Iindawo Ezithile Zelizwe Ledinga

IGenesarete—‘Iyamangalisa Yaye Intle’

“Kufuphi neDike laseGenesarete kukho ummandla omkhulu okwabizwa ngelo gama, obukeka gqitha ngenxa yezinto ezikuwo nangobuhle bawo. Ngenxa yokutyeba komhlaba walapho akukho sityalo singachumiyo apho, yaye abemi balapho balima yonke into: umoya walapho uphole kangangokuba ufanela nezona zinto zahlukahlukeneyo eziphilayo. . . . Awuvelisi nje kuphela iziqhamo ezahlukahlukeneyo ngeyona ndlela ingaqhelekanga; zisoloko zikho ngamaxesha onke. . . . unkcenkceshelwa ngumthombo ovelisa amanzi achumisa ngamandla.”

Umbhali-mbali uJosephus walichaza ngaloo ndlela ithafa elingunxantathu kwincam ekumntla-ntshona woko kwaziwa ngokuqhelekileyo ngokuba luLwandle lwaseGalili. Imifanekiso engasentla inokukunika umbono wendlela eli thafa elalichume ngayo, elinye lawona achumileyo eGalili.a Le ndawo yayibalulekile kumaxesha amandulo kangangokuba umbhali wencwadi yeVangeli uLuka walubiza ulwandle olukufutshane nolunamanzi angenatyuwa ngokuthi ‘lidike laseGenesarete.’—Luka 5:1.

Wasebenzisa elo binzana xa wayebalisa ukuba uYesu wafika kulo mmandla waza wafumana amadoda amane awaba ngabapostile. Ngaba ayengabalimi ababephila ngokulima kulo mhlaba utyebileyo, belima iidiliya, uhlobo oluthile lwamandongomane (walnuts), iziqhamo zomnquma okanye amakhiwane? Akunjalo. Imveliso enjalo yayininzi gqitha kwiThafa laseGenesarete, kodwa la madoda ayengabalobi beentlanzi, ibe kulula ukusiqonda isizathu soko.

Kusenokwenzeka ukuba imifula eyayinqumla kwelo thafa yayithwalela elwandle uhlaza olwalunokuba kukudla ezintlanzini. Ngoko amanzi ayenyakazela ziindidi ngeendidi zeentlanzi, nto leyo eyayibangela ukuba kubekho ushishino olukhulu lweentlanzi. UPetros noAndreya babengabalobi beentlanzi ababengabarhwebi, ngokufanayo noYakobi noYohane, oonyana bomlobi uZebhedi.—Mateyu 4:18-22; Luke 5:2-11.

Ngokufuthi kwakulotywa ngokuvulwa kweminatha esuka emkhombeni. Oko koko uPetros noAndreya babekwenza ukufika kukaYesu kubo. Umnatha omde wokuloba wawuvulwa ube licala lesangqa. Incam engasentla yayibanjwa ngamaplanga awayewubamba ukuze ungatshoni, ngoxa izinto ezibuntsimbi zazibamba umnatha ngasezantsi ukuba ululekele ngakwintsele yolwandle. Ngomnatha onjalo kwakunokubanjiswa iintlanzi ezininzi. Ngoko wawutsalelwa emkhombeni okanye elunxwemeni, ukuze zikhutshelwe kumhlaba owomileyo. Iintlanzi ezifanele ukutyiwa zazisahlulwa kwezo zazingenakutyiwa. Phawula ukuchana kwenkcazelo ekuLuka 5:4-7 nekuYohane 21:6-11. Ngaba uyakhumbula ukuba uYesu wayikhankanya le ndlela yokuloba kumzekeliso wakhe womnatha wokuloba? (Mateyu 13:47, 48) Ukongezelela, uMateyu 4:21 ubalaselisa into yokuba abalobi babedla ngokuchitha ixesha bethunga iminatha ekrazulwe ngamatye okanye ziintlanzi.

Ukuba ubunokuhamba kolu nxweme lwaseGenesarete, ubusenokubona iindawo eziliqela ekuthiwa kulapho iziganeko zobulungiseleli bukaYesu zenzeka khona. Enye yinduli eluhlaza apho, ngokuqhelekileyo, ekuthiwa uYesu wanikela khona iNtshumayelo yakhe yaseNtabeni. Le ndawo ayiphikisani nengxelo yeencwadi zeVangeli, kuba uYesu wayekufuphi neThafa laseGenesarete xa wayenikela loo ntshumayelo.—Mateyu 5:1–7:29; Luke 6:17–7:1.

Enye indawo ekuthiwa kwenzeka kuyo isiganeko esingokwembali ayivumelani neenyaniso zeBhayibhile. Uya kufumana kukho icawa ekuthiwa yakhiwa apho uYesu wondla khona abantu abangama-4 000 ngezonka ezisixhenxe neentlanzi ezimbalwa. (Mateyu 15:32-38; Marko 8:1-9) Kunokuba ithi oku kwakukwiThafa laseGenesarete, ingxelo kaMarko ikhankanya ‘imida yaseDekapoli,’ eyayikumgama ongaphezu kweekhilomitha ezilishumi elinanye ngaphesheya kolwandle.—Marko 7:31.

UMateyu noMarko bathi emva kokuba enze lo mmangaliso, uYesu wahamba ngomkhombe esiya eMagadan, okanye eDalmanuta. (Mateyu 15:39, TE; Marko 8:10) Abaphengululi bawudibanisa lo mmandla neMagadala, esezantsi kweThafa laseGenesarete, ngaseTibheriya. Ngokutsho kweThe Macmillan Bible Atlas, iMagadala “yayidume ngoshishino lwayo lokulungisa iintlanzi ezithengiswayo.” Ubuninzi beentlanzi ezinokulotywa kulo mmandla wedike ngokuqinisekileyo kwakunokubangela ukuba kubekho ushishino olunjalo kwaye lube nengeniso.

Okubangel’ umdla kukuba, imbalela yowe-1985/86 yawuhlisa umlinganiselo wamanzi oLwandle lwaseGalili, iveza ummandla omkhulu okwintsele yeli dike. Kufutshane neThafa laseGenesarete, amadoda amabini afumana iintsalela zomkhombe wamandulo. Abembi bezinto zakudala baye bakwazi ukuwulungisa kwakhona lo mkhombe wokuloba wenziwe ngomthi owawukho ukususela ngexesha uYesu awatyelela ngalo iDike neThafa laseGenesarete.

[Umbhalo osemazantsi]

[Inkcazelo Ngomfanekiso okwiphepha 24]

Pictorial Archive (Near Eastern History) Est.

[Inkcazelo Ngomfanekiso okwiphepha 24]

Pictorial Archive (Near Eastern History) Est.

[Inkcazelo Ngomfanekiso okwiphepha 25]

Garo Nalbandian

[Inkcazelo Ngomfanekiso okwiphepha 25]

Pictorial Archive (Near Eastern History) Est.