Sabela Kumadinga KaThixo Ngokubonakalisa Ukholo

“Saphiwa [nguYehova uThixo] amadinga amakhulukazi, anqabileyo.”—2 PETROS 1:4.

1. Yintoni esenza sikwazi ukubonakalisa ukholo lokwenyaniso?

UYEHOVA ufuna ukuba sibonakalise ukholo kumadinga akhe. Kodwa, “ukholo alubantwini bonke.” (2 Tesalonika 3:2) Olu phawu sisiqhamo somoya oyingcwele, okanye amandla kaThixo asebenzayo. (Galati 5:22, 23) Ngenxa yoko, kuphela ngabo bakhokelwa ngumoya kaYehova abanokubonakalisa ukholo.

2. Umpostile uPawulos uluchaza njani “ukholo”?

² Kodwa luyintoni ukholo? Umpostile uPawulos uthi “kukweyiseka bubukho bezinto ezingabonwayo.” Ubungqina bezi zinto zingabonwayo bunamandla kangangokuba ukholo lufaniswa nabo. Kwakhona ukholo kuthiwa “kukukholosa ngezinto ezithenjiweyo” kuba abo banolu phawu banesiqinisekiso sokuba yonke into ethenjiswe nguYehova uThixo iqiniseke ngokungathi sele izalisekile.—Hebhere 11:1.

Ukholo Namadinga KaYehova

3. Kuya kwenzeka ntoni kumaKristu athanjisiweyo ukuba abonakalisa ukholo?

³ Ukuze sikholise uYehova, sifanele sibonakalise ukholo kumadinga akhe. Umpostile uPetros wakubonisa oku kwincwadi yakhe ephefumlelweyo yesibini, eyabhalwa malunga nowama-64 C.E. Wabonisa ukuba ukuba amanye amaKristu athanjisiweyo ayebonakalisa ukholo, ayeya kukubona ukuzaliseka ‘kwamadinga kaThixo amakhulukazi, anqabileyo.’ Ngenxa yoko, ayeya ‘kuba ngamadlelane ngemvelo yobuThixo’ njengeendlalifa kunye noYesu Kristu kuBukumkani basezulwini. Ngokholo nangoncedo lukaYehova uThixo, ayekhululekile ebukhobokeni bemikhwa nezenzo zeli hlabathi lonakeleyo. (2 Petros 1:2-4) Yaye khawufan’ ucinge! Namhlanje abo babonakalisa ukholo lokwenyaniso banandipha inkululeko exabisekileyo efanayo.

4. Ziziphi iimpawu esifanele sizongezelele elukholweni lwethu?

⁴ Ukuba nokholo kumadinga kaYehova nokuba nombulelo ngenkululeko yethu esiyinikwe nguThixo kufanele kusishukumisele ekwenzeni konke okusemandleni ethu ukuze sibe ngamaKristu angumzekelo. UPetros wathi: “Nakuba niqokele ukukhuthala konke, yithini elukholweni lwenu nongezelele isidima, esidimeni ke ulwazi, elwazini ke ukuzeyisa, ekuzeyiseni ke unyamezelo, kunyamezelo ke ukuhlonela uThixo, ekuhloneleni ke uThixo ukuthanda abazalwana, ekuthandeni ke abazalwana, uthando.” (2 Petros 1:5-7, NW) Ngaloo ndlela uPetros usinika uludwe lwezinto ekufuneka sihlale sizikhumbula. Makhe sizihlolisise ezi mpawu.

Izinto Ezibalulekileyo Ezibumba Ukholo

5, 6. Siyintoni isidima, yaye sinokusongezelela njani elukholweni lwethu?

⁵ UPetros wathi isidima, ulwazi, ukuzeyisa, unyamezelo, ukuhlonela uThixo, ukuthanda abazalwana nothando, zizinto esifanele sibe nazo zonke nesifanele sizongezelele elukholweni lwethu. Sifanele sizame ukwenza ezi mpawu zibe zezona zinto zibalulekileyo ezibumba ukholo lwethu. Ngokomzekelo, asinakubonakalisa uphawu lokuba nesidima ngaphandle kokholo. Umbhali wesichazi-magama uW. E. Vine ubonisa ukuba kweyesi-2 kaPetros 1:5, “isidima siqukiwe njengophawu olubalulekileyo ekubonakaliseni ukholo.” Ngalunye kwiimpawu uPetros azikhankanyayo lukwafanele lube yinto ebumba ukholo lwethu.

⁶ Okokuqala, sifanele songezelele isidima elukholweni lwethu. Ukubonakalisa isidima kuthetha ukwenza oko kulungileyo emehlweni kaThixo. Kwigama lesiGrike apha eliguqulelwe ngokuthi “isidima,” ezinye iinguqulelo zisebenzisa igama elithi “ukulunga.” (New International Version; The Jerusalem Bible; Today’s English Version) Isidima sisishukumisela ukuba sikuphephe ukwenza okubi okanye ukwenzakalisa abanye abantu. (INdumiso 97:10) Kwakhona sikhuthaza ukuba nenkalipho ekwenzeni okulungileyo ukuze abanye bangenelwe ngokomoya, ngokwenyama, nangokweemvakalelo.

7. Kutheni sifanele songezelele ulwazi elukholweni nakwisidima sethu?

⁷ Kutheni uPetros esikhuthaza ukuba songezelele ulwazi elukholweni nakwisidima sethu? Kaloku, xa sijamelana nocelomngeni olutsha elukholweni lwethu, sifanele sibe nolwazi ukuba siza kukwazi ukwahlula okuhle kokubi. (Hebhere 5:14) Ngofundisiso lweBhayibhile namava ekusebenziseni iLizwi likaThixo nasekusebenziseni ubulumko bokwenyaniso kubomi bemihla ngemihla, sandisa ulwazi lwethu. Ngenxa yoko, oku kusenza sihlale sinokholo size siqhubeke sisenza izinto ngendlela ebonakalisa isidima xa sivavanywa.—IMizekeliso 2:6-8; Yakobi 1:5-8.

8. Kuyintoni ukuzeyisa, yaye kunxulumene njani nonyamezelo?

⁸ Ukusinceda sihlangabezane novavanyo ngokholo, sifanele songezelele ukuzeyisa elwazini lwethu. Igama lesiGrike elithi “ukuzeyisa” libonakalisa amandla okuzilawula. Esi siqhamo somoya kaThixo siyasinceda sibonakalise ukuzilawula kwingcinga, kwintetho, nakwihambo yethu. Ngokuzingisa ekubonakaliseni ukuzeyisa, songezelela kuko unyamezelo. Igama lesiGrike elithi “unyamezelo” linentsingiselo yokuhlala uqinile ngenkalipho, kungekhona ukudakumba size siziyekele kubunzima obungaphephekiyo. Luvuyo olwalubekwe phambi kwakhe olwenza ukuba uYesu anyamezele umthi wentuthumbo. (Hebhere 12:2) Amandla esiwanikwe nguThixo ndawonye nonyamezelo ayalomeleza ukholo lwethu aze asincede sivuye xa sisezimbandezelweni, sichase izihendo, size sikuphephe ukulalanisa xa sitshutshiswa.—Filipi 4:13.

9. (a) Kuyintoni ukuhlonela uThixo? (b) Kutheni sifanele songezelele ukuthanda abazalwana ekuhloneleni kwethu uThixo? (c) Sinokulongezelela njani uthando ekuthandeni kwethu abazalwana?

⁹ Kunyamezelo lwethu simele songezelele ukuhlonela uThixo—uloyiko olunzulu, unqulo, nenkonzo kuYehova. Ukholo lwethu luyakhula njengoko sibonakalisa ukuhlonela uThixo size sibone indlela uYehova aqhubana ngayo nabantu bakhe. Ukanti, ukuze sibonakalise ukuhlonel’ uThixo, sifanele sithande abazalwana. Ngapha koko, “lowo ungamthandiyo umzalwana wakhe ambonileyo, angathini na ukumthanda uThixo angambonanga?” (1 Yohane 4:20) Iintliziyo zethu zifanele zisishukumisele ukuba sibathande ngokwenyaniso abanye abakhonzi bakaYehova size sixhalabele intlalo-ntle yabo ngawo onke amaxesha. (Yakobi 2:14-17) Kodwa kutheni sixelelwa ukuba songezelele uthando eluthandweni lwethu lobuzalwana? Kubonakala ukuba uPetros wayethetha ukuba simele sithande bonke abantu, kungekuphela nje abazalwana bethu. Olu thando lubonakaliswa ubukhulu becala ngokushumayela iindaba ezilungileyo nangokunceda abantu ngokomoya.—Mateyu 24:14; 28:19, 20.

Imiphumo Engafaniyo

10. (a) Siya kuzenza njani izinto ukuba songezelele isidima, ulwazi, ukuzeyisa, unyamezelo, ukuhlonela uThixo, ukuthanda abazalwana nothando elukholweni lwethu? (b) Kwenzeka ntoni ukuba lowo uzibanga engumKristu akanazo ezi mpawu?

¹⁰ Ukuba songezelela isidima, ulwazi, ukuzeyisa, unyamezelo, ukuhlonela uThixo, ukuthanda abazalwana nothando elukholweni lwethu, siya kucinga, sithethe size senze izinto ngendlela eyamkelekileyo kuThixo. Ngokwahlukileyo koko, ukuba lowo uzibanga engumKristu uyasilela ukubonakalisa ezi mpawu, uba yimfama ngokomoya. ‘Ukubona luzizi ukukhanya’ okuvela kuThixo aze alibale ukuba uye wahlanjululwa kwizono zexesha elidluleyo. (2 Petros 1:8-10; 2:20-22) Masingaze sisilele ngaloo ndlela size singabi nalukholo kumadinga kaThixo.

11. Ngokufanelekileyo yintoni esinokuyilindela ngabathanjiswa abanyanisekileyo?

¹¹ AmaKristu athanjisiweyo anyanisekileyo anokholo kumadinga kaYehova yaye ayazibhokoxa ukuze aqinisekise ubizo nokuwanyula kwakhe. Phezu kwayo nayiphi na imiqobo esendleleni yawo, sinokulindela ukuba abonakalise iimpawu zokuhlonela uThixo. Abathanjiswa abathembekileyo ‘baya kuphiwa ngokobutyebi ukungena ebukumkanini obungunaphakade bukaYesu Kristu’ ngokuvuselwa kwabo kubomi bokomoya ezulwini.—2 Petros 1:11.

12. Sifanele siwaqonde njani amazwi akweyesi-2 kaPetros 1:12-15?

¹² UPetros wayesazi ukuba kungekudala wayeya kufa, yaye wayelindele ukuba ekugqibeleni avuselwe kubomi basezulwini. Kodwa logama nje wayesaphila “kulo mnquba”—umzimba wakhe wenyama—wazama ukwakha ukholo kwamanye amakholwa nokuwakhuthaza ngokuwakhumbuza ngezinto eziyimfuneko ukuze azuze inkoliseko kaThixo. Emva kokunduluka kwakhe ekufeni, abazalwana noodade bokomoya bakaPetros babenokomeleza ukholo lwabo ngokukhumbula amazwi akhe.—2 Petros 1:12-15.

Ukuba Nokholo Kwilizwi Lesiprofeto

13. UThixo wabunikela njani ubungqina obomeleza ukholo ngokuza kukaKristu?

¹³ UThixo wanikela ubungqina obomeleza ukholo ngokuqiniseka kokuza kukaYesu “enamandla, nobuqaqawuli obukhulu.” (Mateyu 24:30; 2 Petros 1:16-18) Bengenabungqina, ababingeleli abangabahedeni babebalisa iintsomi ngoothixo babo, kodwa uPetros, uYakobi noYohane babengamangqina okuzibonela ubuqaqawuli bukaKristu ngoxa wayenziwe kumila kumbi. (Mateyu 17:1-5) Bambona enobuqaqawuli baza beva isandi selizwi likaThixo simngqina uYesu njengoNyana Wakhe oyintanda. Oko kungqinelwa nokukhazimla awayenako uKristu ngoko yayikukunikwa imbeko nobuqaqawuli. Ngenxa yesi sityhilelo sikaThixo, le ndawo, ngokunokwenzeka esecaleni kwentaba yeHermon, uPetros wayibiza ngokuthi, ‘yintaba engcwele.’—Thelekisa iEksodus 3:4, 5.

14. Ukwenziwa kumila kumbi kukaYesu kufanele kuluchaphazele njani ukholo lwethu?

¹⁴ Ukwenziwa kumila kumbi kukaYesu kufanele kuluchaphazele njani ukholo lwethu? UPetros wathi: “Kanjalo sinalo nelona lizwi [“lesiprofeto eliqinisekiswe ngakumbi,” NW], enityaphayo ukulinyamekela, linjengesibane esikhanyisa endaweni emnyama, kude kuse, liphume ikhwezi ezintliziyweni zenu.” (2 Petros 1:19) Kuyabonakala ukuba ‘ilizwi lesiprofeto’ lalingaquki kuphela iziprofeto ezikwiZibhalo zesiHebhere ezingoMesiya kodwa kwakhona laliquka amazwi kaYesu okuba uya kuza “enamandla, nobuqaqawuli obukhulu.” Elo lizwi ‘laqinisekiswa ngakumbi’ njani ngokwenziwa kumila kumbi? Eso siganeko salingqina liyinyaniso ilizwi lesiprofeto elithetha ngokuza kukaKristu enobuqaqawuli esemandleni oBukumkani.

15. Kubandakanyeke ntoni ekunikeleni ingqalelo kwilizwi lesiprofeto?

¹⁵ Ukuze someleze ukholo lwethu, simele sinikele ingqalelo kwilizwi lesiprofeto. Oku kuquka ukulifundisisa elo lizwi, sixubushe ngalo kwiintlanganiso zamaKristu, size sisebenzise isiluleko salo. (Yakobi 1:22-27) Simele silenze libe ‘sisibane esikhanyisa endaweni emnyama,’ esikhanyisela iintliziyo zethu. (Efese 1:18) Kuphela kungokwenza oko eliya kusikhokela lide “ikhwezi,” okanye, “ikhwezi eliqaqambileyo lokusa,” uYesu Kristu, atyhileke esebuqaqawulini. (ISityhilelo 22:16) Oko kutyhileka kuya kuthetha intshabalalo kwabangakholwayo neentsikelelo kwabo banokholo.—2 Tesalonika 1:6-10.

16. Kutheni sinokuba nokholo lokuba onke amadinga ekuprofetwe ngawo eLizwini likaThixo aya kuzaliseka?

¹⁶ Abaprofeti bakaThixo babengengomadoda nje alumkileyo awayexela kwangaphambili izinto ngobulumko nje kuphela, kuba uPetros wathi: “Akukhanga kubekho siprofeto ngokuthanda komntu; bathi abantu abangcwele bakaThixo bathetha beqhutywa nguMoya oyiNgcwele.” (2 Petros 1:20, 21) Ngokomzekelo, uDavide wathi: “UMoya kaYehova uthetha ngam.” (2 Samuweli 23:1, 2) Yaye uPawulos wabhala: “Sonke isibhalo siphefumlelwe nguThixo.” (2 Timoti 3:16) Ekubeni abaprofeti bakaThixo babephefumlelwe ngomoya wakhe, sinokuba nokholo lokuba onke amadinga aseLizwini lakhe aya kuzaliseka.

Babenokholo Kumadinga KaThixo

17. Ukholo luka-Abheli lwalusekelwe kweliphi idinga?

¹⁷ Amadinga kaYehova ayesisiseko sokholo ‘lwelifu elikhulu’ lamangqina akhe angaphambi kobuKristu. (Hebhere 11:1–12:1) Ngokomzekelo, uAbheli wayenokholo kwidinga likaThixo ‘elingembewu’ eyayiya kutyumza intloko ‘yenyoka.’ Kwakukho ubungqina bokuzaliseka kwesigwebo sikaThixo kubazali baka-Abheli. Ngaphandle kwe-Eden, uAdam kunye nentsapho yakhe babesitya ukubila kobuso babo kuba umhlaba oqalekisiweyo wawuntshula imithana enameva neenkunzane. Kunokwenzeka ukuba uAbheli wayiphawula inkanuko kaEva kumyeni wakhe waza wabona ukuba uAdam wayemlawula. Ngokuqinisekileyo wayethetha ngentlungu awayesiba nayo ekumitheni kwakhe. Yaye isango lomyezo wase-Eden lalilindwe ziikerubhi nelangatye lekrele elijikajikayo. (Genesis 3:14-19, 24) Konke oku ‘kwakusisiqinisekiso’ esabangela uAbheli abone ukuba inkululeko yayiza kufumaneka ngeMbewu ethenjisiweyo. Ngokholo, uAbheli wenza idini kuThixo elangqineka linexabiso elikhulu kunelikaKayin.—Hebhere 11:1, 4.

18, 19. Kungaziphi iindlela uAbraham noSara ababonakalisa ukholo ngazo?

¹⁸ Usolusapho uAbraham, uIsake, kunye noYakobi nabo babenokholo kumadinga kaYehova. UAbraham wayenokholo kwidinga likaThixo lokuba zonke iintsapho zomhlaba zaziya kusikelelwa ngaye nokuba imbewu yakhe yayiya kunikwa ilizwe. (Genesis 12:1-9; 15:18-21) Unyana wakhe uIsake nomzukulwana wakhe uYakobi ‘babeziindlalifa zalo elo dinga.’ Ngokholo uAbraham “waba ngumphambukeli emhlabeni wedinga” waza wawulinda “umzi lo uneziseko,” uBukumkani bukaThixo basezulwini aya kuvuselwa kubo ebomini apha emhlabeni. (Hebhere 11:8-10) Ngaba unokholo olunjalo?

¹⁹ Umfazi ka-Abraham, uSara, wayeneminyaka engama-90 ubudala yaye wayesele edlulile kubudala bokuzala xa wabonakalisa ukholo kwidinga likaThixo waza wafumana amandla “okumisa umzi” waza wazala uIsake. Ngaloo ndlela, kuAbraham owayeneminyaka eli-100 ubudala, “engofileyo” ngokuphathelele ukuzala, ekugqibeleni ‘kwazalwa into engangeenkwenkwezi zezulu ukuba yintabalala.’—Hebhere 11:11, 12; Genesis 17:15-17; 18:11; 21:1-7.

20. Nangona oosolusapho bengazange bakubone ngokupheleleyo ukuzaliseka kwamadinga kaThixo kubo, yintoni abayenzayo?

²⁰ Oosolusapho abathembekileyo bafa bengakubonanga ngokupheleleyo ukuzaliseka kwamadinga kaThixo kubo. Ukanti, “besuka bawabona [amadinga] kude, bakholosa, bathakazela, bavuma ukuba bangabasemzini, balundwendwe emhlabeni.” Kwadlula izizukulwana ngaphambi kokuba inzala ka-Abraham ifumane iLizwe Ledinga. Noko ke, kubomi babo buphela, oosolusapho aboyik’ uThixo baba nokholo kumadinga kaYehova. Ngenxa yokuba bengazange baphulukane nokholo, kungekudala baza kuvuselwa ebomini kummandla osemhlabeni ‘womzi’ uThixo abalungiselele wona, uBukumkani obungoMesiya. (Hebhere 11:13-16) Ngokufanayo, ukholo lunokusenza sihlale sinyanisekile kuYehova kwanokuba akazaliseki ngokukhawuleza onke amadinga akhe amangalisayo. Kwakhona ukholo lwethu luya kusishukumisela ukuba sithobele uThixo, njengoko wenzayo uAbraham. Yaye njengoko wadlulisela ilifa lokomoya kwinzala yakhe, ngoko sinokunceda abantwana bethu babonakalise ukholo kumadinga kaYehova axabisekileyo.—Hebhere 11:17-21.

Ukholo Lubalulekile KumaKristu

21. Ukuze samkeleke kuThixo namhlanje, yintoni efanele iqukwe ekubonakaliseni kwethu ukholo?

²¹ Kambe ke, ukholo lubandakanya okungakumbi kunokuba nentembelo ekuzalisekeni kwamadinga kaYehova. Ukutyhubela imbali yabantu, bekuyimfuneko ukubonakalisa ukholo kuThixo ngeendlela ezahlukahlukeneyo ukuba siza kunandipha inkoliseko yakhe. UPawulos wabonisa ukuba “lungekho ukholo, akunakubakho ukumkholisa [uYehova uThixo] kakuhle; kuba lowo uzayo kuThixo, umelwe kukukholwa ukuba ukho, nokuba ungumvuzi wabo bamfunayo.” (Hebhere 11:6) Ukuze umntu amkeleke kuYehova namhlanje, ufanele abonakalise ukholo kuYesu Kristu nakwidini lentlawulelo elanikelwa nguThixo ngaye. (Roma 5:8; Galati 2:15, 16) Kunjengokuba uYesu watshoyo: “Wenjenje uThixo ukulithanda kwakhe ihlabathi [loluntu], ude wancama uNyana wakhe okuphela kwamzeleyo, ukuze bonke abakholwayo kuye bangatshabalali, koko babe nobomi obungunaphakade. Lowo ukholwayo kuNyana, unobomi obungunaphakade; ke lowo ungamviyo uNyana, akayi kubona bomi; ingqumbo kaThixo ihleli phezu kwakhe.”—Yohane 3:16, 36.

22. UBukumkani obungoMesiya buya kuzalisekisa liphi idinga?

²² UYesu unendima ebalulekileyo ekuzalisekeni kwamadinga kaThixo angoBukumkani obuthandazelwa ngamaKristu. (Isaya 9:6, 7; Daniyeli 7:13, 14; Mateyu 6:9, 10) Njengoko uPetros wabonisayo, ukwenziwa kumila kumbi kukaYesu kwalingqina liyinyaniso ilizwi lesiprofeto elingokuza kwakhe esemandleni nakubuqaqawuli boBukumkani. UBukumkani obungoMesiya buya kuzalisekisa elinye idinga likaThixo, kuba uPetros wabhala: “Ngokwedinga lakhe silinde elitsha izulu, nomtsha umhlaba, apho kumi ubulungisa.” (2 Petros 3:13) Isiprofeto esifanayo sazaliseka xa amaYuda awayethinjelwe eBhabhiloni abuyiselwa kwilizwe lawo ngowama-537 B.C.E. phantsi kolawulo lukaZerubhabheli njengerhuluneli noYoshuwa njengombingeleli omkhulu. (Isaya 65:17) Kodwa uPetros walatha kwixesha elizayo xa “amazulu amatsha”—uBukumkani obungoMesiya basezulwini—eya kulawula ‘umhlaba omtsha,’ ibutho labantu abanobulungisa abahlala kulo mhlaba.—Thelekisa INdumiso 96:1.

23. Yiyiphi imibuzo engesidima eya kuxutyushwa ngokulandelayo?

²³ Njengabakhonzi abanyanisekileyo bakaYehova nabalandeli boNyana wakhe oyintanda, uYesu Kristu, sikhangele phambili kwihlabathi elitsha elithenjiswe nguThixo. Siyazi ukuba lisondele, yaye sinokholo lokuba onke amadinga kaYehova axabisekileyo aya kuzaliseka. Ukuze samkeleke kuThixo wethu, simele someleze ukholo lwethu ngokongezelela kulo isidima, ulwazi, ukuzeyisa, unyamezelo, ukuhlonela uThixo, ukuthanda abazalwana, nothando.a Ngeli thuba, kusenokubuzwa ukuba, Sinokusibonakalisa njani isidima? Yaye ukwenza kwethu izinto ngendlela ebonakalisa isidima kuya kuba yingenelo njani kuthi nakwabanye, ngokukodwa kwizinxulumani zethu ezingamaKristu, eziye zasabela kumadinga kaThixo ngokubonakalisa ukholo?

[Umbhalo osemazantsi]

Zithini Iimpendulo Zakho?

◻ Lunokuchazwa njani “ukholo”?

◻ Ngokutsho kweyesi-2 kaPetros 1:5-7, ziziphi iimpawu ezifanele zongezelelwe elukholweni lwethu?

◻ Ukwenziwa kumila kumbi kukaYesu kufanele kube nawuphi umphumo kukholo lwethu?

◻ Yiyiphi imizekelo yokholo eyabona-kaliswa nguAbheli, uAbraham, uSara, nabanye abantu bamandulo?

[Umfanekiso okwiphepha 15]

Ngaba uyayazi indlela ukwenziwa kumila kumbi kukaYesu okunokuluchaphazela ngayo ukholo lomntu?