Unokuphila Ixesha Elide Kangakanani?
INKOLISO yethu ngokulula iya kuvuma ukuba kukho iingxaki kwindlela yobomi. Sekunjalo, siyavuya kuba siphila. Asaneliswa nje kuphela bubuntwana bethu okanye bubomi obufutshane; singathanda ukuphila iminyaka emininzi. Sekunjalo, ukufa kubonakala kungaphepheki. Ngaba kunjalo?
Ngaba sinako ukukubekela amangomso ukufa? Ngaba ubude bobomi bethu bungandiswa?
Ngaba Ubude Bobomi Bungandiswa?
Ingxelo yeendaba yowe-1990 yathi kunokwenzeka ukwandisa ubude bobomi bomntu bufikelele “kwiminyaka engamashumi amabini aphindwe kahlanu neshumi.” Alithandabuzeki elokuba ngoku yayibhekisela ngokungangqalanga kula mazwi omdumisi weBhayibhile uMoses: “Imihla yeminyaka yethu iyiminyaka engamashumi amabini aphindwe kathathu neshumi; yaye ukuba kungenxa yamandla iba yiminyaka engamashumi amabini aphindwe kane, kanti ingamandla abo okusebenza nosizi; ngokuba iphela ngokukhawuleza, size sibhabhe simke.” (INdumiso 90:10, King James Version) Ngoko iBhayibhile ithi ngama-70 okanye ama-80 umlinganiselo wobude bobomi bomntu. Kodwa mingaphi iminyaka ekunokwenzeka umntu alindele ukuyiphila namhlanje?
Ingxelo eyapapashwa yiWHO (iNtlangano Yehlabathi Yezempilo) ngowe-1992 yathi umlinganiselo wobomi obunokulindelwa emhlabeni wonke yiminyaka engama-65. Ngokutsho kweWHO, oku “kwakulindeleke ukuba kwande ngeenyanga ezine ngonyaka kwiminyaka emihlanu elandelayo, ngokuyintloko ngenxa yokuncitshiswa kokufa kweentsana.” Noko ke, kwanokuba umlingo wezonyango unokukuthintela ukufa kwabo bonke abantu ngaphambi kobudala bama-50 eminyaka, iphephancwadi iTime lithi eUnited States, “ulwando kumlinganiselo wobomi obunokulindelwa uya kuba yiminyaka emithathu enesiqingatha kuphela.”
Kutheni Ubomi Bubufutshane Kangaka?
UGqr. Jan Vijg weInstitute of Experimental Gerontology yaseNetherlands umi ngelithi kanye njengokuba izifo ezithile zinxulunyaniswa neziphene ekwakhiweni kweeseli zomzimba womntu, ngoko inkqubo yokwaluphala ibonakala iphenjelelwa ziigenes. Abanye abaphandi bakholelwa ukuba sinokuphila ixesha elide ngakumbi ukuba “isixa esincinane seegenes eziphambili” sinokuthatyathelw’ indawo zezintsha njengokuba sikhula. Abanye bakugqala oko “njengokungekho ngqiqweni.”
Phofu ke, izazinzulu ziyavuma ukuba “kubonakala kukho uhlobo lommiselo webhayoloji owakhelwe ngaphakathi kwiiseli zomzimba womntu,” litsho njalo iphephancwadi iTime. Kwanabo bathi “simiselwe ukuhlala siphilile” bayavuma ukuba “ukho undonakele.” Eneneni, kwiminyaka engama-65, engama-70, okanye engama-80 okanye embalwa nangakumbi, ubomi bethu ‘bukhawuleza buphelele’ ekufeni, njengokuba iBhayibhile isitsho.
Kanti, umpostile uPawulos ongumKristu wenkulungwane yokuqala yeXesha Eliqhelekileyo ngentembelo wachaza oku kwangaphambili: “Olokugqibela utshaba oluya kubhangiswa kukufa.” (1 Korinte 15:26) Kuya kubhangiswa njani ukufa? Kwanokuba kunjalo, ungahlangabezana njani nokufa kwabathandekayo namhlanje?