Iindawo Ezithile Zelizwe Ledinga

Khawuze Ukhenkethe KuLwandle LwaseGalili!

IMBALWA imimandla abayikhumbula ngokukhawuleza ngakumbi abafundi beBhayibhile kunoLwandle lwaseGalili. Kodwa ngaba ungacimela uze uzenzele umfanekiso-ngqondweni wolwandle olunamanzi angcwengileyo, iindawo ezibalulekileyo ezikulo, ezinjengendawo ongena uze uphume kuyo uMlambo iYordan okanye imimandla yaseKapernahum neyaseTibheriya?

Khawuziphe ixesha uze uhlolisise lo mfanekiso ungezantsi uthatyathwe emoyeni, uthelekisa la manani akuwo kunye nalawo akweli nqaku. Kwezi ndawo zibaliweyo zingaphi ozaziyo? Okukhona usazi ezingakumbi, kokukhona iBhayibhile iya kubangela umdla ize ibe nentsingiselo kuwe. Ngenxa yoko, makhe siqhubeke nolu khenketho lufutshane, lufundisayo.

Lo mfanekiso ungakumntla-mpuma. Makhe siqale ngenombolo #1. Nguwuphi lo mmandla wolwandle uboniswe apha? Ewe, yincam engasezantsi, apho iphuma khona iYordan, iqukuqela isehlela emazantsi phakathi kweSamariya neGiliyadi ize iye kungena kuLwandle Olufileyo. Ngasekhohlo uyibonela kufutshane le ncam yolwandle, ekwaboniswe kwiKhalenda YamaNgqina KaYehova Yowe-1993.

ULwandle lwaseGalili lumi esizikithini seNtlambo yeRift, malunga neemitha ezingama-200 ngasezantsi koLwandle lweMeditera. Njengoko uwuhlolisisa lo mfanekiso, khawuqwalasele ezi ntaba ziphakamileyo ukusuka kunxweme lwalo olungasempuma (malunga nenombolo #7). Kwakhona iinduli neentaba ziphakamela kufutshane, okanye kunxweme, olungasentshona, nto leyo egxininisa ukuba ulwandle lukummandla osesigingqini, lumalunga neekhilomitha ezingama-21 ubude nobubanzi obungenakudlula kwiikhilomitha ezili-12. Kwakukho iindawo eziselunxwemeni ezineedolophana nezixeko ezinjengesaseTibheriya (#2). Khumbula ukuba isihlwele esasihamba ngemikhombe sisuka eTibheriya sawela kolu lwandle sisiya apho uYesu wondla abantu abangama-5 000 ngokungummangaliso.—Yohane 6:1, 10, 17, 23.

Njengoko uhamba ngakummandla ogudle unxweme olusemantla eTibheriya, udlula kummandla ochumileyo weGenesarete (#3).a Kulo mmandla uYesu wanikela iNtshumayelo yaseNtabeni, yaye mhlawumbi kolu nxweme lukufuphi, wamema uPetros nabanye abathathu ukuba babe “ngababambisi babantu,” njengoko kuboniswe apha. (Mateyu 4:18-22) Njengoko uqhubeka nohambo lwakho, ufika eKapernahum (#4), eyayisisazulu sendawo awayenzela kuyo imisebenzi yakhe uYesu, kangangokuba kude kubhekiselwe kuyo ngokuthi ‘kukowabo.’ (Mateyu 4:13-17; 9:1, 9-11; Luka 4:16, 23, 31, 38-41) Njengoko uhamba usinge ngasempuma kufuphi nolwandle, unqumla (#5) apho iqukuqela khona iYordan ukuya elwandle (ngasezantsi). Ngoko ufika kummandla waseBhetesayida (#6).

Sisenokusebenzisa ezi ndawo zimbalwa ukucacisa indlela ulwazi onalo ngoLwandle lwaseGalili olunokukunceda ngayo ulandele uze ube nomfanekiso-ngqondweni, weengxelo zeBhayibhile. Emva kokuba uYesu ondle abangama-5 000 kummandla waseBhetesayida zaza izihlwele zafuna ukumenza ukumkani, wathuma abapostile ngomkhombe ukuba baye eKapernahum. Ebudeni bohambo lwabo ngomkhombe, ngequbuliso kwaqhambuka umoya onoqhwithela usuka ezintabeni aza amaza alatyuza ngamandla, abafundi boyika kunene. Kodwa uYesu weza kubo ehamba phezu kolwandle, waluzolisa uqhwithela, baza bafika kufuphi naseGenesarete bekhuselekile. (Mateyu 14:13-34) Kwakhona abo babesuka eTibheriya bawelela eKapernahum.—Yohane 6:15, 23, 24.

Njengoko uhambela phambilana malunga necala elingasempuma lolwandle, udlula kwindawo ekusenokuba kwakubhekiselwa kuyo ngokuthi ‘lilizwe lamaGadara [okanye, lamaGergasi].’ Khumbula ukuba apha kulapho uYesu wakhupha iidemon ezazikumadoda amabini. Loo mimoya ngenkohlakalo yangena kugxuba lweehagu olwaphaphatheka lwehla eliweni lwaya kungena elwandle. Emva koko enye yala madoda yanikel’ ubungqina kwizixeko zaseDekapoli ezikufuphi zabantu abathetha isiGrike. UYesu wafika waza wanduluka ukusuka kwesi sixeko ngomkhombe ukuwela kuLwandle lwaseGalili.—Mateyu 8:28–9:1; Marko 5:1-21.

Njengoko ukhenketho lwakho uluphetha ngakumazantsi encam yolwandle, udlula kufuphi nendawo apho umlambo omkhulu (obizwa ngokuba yiYarmuk) usizisa amanzi amaninzi kumazantsi oMlambo iYordan.

IBhayibhile ayiyicacisi indawo ezenzeka kuyo iziganeko ezithile kufuphi noLwandle lwaseGalili, ezinjengokubonakala kukaYesu emva kokuvuswa kwakhe xa uPetros nabanye abapostile babeloba (ngezantsi). Ngaba ucinga ukuba kwakukufuphi naseKapernahum? Phofu ke, ulwazi onalo ngolu lwandle lubalulekileyo lukunceda ukwazi ukuzenzela umfanekiso-ngqondweni wendawo ekusenokuba kwenzeka kuyo oku.

[Umbhalo osemazantsi]

[Imifanekiso ekwiphepha 24]

1

2

3

4

5

6

7

N

S

E

W

[Inkcazelo Ngomfanekiso okwiphepha 24]

Pictorial Archive (Near Eastern History) Est.

[Inkcazelo Ngomfanekiso okwiphepha 24]

Pictorial Archive (Near Eastern History) Est.

[Inkcazelo Ngomfanekiso okwiphepha 24]

Garo Nalbandian

[Inkcazelo Ngomfanekiso okwiphepha 25]

Pictorial Archive (Near Eastern History) Est.