Indlela AmaKristu Anokubanceda Ngayo Abakhulileyo

“KUNGOKO singethi mandla; kuba nokuba umntu wethu wangaphandle uya esonakala, usuka yena owangaphakathi aye ehlaziyeka imihla ngemihla. . . . Asixuneli ezintweni ezibonwayo, sixunela kwezingabonwayo. Kuba ezibonwayo zezomzuzwana, ke zona ezingabonwayo zezonaphakade.” Wathetha loo mazwi umpostile uPawulos kwincwadi yakhe yesibini eya kwabaseKorinte.—2 Korinte 4:16-18.

Kumaxesha amandulo, amadoda nabafazi bokholo batsolisa amehlo abo kwizinto ezingabonwayo, ezaziquka zonke izinto uThixo wabo, uYehova, awayethembise ukuzenza ngexesha lakhe elifanelekileyo. Kwincwadi yamaHebhere, uPawulos wabancoma abo banjalo, abalondoloza ukholo lwabo de kwasa ekufeni—ibe abanye babo baphila bada baluphala kakhulu. Walatha kubo njengomzekelo kuthi, xa esithi: “Aba bonke bafa ngokokholo, bengawafumananga amadinga; besuka bawabona kude, bakholosa, bathakazela.”—Hebhere 11:13.

Namhlanje sisondele gqitha ekuzalisekisweni kwala madinga. Kodwa kukho abo bagulayo nabakhulileyo phakathi kwethu abangaqinisekanga ukuba baya kuphila ukuze basibone isiphelo sale nkqubo ingendawo. Mhlawumbi abanye baba nabo baya kufela elukholweni bengakhange bawabone onke la madinga ezaliseka ebudeni bokudla kwabo ubomi. Kwabo banjalo amazwi kaPawulos akweyesi-2 kwabaseKorinte 4:16, anokuba lukhuthazo olukhulu.

UYehova uyabakhumbula bonke abanyanisekileyo bakhe, kuquka abagulayo nabakhulileyo. (Hebhere 6:10) Abakhulileyo abathembekileyo kuthethwa ngabo ngentlonelo kwiindawo ezahlukahlukeneyo eBhayibhileni, yaye kuMthetho kaMoses, kuthethwa ngokukhethekileyo ngokubonakaliswa kwentlonelo kwabakhulileyo. (Levitikus 19:32; INdumiso 92:12-15; IMizekeliso 16:31) Phakathi kwamaKristu okuqala, abakhulileyo babephathwa ngentlonelo. (1 Timoti 5:1-3; 1 Petros 5:5) Enye incwadi yeBhayibhile iqulethe inkcazelo entle yenyameko enothando nokuzincama okuchukumisayo okwabonakaliswa ngumfazi oselula kuninazala owalupheleyo. Le ncwadi ngokufanelekileyo ibizwa ngegama lalo mfazi uselula, uRute.

Umncedi Ozinikeleyo

Ubomi babuyincindi yekhala kuNahomi owalupheleyo. Indlala yayibangele ukuba yena nentsapho yakhe encinane, bazinikel’ umva izihlobo nelifa elikwaYuda baze bahlale kwimpuma yoMlambo weYordan kwilizwe lakwaMowabhi. Apha itshoba lalal’ umbethe kwindoda kaNahomi, imshiya namakhwenkwana abo amabini. Ekuhambeni kwexesha, la makhwenkwe, akhula aza atshata, kodwa nawo afa. UNahomi wayengasenazindlalifa ezazinokumnyamekela.

Wayaluphele gqitha ukuba angaqalisa intsapho entsha, yaye izinto zazibonakala zingamhambeli kakuhle ebomini. Ngobubele, wafuna ukuthumela uRute no-Orpa, abahlolokazi boonyana bakhe ababini, kumakhaya oonina ukuze bakwazi ukuzifumanela amadoda. Wayeya kubuyela yedwa kwilizwe lakhe lokuzalwa. Namhlanje, abanye abakhulileyo baziva bedandathekile, ngokukodwa xa beye baphulukana nabathandekayo babo ekufeni. Kanye njengoNahomi, basenokufuna ubani onokubanyamekela, kodwa abafuni kuba ngumthwalo.

Noko ke, uRute, akazange amshiye uninazala. Wayemthanda lo mfazi ukhulileyo, ibe wayemthanda uYehova, uThixo owayenqulwa nguNahomi. (Rute 1:16) Ngoko bobabini bathabatha uhambo olubuyela kwaYuda. Kwelo lizwe, kwakukho ilungiselelo lothando phantsi koMthetho kaYehova lokuba amahlwempu ayenokubhikica, okanye aqokelele konke okwakusele emasimini emva kokuvuna. URute, owayeselula, ngentliziyo evumayo wazinikela ekwenzeni lo msebenzi, esithi: “Nceda undivumele ndihambe.” Wasebenza ngenzondelelo ukuze bangenelwe bobabini.—Rute 2:2, 17, 18, NW.

Ukuthembeka kukaRute nokuthanda kwakhe uYehova kwaba lukhuthazo olomeleleyo kuNahomi, owaqalisa ukucinga ngendlela ephangaleleyo neyakhayo. Ukwazi kwakhe uMthetho nezithethe zelizwe ngoku kwaba luncedo. Wanikela icebiso lobulumko kulo mncedi wakhe uzinikeleyo ukuze lo mfazana uselula, ngomtshato wongeno, akwazi ukubuyisela ilifa lentsapho aze abe nonyana oya kuqhubeka nomnombo wentsapho. (Rute, isahluko 3) URute ngumzekelo omhle kwabo bazincamayo ukuze banyamekele abagulayo nabakhulileyo. (Rute 2:10-12) Phakathi ebandleni namhlanje, ngokufanayo kuninzi okunokwenziwa ukunceda abakhulileyo nabagulayo. Kodwa njani?

Ukulungiselela Okuthile Kubalulekile

Kwibandla lamaKristu okuqala, kwakugcinwa uludwe lwabahlolokazi abafuna inkxaso yezinto eziphathekayo. (1 Timoti 5:9, 10) Ngokukwanjalo namhlanje, kwezinye iimeko abadala basenokwenza uludwe lwabo bagulayo nabakhulileyo abafuna ingqalelo ekhethekileyo. Kwamanye amabandla kuye kwabelwa umdala othile ukunyamekela abanjalo njengembopheleleko yakhe ekhethekileyo. Ekubeni abakhulileyo abaninzi, njengoNahomi, bengatyekelanga ekufuneni uncedo, lo mzalwana kuya kufuneka abe nobuchule ekuyiqondeni imeko aze—ngobuchule nangengqiqo—aqiniseke ukuba izinto eziyimfuneko ziyenziwa. Ngokomzekelo, unokuqinisekisa ukuba iHolo yoBukumkani inamalungiselelo aneleyo abo bagulayo nabakhulileyo. Ukuba oku kunokwenzeka, usenokulungiselela izinto ezifana nendawo emqengqelezi yokuhamba izihlalo ezinamavili, izindlu zangasese ezifanelekileyo, ii-earphones kwabo bangeva kakuhle nendawo yezihlalo ezikhethekileyo. Kwakhona lo mzalwana unokuqiniseka ukuba bonke abo bangakwaziyo ukuya kwiHolo yoBukumkani banokubolekwa iikhasethi ezirekhodiweyo zeentlanganiso okanye baziphulaphule ngonxibelelwano lomnxeba.

Kwakhona kusenokubakho imfuneko yokulungiselela isithuthi sokuya ezintlanganisweni nakwiindibano. Omnye udade okhulileyo waba nengxaki kuba lowo wayemsa rhoqo kwiintlanganiso wayengafumaneki. Kwafuneka atsalele umnxeba abantu abaninzi ngaphambi kokuba ekugqibeleni afumane into yokuhamba yaye ngokomphumo waziva engumthwalo. Ukuba kwakwenziwe ilungiselelo nomdala othile oya kusingatha imicimbi enjalo oko ngekwakukuthintele ukuziva kwakhe ephoxekile.

Kwakhona lo mdala usenokucela iintsapho ezahlukeneyo ukuba zibolekisane ngokutyelela abakhulileyo. Ngale ndlela abantwana banokufunda ukuba ukunyamekela abakhulileyo kuyinxalenye yobomi bomKristu. Kuyinto elungileyo ngabantwana ukufunda ukuyithwala le mbopheleleko. (1 Timoti 5:4) Omnye umveleli wesiphaluka uthi: “Ngokwamava am, bambalwa gqitha abantwana okanye abaselula abaye bazicingele ukutyelela abakhulileyo nabagulayo.” Mhlawumbi abakhe bacinge ngako oko, okanye basenokuziva bengaqinisekanga ngento abanokuyenza okanye abanokuyithetha; abazali banokubafundisa oku.

Noko ke, khumbula ukuba, inkoliso yabantu abakhulileyo iya kukuxabisa ukwazi kwangaphambili ukuba kukho isihlobo esiza kubatyelela. Oku kubazisela uvuyo olongezelelekileyo lokulindela undwendwe. Ukuba iindwendwe ziza nezimuncumuncu, ezifana nekofu okanye ikeyiki, zize ngokukhawuleza zicoce ngemva koko, kuya kuphetshwa ukubangela uxanduva olongezelelekileyo kwabo bakhulileyo. Esinye isibini esikhulileyo, esomeleleyo, veki nganye sinosuku oluthe rhoqo esilubekela ukupakisha ingobozi encinane size siphume ukuya kutyelela abo bakhulileyo ebandleni laso. Utyelelo lwaso luxatyiswa kakhulu.

Ukuze kungenelwe abakhulileyo, amabandla amaninzi aqhuba iSifundo Sencwadi Sebandla ebudeni beeyure zasemini. Kwenye indawo iintsapho ezithile kunye nabavakalisi abangatshatanga babuzwa enoba babenokukuvuyela kusini na ukuxhasa iqela elinjalo, yaye umphumo waba sisifundo sencwadi seqela apho abakhulileyo nabaselula babenokunyamekelana.

Akufanelwe kuyekelwe kubadala kuphela ukusuka kuqala kule nkalo. Sonke simele siziphaphele iintswelo zabagulayo nabakhulileyo. Sinokubabulisa kwiHolo yoBukumkani size sizinike ixesha lokuncokola nabo. Basenokukuvuyela ukumenyelwa kwimbutho nje yabantu abambalwa. Okanye sisenokubamema ukuba bahambe kunye nathi ukuya kwipikiniki okanye kwanaxa sisiya kwiiholide. Elinye iNgqina ngokufuthi lalihamba nabavakalisi abalupheleyo ngenqwelo-mafutha yalo xa lalihambela ngaphandle kwedolophu ngemicimbi yezoshishino. Kubalulekile ukunceda abakhulileyo ukuba baqhubeke beziva bebandakanyekile. Musa ukubavumela bazahlule, njengoko uNahomi wayetyekele ekwenzeni njalo, nto leyo esenokukhawulezisa inkqubo yokwaluphala okanye ubuxhego.

Abaselula abaneziphene okanye abagulayo nabo bakwafuna ingqalelo. INgqina elalinamakhwenkwe amathathu awayegula ngokunganyangekiyo, amabini kuwo awafayo, lithi: “Kusenokuba nzima ngebandla ukuqhubeka libonakalisa inkathalo xa ubani enesigulo esithabatha ixesha elide singapheli. Kutheni kungabelwa abavakalisi abathenjiweyo abaselula ukuba baxubushe itekisi yosuku baze bafunde isahluko seBhayibhile suku ngalunye nomhlobo wabo olele ebhedini? Abaselula, kwanoovulindlela, basenokutshintshana ngamaxesha okuya.”

Xa Ukufa Kubonakala Kungenakuphetshwa

Abakhonzi bakaYehova basoloko bejamelana ngenkalipho nokufa, enoba kuza ngokugula okanye ngenxa yentshutshiso. Xa abo babandezelekileyo beqalisa ukuvakalelwa kukuba ukufa kuyasondela, kuyinto engokwemvelo ngabo ukuba neemvakalelo ezahlukahlukeneyo. Emva kokufa kwabo, izalamane zabo nazo ziya kutyhubela ixesha lokwenza uhlengahlengiso, lokuva intlungu nelokwamkela ukufa oko. Ngoko ngokufuthi kuyinto elungileyo ngaloo mntu ugulayo ukuthetha ngokuphandle ngokufa, njengoko wenzayo uYakobi, uDavide noPawulos.—Genesis isahluko sama-48 nesama-49; 1 Kumkani 2:1-10; 2 Timoti 4:6-8.

INgqina elingugqirha libhala oku: “Simele sithethe ngokuphandle ngalo mbandela. Kulo msebenzi wam andizange ndibone umguli encedwa kukufihlelwa isibakala sokuba ugulel’ ukufa.” Sekunjalo, sifanele siqonde oko umguli afuna ukukwazi, size sazi nexesha afuna ukukwazi ngalo oku. Abanye abaguli bakucacisa phandle ukuba bayaqonda ukuba ukufa kusondele, baze bafune ukuxubusha iimbono neemvakalelo zabo ngalo mbandela. Bambi babonakala bezingisa ekubeni nethemba, yaye izihlobo zabo zenza kakuhle ukubahlalisa ethembeni.—Thelekisa amaRoma 12:12-15.

Ubani osekhukweni lokufa usenokudinwa okanye adideke kangangokuba kube nzima ngaye ukuthandaza. Umguli onjalo mhlawumbi uya kuthuthuzelwa kukufunda kwabaseRoma 8:26, 27 ukuba uThixo uyaziqonda ‘izincwino ezingathethekiyo.’ UYehova uyazi ukuba phantsi koxinezeleko olunjalo ubani usenokuba nobunzima ekufumaneni amazwi okuthandaza.

Xa kunokwenzeka, kubalulekile ukuthandaza nomguli. Omnye umzalwana uyabalisa: “Xa umama wam wayesifa yaye engasenawo amandla okuthetha, wayebonisa ngokusonga izandla ukuba ufuna sithandaze naye. Emva komthandazo wethu, sasicula enye yeengoma zoBukumkani, kuba umama wayewuthanda gqitha umculo. Kuqala, sasicula ngokudumzela isandi sengoma, size sandule ukuculela phantsi amazwi. Ngokucacileyo wayekunandipha oku. Ngokungathandabuzekiyo, ezi ngoma esizinxulumanisa nobomi bethu njengamaNgqina kaYehova zivakalisa iimvakalelo ekusenokuba nzima ukuzivakalisa ngezinye iindlela.”

Ukuthetha nomntu ofayo kufuna uthando, ubuchule nemvakalelo. Undwendwe lunokulungiselela imibandela eyakhayo neyomelez’ ukholo olunokubalisa ngayo, yaye lumele lulumke ukuze luphephe ukuthetha kakubi ngabanye abantu nangeengxaki zabo. Kwakhona, ixesha lotyelelo limele lihlengahlengiselwe ukuba libe lelisengqiqweni nelifanelekileyo. Ukuba umguli ubonakala emkelwe ziingqondo, kuhle ukukhumbula ukuba usenokuba uyakuva oko kuthethwayo. Ngoko kulumkele oko ukuthethayo.

Imbopheleleko Esabelana Ngayo

Ukunyamekela abagulayo nabakhulileyo yimbopheleleko enzima. Kwabo basondeleyo kumguli, ilucelomngeni, ngokwasemzimbeni nangokweemvakalelo. Bayakufuna ukuqondwa noncedo oluvela kulo lonke ibandla. Abo banyamekela amalungu entsapho agulayo okanye abo bakhonza kunye nabo benza into elungileyo, kwanaxa oko kuthetha ukuphoswa zezinye zeentlanganiso okanye ukunciphisa ixesha abalichitha kubulungiseleli basentsimini okwexesha elithile. (Thelekisa eyoku-1 kuTimoti 5:8.) Baya komelezwa sisimo sengqondo sokuqonda sebandla. Maxa wambi umzalwana okanye udade usenokumphumza okwexeshana ukuze lowo usoloko enyamekela loo mntu akwazi ukuya kwiintlanganiso okanye anandiphe iiyure ezihlaziyayo ezimbalwa kumsebenzi wokushumayela.

Kakade ke, ukuba nguwe ogulayo, nawe unokwenza okuthile. Ukuphelelwa lithemba nokungakwazi ukuzinceda ngenxa yobulwelwe bakho kunokukwenza ube nomsindo, kodwa ukuba nomsindo kumenza ubani abe yinkom’ edla yodwa ibe kuyabagxotha abanye. Kunoko unokuzama ukubonakalisa uxabiso uze ube ngosebenzisanayo nabanye. (1 Tesalonika 5:18) Bathandazele abanye abasentlungwini. (Kolose 4:12) Camngca ngeenyaniso ezimangalisayo zeBhayibhile, uze uthethe ngazo kwabo bakutyeleleyo. (INdumiso 71:17, 18) Yiba nomdla wokuzigcina uhambisana nenkqubela yabantu bakaThixo eyomelez’ ukholo. (INdumiso 48:12-14) Yiba nombulelo kuYehova ngezi zinto zivuyisayo ziphunyeziweyo. Ukucamngca ngezinto ezinjalo, kanye njengokutshona kwelanga okukhupha ukukhanya okuqaqambe nokushushu ngakumbi kunasemin’ emaqanda, kunokuzenza iintsuku zokugqibela zokuphila kwethu ziqaqambe.

Sonke sifanele sizabalazele ukugcina ithemba elithi, ngokukodwa kula maxesha alingayo, likhusele ingqondo yethu njengesigcina-ntloko. (1 Tesalonika 5:8) Kuyinto elungileyo ukucamngca ngethemba lovuko nesiseko salo esomeleleyo. Sinokukhangela phambili ngokuqiniseka nangolangazelelo kumhla ekungasayi kubakho kugula okanye buthathaka obubangelwa kukwaluphala. Ngoko, wonke ubani uya kuziva ephilile. Kwanabafileyo baya kubuya. (Yohane 5:28, 29) Ezi “zinto zingabonwayo” sizibona ngamehlo ethu okholo nawentliziyo. Ungaze uphulukane nombono wazo.—Isaya 25:8; 33:24; ISityhilelo 21:3, 4.