Intsapho YamaKristu Yenza Izinto Kunye
“Ke kaloku, ndiyaniyala, bazalwana, . . . [ukuba] nigqibelele ngqiqweni-nye, nasicamangweni sinye.”—1 KORINTE 1:10.
1. Injani imeko ngokuphathelele umanyano kwiintsapho ezininzi?
NGABA intsapho yakho imanyene? Okanye ngaba wonk’ umntu uhamba ngayibonayo? Ngaba nenza izinto kunye? Okanye ngaba kunqabile ukuba nonke nibe ndaweninye ngaxeshanye? Igama elithi “intsapho” lithetha indlu emanyeneyo.a Kodwa, asizizo zonke iintsapho ezimanyeneyo. Omnye umhlohli waseBritani wade wathi: “Kunokuba ibe sisiseko sebutho labantu elilungileyo, intsapho . . . ingumthombo wazo zonke izinto ezisenza singonwabi.” Ngaba kunjalo ngentsapho yakho? Ukuba kunjalo, ngaba kumele kube njalo?
2. Ngabaphi abantu abakhankanywe eBhayibhileni abanikela ubungqina bokuba babephuma kwiintsapho ezilungileyo?
2 Ukumanyana okanye ukungamanyani kwentsapho ngokuqhelekileyo kuxhomekeka kukhokelo, enoba lolwabazali ababini okanye umzali omnye. Ngamaxesha okubhalwa kweBhayibhile, iintsapho ezimanyeneyo ezazinqula kunye zazinandipha intsikelelo kaYehova. Oku kwakunjalo kwaSirayeli mandulo, apho intombi kaYifeta, uSamson, noSamuweli, ingulowo ngeyakhe indlela, banikela ubungqina bokuba babephuma kwintsapho ehlonel’ uThixo. (ABagwebi 11:30-40; 13:2-25; 1 Samuweli 1:21-23; 2:18-21) Ngamaxesha amaKristu okuqala, uTimoti, iqabane likaPawulos elithembekileyo maxa wambi uPawulos awayehamba nalo kukhenketho lobuvangeli basemazweni, wakhuliswa ngolwazi lweZibhalo zesiHebhere nguninakhulu uLoyisi nonina, uYunike. Onjani yena ukubalasela umfundi nomvangeli wasemazweni awaba nguye!—IZenzo 16:1, 2; 2 Timoti 1:5; 3:14, 15; bona kwaneZenzo 21:8, 9.
Siyintoni Isizathu Sokwenza Izinto Kunye?
3, 4. (a) Ziziphi iimpawu intsapho emanyeneyo efanele ibe nazo? (b) Sinokulenza njani ikhaya libe ngaphezulu kwendlu nje?
3 Kutheni kuyingenelo ukuba iintsapho zenze izinto kunye? Kungenxa yokuba oku kukhulisa ukuqondana nokuhlonelana. Kunokuchaselana, sihlala sisondelelene yaye sixhasana. Inqaku lakutshanje kulindixesha othi Family Relations lithe: “Ngoku siyaziqonda noko iimpawu ezithile ‘zeentsapho ezomeleleyo.’ Iimpawu ezinjalo ziquka ukuzibophelela komnye nokuxabisana, ubunye, unxibelelwano olunentsingiselo, ubuchule bokucombulula iingxaki, nokuba ubumoya bube yeyona nto ibalulekileyo.”
4 Xa ezi mpawu zikho entsatsheni, ikhaya alisabi yindawo efana neyokutha amafutha kwinqwelo-mafutha. Alibi yindlu nje kuphela. Liyindawo enomtsalane amalungu entsapho aziva etsaleleka kuyo. Liyindawo apho anokufumana khona ukufudumala nothando, imfesane, nokuqondwa. (IMizekeliso 4:3, 4) Liyindawo apho umanyano lwentsapho lufumaneka khona, aliyondlwana yoonomadudwane yongquzulwano neeyantlukwano. Kodwa kwenzeka njani oku?
Ukufundisisa Kunye Njengentsapho
5. Yintoni esifanele siyisebenzise ukuze sifunde unqulo lokwenyaniso?
5 Unqulo lokwenyaniso lukaYehova lufundwa ngokusetyenziswa kwamandla ethu okuqiqa, okanye “amandla engqiqo.” (Roma 12:1, NW) Ihambo yethu ayifanele ilawulwe ziimvakalelo zokomzuzwana ezinjengezo zibangelwa ziintshumayelo ezichukumisayo neentlangano zonqulo ezitsho ngolwimi olubuthelezi koomabonwakude. Kunoko, sishukunyiswa kukufundisisa kwethu rhoqo nokucamngca ngeBhayibhile noncwadi lokufundisisa iBhayibhile olulungiselelwa ‘ngumkhonzi othembekileyo noqondayo.’ (Mateyu 24:45) Izenzo zethu zobuKristu zingumphumo wokufuna ingqiqo kaKristu kuyo nayiphi na imeko okanye isihendo esisenokuvela. Kuloo nkalo, uYehova unguMfundisi wethu Ozukileyo.—INdumiso 25:9; Isaya 54:13; 1 Korinte 2:16.
6. Nguwuphi umzekelo wesifundo sentsapho esiqhutywa emhlabeni wonke esinawo?
6 Isifundo seBhayibhile sentsapho sinendima ebalulekileyo kubumoya bentsapho nganye yamaKristu. Nisiqhuba nini isifundo senu sentsapho? Ukuba sishiyelwa kumabona-ndenzile okanye siqhutywa xa kwenzekile, ngoko ngokuqinisekileyo asiqhutywa rhoqo. Ukufundisisa kunye njengentsapho kufuna ucwangciso oluthe rhoqo, nolumiselweyo. Ngoko bonke bayazi ukuba kungaluphi na usuku nangayiphi na iyure ekulindeleke ukuba babekho ukuze banandiphe imbutho yokomoya yentsapho. Amalungu entsapho yaseBheteli angaphezu kwe-12 000 emhlabeni wonke ayazi ukuba isifundo sawo sentsapho singokuhlwa kwangoMvulo. Hayi indlela okuchukumisa ngayo kwaba basebenzi bokuzithandela baseBheteli ukukhumbula ukuba njengoko usuku luphela bonke baba nenxaxheba kwisifundo esifanayo, kwiziqithi zePasifiki naseNew Zealand, kuze kulandele iOstreliya, iJapan, iTaiwan, iHong Kong, kulandele iAsia, iAfrika, neYurophu, kuze kugqibele amazwe aseMerika. Nangona bahlulwe ngamawaka eekhilomitha naziilwimi ezininzi, esi sifundo sentsapho sikhuthaza imvakalelo yobunye kumalungu entsapho yaseBheteli. Ngomlinganiselo ongaphantsi, unokuhlakulela imvakalelo efanayo ngesifundo sentsapho yakho.—1 Petros 2:17; 5:9.
7. Ngokutsho kukaPetros, sifanele siligqale njani ilizwi lenyaniso?
7 Umpostile uPetros uyasiluleka: “Walangazeleleni, ngokweentsana ezisandula ukuzalwa, amasi angawelizwi, angenankohliso, ukuze nikhule ngawo [nise elusindisweni, NW], ukuba okunene nikuvile, ukuba iNkosi inobubele.” (1 Petros 2:2, 3) Onjani ukuba mhle umfanekiso-ngqondweni obangelwa ngaloo mazwi kaPetros! Wasebenzisa isenzi sesiGrike esithi e·pi·po·theʹsa·te, ngokutsho kweLinguistic Key to the Greek New Testament, esivela kwigama elithetha “ukulangazelela, ukunqwenela, ukurhalela.” Sichaza umnqweno onamandla. Ngaba ukhe wayiphawula indlela inkonyana eliwufuna ngolangazelelo ngayo umbele kanina nendlela umntwana aneliseka ngayo xa esanya kumabele kanina? Sifanele silinqwenele ngendlela efanayo ilizwi lenyaniso. Umphengululi wesiGrike uWilliam Barclay wathi: “KumKristu onyanisekileyo, ukufundisisa ilizwi likaThixo akunto inzima kodwa kuluvuyo, kuba uyazi ukuba kulo intliziyo yakhe iya kufumana ukudla ekulangazelelayo.”
8. Luluphi ucelo-mngeni intloko-ntsapho ejamelene nalo ekuqhubeni isifundo sentsapho?
8 Isifundo sentsapho sibeka imbopheleleko enkulu kwintloko-ntsapho. Ifanele iqinisekise ukuba isifundo sibangel’ umdla kubo bonke yaye bonke banokuba nenxaxheba. Abantwana abafanele bavakalelwe kukuba isifundo ngokwenene sesabantu abakhulu. Umgangatho wesifundo ubaluleke ngakumbi kunobungakanani bombandela ogutyungelweyo. Yenze iBhayibhile iphile. Xa kunokwenzeka, nceda abantwana bakho bazakhele umfanekiso-ngqondweni weendawo nendlela elalimi ngayo elasePalestina apho iziganeko ezixutyushwayo zenzeka khona. Bonke bafanele bakhuthazwe ukuba bazenzele uphando lobuqu baze babelane ngoko bakuphandileyo nentsapho. Ngale ndlela nabantwana ‘banokukhula bekuYehova.’—1 Samuweli 2:20, 21.
Ukuhambisa Ivangeli Kunye
9. Ukushumayela kunokwenziwa njani kube ngamava awonwabisayo entsatsheni?
9 UYesu wathi: “Kumele ukuthi ke ukuqala kuvakaliswe iindaba ezilungileyo ezi kuzo zonke iintlanga.” (Marko 13:10) Loo mazwi abeka phezu komKristu ngamnye onenkathalo isabelo—sokuhambisa ivangeli, ukwabelana nabanye ngeendaba ezilungileyo zolawulo loBukumkani bukaThixo. Ukwenza oku kunye njengentsapho kunokukhuthaza yaye kube ngamava amyoli. Oobawo noomama bayavuyiswa yindlela abantwana babo abazishumayela ngayo iindaba ezilungileyo. Esinye isibini esinoonyana abathathu abaphakathi kweminyaka eli-15 nama-21 sibalisa ukuba sasisoloko sihamba nabantwana baso kumsebenzi wokushumayela esidlangalaleni ngabo bonke ooLwesithathu ukuphuma kwabo esikolweni nangazo zonke iintsasa zangoMgqibelo. Ubawo wathi: “Sibafundisa okuthile sihlandlo ngasinye. Yaye siqinisekisa ukuba oku kuba ngamava anandiphekayo nakhuthazayo.”
10. Abazali banokubenza njani abantwana babo bangenelwe kubulungiseleli?
10 Ukusebenza kunye njengentsapho ekushumayeleni nasekufundiseni kunokuba neziqhamo gqitha. Maxa wambi abantu basabela kakuhle kwintshumayelo yomntwana elula kodwa enyanisekileyo. Ngoko, uMama noTata bakho ukuze bancede xa kuyimfuneko. Abazali banokuqinisekisa ukuba abantwana babo baqeqeshwa ngokuqhubekayo baze ngaloo ndlela babe ngabalungiseleli ‘abangenazintloni, abalungisayo ukulahlula ilizwi lenyaniso.’ Ukushumayela kunye ngale ndlela kunika abazali ithuba lokuphawula isimosengqondo, impumelelo nesimilo somntwana kubulungiseleli. Ngokuba nocwangciso oluthe rhoqo, bayayibona inkqubela yomntwana baze bamqeqeshe ngokuqhubekayo baze bamkhuthaze ukuba omeleze ukholo lwakhe. Kwangaxeshanye, abantwana bayabona ukuba abazali babo bangumzekelo omhle kubulungiseleli. Kula maxesha anomngcipheko nanogonyamelo, ukusebenza njengentsapho emanyeneyo nenenkathalo kusenokude kube yinkuselo kwimimandla oluxhaphakileyo kuyo ulwaphulo-mthetho.—2 Timoti 2:15; Filipi 3:16.
11. Yintoni enokuyiphelisa ngokulula inzondelelo yomntwana ngenyaniso?
11 Abantwana bayakhawuleza ukubabona abantu abadala xa bephila ubomi obumbaxa. Ukuba abazali ababonisi uthando lokwenene ngenyaniso nangobulungiseleli bendlu ngendlu, akunakulindelwa ukuba abantwana babe nenzondelelo. Ngaloo ndlela, umzali ongabikwa hlaba oba nesabelo kwinkonzo yasentsimini kuphela xa eqhubela abantwana isifundo seBhayibhile seeveki ngeeveki usenokufumana imiphumo ebuhlungu xa bekhulile.—IMizekeliso 22:6; Efese 6:4.
12. Ezinye iintsapho zinokuzifumana njani iintsikelelo ezikhethekileyo kuYehova?
12 Ingenelo yokuhlala ‘nimanyene ekucingeni nto-nye’ ikukuba mhlawumbi intsapho inokuncedisana ukuze ubuncinane ilungu elinye likhonze njengomlungiseleli wexesha elizeleyo onguvulindlela ebandleni. Iintsapho ezininzi emhlabeni wonke ziyakwenza oku, yaye zifumana iintsikelelo kumava nempumelelo eyandisiweyo yelungu elinguvulindlela.—2 Korinte 13:11; Filipi 2:1-4.
Ukuzisingatha Kunye Iingxaki
13, 14. (a) Ziziphi iimeko ezinokuyichaphazela imvisiswano yentsapho? (b) Zinokuthintelwa njani iingxaki ezininzi zentsapho?
13 Kula maxesha anzima “oxinezeleko” ‘neengozi,’ sonke sicinezelekile. (2 Timoti 3:1, Revised Standard Version; Phillips) Kukho iingxaki emsebenzini, esikolweni, ezitratweni, kwanasekhaya. Bambi baneengxaki zempilo enkenenkene okanye iingxaki zeemvakalelo ezingapheliyo, ezithi maxa wambi zikhokelele kungquzulwano nokungaqondani entsatsheni. Zinokusingathwa njani iimeko ezinjalo? Ngaba zinokusingathwa ngokuthi ngamnye azivalele owakhe umlomo? Ngaba zinokusingathwa ngokuzahlula nangona nihlala kwikhaya elinye? Akunjalo. Kunoko, kufuneka sixelelane izinto ezisixhalabisayo size sicele uncedo. Yaye ngaba ikho enye indawo efanelekileyo yokwenza oku ngaphezu kwesangqa sentsapho esinothando?—1 Korinte 16:14; 1 Petros 4:8.
14 Njengokuba bonke oogqirha besazi, kulunge ngakumbi ukuyikhusela into kunokuyinyanga. Oku kukwayinyaniso nangeengxaki zentsapho. Ukuxubusha ngokuphandle nangokukhululekileyo ngokufuthi kunokuzikhusela iingxaki ekubeni zezinzulu. Kwanokuba kuvela iingxaki ezinzulu, zinokusingathwa zide ziconjululwe ukuba intsapho iqwalasela kunye imigaqo yeBhayibhile ebandakanyekileyo. Ngokufuthi ungquzulwano lunokuguqulelwa ekubeni lulwalamano olonwabisayo ukuba kusetyenziswa amazwi kaPawulos akwabaseKolose 3:12-14: “Yambathani ngoko . . . iimfesane zeemfefe, ububele, ukuthobeka kwentliziyo, ubulali, ukuzeka kade umsindo, ninyamezelana, nixolelana, ukuba ubani uthi abe nokusola ngakubani. . . . Yalekani uthando, oluyintambo yogqibelelo.”
Ukuzihlaziya kunye
15, 16. (a) Luluphi uphawu olufanele lwahlule iintsapho zamaKristu? (b) Ezinye iinkonzo zibangela ukuba abantu babe njani, yaye ngoba?
15 UYehova unguThixo owonwabileyo, yaye inyaniso isisigidimi solonwabo—sethemba kuluntu. Ngaphezu koko, esinye seziqhamo zomoya luvuyo. Olu vuyo lwahluke gqitha kuchulumanco lokomzuzwana umdlali aba nalo xa ephumelele kumdlalo wokhuphiswano. Yimvakalelo enzulu yolwaneliseko ezalisa intliziyo kabani ngenxa yokuhlakulela ulwalamano olusenyongweni noYehova. Luvuyo olusekelwe kwimilinganiselo yokomoya nolwalamano olwakhayo.—Galati 5:22; 1 Timoti 1:11.
16 Ngoko ke, njengamaNgqina kaYehova angamaKristu, asinasizathu sokuba lusizi nokuthi khunubembe. Ezinye iinkonzo zenza abantu babe njalo ngenxa yokuba ukholo lwazo lugxininisa kwizinto ezingakhiyo. Iimfundiso zazo zibangela unqulo oludakumbisayo nolungavuyisiyo, olungaxhaswayo yiBhayibhile nolungalungelelananga. Azibangeli iintsapho ezonwabileyo enkonzweni kaThixo. UYesu wayibona imfuneko yokuzihlaziya nokuphumla. Ngokomzekelo, ngesinye isihlandlo, wabiza abafundi bakhe ukuba baye ‘ngasese kwindawo eyintlango, baphumle kancinane.’—Marko 6:30-32; INdumiso 126:1-3; Yeremiya 30:18, 19.
17, 18. Ziziphi iindlela ezifanelekileyo iintsapho zamaKristu ezinokuphumla ngazo?
17 Ngokufanayo, neentsapho ziyalifuna ixesha lokuphumla. Omnye umzali wathi ngabantwana bakhe: “Senza izinto ezininzi zokuzonwabisa kunye—siya elwandle, sidlala ibhola epakini, siceba ipikiniki ezintabeni. Ngamathuba athile, sinandipha ‘usuku lobuvulindlela’ kunye kubulungiseleli; size sibhiyoze ngesidlo esikhethekileyo, yaye side sinikane nezipho.”
18 Amanye amacebiso abazali abasenokuwaqwalasela kukukhupha intsapho iye kwimizi yogcino-zilwanyana, kwiindawo zokuzonwabisa ezinezinto zokudlala, kwiimyuziyam, nakwezinye iindawo ezichwayitisayo. Ukuhamba ehlathini, ukubuka iintaka, nokusebenza esitiyeni zizinto ezinokunanditshwa kunye. Kwakhona abazali banokukhuthaza abantwana babo ukuba bafunde ukudlala isixhobo somculo okanye babe nomsetyenzana wokuzonwabisa oluncedo. Ngokuqinisekileyo, abazali abalungeleleneyo baya kuzinika ixesha lokudlala nabantwana babo. Ukuba iintsapho ziyadlala kunye, kulula ngakumbi ukuba zihlale zimanyene!
19. Luluphi utyekelo lwanamhlanje olunokuba yingozi entsatsheni?
19 Namhlanje kuqhelekile ukuba ulutsha lufune ukuzahlula kwintsapho luze luzenzele ezalo izinto lodwa xa kufikelelwa ekuzihlaziyeni. Ngoxa kungekho ngozi ekubeni umntu oselula abe nomsetyenzana wokuzonwabisa okanye indlela yokuchitha ixesha ayithandayo, bekungayi kuba bubulumko ukuvumela izilangazelelo ezinjalo zikwahlule ngokupheleleyo kwamanye amalungu entsapho. Kunoko, sifuna ukusebenzisa umgaqo uPawulos awawunikelayo: “Elowo [angaxuneli] kwezakhe izinto zodwa, elowo makaxunele nakwezabanye.”—Filipi 2:4.
20. Iindibano ezincinane nezinkulu zinokuba zizihlandlo ezivuyisayo njani?
20 Hayi indlela okusivuyisa ngayo xa sisonke ukubona iintsapho zihleli kunye ezindibanweni ezincinane nezinkulu! Ngaloo ndlela abantwana abadala ngokufuthi banokuncedisa ekunyamekeleni abancinane. Ilungiselelo elinjalo likwanceda ekupheliseni utyekelo lwabathile abakwishumi elivisayo lokuzikhetha baze bahlale bengamaqela kwizihlalo ezingasemva yaye banganikeli ngqalelo kangako kucwangciso lwendibano. Kwanohambo lokuya nokubuya endibanweni lunokuba loluvuyisayo ukuba intsapho ibuziwe ukuba ingathanda kuhanjwe ngayiphi na indlela, kubonwe ziphi iindawo endleleni, kuze kuhlalwe phi. Khawuthelekelele indlela elimele ukuba lalivuyisa ngayo ixesha laxa iintsapho zazihamba kunye ukuya eYerusalem ngomhla kaYesu!—Luka 2:41, 42.
Iintsikelelo Zokuba Kunye
21. (a) Sinokuyizabalazela njani impumelelo emtshatweni? (b) Ngawaphi amacebiso amane alungileyo omtshato ohlala uhleli?
21 Akukaze kube lula ukuba nemitshato ephumelelayo neentsapho ezimanyeneyo, yaye azenzeki ngamabona-ndenzile. Bambi bakufumanisa kulula ukuvela ‘balahl’ ithemba,’ bawuphelise loo mtshato ngoqhawulo-mtshato, baze bazame ukuqala ekuqaleni kwakhona. Sekunjalo, ngokufuthi kuvela iingxaki ezifanayo nakumtshato wesibini okanye owesithathu. Esona sicombululo sisebenzayo sesobuKristu: Zabalazelani impumelelo ngokusebenzisa imigaqo yeBhayibhile yothando nentlonelo. Iintsapho ezimanyeneyo zixhomekeke kumoya wokupha nokwamkela, wokungazingci. Omnye umcebisi ngemitshato wanikela icebiso elilula lokwenza umtshato uhlale uhleli. Wabhala: “Ezona zinto zibalulekileyo ezifumanekayo phantse kuyo yonke imitshato ephumelelayo kukulungela ukuphulaphula, ukukwazi ukucela uxolo, ukukwazi ukunikela inkxaso ngokweeemvakalelo ngamaxesha onke, nomnqweno wokubambana ngothando.” Ezo zinto ngokwenene zinokunceda zenze umtshato uhlale uhleli kuba zikwasekelwe kwimigaqo efanelekileyo yeBhayibhile.—1 Korinte 13:1-8; Efese 5:33; Yakobi 1:19.
22. Ziziphi ezinye zeengenelo zokuba nentsapho emanyeneyo?
22 Ukuba silandela isiluleko seBhayibhile, siya kuba nesiseko esomeleleyo sentsapho emanyeneyo, yaye iintsapho ezimanyeneyo zisisiseko sebandla elimanyeneyo nelomeleleyo ngokomoya. Ngaloo ndlela, siya kufumana iintsikelelo eziyintabalala kuYehova njengokuba ngokumanyeneyo sinikela indumiso eyandisiweyo kuye.
[Umbhalo osemazantsi]
a “Igama lesiNgesi elithi family [intsapho] lisuka kwisiL[atini] familia, ntlandlolo elalithetha izicaka namakhoboka endlu enkulu, kunye nendlu ngokwayo enenkosi, inkosikazi, abantwana—kunye nabasebenzi.”—Origins—A Short Etymological Dictionary of Modern English, nguEric Partridge.
Uyakhumbula Na?
◻ Kutheni kuyingenelo ukuba iintsapho zenze izinto kunye?
◻ Kutheni isifundo seBhayibhile sentsapho esithe rhoqo sibalulekile?
◻ Kutheni kubalulekile ukuba abazali babandakanyeke kubulungiseleli basentsimini kunye nabantwana babo?
◻ Kutheni kuluncedo ukuxubusha iingxaki njengentsapho?
◻ Kutheni iintsapho zamaKristu zingafanele zidakumbe okanye zingabi naluvuyo?
[Umfanekiso okwiphepha 17]
Ngaba intsapho yakho ubuncinane itya kunye kanye ngosuku?
[Umfanekiso okwiphepha 18]
Amaxesha okuzikhupha njengentsapho afanele aphumze yaye anandipheke