu kwakhe, ngokuba yena enikhathelele.”
‘Umbhalo Wenkqu Yakhe’
12, 13. Ukongezelela ekumboneni uYehova ngokukhangela kwindalo yakhe nezenzo zakhe ezibhalwe eBhayibhileni, yiyiphi enye indlela esinokumbona size simphulaphule ngayo?
12 Sinokumbona uYehova uThixo ngokujonga kwindalo yakhe; sinokumbona ngokufunda ngezenzo zakhe eBhayibhileni; kwakhona sinokumbona ngamazwi nezenzo ezibhaliweyo eziphathelele uYesu Kristu. KuYohane 12:45 uYesu uthi: “Lowo undibonayo, ubona owandithumayo.” Kwakhona, kuYohane 14:9 uthi: “Lowo undibonileyo mna umbonile uBawo.” KwabaseKolose 1:15 kuthiwa: “[UYesu] ungumfanekiselo kaThixo ongenakubonwa.” EyamaHebhere 1:3 ivakalisa ukuba: “[UYesu] lubengezelo lobuqaqawuli [bukaThixo], nombhalo wenkqu yakhe.”
13 UYehova wathumela uNyana wakhe ingekuko kuphela ukuba alungiselele intlawulelo kodwa kwakhona ukuze amisele umzekelo ofanele uxeliswe, ngamazwi nangezenzo. UYesu wayethetha amazwi avela kuThixo. KuYohane 12:50 wathi: “Izinto endizithethayo mna, njengoko uBawo andixeleleyo, ndenjenjalo ukuzithetha.” Wayengenzi nanye into ngokuzithandela, kodwa wayesenza izinto azixelelwe nguThixo ukuba azenze. KuYohane 5:30 wathi: “Mna ngokwam andinakwenza nto.”—Yohane 6:38.
14. (a) Yintoni uYesu awayibonayo eyamenza wasikwa yimfesane? (b) Kutheni indlela uYesu awayethetha ngayo yayibangela ukuba abantu bathontelane ukuze bamphulaphule?
14 UYesu wabona abantu ababeneqhenkqe, ababeyimilwelwe, ababezizithulu, ababeziimfama, nababephethwe ziidemon nabo babezilele abantu babo abafileyo. Ngenxa yemfesane awayenayo ngabo, waphilisa abagulayo waza wavusa abafileyo. Wabona izihlwele zinqinile kwaye zibandezelekile ngokomoya, waza waqalisa ukuzifundisa izinto ezininzi. Akazange nje afundise ngamazwi alungileyo kodwa wafundisa nangamazwi ayolisayo aphuma entliziyweni yakhe angena ezintliziyweni zabanye, awabenza batsaleleka kuye, bafika kwangexesha etempileni ukuze bamphulaphule, banamathela kuye, bakuvuyela ukumphulaphula. Babethontelana ukuze bamphulaphule, bevakalisa ukuba ‘akukho mntu owakha wathetha ngendlela athethe ngayo lo.’ Yaye babemangaliswa yindlela awayefundisa ngayo. (Yohane 7:46; Mateyu 7:28, 29; Marko 11:18; 12:37; Luka 4:22; 19:48; 21:38) Yaye xa iintshaba zakhe zazizama ukumbambisa ngemibuzo, icekwa walishiyela kuzo, waza wazival’ imilomo.—Mateyu 22:41-46; Marko 12:34; Luka 20:40.
15. Wawusithini umxholo oyintloko wentshumayelo kaYesu, yaye abanye wababandakanya kangakanani ekuwusasazeni?
15 Wayevakalisa ukuba “ubukumkani bamazulu [babusondele]” waza wabongoza abaphulaphuli bakhe ukuba baqhubeke ‘befuna tanci ubukumkani.’ Wathuma abanye ukuba bashumayele ukuba “ubukumkani bamazulu [babusondele],” ukuba ‘benze abafundi zonke iintlanga,’ ukuba babe ngamangqina kaKristu “kude kuse nasekupheleni komhlaba.” Namhlanje amaNgqina kaYehova anokuba zizigidi ezine ezinesiqingatha ahamba emanyathelweni akhe, esenza ezo zinto.—Mateyu 4:17; 6:33; 10:7; 28:19; IZenzo 1:8.
16. Uphawu lukaYehova lothando lwabekwa njani eluvavanyweni oluqatha, kodwa olu phawu lwalwenzela ntoni uluntu?
16 Kweyoku-1 kaYohane 4:8 sixelelwa ukuba: “UThixo uluthando.” Olu phawu lukhethekileyo lwabekwa kolona vavanyo luqatha ubani anokulucinga xa wathumela okuphela koNyana wakhe amzeleyo ukuze afele emhlabeni. Iintlungu ezaviwa ngulo Nyana wakhe othandekayo nezibongozo awazivakalisa kuYise wasezulwini zifanele ukuba zamenza buhlungu gqitha uYehova, nangona uYesu walungqina lububuxoki ucelomngeni lukaSathana lokuba akukho bantu apha emhlabeni abanokugcina ingqibelelo yabo kuYehova xa bevavanywa. Kwakhona sifanele siliqonde nexabiso ledini likaYesu, kuba uThixo wamthumela apha ukuze asifele. (Yohane 3:16) Oku yayingekokufa kulula, nokukhawulezayo. Ukuze siqonde oko kwakuthethwa koku kuThixo nakuYesu size ngaloo ndlela sifumanise ubungakanani bedini labo kuthi, makhe sihlolisise ingxelo yeBhayibhile ngoko kwenzekayo.
17-19. UYesu wasichaza njani isilingo awayeza kujamelana naso?
17 Ubuncinane kangangezihlandlo ezine, uYesu wabachazela abapostile bakhe oko kwakuza kwenzeka kuye. Kwiintsuku nje ezimbalwa ngaphambi kokuba oko kwenzeke, wathi: “Niyabona, siyenyuka siya eYerusalem; waye uNyana woMntu eya kunikelwa kubabingeleli abakhulu, nakubabhali; baya kumgweba ukuba afe, bamnikele kuzo iintlanga. Ziya kudlala ngaye, zimtyakatye, zimtshicele, zimbulale.”—Marko 10:33, 34.
18 UYesu wayiva ingcinezelo yoko kwakuza kwenzeka kuye, ekuqonda ukoyikeka kwendlela amaRoma ayemtywatyusha ngayo umntu. Iintambo zenziniya yofele eyayisetyenziswa ekukatseni zazineentsinjana namathambo egusha; ukuze ngoxa kukatswa ngazo, ziwudlakaze umqolo nemilenze igxize igazi. Kwiinyanga ngaphambili, uYesu wabonisa indlela awayecinezeleke ngayo ngokweemvakalelo ngenxa yesilingo awayeza kujamelana naso, esithi, njengoko sifunda kuLuka 12:50: “Kukho ke lubhaptizo ndifanele ukubhaptizwa ngalo; asikuko nokuba ndicinezelekile lude lufezeke.”
19 Ingcinezelo yayikhula njengoko ixesha lalisondela. Wathetha ngayo kuYise wasezulwini esithi: “Kukalokunje umphefumlo wam ukhathazekile, mandithini na? Bawo, ndisindise kweli lixa. Hayi, ndizele khona oku kweli lixa.” (Yohane 12:27) Hayi indlela afanele ukuba uYehova wayechukumiseke ngayo sesi sibongozo sokuphela koNyana wakhe amzeleyo! EGetsemane, kwiiyure nje ezimbalwa ngaphambi kokufa kwakhe, uYesu wayebuhlungu kakhulu yaye wathi kuPetros, uYakobi nakuYohane: “Umphefumlo wam ubuhlungu kakhulu, ngokokude ube sekufeni.” Kwimizuzu embalwa emva koko wathandaza okokugqibela kuYehova ngalo mbandela esithi: “Bawo, ukuba uyavuma, mayidlule le ndebe kum; kodwa makungabi kukuthanda kwam, makube kokwakho okwenzekayo. Uthe ke, eneminzunzu, kwaba kukhona athandaza enyamekile. Kwathi ke ukubila kwakhe kwanga kungamathontsi amakhulu egazi, esiwa emhlabeni.” (Mateyu 26:38; Luka 22:42, 44) Oku kusenokuba koko kwezamayeza kubizwa ngokuba yihaematidrosis. Oku kuyinto enqabileyo kodwa kunokwenzeka kwimeko yokuchukumiseka ngamandla ngokweemvakalelo.
20. Yintoni eyanceda uYesu ukuze akwazi ukunyamezela isilingo awayeza kujamelana naso?
20 Ngokuphathelele eli xesha eGetsemane, kumaHebhere 5:7 kuthiwa: “Ngemihla yenyama yakhe [“uKristu,” NW], xa wayesondeze izikhungo kwanezibongozo kulowo unako ukumsindisa ekufeni, kunye nodanduluko olunamandla, neenyembezi, waviwa ngenxa yokumhlonela kwakhe uThixo.” Ekubeni engazange asindiswe ekufeni ngulowo “unako ukumsindisa ekufeni,” umthandazo wakhe waviwa ngayiphi ingqiqo? ULuka 22:43 uyaphendula: “Kwabonakala ke kuye isithunywa, sivela ezulwini, simomeleza.” Lo mthandazo waphendulwa kuba isithunywa sezulu uThixo asithumelayo samomeleza uYesu ukuze akwazi ukusinyamezela esi silingo.
21. (a) Yintoni ebonisa ukuba uYesu wasoyisa isilingo awayejamelene naso? (b) Xa izilingo zethu zisiba qatha, yiyiphi indlela esifanele sikwazi ukuthetha ngayo?
21 Oku kwabonakala kwinto eyaba ngumphumo woku. Xa ingcinezelo yangaphakathi yayisele iphelile, uYesu waphakama waza wabuyela kuPetros, kuYakobi, nakuYohane, waza wathi: “Vukani sihambe.” (Marko 14:42) Enyanisweni wayesithi, ‘Mandihambe ndiye kungcatshwa ngokuba ndangiwe, ukuze ndibanjwe lihlokondiba, ndisiwe enkundleni yamatyala ngokungekho mthethweni, ndigwetywe ngokungafanelekanga. Mandihambe ndiye kugculelwa, nditshicelwe, nditywatyushwe, ndize ndibethelelwe emthini wentuthumbo.’ Kangangeeyure ezintandathu wayexhonywe apho, engcungcutheka ziintlungu, waza wanyamezela kwade kwasekupheleni. Ekufeni kwakhe, wadanduluka ngoloyiso esithi: “Kugqityiwe!” (Yohane 19:30) Wahlala ethembekile waza wayingqina ingqibelelo yakhe ngokuphakamisa ulongamo lukaYehova. Yonke into uYehova awayemthume ukuba ayenze emhlabeni wayeyifezile. Xa sisifa okanye xa kufika iArmagedon, ngaba siya kukwazi ukuthi ngokuphathelele uthumo lwethu oluvela kuYehova: “Kugqityiwe”?
22. Yintoni ebonisa ubungakanani bokusasazeka kolwazi lukaYehova?
22 Enoba imeko injani na, sinokuqiniseka ukuba kwixesha liYehova elisondela ngokukhawuleza, lonke “ilizwe liya kuzala kukwazi uYehova, njengamanzi egubungele ulwandle.”—Isaya 11:9.
Uyakhumbula Na?
◻ Kuthetha ukuthini ukwazi nokuba nolwazi?
◻ Inceba kaYehova nokuxolela kwakhe kubonakaliswe njani kuthi eLizwini lakhe?
◻ UAbraham wakusebenzisa njani ukuthetha ngokungafihlisi noYehova?
◻ Kutheni sinokukhangela kuYesu size sibone kuye iimpawu zikaYehova?