Imibuzo Evela Kubafundi
Ekubeni umbingeleli wamandulo uMelkitsedeke wayengumntu wokwenene, kutheni iBhayibhile isithi ‘wayengenamlibo wakuzalwa’?
Le ngxelo ikumaHebhere 7:3. Khawuphawule umongo wale ndinyana:
“Kuba lo Melkitsedeke, kumkani weSalem, mbingeleli kaThixo Osenyangweni, wahlangabezanayo noAbraham, ebuya evela ekubulaleni ookumkani, wamsikelela; awathi uAbraham wamabela nesishumi sezinto zonke (esithi okunene, ukuqala ukuthetha ngentetho evakalayo, ngukumkani wobulungisa, kodwa kamva abe nangukumkani weSalem, oko kukuthi, ngukumkani woxolo; engenayise, engenanina, engenamlibo wakuzalwa, engenasiqalo samihla, engenasiphelo sabomi, enziwe wafana naye uNyana kaThixo): lo uhleli engumbingeleli ngokungapheliyo.”—Hebhere 7:1-3.
Njengoko sele kukhankanyiwe, uMelkitsedeke wayengumntu wokwenene, ngokufanayo noAbraham, owayeqhubana naye ngokungqalileyo. (Genesis 14:17-20; Hebhere 7:4-10) Ekubeni oku kunjalo, uMelkitsedeke umele ukuba wayenabo abazali, uyise nonina yaye kusenokwenzeka ukuba wayenabo nabantwana. Ngenxa yoko, njengomntu wayenawo umlibo wokuzalwa, okanye umnombo. Kwakhona ubomi bakhe baba nesiphelo. Ngathuba lithile uMelkitsedeke wafa, ngokuvisisana nengxelo yompostile uPawulos ekweyabaseRoma 5:12, 14. Kodwa ekubeni singawazi umhla wokufa kukaMelkitsedeke nowokuyeka kwakhe ukukhonza njengombingeleli, ngenxa yoko wakhonza ixesha elinesiphelo esingaziwa mntu.
KumaHebhere, uPawulos wagqabaza ngoMelkitsedeke xa wayexubusha ngendima kaYesu Kristu njengoMbingeleli Omkhulu nowongamileyo. Ebhekisela kuMelkitsedeke njengomzekelo kaYesu kule ndima yakhe yokuba ngumbingeleli, uPawulos wathi: “UYesu . . . ethe ngokohlobo lukaMelkitsedeke, waba ngumbingeleli omkhulu osa ephakadeni.” (Hebhere 6:20) Ngayiphi ingqiqo?
Kumele ukuba uPawulos wayeqonda ukuba ingxelo yeBhayibhile ayinikeli nkcukacha ngomnombo wentsapho kaMelkitsedeke—ookhokho bakhe okanye nabaphi na abantwana asenokuba wayenabo. Kuphela loo nkcazelo ayifumaneki kwingxelo yeBhayibhile. Ngoko ke, ukususela koko uPawulos wayekwazi okanye koko sikwaziyo, ngokuchanileyo kunokubhekiselwa kuMelkitsedeke ‘njengongenamlibo wakuzalwa’ (New World Translation of the Holy Scriptures; American Standard Version), ‘ongenamnombo wakuzalwa’ (W. J. Conybeare), okanye ‘ongenamnombo.’—J. B. Phillips.
Kungayiphi indlela uYesu afana ngayo naye? Siyavuma ukuba, siyazi ukuba uYise kaYesu wayenguYehova uThixo nokuba unina ongumntu yayinguMariya wohlanga lwakwaYuda. Sekunjalo, kwakukho izinto ababefana ngazo uMelkitsedeke noYesu. Kutheni sisitsho nje? UYesu wayengazalelwanga kuhlanga lwakwaLevi, uhlanga lwababingeleli besizwe sakwaSirayeli. Ewe, uYesu akazange abe ngumbingeleli ngokusuka kumlibo womntu wokuzalwa. Ngokufanayo noMelkitsedeke, owayengengombingeleli ‘omiswe ngokomyalelo womthetho ongowenyama,’ oko kukuthi, omiswe kuba ezelwe kuhlanga nentsapho yababingeleli. (Hebhere 7:15, 16) Kunokuba abe ngumbingeleli kuba uyise ongumntu wayengumbingeleli, uYesu ‘ubizwe nguThixo, ukuba abe ngumbingeleli omkhulu ngokohlobo lukaMelkitsedeke.’—Hebhere 5:10.
Ngokubhekele phaya, uYesu akazange abe nanzala okanye amalandela kububingeleli bakhe. Kwakhona ngokwale ngqiqo, wayengenamlibo wokuzalwa. Uya kuyiphumeza ngonaphakade inkonzo yakhe yobubingeleli njengomyaleli ozisa iingenelo. Ethetha ngale nkonzo ingenasiphelo, uPawulos uthi:
“[UYesu] ngenxa yokuba ehleli ngonaphakade, unobubingeleli obungenakudlula. Ngoko unako nokubasindisa kanye abo bezayo ngaye kuThixo, ehlala ehleli nje ukuba abathethelele.”—Hebhere 7:24, 25.
Indlela esiwaqonda ngayo amazwi kaPawulos akumaHebhere 7:3 ayimele ibe yinto engenamsebenzi nelibaleka nje lula. Imele ilomeleze uxabiso esinalo ngelungiselelo lothando uYehova uThixo asenzele lona ukuze isono sethu sixolelwe ngonaphakade nangenxa yendlela asilungiselele yona ukuze sizuze uncedo nokhokelo olungenasiphelo.