Ukuthanda Ummelwane Kunokwenzeka
UMZEKELISO kaYesu Kristu womSamariya wabonisa oko ukuthanda ummelwane kukuthethayo ngokwenene. (Luka 10:25-37) Kwakhona uYesu wafundisa oku: “Uze uyithande iNkosi uThixo wakho ngentliziyo yakho iphela, nangomphefumlo wakho uphela, nangengqondo yakho iphela. Nguwo lowo owokuqala nomkhulu umthetho. Owesibini ke ufana nawo; Uze umthande ummelwane wakho ngoko uzithanda ngako.”—Mateyu 22:37-39.
Njengabantu abaninzi, ngaba ukufumanisa kunzima ukuthanda ummelwane wakho wolunye uhlanga olwahlukileyo kolwakho? Mhlawumbi oku kunjalo ngenxa yokuba uye wafunda okanye ngokobuqu uye wanamava ocalucalulo nokungekho sikweni. Wena okanye obathandayo kusenokwenzeka ukuba nikhe naphathwa kakubi ngabantu bolunye uhlanga.
Ekubeni uYesu wabonisa ukuba omnye wemithetho kaThixo ukukuba sithande ummelwane wethu, simele sikwazi ukoyisa iimvakalelo ezinamandla ezinjalo. Undoqo ekwenzeni oko kukujonga abantu ngendlela uThixo noKristu ababajonga ngayo. Ngokuphathelele oku makhe siqwalasele umzekelo kaYesu nowamaKristu okuqala.
Umzekelo KaYesu Obalaseleyo
AmaYuda enkulungwane yokuqala ayewachase kakhulu amaSamariya, abantu ababehlala kummandla ophakathi kwelakwaYuda naseGalili. Ngesinye isihlandlo abachasi abangamaYuda ngendelelo babuza uYesu oku: “Asilungisi na thina ukuthi ungumSamariya wena, nokuthi unedemon?” (Yohane 8:48) Wawunamandla gqitha umoya wokuthiya amaSamariya kangangokuba amanye amaYuda ayede awaqalekise ngokuphandle amaSamariya kwizindlu zesikhungu aze imihla ngemihla athandazele ukuba amaSamariya angabufumani ubomi obungunaphakade.
Ngokungathandabuzekiyo kukwazi le ntiyo eyayendele ezintliziyweni okwabangela ukuba uYesu enze umzekeliso ongomSamariya owazingqina engummelwane wokwenene ngokunyamekela indoda engumYuda eyayibethwe ngabaphangi. Ngewayephendule njani uYesu xa indoda engumYuda eyayiwazi kakuhle uMthetho kaMoses yabuza oku: “Ngubani na ongummelwane wam?” (Luka 10:29) Kaloku, uYesu ngewayephendule ngokungqalileyo ngokuthi: ‘Ummelwane wakho asingomYuda kuphela kodwa nabanye abantu, kwanomSamariya.’ Noko ke, amaYuda ngewayekufumanise kunzima ukukwamkela oko. Ngoko wabalisa lo mzekeliso ungomYuda owenzelwa inceba ngumSamariya. Ngaloo ndlela uYesu wanceda abaphulaphuli abangamaYuda bafikelela kwisigqibo sokuba uthando lokwenyaniso ngommelwane lwaluya kudlulela kwanakwabo bangengomaYuda.
UYesu wayengawachasanga amaSamariya. Ehambahamba kwelaseSamariya ngesinye isihlandlo, waphumla ngasequleni ngoxa abafundi bakhe babeye kwisixeko esikufutshane beyokuthenga ukutya. Xa ibhinqa elingumSamariya leza kukha amanzi, wathi: “Ndiphe ndisele.” Ekubeni amaYuda ayengenabudlelane namaSamariya, labuza: “Uthini na wena, ungumYuda nje, ukucela kum into eselwayo, ndingumSamariyakazi nje?” Wandula ke uYesu wanikela ubungqina kulo, evakalisa ngokuphandle ukuba wayenguMesiya. Lasabela ngokuba lihambe liye esixekweni lize libize abanye ukuba baze kumphulaphula. Waba yintoni umphumo? “Kwakholwa kuye into eninzi yamaSamariya kuloo mzi.” Onjani wona ukuba mhle umphumo ngenxa yokuba uYesu wayengachatshazelwanga sisimo sengqondo esasixhaphakile samaYuda awayephila ngexesha lakhe!—Yohane 4:4-42.
UThixo Akamkhethi Wabuso Bamntu
Kwakuyinjongo kaThixo ukuba uYesu ashumayele ngokuyintloko kumaYuda, “kwizimvu ezilahlekileyo zendlu kaSirayeli.” (Mateyu 15:24) Ngenxa yoko, abalandeli bakhe bokuqala babengamaYuda. Kodwa kwiminyaka nje emithathu emva kokuthululwa komoya oyingcwele ngePentekoste yowama-33 C.E., uYehova wakwenza kwacaca ukuba wayefuna amakholwa angamaYuda anabisele umsebenzi wawo wokwenza abafundi nakubantu beeNtlanga.
KumYuda, ukuthanda umSamariya njengokuba ezithanda kwakuya kuba nzima gqitha. Kwakuya kuba nzima ngakumbi ukubonisa uthando lommelwane kumntu weeNtlanga ongalukanga, abantu ababengafani konke konke namaYuda ngaphezu kwamaSamariya. Igqabaza ngesimo sengqondo samaYuda ngabeeNtlanga, iThe International Standard Bible Encyclopaedia ithi: “Sifumana, kumaxesha okubhalwa kweTestamente Entsha, okona kucekisa, indelelo nentiyo embi. [AbeeNtlanga] babegqalwa njengabangacocekanga, ekwakungavumelekanga ngokomthetho ukwakha nabuphi na ubuhlobo nabo. Babeziintshaba zikaThixo nabantu Bakhe, ababengavunyelwa ukuba babe nolwazi ngoThixo ngaphandle kokuba baguqukele ebuYudeni yaye kwanangoko babengenako, njengakumaxesha amandulo, ukuvunyelwa ngokupheleleyo ukuba badlelane namaYuda. AmaYuda ayengavumelekanga ukuba abacebise, yaye ukuba babebuza izinto ezimayela noThixo kwakufuneka baqalekiswe.”
Ngoxa abaninzi babenezi mbono, uYehova wabangela ukuba umpostile uPetros abe nombono awaxelelwa kuwo ukuba ‘izinto uThixo azihlambululeyo angazenzi inqambi.’ Wandula ke uThixo wamalathisa endlwini kaKorneli owayengumntu weeNtlanga. UPetros wanikela ubungqina ngoKristu kuKorneli, kwintsapho yakhe nakwabanye beeNtlanga. UPetros wathi, “Ndiyaqiqa okwenyaniso ukuba uThixo akamkhethi wabuso bamntu; kwiintlanga zonke, lowo umoyikayo, asebenze ubulungisa, wamkelekile kuye.” Ngoxa uPetros wayesashumayela, umoya oyingcwele wehla phezu kwaloo makholwa matsha, awabhaptizwa ngoko aza angabokuqala kwabeeNtlanga ukuba ngabalandeli bakaKristu.—IZenzo, isahluko 10.
Abalandeli abangamaYuda bakwamkela oku kwenzekileyo, beqonda ukuba umyalelo kaYesu ‘wokwenza abafundi zonke iintlanga’ wawungapheleliswanga kumaYuda kuzo zonke iindawo kodwa wawuquka nabeeNtlanga. (Mateyu 28:19, 20; IZenzo 11:18) Besoyisa zonke iimvakalelo zokuchasa abeeNtlanga ekwakunokwenzeka ukuba babenazo, ngenzondelelo balungiselela iphulo lokushumayela lokwenza abafundi kwiintlanga. Kwiminyaka engaphantsi kwama-30 kamva, kwakunokuthiwa iindaba ezilungileyo zazishunyayelwe “kwindalo yonke ephantsi kwezulu.”—Kolose 1:23.
Owayekhokela kulo msebenzi wokushumayela yayingumpostile uPawulos, owayengumKristu onemvelaphi yobuYuda. Ngaphambi kokuba abe ngumlandeli kaKristu, wayelilungu elinenzondelelo lehlelo lonqulo lwabaFarisi. Babenganeli nje ukujongela phantsi abeeNtlanga kodwa babesenjenjalo kwanakubantu abangabalulekanga bohlanga lwabo. (Luka 18:11, 12) Kodwa uPawulos akazange avumele ezo mbono zimbangele ukuba angabonakalisi uthando ngommelwane kwabanye. Kunoko, waba “ngumpostile weentlanga [abeeNtlanga],” enikela ubomi bakhe kumsebenzi wokwenza abafundi kuwo onke amazwe akwiMeditera.—Roma 11:13.
Ebudeni bobulungiseleli bakhe, uPawulos waxulutywa ngamatye, wabethwa waza wavalelwa entolongweni. (IZenzo 14:19; 16:22, 23) Ngaba amava abuhlungu anjalo ambangela ukuba acaphuke aze agqibe kwelokuba wayedlala ngexesha lakhe kwiintlanga ezithile nakumaqela eentlanga? Nakanye. Wayesazi ukuba abantu abaneentliziyo ezinyanisekileyo babesasazeke kumaqela amaninzi eentlanga omhla wakhe.
Njengokuba uPawulos wafumanisa ukuba abeeNtlanga babekulungele ukufundiswa iindlela zikaThixo, wabathanda. Ngokomzekelo, wabhalela abaseTesalonika wathi: “Sisuke sathantamisa phakathi kwenu njengomdlezana osukuba ebagcinile abakhe abantwana; ngokunjalo sinilangazelela nje, kwakholeka kuthi ukuba singaneli kunabela iindaba ezilungileyo zikaThixo nje kodwa, sinabele nobomi bethu, ngenxa enokuba naba ziintanda kuthi.” (1 Tesalonika 2:7, 8) La mazwi asuk’ entliziyweni abonisa ukuba uPawulos ngokwenene wayebathanda abeeNtlanga baseTesalonika yaye akazange avumele nantoni na yonakalise uvuyo lokuba nolwalamano oluhle nabo.
Ukubonakaliswa Kothando Lommelwane
Namhlanje, njengakwinkulungwane yokuqala, abo bazinxulumanisa nebandla lamaKristu bahlakulela uthando lommelwane ngabantu bawo onke amaqela eentlanga. Ngokuhlakulela imbono kaThixo ngabanye nangokwabelana nabo ngeendaba ezilungileyo zoBukumkani, amaKristu okwenyaniso aye aphangalalisa indlela abaqonda ngayo abantu engengabazanga. Bakwanalo nothando lobuzalwana ngabo. (Yohane 13:34, 35) Oku kusenokuba njalo nakuwe.
Uthando olunjalo lukho phakathi kwamaNgqina kaYehova, nangona efumaneka kumazwe angama-229 yaye emela “zonke iintlanga, nezizwe, nabantu, neelwimi.” (ISityhilelo 7:9) Njengabazalwana behlabathi lonke, amanyene ekunquleni uYehova, ekwaleni kwawo ukuba nenxaxheba kwiingxwabangxwaba nezaqunge zobuhlanga, nasekugatyeni kwawo ikhethe lobuhlanga elibangela abantu bangabi nolwalamano olusenyongweni nabanye abantu.
Nxulumana namaNgqina, yaye uya kuphawula indlela abantu beentlanga zonke abakwenza ngayo ukuthanda kukaThixo. Uya kubona ukubonakaliswa kothando lommelwane njengokuba evakalisa iindaba ezilungileyo zoBukumkani bukaThixo. Ewe, nakumabandla awo, uya kudibana nabantu abanobubele, abanyanisekileyo ababonisa ngobomi babo ukuba ngokwenene baye bafunda ukuthanda abamelwane babo.
[Umfanekiso okwiphepha 6]
Kumabandla amaNgqina kaYehova, uya kufumana abantu abonwabileyo beentlanga zonke
[Inkcazelo Ngomfanekiso okwiphepha 4]
Arrival of the Good Samaritan at the Inn/The Doré Bible Illustrations/Dover Publications, Inc.