Umnqweno Wokuphila Ubomi Obude Unokuphumelela Njani?
ABANYE banethemba lokuba iwaka leminyaka elizayo liya kuba negalelo kwimizamo yabantu yokwandisa ubomi. UGqr. Ronald Klatz ngomnye wabo. Ungumongameli weAmerican Academy of Anti-Aging Medicine, umbutho woogqirha nezazinzulu ezizinikele ekwandiseni ubomi bomntu. Yena namaqabane akhe baceba ukuphila ubomi obude gqitha. UGqr. Klatz uthi: “Ubuncinane ndicinga ukuba ndiya kuphila iminyaka eli-130. Sikholelwa ukuba ukwaluphala asinto ingenakuphepheka. Bukho ngoku ubugcisa obunokunciphisa, bumise buze mhlawumbi buthothise ukwaluphala okukhoyo nezifo ezibizwa ngokuba kukwaluphala kwemvelo.” UGqr. Klatz usela iipilisi ezingama-60 yonke imihla ngenxa yokuba enomnqweno wokuphila ubomi obude.
Ukunyanga Ngencindi Yedlala Nemfuza—Ngaba Zikho Izizathu Zokuba Nethemba?
Ukunyanga ngencindi yedlala yenye into ebangela ithemba. Ukulingwa kwencindi yedlala ebizwa ngokuba yiDHEA kubonakala kunciphisa ukwaluphala kwizilwanyana ezifakwa kwilebhu.
Ngokuphathelele incindi yedlala yezityalo ikinetin, iphephandaba lamihla le laseSweden iAftonbladet lacaphula uGqr. Suresh Rattan, unjingalwazi kwiYunivesithi iAarhus, eDenmark, esithi: “Uvavanyo olwenziwe kwilebhu yethu lubonisa ukuba iiseli zomzimba womntu ezifakwe kwikinetin azaluphali ngendlela eqhelekileyo. Zihlala zintsha ubomi bazo bonke.” Izinambuzane ezinyangwe ngale ncindi yedlala kuthiwa ziphila ixesha elide kuneliqhelekileyo elilinganiselwa kuma-30 ukusa kuma-45 ekhulwini.
Iimpuku ezinyangwe ngemelatonin kuthiwa zihlala ixesha elide elingangama-25 ekhulwini. Ukongezelela, impuku ibonakala isencinane, isempilweni yaye inamandla.
Abo bancomela incindi yedlala elikhula emntwini (human growth hormone [hGH]) bathi iyasinceda isikhumba sibe sihle, yandise izihlunu, yandise amandla esini, ibangele ulonwabo, ubukhali bengqondo, nokudlamka komntu ofikisayo.
Kwakhona abaninzi bakhangela kwimfuza. Izazinzulu ziye zagqiba kwelokuba ngokuphatha ngocoselelo imfuza, banokulawula ubomi obuphilwa yinematode, okanye umsundululu. Enyanisweni, baye baphumelela ekugcineni eminye yayo iphilile ixesha elide ngokuphindwe izihlandlo ezithandathu kunexesha eliqhelekileyo eliphilayo. Oku kuye kwavusa ithemba lokufumana amadlala emfuza anjalo kuze kusetyenziswe wona ebantwini. Iphephancwadi iTime lacaphula uGqr. Siegfried Hekimi weYunivesithi iMcGill, eMontreal, esithi: “Ukuba nje sinokufumana onke amadlala omntu emfuza alawula ubudala, mhlawumbi sisenokuwathothisa nje kancinane, ukuze sandise ubomi.”
Izazi ngebhayoloji kudala zisazi ukuba incam yemisontwana yeeseli, ebizwa ngokuba yitelomere, iya isiba mfutshane lonke ixesha xa kukho iseli eyenziwayo. Xa itelomere isiba mfutshane ngama-20 ekhulwini, amandla eseli okwenza enye ayaphela yaye iyafa. Idlala elithile elibizwa ngokuba yitelomerase linokubuyisela itelomere kubude bayo ngokupheleleyo, ngaloo ndlela ivumela iseli ukuba iqhubeke ivelisa enye. Kwinkoliso yeeseli eli dlala liqotywa amandla lize lingasebenzi, kodwa itelomerase ephilileyo iye yafakwa ngokunempumelelo kwiiseli ezithile, izenza zikhule zize zivelise ezinye ezingaphezulu lee kwinani eliqhelekileyo.
Ngokutsho kwabaphandi, oku kuvelisa ithuba elibangel’ umdla lokulwa izifo ezinxulumene nokwaluphala. Kuthekani ngokuba iiseli zomzimba zithatyathelw’ indawo zezinye (iiseli ezihlaziya izicwili zomzimba) nezinye ezomeleleyo eziye zenziwa “azabi nakufa” ngenxa yetelomerase? UGqr. William A. Haseltine uthi: “Le yingcamango eqondwa kakuhle yokungafi komntu eza kusetyenziswa ngokuthe ngcembe kwiminyaka engama-50 ezayo.”—The New York Times.
Ngaba Ubugcisa Bezinto Ezincinane Nokukhenkciswa Kwemizimba Kusisicombululo?
Ubugcisa bezinto ezincinane (nanotechnology), yinzululwazi yobunjineli ekusetyenziswa kuyo umlinganiselo wenanometer (isahlulo sewaka lezigidi seemitha), nako kunika ithemba elingakumbi. Iinkcuba-buchopho ngalo mbandela zithi oomatshini bekhompyutha, abancinane gqitha kuneeseli, kwixa elizayo basenokwenziwa basebenze kwimolekyuli ukulungisa nokuhlaziya iiseli ezaluphalayo, izicwili namalungu omzimba. Kwingqungquthela ekwakuxutyushwa kuyo ngokulwa nokwaluphala, omnye umphengululi wathi oogqirha benkulungwane yama-21 basenokusebenzisa le nkqubo yobugcisa bezinto ezincinane ukunceda abantu ukuba baphile ubomi obungenasiphelo.
Icryonics luqheliselo lokukhenkcisa imizimba yabantu ngethemba lokuba inzululwazi iza kukwazi ukunyanga iiseli ezifileyo, ngaloo ndlela ziphile kwakhona. Umzimba wonke, okanye ubuchopho, bunokukhenkciswa. Enye indoda yade yakhenkcisa ishiti lomandlalo. Kwakutheni ukuze ikhenkcise ishiti? Yayilelomhlobo owalahlekayo yaye lalineeseli zolusu neenwele ezimbalwa. Yayifuna zihlale zikhenkcekile ukuze umhlobo wayo afumane ithuba lokuphila kwakhona ukuba inzululwazi ifikelela kwinqanaba lokuphinda yenze abantu kwizinto nje ezimbalwa okanye kwenye yeeseli zabo.
Sifanele Sithembele Phi?
Umntu unomnqweno wemvelo wokuphila, kungekhona owokufa. Ngoko ke, inkqubela yeenzululwazi kulo mbandela yothulelw’ umnqwazi yaye abantu balindele lukhulu kuyo. Kodwa ukuza kuthi ga ngoku akukho bungqina bubambekayo bokuba iDHEA, ikinetin, imelatonin, ihGH, okanye nayo nayiphi na enye into inokubambezela ukwaluphala ebantwini. Abo bathandabuzayo boyikela ukuba ukuphazamisana netelomerase ekwiseli kusenokukhulisa iiseli zomhlaza. Yaye ukusetyenziswa kobugcisa bezinto ezincinane nokukhenkceziswa kwemizimba kuseyintsomi.
Inzululwazi iye yanegalelo nayo, yaye isenokuba nalo ngakumbi, kubomi obude nobusempilweni kwabathile, kodwa ayinakuze ikwazi ukunika nabani na ubomi obungunaphakade. Ngoba? Ngamazwi nje alula, kungenxa yokuba isizekabani sokwaluphala nokufa asikho kumandla enzululwazi yabantu.
Isizekabani Sokwaluphala Nokufa
Inkoliso yezazinzulu ziyavuma ukuba ukwaluphala nokufa kubonakala ngathi kwendele kwimizila yethu yemfuza. Umbuzo ngulo: Kwangena nini, njani yaye kwakutheni ukuze kungene kwimizila yethu yemfuza ngokungathi kunjalo?
IBhayibhile isinika impendulo elula—nangona ingakuchazi njengemizila yemfuza okanye iDNA. EyabaseRoma 5:12 ifundeka ngolu hlobo: “Ngenxa yoko, kanye njengokuba isono sangena ngamntu mnye ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.”
Umntu wokuqala, uAdam, wayenethemba lokuphila ngonaphakade. Umzimba wakhe wawenziwe wanamandla afanelekileyo okuphila nokunandipha ubomi obungunaphakade. Noko ke, ubomi obungunaphakade babunemiqathango. Kwakufuneka uAdam asebenzisane aze athobele uMthombo wobomi, uMdali wakhe, ukuze akwazi ukuphila ngonaphakade.—Genesis 1:31; 2:15-17.
UAdam wakhetha ukungamthobeli uMdali. Enyanisweni, uAdam wema ngelithi kwakuya kuba bhetele ukuzilawula ngaphandle koThixo. Ngaloo ndlela wona. Ukususela ngelo xesha ukusa phambili, kwakufana nokungathi umzila wakhe wemfuza wawuguqukile. Kunokuba adlulisele ubomi obungunaphakade njengelifa kwinzala yakhe, uAdam wadlulisela isono nokufa.—Genesis 3:6, 19; Roma 6:23.
Ithemba Eliqinisekileyo
Noko ke, izinto zazingayi kuhlala zinjalo ngonaphakade. EyabaseRoma 8:20 ithi: “Kuba indalo yathotyelwa kokuphuthileyo, kungengakuthanda kwayo kodwa ngalowo wayithobelayo, ngesizinzi sethemba.” UMdali womntu, uYehova uThixo, wathobela uluntu ekufeni ngenxa yokuba lwamona, kodwa xa wayesenza oku wenza nesizinzi sethemba.
Esi sizinzi sachazwa ngokucacileyo xa uYesu Kristu weza emhlabeni. UYohane 3:16 uthi: “Kuba uThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani oqhelisela ukholo kuye angatshabalali kodwa abe nobomi obungunaphakade.” Ngoko ke, ukuqhelisela ukholo kuYesu Kristu kunokusisindisa njani ekufeni?
Ukuba unobangela wokufa sisono, isono simele sisuswe ngaphambi kokuba ukufa kupheliswe. Ekuqaleni kobulungiseleli bukaYesu njengoKristu, uYohane uMbhaptizi wathi: “Yabonani, iMvana kaThixo esusa isono sehlabathi!” (Yohane 1:29) UYesu Kristu wayengenasono kwaphela. Ngenxa yoko, kwakunganyanzelekanga ukuba afe, nto leyo engumvuzo wesono. Noko ke, wavumela abanye ukuba bambulale. Ngoba? Ngenxa yokuba ngokwenjenjalo, wahlawula ixabiso lezono zethu.—Mateyu 20:28; 1 Petros 3:18.
Ngenxa yokuba kwahlawulwa elo xabiso, kwavuleleka ithuba lokuphila ngaphandle kokufa kubo bonke abo babeqhelisela ukholo kuYesu. Inzululwazi inokuba negalelo ekwandiseni ubomi bethu ngomlinganiselo omncinane gqitha, kodwa ukuqhelisela ukholo kuYesu yeyona ndlela ikhokelela kubomi obungenasiphelo. UYesu wabufumana ubomi obunjalo ezulwini, yaye abapostile bakhe abathembekileyo nabathile baya kubufumana nabo. Ukanti, inkoliso yethu eqhelisela ukholo kuYesu, iya kubufumana emhlabeni ubomi obungunaphakade, xa uYehova uThixo ebuyisele umhlaba oyiParadesi.—Isaya 25:8; 1 Korinte 15:48, 49; 2 Korinte 5:1.
Ubomi Obungunaphakade KwiParadesi Esemhlabeni
Enye indoda yabuza: “Bangaphi abantu abaya kukuxabisa ukuphila xa bengasayi kuphinde bafe?” Ngaba ubomi xa ubani engasayi kuphinde afe buya kukruqula? IBhayibhile iyasiqinisekisa ukuba akusayi kuba njalo. “Zonke izinto uzenze zantle ngexesha lazo; kwanephakade ulinikele ezintliziyweni zabo ngohlobo lokuba umntu angasifumani isenzo asenzayo uThixo, athabathele ekuqaleni ade ase ekupheleni.” (INtshumayeli 3:11) Ininzi gqitha into uYehova uThixo ayidalileyo yaye intsonkothile kangangokuba iya kuqhubeka isimangalisa, isichukumisa, ize isenze sonwabe lo gama nje sisaphila—kwanangonaphakade.
Enye indoda eyafunda ngentaka ekuthiwa yiSiberian Jay yayichaza “njengomhlobo ongaqhelekanga nochwayitisayo” yaye yathi ukuqwalasela intaka enjalo yayiyenye yezona zinto zonwabisayo ebomini bakhe. Okukhona efunda ngale ntaka, kokukhona wabona indlela emangalisa ngayo. Wathi nasemva kweminyaka eli-18, kwakuse kukude ukuba agqibe ukufunda ngayo. Ukuba uhlobo olunye nje lwentaka lunokumangalisa, luchukumise, luze lugcine indoda ekrelekrele yonwabile ebudeni beminyaka eli-18 yofundisiso, khawufan’ ucinge ulwaneliseko novuyo olusenokubakho ngokufundisisa ngayo yonke indalo esemhlabeni.
Zenzele umfanekiso-ngqondweni wazo zonke iinkalo zenzululwazi eziya kufumaneka kumntu ongasikelwanga mda lixesha. Cinga ngazo zonke iindawo ezichulumancisayo oya kuzibona nabo bonke abantu ababangel’ umdla oya kubabona apho. Zama ukucingisisa ngezinto ezingapheliyo onokuba nomfanekiso wazo, uziyile uze uzakhe. Siya kuba namathuba angaphele ndawo okwenza izinto esizithandayo. Xa sicinga ngobuninzi bezinto zendalo, kuyacaca ukuba unaphakade kuphela kwendlela elinokuchazwa ngayo ixesha elifunekayo ukuze sibone zonke izinto esinokuzenza ebomini.
IBhayibhile ibonisa ukuba ngovuko, ukuphila ngonaphakade kuya kudluliselwa nakwabo bafileyo. (Yohane 5:28, 29) Uninzi lwezinto ezingaziwayo embalini lusenokucaca kuthi xa abo bajamelana nazo bezalisekisa iinkcukacha neempendulo kwimibuzo yethu. Cinga ngabo bonke ubulumko bamaxesha ahlukahlukeneyo embali esiya kubufumana kwabo bavusiweyo.—IZenzo 24:15.
Xa ucinga ngelo xesha, usenokuqonda ukuba uYobhi ovusiweyo usenokufuna ukuwaguqula amazwi afumaneka kuYobhi 14:1. Mhlawumbi usenokufuna ukuthi: ‘Umntu, into ezelwe ngumfazi, ngoku uphila ubomi obungunaphakade yaye uzele lulwaneliseko.’
Kwabo bathembela kuYehova baze baqhelisele ukholo kuYesu, ukuphila ubomi obude bengasikelwe mda asilophupha nje. Kungekudala loo nto iza kwenzeka ngokoqobo. Kuya kuphela ukwaluphala nokufa. Oku kuvisisana neNdumiso 68:20, ethi: “Yena uThixo kuthi nguThixo wosindiso, kokukaYehova, iNkosi yethu, ukukhupha ekufeni.”—ISityhilelo 21:3, 4.
[Imifanekiso ekwiphepha 4, 5]
Inkqubela yenzululwazi iye yabangela kwakho ithemba elingakumbi lokuphila ixesha elide
[Umfanekiso okwiphepha 7]
Unaphakade kuphela kwendlela elinokuchazwa ngayo ixesha elifunekayo ukuze sibone zonke izinto esinokuzenza ebomini