Yiba Nembono Elungileyo Ngenceba KaThixo

UGQIRHA wayenobubele kwaye enenkathalo gqitha. Ngokwendlela awayebona ngayo, umguli awayemnyamekela kwakufuneka atyandwe ukuze kusindiswe ubomi bakhe. Xa lo mguli wathandabuzayo waza waphakamisa umbandela wotofelo-gazi, ugqirha wamangaliswa. Xa wa-mchazela ukuba ngenxa yezizathu zonqulo wayengenakulwamkela utyando oluya kufuna utofelo-gazi, wothuka kakhulu. Wazama ukucingisisa nzulu ukuze afumane indlela yokumnceda. Ekugqibeleni, wacinga ukuba uyifumene. Wathi: “Uyazi, ukuba akuvumi ukwamkela utofelo-gazi, uza kufa. Awukufuni oko, akunjalo?”

“Kunjalo kanye,” watsho umguli.

“Kodwa, kubonakala ngathi ukuba uyalwamkela, uya kwenza okuchasene neenkolelo zakho zonqulo, nazo ezibalulekileyo kuwe. Kodwa, nali elam icebiso. Kutheni ungamkeli utofelo-gazi uze ngaloo ndlela usindise ubomi bakho. Wandule ke uvume kuThixo ukuba wonile, uze uguquke. Ngaloo ndlela, uya kubuyiselwa kwakhona kunqulo lwakho.”

Lo gqirha owayeneenjongo ezintle wayecinga ukuba usifumene isicombululo esifanelekileyo. Wayesazi ukuba umguli wakhe wayekholelwa kuThixo onenceba. Ngokuqinisekileyo, esi yayisisihlandlo esifanelekileyo sokusebenzisa inceba kaThixo! Kodwa ngaba icebiso lakhe lalisengqiqweni ngendlela elalivakala ngayo?

Ngaba Sikhe Siqiqe Ngale Ndlela?

Maxa wambi sisenokuzifumana siqiqa ngendlela lo gqirha awaqiqa ngayo. Mhlawumbi soyikiswa kukuqhambuka kwenkcaso engalindelekanga esikolweni okanye emsebenzini. Okanye sisenokuzifumana sikwimeko ebangel’ iintloni apho sinokucinezelelwa ukuba senze okuthile okuphazamisana nesazela sethu. Singalindelanga, sisenokutyekela ekuthabatheni iindlela ezilula size senze oko sikwaziyo ukuba kuphosakele, sizimisele ukucela ukuxolelwa kamva.

Okanye abantu ngabanye basenokuhendwa lutyekelo lwabo oluphosakeleyo. Ngokomzekelo, igatyana lomfana lisenokuzifumana likwimeko apho lihendelwa ngamandla ekuziphatheni okubi. Kunokuba lilwe nalo mnqweno uphosakeleyo, lisenokunikezela, ngelithi liya kuyilungisa imicimbi noThixo kamva. Bambi bade benze nesono esinzulu nangona besazi ukuba baya kukhutshelwa ngaphandle kwibandla lamaKristu. Kubonakala ukuba baye baqiqa ngelithi, ‘Ndiya kulinda nje ixeshana ligqithe. Ndandule ke ndiguquke ndize ndibuyiselwe.’

Zonke ezi meko zichaziweyo zinezinto ezimbini ezifana ngazo. Okokuqala, abo babandakanyekileyo bayanikezela kunokuba bazabalazele ukwenza okulungileyo. Okwesibini, bavakalelwa kukuba emva kokwenza okuphosakeleyo, uThixo uya kusuka nje abaxolele ukuba bayamcela.

Yiyiphi Imbono Elungileyo?

Ngaba oku kubonakalisa uxabiso olufanelekileyo ngenceba kaThixo? Kaloku, khawucinge nje ngaloo nceba okomzuzwana. UYesu wathi: “Wenjenje uThixo ukulithanda kwakhe ihlabathi, ude wancama uNyana wakhe okuphela kwamzeleyo, ukuze bonke abakholwayo kuye bangatshabalali, koko babe nobomi obungunaphakade.” (Yohane 3:16) Umpostile uYohane wayichaza indlela esebenza ngayo loo nceba xa wathi: “Ndinibhalela ezi zinto, ukuze ningoni. Ukuba kukho othe wona, sinoMthetheleli kuye uYise, uYesu Kristu ilungisa.” (1 Yohane 2:1) Ngenxa yoko, ukuba ngenxa yokungafezeki siwela esonweni, sinokuya kuThixo ngomthandazo size sicele ukuxolelwa ngesizinzi sedini likaYesu.

Noko ke, ngaba oku kuthetha ukuba akukhathaliseki enoba siyona okanye asoni, lo gama nje sicela ukuxolelwa emva koko? Nakanye. Khumbula amazwi okuqala eso sicatshulwa: “Ndinibhalela ezi zinto ukuze ningoni.” Amazwi kaYohane abhekele phaya kuloo ndinyana abonisa ilungiselelo likaYehova lothando lokuqhubana nokungafezeki kwethu. Sekunjalo, simele sizame ngamandla kangangoko sinako ukukuphepha ukona. Kungenjalo siya kuba sibonakalisa ukungabi nambeko okulusizi ngothando lukaThixo, kanye njengabo uYuda abhekisela kubo abasebenzisa ubabalo lukaThixo njengesingxengxezo sokuziphatha kakubi.—Yuda 4.

Ukujonga inceba kaThixo njengomnatha okhuselayo oya kusoloko usilindile xa sisiwa enoba senza ntoni na kuyenza ibonakale ingabalulekanga inceba kaThixo kuze kwenze kube ngathi isono asisibi kangako. Oku akuyonyaniso nje kwaphela. Umpostile uPawulos waxelela uTito oku: “Kuba lubonakele kubantu bonke ubabalo lukaThixo, lulolusindisayo; lusiqeqesha ukuze sithi, sikuncama ukungahloneli Thixo nokukhanuka okukokwehlabathi, sihlale ngokunesidima, nangokubulungisa, nangokuhlonela uThixo, kweli phakade langoku.”—Tito 2:11, 12.

UPawulos wabonakalisa uxabiso ngenceba kaThixo ngendlela awayelwisana ngayo nokungafezeki kwakhe. Wathi: “Ndisuka ndiwuqobe umzimba wam, ndiwuxinzelele phantsi, hleze ndithi, ndakuba ndizivakalisile iindaba ezilungileyo kwabanye, ndibe mna ndingumlahlelwa phandle.” (1 Korinte 9:27) UPawulos akazange asithabathe njengesingabalulekanga isibakala sokuba ngalo lonke ixesha wayebotshiwe sisono. Ngaba thina simele sibe njalo?

Imbono KaYesu

Ngesinye isihlandlo, uYesu wabonisa indlela awayekujonga ngayo ukulalanisa kokulungileyo nokuthabatha undlela-lula ukuze kuphetshwe ukubandezeleka. Xa waqalisa ukuxelela abafundi bakhe ngokufa kwakhe okulidini okwakusondela, uPetros wazama ukumkhalimela, esithi: “Makube camagu [yiba nobubele, NW] kuwe, Nkosi; oko akuyi kukha kubekho kuwe.” Wasabela njani uYesu? “Suka uye emva kwam, Sathana, usisikhubekiso kum; ngokuba ungazinyamekeli ezikaThixo izinto, unyamekela ezabantu.”—Mateyu 16:22, 23.

Ukumkhalimela kabukhali kukaYesu uPetros kwabonisa ngokucacileyo ukuba uYesu akazange akuvume ukuthabatha undlela-lula okwakuya kuquka ukwenza nxamnye nokuthanda kukaThixo. Ingxelo ibonisa ukuba wayilandela ngokungaxengaxengiyo indlela elungileyo, enyamezela ukuphathwa kakubi ngokuzingisileyo nguSathana. Ekugqibeleni wenziwa intlekisa, wabethwa kabuhlungu waza wabulawa ngokumanyumnyezi. Sekunjalo, akazange alalanise, yaye ngenxa yoku wanikela ngobomi bakhe njengentlawulelo yethu. Ngokuqinisekileyo akazange anyamezele konke oku ukuze ‘sizenzele ububele’ xa kuvela iinzima okanye izilingo!

Kuthiwa ngoYesu: “Wathanda ubulungisa, wathiya okungendawo.” (Hebhere 1:9) Ukuthabatha iindlela ezilula amaxesha amaninzi kubandakanya ulwaphulo-mthetho. Ngenxa yoko, ukuba sikuthiye ngokwenene oku—njengoko uYesu wenzayo—siya kusoloko sikwala ukulalanisa. Kwincwadi yeMizekeliso, uYehova uthi: “Yiba nobulumko, nyana wam, uyivuyise intliziyo yam; ukuze ndimphendule ngezwi ondingcikivayo.” (IMizekeliso 27:11) Ubulungisa bukaYesu obulungeleleneyo kodwa obungalalanisiyo bayivuyisa gqitha intliziyo kaYehova. Sinokumvuyisa ngokufanayo uYehova ukuba silandela ikhondo likaYesu lengqibelelo.—1 Petros 2:23.

Ukuqeqeshwa Lunyamezelo

Umpostile uPetros wabhala: “Enigcoba ngalo, nokuba nithe naba buhlungu umzuzwana ngoku, ukuba nimelwe kuko, phakathi kwezilingo ngezilingo; ukuze ukucikideka kokholo lwenu kufunyanwe kunqabile kakhulu, ngaphezu kwegolide le itshabalalayo, noko icikidwa ngomlilo; kuse kuyo indumiso nembeko nozuko ekutyhilekeni kukaYesu Kristu.” (1 Petros 1:6, 7) Ngenxa yokuba singafezekanga yaye siphila kwihlabathi likaSathana, siya kusoloko sijamelana neemvavanyo nezilingo. Njengoko uPetros ebonisa, ezi zinto zinokuphumeza injongo entle. Zivavanya ukholo lwethu, enoba lubuthathaka okanye lomelele.

Zikwanceda ngokusiqeqesha. UYesu “wafunda ukululama ngobunzima awabuvayo.” (Hebhere 5:8) Nathi ngokufanayo sinokukufunda ukululama, kunye nokuthembela ngoYehova, ukuba siyanyamezela xa sivavanywa. Yaye le nkqubo yokufunda iya kuqhubeka de iphelele, njengoko uPetros wathi: “UThixo . . . anilungise nigqibelele, anizimase, anomeleze.”—1 Petros 5:10.

Noko ke, ukuba siyalalanisa xa sivavanywa, sibonakalisa ukuba singamagwala okanye sibuthathaka, asinalo uthando olomeleleyo ngoYehova nangobulungisa okanye siswele ukuzeyisa. Nabuphi na ubuthathaka obunjalo, bubeka ulwalamano lwethu noThixo engozini enkulu. Ngokwenene, isilumkiso sikaPawulos sinokuba yinyaniso kwimeko yethu: “Kuba, xa sithi sone [siqhelisele isono, NW] ngabom, emveni kokuba sakwamkelayo ukwazi inyaniso, akusasele dini ngenxa yezono.” (Hebhere 10:26) Hayi indlela ekulunge ngakumbi ngayo ukungenzi sono kwasekuqaleni kunokuyekelela kubuthathaka size siwele engozini yokuphulukana nawo onke amathemba obomi!

Ingqibelelo Epheleleyo

Ngemihla yomprofeti uDaniyeli, amaHebhere amathathu oyikiswa ngokubulawa ngomlilo ukuba ayengenakuqubuda kwisithixo. Asabela njani? “Ukuba uThixo wethu esimbusayo unako, wosisindisa ezikweni elivutha umlilo, nasesandleni sakho, kumkani. Ke, ukuba akunjalo, makwazeke kuwe, kumkani, ukuba asiyi kubabusa oothixo bakho, asiyi kuqubuda kumfanekiso wegolide owumisileyo.”—Daniyeli 3:17, 18.

Bema kwelo ngenxa yokuba babefuna ukwenza okulungileyo. Ukuba oko kwakuya kubasa ekufeni, babekulungele ukufa. Babethembele kuvuko. Noko ke, ukuba uThixo wayebakhulula, oko kwakuya kuba kokona kulungileyo. Kodwa ukuma kwabo okuqinileyo kwakugqibelele. Ngoko kufanele kube njalo ngalo lonke ixesha ngabakhonzi bakaThixo.

Kumhla wethu abanye abaye bala ukulalanisa baye bavalelwa ezintolongweni, bathuthunjiswa de babulawa. Abanye baye balahlekelwa zizinto eziphathekayo, bexolela ukuhlala behlwempuzekile kunokuba babe zizityebi ngenxa yokulalanisa kwimigaqo elungileyo. Kwenzeka ntoni ngebhinqa elingumKristu elikhankanywe ekuqaleni kweli nqaku? Layixabisa intshukumisa yobubele kagqirha nangona yayitenxile, kodwa alizange lilalanise kukholo lwalo. Kunoko, ukuhlonela kwalo imithetho kaYehova kwalikhokelela ekubeni lingaluvumi olo tyando. Okonwabisayo kukuba, lo dade wachacha waza waqhubeka ekhonza uYehova ngenkuthalo. Noko ke, xa wathabatha oko kuma, wayengayazi ukuba yayiya kuba yintoni na imiphumo, kodwa wayekulungele ukuyekela wonke umcimbi ezandleni zikaYehova.

Yintoni eyamnceda wahlala eqine ngolo hlobo phantsi kwengcinezelo? Akazange azame ukuthembela kwawakhe amandla, yaye akumele kube njalo nakuwuphi na umkhonzi kaThixo. Khumbula, “uThixo ulihlathi, uligwiba kuthi; ezimbandezelweni ufumaneke eluncedo kunene.” (INdumiso 46:1) Hayi indlela ekulunge ngakumbi ngayo ukuphethukela kuThixo ukuze sifumane uncedo xa silingwa kunokona size siphethukele kwinceba yakhe!

Ewe, masingaze siyithabathe lula inceba kaThixo ebalaseleyo. Kunoko, masihlakulele umnqweno onyanisekileyo wokwenza okulungileyo, kwanaxa sijamelene neenzima. Oku kuya kulwenza nzulu ulwalamano lwethu noYehova, kusinike uqeqesho esilufunayo ukuze sifumane ubomi obungunaphakade, kuze kubonise intlonelo efanelekileyo ngenceba kaThixo. Ikhondo lobulumko elinjalo liya kuzisa uvuyo entliziyweni kaBawo wethu osemazulwini.

[Umfanekiso okwiphepha 24]

Intembelo epheleleyo eluvukweni yanceda amaHebhere amathathu agcina ingqibelelo