Kutheni Umele Umthande Ummelwane Wakho?
UBOMI obungunaphakade buxhomekeke kuthando lwethu ngoThixo nommelwane. Loo ngongoma yaveliswa kwincoko eyaqhubeka phantse kwiminyaka engama-2 000 eyadlulayo.
Indoda engumYuda neyayiwazi kakuhle uMthetho kaMoses yabuza uYesu Kristu oku: “Ndenze ntoni na ukuze ndibudle ilifa ubomi obungunaphakade?” UYesu waphendula wathi: “Emthethweni kubhalwe ntoni na?” Icaphula eMthethweni, le ndoda yathi: “Uze uyithande iNkosi uThixo wakho ngentliziyo yakho iphela, nangomphefumlo wakho uphela, nangamandla akho ephela, nangengqondo yakho iphela; nommelwane wakho, njengoko uzithanda ngako.” UYesu wathi, “Uphendule walungisa; yenza oko, wobudla ubomi.”—Luka 10:25-28.
Esakutsho, lo wayebuza uYesu wathi: “Ngubani na ongummelwane wam?” Kunokuba amphendule ngokungqalileyo, uYesu wabalisa ibali elingumzekeliso ngendoda engumYuda eyayiphangiwe, ibethiwe, yaza yashiywa ingathi iza kufa. Kweza amaYuda amabini—owokuqala engumbingeleli omnye engumLevi. Ngamnye kuwo ayibona imeko yomYuda wakowabo kodwa akenza nto ukumnceda. Kwalandela umSamariya. Esikwe yimfesane, wabopha amanxeba omYuda owenzakeleyo, wamsa endlwini yabahambi, waza walungiselela ukuba aqhubeke esongiwa.
UYesu wabuza lowo wayembuza: “Nguwuphi na kwabo bathathu ngoko, othi wena, waba ngummelwane walowo wagaxeleka ezihangeni?” Ngokucacileyo, yayingumSamariya onenceba. Ngaloo ndlela uYesu wabonisa ukuba uthando lokwenyaniso lommelwane ludlulela ngaphaya kwemida yobuhlanga.—Luka 10:29-37.
Ukungabikho Kothando Lommelwane
Namhlanje kukho intiyo eyandayo phakathi kwamaqela abantu abahlukeneyo ngokobuhlanga. Ngokomzekelo, eJamani abavukeli abatyekele kubuNazi kutshanje bawisa enye indoda emhlabeni baza bayixusha ngezihlangu ezomeleleyo, besophula phantse zonke iimbambo zayo. Bandula bayifefa ngesiselo esine-alkoholi eninzi baza bayitshisa. Le ndoda yashiywa apho ukuze ife yahlaselwa ngenxa yokuba kwakucingwa ukuba ngumYuda. Kwesinye isiganeko esingaginyisi mathe, indlu ekufutshane naseHamburg yagityiselwa ngebhombu yepetroli, kwatsha abantu abathathu abasuka eTurkey bade bafa—omnye wabo iyintombazana eneminyaka elishumi ubudala.
Kwiziqithi zeBalkans nakumazwe akude asempuma, iimfazwe zobuzwe bezibulala amawaka abantu. Abanye bafa kwiingxwabangxwaba eziphakathi kwabantu abaneemvelaphi ezahlukeneyo eBangladesh, eIndiya, nasePakistan. Yaye eAfrika, iingxwabangxwaba eziphakathi kwezizwe neentlanga ezithile zibulala abanye abangakumbi.
Abantu abaninzi bayothuswa lugonyamelo olunjalo yaye abasayi kuze babenzakalise abamelwane babo. Enyanisweni, eJamani uqhankqalazo lwasesidlangalaleni luye lwabonisa ukuba abantu balapho abaluthandi ugonyamelo lobuhlanga. Phofu ke, iThe New Encyclopædia Britannica ithi: “Phantse abantu bazo zonke iintlanga zehlabathi bayigqala indlela yabo yokuphila njengeyongamileyo kunayo neyabona bamelwane basondeleleneyo.” Iimbono ezinjalo ziyaluthintela uthando ngommelwane. Kunokwenziwa ntoni ngoku, ngokukodwa ekubeni uYesu wathi ubomi buxhomekeke kuthando ngoThixo nommelwane?
[Inkcazelo Ngomfanekiso okwiphepha 2]
Cover: Jules Pelcog/Die Heilige Schrift
[Inkcazelo Ngomfanekiso okwiphepha 3]
The Good Samaritan/The Doré Bible Illustrations/Dover Publications, Inc.