Incopho Ezayo ‘Yencwadi Yeemfazwe ZikaYehova’
“Kuthiwa encwadini yeemfazwe zikaYehova.”—NUMERI 21:14.
1, 2. Kungasiphi isihlandlo samandulo awathi uYehova wawabonisa amaYiputa ukuba wayenguThixo ongumphumi-mkhosi, ibe wakwenza njani?
ABANTU banamhla bayixabisa kancinane into yokuba uThixo weBhayibhile, uYehova, ungumphumi-mkhosi, indoda elwayo. Le nyaniso yabonakaliswa xa wakhulula abantu bakhe bamaxesha amandulo kwingcinezelo yaseYiputa. UFaro wayephenjelelwe lutshaba olungabonakaliyo lwabo bantu, uSathana uMtyholi, ukuba azame ukubasebenzisa bade bafe. Ngoku, eqonda oko wayephulukana nako ngokuvumela amaSirayeli ukuba ahambe ngokukhululekileyo, uFaro nemikhosi yakhe bawasukela.
2 Noko ke, uFaro akazange aqonde ukuba uThixo wamaSirayeli wayenokuba nguThixo ongumphumi-mkhosi ukuze ahlangule abantu Bakhe. Njengoko loo mikhosi yamaYiputa yayihamba kwintsele eyomileyo yoLwandle Olubomvu isukela inomoya wokuziphindezela, uThixo wamaSirayeli awayesengozini wenza isenzo esithile waza wabarhaxisa elwandle abaqhubi beenqwelo zokulwa nabamahashe ebangela ukuba iimfumba zamanzi zidilikele phezu kwaloo ndlela yokusaba yayivulelwe amaSirayeli ngokungummangaliso.—Eksodus 14:14, 24-28.
3. Kwingoma yawo yoloyiso, amaSirayeli amchaza uYehova njengoThixo onjani, kodwa yiyiphi inyaniso iintlanga zanamhlanje eziyityeshe- layo?
3 Enqabisekile kunxweme olungasempuma loLwandle Olubomvu, amaSirayeli awayezaliswe yimincili avuma ingoma yoloyiso, ezukisa uMhlanguli wawo wasezulwini esithi: “Ndiya kuhlabela kuYehova, kuba enobungangamsha obukhulu, ihashe nomkhweli walo ulizulumbele elwandle. Uqhayiya lam, ungoma yam nguYehova; waba lusindiso kum. UloThixo wam endimzukisayo, uThixo kabawo endimphakamisayo. UYehova yindoda elwayo, uYehova ligama lakhe. Iinqwelo zokulwa zikaFaro nempi yakhe waziphosa elwandle; abahleliweyo kubaphathi-mikhosi bakhe batshoniswe eLwandle oluBomvu.” (Eksodus 15:1-4) Apho kuLwandle Olubomvu, uYehova wazibonakalisa njengomphumi-mkhosi onako ukwenza imisebenzi ekhwankqisayo. Le nyaniso iye yatyeshelwa ziintlanga zehlabathi.
4, 5. Ezo zizwe zichwayitileyo zili-12 zakwaSirayeli zaphuma kuwuphi ukhokho omnye, yaye lowo waba ngumhlobo kabani ngenxa yaluphi uphawu?
4 Umprofeti uMoses, owakhokelayo ekuvunyweni kwalo ngoma iphefumlelweyo, wabhekisela kuYehova ngokuthi “uThixo kabawo.” UAbraham ongumHebhere wayenguyisemkhulu obalaseleyo wohlanga lwakwaSirayeli. Ukususela kuye, ukuya kuIsake noYakobi noonyana abali-12 bakaYakobi, kwaphuma izizwe ezili-12 zakwaSirayeli. UAbraham wazingqina engumnquli ongumzekelo kaYehova uThixo. Wayeyindoda yokholo olwalomelele ngolo hlobo kangangokuba xa uYehova wathi kuye makashiye ikhaya lakhe eliseUre yamaKhaledi, ngokungathandabuziyo waya kwilizwe uYehova awayeza kumbonisa lona, enentembelo yokuba uThixo wayeya kulizalisekisa idinga Lakhe lokulinika yena nenzala yakhe.
5 Ngenxa yokholo olubalaseleyo lukaAbraham, uYehova wathembisa ukunika uAbraham “imbewu”, okanye inzala, ekwakuya kuthi ngayo zonke iintsapho zomhlaba, kuquka iintsapho zanamhlanje, zizisikelele. (Genesis 12:2, 3; 22:17, 18) UAbraham wangeniswa kolo lwalamano lusenyongweni noThixo wakhe kangangokuba wayebizwa ngokuba “sisihlobo sikaThixo,” uThixo ngokwakhe embiza lo solusapho uthembekileyo ngokuthi “mhlobo wam.”—Yakobi 2:23; Isaya 41:8, NW.
6. Nangona wayengumhambahambi othand’ uxolo kwiLizwe Ledinga, uAbraham wazingqina njani ukuba ungumlwi othembele ngoYehova?
6 Nangona wayehambahamba njengomphambukeli kwiLizwe Ledinga, uAbraham wakungqina ukuba wayenako ukulwa, ukuba ngumphumi-mkhosi. Ngesinye isihlandlo ookumkani abane abavela ngaphandle bahlasela iLizwe Ledinga baza bathimba umtshana ka-Abraham uLote nentsapho kaLote. UAbraham, eshukunyiswe ngamaqhina awomeleleyo entsapho, waxhobisa izicaka zakhe ezingamadoda ezingama-318, ibe encediswa yimikhosi yamaqabane akhe amathathu asekuhlaleni, uAnere, uEshkoli noMamre, wabasukela aba bahlaseli. Ebahlasela ngequbuliso ebusuku, uAbraham neqela lakhe waboyisa abahlaseli, nakubeni babenomkhosi omkhulu gqitha. Kwabakho ‘ukubulawa kookumkani.’ (Hebhere 7:1; Genesis 14:13-17) UAbraham wamhlangula uLote nentsapho yakhe waza wakufumana konke oko kwakubiwe.
7-9. (a) Ngubani umbingeleli awamtyelelayo uAbraham, ibe yiyiphi intsikelelo awayifumanayo? (b) UAbraham wakubonisa njani ukuba wayefuna ukwenziwa isityebi kuphela nguThixo Osenyangweni? (c) Njengoko kwathi kwangqinwa nguMelkitsedeke, ngubani owanika uAbraham uloyiso lwasemkhosini?
7 UAbraham wayiqonda into yokuba ukulwa kwakhe kwangqineka kunempumelelo kuphela ngoncedo lukaYehova uThixo, ibe kuhambo lwakhe loloyiso ebuyela ekhaya, wenza uvumo lwasekuhleni ngeso sibakala. Wayesazi ukuba umbingeleli akholiswayo nguye uThixo wayeza kufunyanwa kwisixeko saseSalem. Ngoko wamatsha esiya kweso sixeko. Inxalenye yokugqibela yeGenesis isahluko 14 isixelela oko kwathi kwenzeka emva koko:
8 “UMelkitsedeke, ukumkani waseSalem, waphuma enesonka newayini; ubengumbingeleli kaThixo Osenyangweni. Wamsikelela wathi, Makasikelelwe uAbram nguThixo Osenyangweni, uMninimazulu nehlabathi! Makabongwe uThixo Osenyangweni obanikeleyo ababandezeli bakho esandleni sakho. UAbram wamnika isishumi seento zonke. Wathi ukumkani waseSodom, kuAbram, Ndinike abantu, uthabathe impahla. Wathi uAbram kukumkani waseSodom, Isandla sam ndisiphakamisele kuYehova uThixo Osenyangweni, uMninimazulu nehlabathi, ukuba andiyi kuthabatha nosinga, nokuba ngumtya wembadada, ukuba andiyi kuthabatha kuko konke okwakho; ukuze ungatsho ukuthi, Mna ndimtyebisile uAbram. Makungabikho nto iyeyam, kuphela ibe yile nto idliweyo ngabafana, nesabelo samadoda abehamba nam, uAnere, noEshkoli, noMamre; wona makasithabathe isabelo sawo.”—Genesis 14:18-24.
9 Njengoko ezi ndinyana zibonisa, uMelkitsedeke, umbingeleli wasebukhosini wesixeko saseSalem, wakungqinela ukweyiseka kuka-Abraham kokuba yayinguThixo Osenyangweni owamlwelayo yena nemikhosi yakhe waza wamnika uloyiso. UKumkani onguMbingeleli uMelkitsedeke akazange ayijongele phantsi inxaxheba awaba nayo uYehova kulo mcimbi.
Incwadi Yeemfazwe ZikaYehova
10. Kuphi apho imfazwe ikhankanywa khona okokuqala eBhayibhileni, ibe kutheni yayikukuqalisa nje kweemfazwe zoloyiso zikaYehova?
10 Inkcazelo ekwiGenesis 14 engokuhlaselwa kweLizwe Ledinga nengokoyisa kuka-Abraham abahlaseli abaxhobileyo ikukukhankanywa okokuqala kwemfazwe kwiZibhalo Ezingcwele. Ngaloo ndlela, ngaphezu kweenkulungwane ezine ngaphambi kwesenzo sobukroti awasenza kuLwandle Olubomvu, uYehova wazibonakalisa njengomphumi-mkhosi, “indoda elwayo.” Ukanti, eso yayisisiqalo nje kuphela. Uloyiso olukhulu ngakumbi noluzukileyo lwaluza kulandela, kuquka olokugqibela ‘ekuqoshelisweni kwenkqubo yezinto.’—Mateyu 24:3, NW.
11. Iyintoni “incwadi yeeMfazwe zikaYehova,” kodwa zichazwe phi ezinye iingxelo ezininzi zemisebenzi yakhe ebalulekileyo yeemfazwe?
11 Ngokwamazwi akwiNumeri 21:14, ‘incwadi yeeMfazwe zikaYehova’ yabhalwa. Le ngxelo, okanye imbali ethembekileyo, engeemfazwe uThixo azilwela abantu bakhe, mhlawumbi yaqala ngeli dabi alilwela uAbraham othembekileyo. UMoses wayeyazi le ncwadi kodwa akanikeli zinkcukacha zibhekele phaya ngayo. Ngenxa yoko, asixelelwanga ngazo zonke iindlela uYehova awazibonakalisa ngazo engumphumi-mkhosi ebudeni bexesha eligutyungelwe yiloo ncwadi yeeMfazwe zikaYehova. Noko ke, ukususela ekukhankanyweni kwaloo ncwadi, inxalenye ephambili yeZibhalo Ezingcwele yabhalwa, yaye oku kunikela iingxelo ezininzi zemisebenzi ebalulekileyo yeemfazwe zikaYehova.
UMelkitsedeke Omkhulu—Umphumi-mkhosi
12. UMelkitsedeke wafanekisela liphi iGosa elikhulu loThixo Osenyangweni, ibe yiyiphi indumiso eyaqanjwa nguDavide ebhekiswa kulowo njengombingeleli nomphumi-mkhosi?
12 Emva kokuba uAbraham oyise uKedorlahomere nookumkani awayemanyene nabo, uMelkitsedeke wamsikelela. UKumkani onguMbingeleli uMelkitsedeke ngokwesiprofeto wafanekisela Lowo wayeya kuba nguMbingeleli Omkhulu woThixo Osenyangweni kwanomphumi-mkhosi olikroti oxhaswa nguThixo Ophakamileyo. INdumiso 110, eyaqanjwa phantsi kwempefumlelo nguKumkani uDavide owayengumphumi-mkhosi, ibhekiswa kuLowo umkhulu kunoMelkitsedeke waseSalem xa isithi: “Intonga yamandla akho uya kuyithumela uYehova, ivela eZiyon, esithi, Yiba nobukhosi phakathi kweentshaba zakho. Ufungile uYehova, akayi kuzohlwaya; uthe, Ungumbingeleli ngonaphakade wena ngokohlobo lukaMelkitsedeke. INkosi ngasekunene kwakho iya kuphalusa ookumkani ngemini yomsindo wayo.”—INdumiso 110:2, 4, 5.
13. KumaHebhere isahluko 7 nese-8, Lowo mkhulu kunoMelkitsedeke wamandulo uchazwa engubani, ibe yiyiphi indawo ephakamileyo Lo awangena kuyo yaye wayephethe uhlobo olunjani lwedini?
13 Umbhali ophefumlelweyo wencwadi yamaHebhere wachaza ukuba ngubani na Lowo ngokwenene kwakubhekiswa kuye loo mazwi xa wathi: “Apho umanduleli uYesu wangena khona ngenxa yethu, ethe, ngokohlobo lukaMelkitsedeke, waba ngumbingeleli omkhulu osa ephakadeni.” (Hebhere 6:20) Kwisahluko esilandelayo samaHebhere, ubukhulu bukaMelkitsedeke wamandulo bucacisiwe. Sekunjalo, ubukhulu bakhe njengombingeleli buyagqweswa bobaLowo awamfanekisela kwangaphambili, uYesu Kristu ovusiweyo nozukisiweyo, owangena kubukho obungcwele bukaYehova uThixo enexabiso ledini elizuke ngaphezulu lee kunayo nantoni na uKumkani onguMbingeleli uMelkitsedeke waseSalem awayenokuyinikela.—Hebhere 7:1–8:2.
14. Ngaba uMelkitsedeke Omkhulu uye wagunyazisa abefundisi beNgqobhoko ukuba babe nesabelo kumaphulo emfazwe eentlanga ekuthiwa zezobuKristu?
14 Umbingeleli wasebukhosini uMelkitsedeke wamsikelela umphumi-mkhosi, uAbraham owoyisileyo. Kodwa kuthekani ngoMelkitsedeke Omkhulu, uMseki wobuKristu bokwenyaniso? Abefundisi beNgqobhoko bazibanga bemela uYesu Kristu ekusikeleleni imikhosi yeentlanga ekuthiwa zezobuKristu nasekuyithandazeleni. Kodwa ngaba uMbingeleli Ophakamileyo kaYehova osezulwini uye wabaxhasa abefundisi beNgqobhoko koku? Ngaloo ndlela ngaba uye wakuvuma ukubekek’ ityala ngenxa yako konke ukuphalazwa kwegazi okuye kwaqhubeka ebudeni beXesha elalibizwa ngokuba lelobuKristu, kuquka igazi elaphalazwa ebudeni beMfazwe Yehlabathi I neye-II? Ngokuqinisekileyo akunjalo! Akazange nangaliphi na ixesha agunyazise abafundi bakhe bokwenyaniso ukuba bazenze inxalenye yeli hlabathi baze bathelele kwinkqubo yalo yezomkhosi yokuphalaza igazi.
UThixo Ongumphumi-mkhosi Uzenzela Igama Elihle
15, 16. UYehova wazenzela ntoni xa wathi walwela ukuhlangula abantu bakhe eYiputa?
15 UNehemiya 9:10 ubhekisela ekuhlanguleni kukaYehova izizwe ezili-12 zakwaSirayeli eYiputa, esithi: “Wenza imiqondiso nezimanga kuFaro, nakubakhonzi bakhe bonke, nakubantu bonke belizwe lakhe, ngokuba ubusazi ukuba baye bebakhukhumalele [amaSirayeli]; wazenzela igama njengoko kunjalo nanamhla.”—Thelekisa iEksodus 14:18.
16 Umprofeti uIsaya ubhekisela kuhlobo lweli gama xa ethetha ngoYehova ‘njengaLowo wayihambisa ngasekunene kukaMoses ingalo yokuhomba kwakhe; Lowo wawacanda amanzi phambi kwakhe ukuze azenzele igama elizukileyo.’ Yaye ebhekisa kuYehova, uthi: “Wenjenjalo ukubaqhuba abantu bakho, ukuze uzenzele igama elizukileyo.” (Isaya 63:12-14) Ebhenela kuYehova ukuba enze isenzo kwakhona ngenxa yabantu bakhe, uDaniyeli wabhekisela kuye ngokuthi “owabakhuphayo abantu bakho ezweni laseYiputa ngesandla esithe nkqi, wazenzela igama, njengoko kunjalo namhla.”—Daniyeli 9:15; Yeremiya 32:20.
17. UYehova uya kuthumela bani ukuza kulwela igama lakhe, ibe ngaloo ndlela uya kuzibonisa ntoni iintlanga zonke namhlanje?
17 Ngexesha elifanelekileyo, uYehova uThixo uya kuthumela uYesu Kristu, uMelkitsedeke Omkhulu, njengomphumi-mkhosi okhaliphileyo. Ngaye, uYehova uya kuzenzela igama eligqwesa nantoni na yangaphambili njengoko kuchazwe kwincwadi yeeMfazwe zikaYehova okanye kwiZibhalo zesiHebhere zeZibhalo Ezingcwele. Kwisahluko sokugqibela sencwadi yesibini ukusuka ekugqibeleni kwiZibhalo zesiHebhere, ukuhlaselwa kweYerusalem zintlanga ngeentlanga kuxelwe ngenx’ engaphambili. Ngoko, ngokukaZekariya 14:3, “Uya kuphuma ke uYehova, alwe nezo ntlanga, njengemini yokulwa kwakhe.” Ngale ndlela uThixo weBhayibhile uya kuzibonisa zonke iintlanga zanamhla ukuba usenguThixo ongumphumi-mkhosi awayenguye kumaxesha oSirayeli wamandulo.
18, 19. Yiyiphi iYerusalem eya kuba lixhoba lokuhlaselwa ngokupheleleyo ziintlanga?
18 Eli lithemba elisengaphambi kwethu. Kodwa yiyiphi iYerusalem eya kuva ukuhlaselwa ngokupheleleyo okulolo hlobo? Esi siprofeto asizange sizaliseke phezu kweYerusalem yomhla kaZekariya. Eso sixeko satshatyalaliswa yimikhosi yaseRoma ngowama-70 C.E. Noko ke, iYerusalem yakhiwa kwakhona, ibe namhlanje ijongwa njengengcwele yiNgqobhoko kwanaluhlanga lukaSirayeli wokwenyama. Kwimfazwe yowe-1967 eyathabatha iintsuku ezintandathu, uSirayeli wokwenyama wayithabathela kuye yonke iYerusalem yasemhlabeni eyakhiweyo kwakhona. Noko ke, akukho nentwana yobungqina bokuba uYehova uThixo wayenayo nayiphi na inxaxheba kumlo owawuqhubeka ngoko. UKumkani wakhe obekwe etroneni, uYesu Kristu, akalawuli kwiYerusalem yasemhlabeni, yaye ayisenguwo “umzi woKumkani omkhulu,” oko kukuthi, kaYehova.—Mateyu 5:35.
19 Esi sixeko silikomkhulu soburhulumente bamaYuda obulilungu leZizwe Ezimanyeneyo asiyiyo iYerusalem ekhankanywe kwisiprofeto sikaZekariya. Kunoko, uZekariya ubhekisela kwiYerusalem esifunda ngayo kwincwadi yamaHebhere. Apho, uPawulos ubhekisa kumaKristu athanjisiweyo aze athi: “Nisuke nina nafika eZiyon, entabeni nasemzini woThixo ophilileyo, kwiYerusalem yasemazulwini, nakumawakawaka ezithunywa zezulu.” (Hebhere 12:22) Le Yerusalem yasezulwini ibuBukumkani bukaThixo obungoMesiya, obumelwe emhlabeni namhlanje liqela elincinane lamaKristu athanjisiweyo anethemba lokuba ngabalawuli kunye noYesu Kristu kobo Bukumkani. Aba baya kuba ngamaxhoba entlaselo ekwaprofetwa ngayo.
20. Ngawaphi amazwi uKumkani uHezekiya awawathethayo ukomeleza abantu bakhe ababesongelwa, yaye kukumazwi awuphi uKumkani omkhulu kunoHezekiya amaNgqina kaYehova athi ayame kuwo namhlanje?
20 Noko ke, aba nesihlwele esikhulu samaKristu esinethemba lasemhlabeni esiye saphuma kuzo zonke iintlanga ukuza kubathelela kunqulo olunyulu akuyomfuneko ukuba bakoyike oko kuya kuba ngumphumo wolu hlaselo. Xa imikhosi enkwantyisayo kaSaneribhe, ukumkani waseAsiriya, yayingenelayo iYerusalem ebudeni bolawulo lukaKumkani uHezekiya, amaSirayeli awayesengozini anikwa imbono ezolisayo ngemeko xa uKumkani uHezekiya wathi kuwo: “Okunaye yingalo yenyama, okunathi nguYehova uThixo wethu, ukuba asincede, alwe amadabi ethu.” Umphumo waba kukuba “abantu bayama emazwini kaHezekiya ukumkani wakwaYuda.” (2 Kronike 32:8) AmaNgqina kaYehova anamhlanje, xa esongelwa yimikhosi yeentlanga zale nkqubo yehlabathi, anokwayama kumazwi afanayo avela kukumkani omkhulu kunoHezekiya, uYesu Kristu.
21. (a) Kutheni amazwi kaYahaziyeli eya kukhunjulwa nje ebudeni bohlaselo oluzayo lweYerusalem yasezulwini? (b) Uya kuba yintoni umphumo wedabi eliza kuliwa?
21 Ngelo xesha, amazwi akhuthaza ukholo kaYahaziyeli umLevi aya kukhunjulwa: “Le yanamhla asiyeyenu; zimiseni nime, nilubone usindiso lukaYehova onani, maYuda neYerusalem. Musani ukoyika, musani ukuqhiphuka umbilini. Phumani ngomso nibahlangabeze; uYehova unani.” (2 Kronike 20:17) Ewe, kulo lonke elo xesha linobungozi, uYehova uya kuba nabantu bakhe. Ukukhuseleka nokulondolozwa kwabo kuya kuxhomekeka ekubalweleni kwakhe. Ibe uya kubalwela ngomphumi-mkhosi wakhe onguKumkani, uYesu Kristu! Uya kuba yintoni umphumo? Uya kuba kukutshatyalaliswa ngokupheleleyo kwentlangano ebonakalayo kaSathana esemhlabeni.—ISityhilelo 19:11-21.
22. (a) Siya kuba yintoni isiphelo soloyiso sencwadi yeeMfazwe zikaYehova, ibe uYehova uza kuzenzela ntoni ngaso? (b) Abathandi begama likaYehova baya kushukunyiselwa ukuba benze ntoni ngoloyiso lwakhe?
22 Hayi ukuba lihle kwegama aya kuzenzela lona uThixo ngoloyiso lwakhe oloyikekayo kule “mfazwe yaloo mini inkulu kaThixo, uSomandla” eArmagedon! (ISityhilelo 16:14, 16) Isahluko esitsha, ngokungathi kunjalo, siya kongezelelwa kwincwadi yeeMfazwe zikaYehova. Iya kuba sisiphelo esinoloyiso, incopho ezukileyo ngokuphathelele le nkqubo yezinto. Incwadi iphela iya kubonisa ukuba uThixo uSomandla akazange oyiswe edabini. Hayi indlela abathandi begama likaYehova abaya kumdumisa ngemincili ngayo emva koko! Eneneni, iya kwandula ke indinyana yokugqibela yencwadi yeeNdumiso iphunyezwe ngendlela ezukileyo: “Yonke into ephefumlayo mayimdumise uYehova. Haleluya!”—INdumiso 150:6.
Imibuzo Yempinda
◻ Yintoni exatyiswa kancinane ngabantu banamhla ngoThixo weBhayibhile, uYehova?
◻ Yiyiphi imfazwe awayilwayo uAbraham, yaye ngubani owamnika uloyiso?
◻ Iyintoni “incwadi yeeMfazwe zikaYehova”?
◻ Iya kuba yintoni incopho “yencwadi yeeMfazwe zikaYehova,” yaye iya kuphumela entwenini?