Indlela Yokomeleza Amaqhina Omtshato

ABAFARISI ababezama ukubambisa uMfundisi Omkhulu, uYesu Kristu babuza oku, “Kuvumelekile na ukuba umntu amale umfazi wakhe nangasiphi na isizathu?” Wabaphendula ngokubhekisela kumtshato wokuqala wabantu waza wamisela umlinganiselo kulo mcimbi: “Oko ke ngoko uThixo akumanyileyo, makungahlulwa mntu.”

AbaFarisi bema ngelithi uMoses wenza ilungiselelo loqhawulo-mtshato ngokumisela ukukhutshwa ‘kwencwadi yokwahlukana.’ UYesu wabaphendula: “UMoses ngenxa yobulukhuni beentliziyo zenu wanivumela ukuba nibale abafazi benu; ke ekuqalekeni bekungenjalo. Ndithi ke kuni, Othe wamala umfazi wakhe, kungengaluhenyuzo, wazeka omnye, uyakrexeza; nalowo uzeka owaliweyo uyakrexeza.”—Mateyu 19:3-9.

Ekuqalekeni, umtshato wawuza kuba liqhina elihlala lihleli. Kwanokufa ngekwakungazange kusahlule isibini esitshatileyo sokuqala, kuba sasidalwe sangabantu abafezekileyo abanethemba lobomi obungunaphakade. Noko ke, sona. Isono saso sawonakalisa umtshato wabantu. Utshaba olukukufa lwaqalisa ukwahlukanisa izibini ezitshatileyo. UThixo ukujonga ukufa njengesiphelo somtshato, njengokuba sifunda eBhayibhileni: “Umfazi ubotshiwe ngumthetho ngalo lonke ixesha isaphilileyo indoda yakhe; ke ukuba indoda yakhe ithe yafa, ukhululekile, angendiselwa kwayithandayo, kodwa ke ngokwaseNkosini.” (1 Korinte 7:39) Oku kwahluke kakhulu kwiingcamango zonqulo ezifana nesuttee, apho umfazi acengelwa okanye anyanzelelwa ukuba ngexesha lokufa komyeni wakhe azitshise ade afe ngenxa yenkolelo yokuba iqhina lomtshato liyaqhubeka emva kokufa.

Ilungiselelo LoMthetho KaMoses

Xa kwakunikelwa uMthetho kaMoses, ulwalamano lomtshato lwaluwohlokile kangangokuba uYehova, ngenxa yobulukhuni beentliziyo zamaSirayeli, wenza ilungiselelo loqhawulo-mtshato. (Duteronomi 24:1) UThixo wayengenanjongo yokuba amaSirayeli awusebenzise kakubi lo mthetho ukuze aqhawule umtshato kunye nabafazi bawo ngenxa yeempazamo ezingenamsebenzi, njengoko kuboniswa ngumyalelo wakhe wokuba athande abanye abantu njengoko ezithanda. (Levitikus 19:18) Kwanokukhutshwa kwencwadi yokwahlukana kwakusebenza njengesithintelo kuba, njengenxalenye yenkqubo yokubhala le ncwadi, indoda efuna ukuqhawula umtshato kwakufuneka idibane namadoda amiselwe ngokufanelekileyo, nawayenokuzama ukwenza uxolelwaniso. Ewe, uThixo akazange amise lo mthetho ukuze amisele naliphi na ilungelo lokuqhawula umtshato kukabani nomfazi wakhe “nangasiphi na isizathu.”—Mateyu 19:3.

Noko ke, ekugqibeleni amaSirayeli ayityeshela intsingiselo yokwenene yalo mthetho aza ayisebenzisa kakubi le nxalenye ngokuqhawula umtshato phantsi kwaso nasiphi na isizathu awayebona sifanelekile. Malunga nenkulungwane yesihlanu Ngaphambi kweXesha Eliqhelekileyo, ayengathembekanga kubafazi bobutsha bawo, eqhawula umtshato kunye nabo phantsi kwazo naziphi na izizathu. UYehova wawaxelela ngokungqongqo ukuba ukuthiyile ukwala. (Malaki 2:14-16) Kungenxa yezi zizathu awathi uYesu walugxeka uqhawulo-mtshato njengoko amaSirayeli ayelwenza ngomhla wakhe.

Ekuphela Kwesizathu Soqhawulo-mtshato Esifanelekileyo

Noko ke, uYesu wakhankanya isizathu esinye soqhawulo-mtshato esifanelekileyo: uhenyuzo. (Mateyu 5:31, 32; 19:8, 9) Apha igama eliguqulelwe ngokuthi “uhenyuzo” liquka zonke iintlobo zeentlobano zesini ezingekho mthethweni ezingaphandle komtshato weZibhalo, enoba zenziwa nomnye wesini esifanayo okanye esahlukileyo okanye nesilwanyana.

Sekunjalo, uYesu wayengancomeli uqhawulo-mtshato kumaqabane angathembekanga. Kuxhomekeke kwiqabane elingenatyala ukuhlola imiphumo enokubakho lize ligqibe enoba liyafuna ukuqhawula umtshato okanye akunjalo. Abafazi abaceba ukuqhawula umtshato phantsi kwesi sizathu sivumelekileyo ngokweZibhalo basenokufuna ukuqwalasela ingxelo kaThixo xa wayewisa isigwebo kumfazi wokuqala ngenxa yesono sakhe. Ukongezelela kwisigwebo sokufa, uThixo waxelela uEva ngokungqalileyo oku: “Inkanuko yakho ibe sendodeni yakho, ikulawule yona.” (Genesis 3:16) ICommentary on the Old Testament, ebhalwe nguC. F. Keil noF. Delitzsch, ichaza le “nkanuko” “njengomnqweno ophantse ufane nesifo.” Kuyavunywa ukuba, le nkanuko ayikho bukhali kangako kubo bonke abafazi, kodwa xa umfazi ongenatyala ecinga ngokuqhawula umtshato, uya kuba ulumkile ukuba ucinga ngeentswelo ezingokweemvakalelo abafazi abazizuz’ ilifa kuEva. Noko ke, njengoko isini esenziwa ngaphandle kweqhina lomtshato liqabane elinetyala sisenokukhokelela ekubeni iqabane elimsulwa lasulelwe zizifo ezidluliselwa ngeentlobano zesini, kuquka uGawulayo, bambi baye bagqiba kwelokuba babhenele kuqhawulo-mtshato njengokuba uYesu wachazayo.

Imvelaphi Yeengxaki Zentsapho

Ukuba lukhuni kweentliziyo zabantu kuvela kwisono esenziwa sisibini sokuqala esingabantu nxamnye noThixo. (Roma 5:12) Iingxaki zentsapho zavela xa isibini sokuqala esingabantu sona uBawo waso wasezulwini. Njani? Xa umfazi wokuqala, uEva, walukuhlwa yinyoka ukuba atye emthini owalelweyo, waya waza wasitya isiqhamo. Kuphela kwaba semva kokuba enze eso sigqibo sinzulu awathi wathetha nendoda yakhe ngento ayixelelwe yinyoka. (Genesis 3:6) Ewe, wenza ngaphandle kwendoda yakhe. Nanku umzekelo wokuqala weengxaki iintsapho ezininzi ezijamelene nazo namhlanje—ukungabikho konxibelelwano olunyanisekileyo.

Kamva, xa babejamelene nemiphumo yesono sabo, uAdam noEva babhenela ekusebenziseni amaqhinga afana nasetyenziswa zizibini ezininzi namhlanje xa zisengxakini, ukubeka ityala kwabanye. Indoda yokuqala, uAdam, yabek’ ityala loko yayikwenzile kumfazi wayo nakuYehova, isithi: “Umfazi owandinikayo ukuba abe nam, nguye ondinikileyo kuwo umthi, ndadla ke.” Umfazi yena wathi: “Inyoka indilukuhlile, ndadla ke.”—Genesis 3:12, 13.

Ukuvakalisa kukaYehova isigwebo kuAdam noEva kwatyhila kusengaphambili enye inkalo yeengxaki ezaziya kuvela. Ngokuphathelele ulwalamano lwakhe nendoda yakhe, uYehova waxelela uEva oku: “Ikulawule yona.” Amadoda amaninzi namhlanje, njengoIsao okhankanywe kwinqaku lethu lokuqala, alawula abafazi bawo ngenkohlakalo engazikhathalelanga iimvakalelo zabafazi bawo. Sekunjalo, abafazi abaninzi baqhubeka benenkanuko yengqalelo yamadoda abo. Xa loo nkanuko inganeliswa, abafazi basenokuyifuna ngenkani loo ngqalelo baze basebenzise ukuzingca. Ekubeni amadoda amaninzi elawula yaye abafazi abaninzi benenkanuko, ukuzingca kuyesamela, yaye uxolo luthi shwaka. Kwiphepha elalinomxholo othi “Indlela Yokuhlalutya Uqhawulo-mtshato Lwanamhlanje,” uShunsuke Serizawa wathi: “Ukuba siyawutyeshela oyena nobangela usisiseko wokuba ‘ubani enze into ngeyakhe indlela’ okuthetha ukuba ubani abeke ezakhe izilangazelelo kwindawo yokuqala, kuya kuba nzima ukuhlalutya uqhawulo-mtshato namhlanje.”

Noko ke, uYehova uye wanikela ukhokelo ngeLizwi lakhe ukuze izibini ezitshatileyo nezithobelayo zikwazi ukunandipha umlinganiselo othile wolonwabo emtshatweni kwanakwimeko yazo yokungafezeki. UIsao walandela ulwalathiso lukaThixo yaye ngoku unandipha ubomi obonwabisayo bentsapho. Makhe sibone indlela imigaqo yeBhayibhile ebanceda ngayo abantu ukuze baqinise iqhina labo lomtshato.

Ukuthetha Ngokungafihlisiyo

Kwimitshato emininzi, ukungabikho konxibelelwano, utyekelo lokubek’ ityala kwabanye abantu, nesimo sengqondo sokuzingca senza kube nzima ngendoda nomfazi ukuba baqonde iimvakelelo zabo. UCaryl S. Avery ongumphengululi uthi, “Ekubeni ukuxelelana indlela enivakalelwa ngayo kubalulekile ukuze nibe nolwalamano olusenyongweni, ulwalamano olusenyongweni lufuna nithembane ngokupheleleyo. Yaye ukuthembana yinto enqabileyo namhlanje. Ukwabelana ngeemvakalelo zenu ezinzulu kuyayakha intembelo enjalo. Oku kufuna ukuba indoda nomfazi bathethe ngokungafihlisiyo xa bencokolisana.

IMizekeliso isebenzisa umzekeliso ukukhuthaza ukwabelana ngeengcinga ezisenyongweni, isithi: “Ngamanzi anzulu icebo entliziyweni yendoda, kanti indoda enengqondo iyalirhola.” (IMizekeliso 20:5) Amaqabane atshatileyo amele asebenzise ukuqonda aze akhuphe iingcinga ezisemazantsi kwiintliziyo zamaqabane awo. Khawucinge nje xa iqabane lakho liphazamisekile. Kunokuba usabele ngolu hlobo: “Nam ngokwam ndisebenze nzima namhlanje,” kutheni ungabuzi ngobubele uthi: “Ngaba usebenze nzima namhlanje? Kwenzeke ntoni?” Kusenokuthabatha ixesha yaye kufuneke wenze umgudu ukuze uphulaphule iqabane lakho, kodwa ngokuqhelekileyo kuvuyisa kakhulu, kuyanelisa, yaye konga ixesha ukwenza ngolo hlobo kunokulityeshela iqabane lakho kuze kufuneke uhlangabezane neemvakalelo eziphazamisekileyo ezisenokuvela kamva.

Ukuze nithembane, ngamnye umele anyaniseke aze azame ukuchaza iimvakalelo zakhe ngendlela elinye iqabane elinokuyiqonda. ILizwi likaThixo liyabongoza, “Thethani inyaniso . . . ngokuba singamalungu, omnye elelomnye.” (Efese 4:25) Ukuthetha inyaniso kufuna ukuqonda. Masithi umfazi uvakalelwa kukuba akeviwanga. Ngaphambi kokuba athethe, ufanele aqwalasele lo mzekeliso: “Owanqandayo amazwi akhe unokwazi: omoya upholileyo yindoda enengqondo.” (IMizekeliso 17:27) Kunokuba atyhole indoda yakhe athi, “Awukhe undiphulaphule!” kuya kuba kokulunge ngakumbi ukuchaza iimvakalelo zakhe ngaphambi kokuba akhathazeke okanye adane. Mhlawumbi unokubonakalisa indlela avakalelwa ngayo ngokuthetha into efana nale, “Ndiyazi uxakekile, kodwa ukufumana ithutyana elingakumbi kunye nawe kunokundenza ndonwabe gqitha.”

Eneneni, “ingcinga ziyatshitsha ngokungabikho kokucweya.” (IMizekeliso 15:22) Iqabane lakho liyakuthanda, kodwa oko akuthethi ukuba linokukwazi oko ukucingayo. Umele ulixelele ngobuchule iqabane lakho indlela ovakalelwa ngayo. Oku kuya kuninceda, njengesibini esitshatileyo esingamaKristu, ukuba nenze uhlengahlengiso lothando ukuze “nikhuthalele ukubugcina ubunye boMoya ngentambo yoxolo.”—Efese 4:2, 3.

Ngokomzekelo, khawucinge ngemeko kaKazuo owayeyindoda ethiwe nqo ngempumlo ethanda kakhulu ukungcakaza. Wazifumanisa ethe zwabha kumatyala amalunga namakhulu aliqela amawaka eerandi. Ngokuboleka imali yokuhlawula amatyala akhe, waya ezika ngokuzika kuloo mgxobhozo. Wandula ke waqalisa ukufundisisa iBhayibhile yaye ekugqibeleni wakwazi ukuba nenkalipho yokuxelela umfazi wakhe ngeengxaki zakhe. Wayelindele ukuba ambek’ ityala. Noko ke, wamangaliswa xa umfazi wakhe, ekwakusele kulithutyana efundisisa iBhayibhile, waphendula ngokuzolileyo wathi: “Masizame ukufumanisa indlela esinokuhlawula ngayo la matyala.”

Beqalisa ngosuku olulandelayo, baya kubantu ababenamatyala kubo baza baqalisa ukuhlawula amatyala abo, bada bathengisa nendlu yabo. Kwathabatha ixesha elimalunga nonyaka ukuze bawagqibe amatyala abo. Yintoni eyaguqula isimo sengqondo sikaKimie, umfazi wakhe? Uthi: “Amazwi afumaneka kwabaseFilipi isahluko 4, indinyana 6 neyesi-7, ngokwenene ayinyaniso. ‘Ningaxhaleli nto; mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo. Lwaye uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu kuKristu Yesu.’” Wongezelela esithi: “Umhlobo wam, owayemangalisiwe yindlela endandibonakala ndichwayite ngayo phezu kwazo nje ezo nzima, waqalisa ukufundisisa iBhayibhile kunye nam.” Ukususela ngoko uKazuo nomfazi wakhe baye babhaptizwa yaye ngoku banandipha ubomi obonwabisayo bentsapho.

Ukongezelela ekuthembaneni ngokuxelelana inyaniso, amadoda nabafazi abaye banamava afana nala angasentla benza okuthile ukunceda izibini ukuba zicombulule iingxaki zazo zomtshato. Banxibelelana noMsunguli welungiselelo lomtshato, uYehova uThixo. Phezu kwazo nje iingcinezelo neengxaki izibini ezijamelana nazo, uya kuzisikelela ngoxolo lukaThixo olugqithisele kuko konke ukuqonda ukuba zenza konke okusemandleni azo ukusebenzisa imigaqo yakhe zize konke okunye zikuyekele kuye. Ukuthandaza kunye kuluncedo ngokukhethekileyo. Indoda ifanele ikhokele ize ‘iphalaze intliziyo yayo’ phambi koThixo, ifune ukhokelo nolwalathiso lwakhe kuyo nayiphi na ingxaki abajamelene nayo nomfazi wayo. (INdumiso 62:8) Ngokuqinisekileyo uYehova uThixo uya kuyiphulaphula imithandazo enjalo.

Ewe, iqhina lomtshato linokomelezwa. Kwanangoku, nakubeni ziphila phakathi kwebutho elingazolanga nako konke ukungafezeki kwethu, izibini ezitshatileyo zinako ukufumana uvuyo kulwalamano lwazo. Unokufumana amanye amacebiso asebenzisekayo angakumbi nesiluleko esivela kuThixo kwincwadi ethi Ukwenza Ubomi Bentsapho Yakho Bonwabe, epapashwe yiWatchtower Bible and Tract Society of New York, Inc. Ngaphezu koko, izibini ezisebenzela ukusebenzisa imigaqo yeBhayibhile ngokunyanisekileyo zinethemba lokumanyaniswa eluthandweni kwihlabathi elitsha elingekude elenziwe nguThixo.