“Funani UYehova, Nonke Balulamileyo”
“FUNANI uYehova, nonke balulamileyo belizwe, bakwenzileyo okusesikweni kwakhe; funani ubulungisa, funani ululamo, mhlawumbi nositheliswa ngemini yomsindo kaYehova.”—Zefaniya 2:3.
Umprofeti uZefaniya wawathetha loo mazwi ‘kwabalulamileyo belizwe,’ ibe wababongoza ukuba ‘bafune ululamo’ ukuze bakhuselwe “ngemini yomsindo kaYehova.” Akuthandabuzeki ukuba ululamo luyimfuneko ukuze ubani asinde. Kodwa kutheni kunjalo nje?
Kutheni Simele Sifune Ululamo?
Ululamo luphawu lokuba nobulali, ukungabi nakratshi okanye ukungazingci. Lunxulumene ngokusondeleyo nezinye iimpawu zokulunga, ezifana nokuthobeka nobulali. Ekubeni oku kunjalo, abantu abalulamileyo bayafundiseka yaye bakulungele ukwamkela uqeqesho oluvela kwisandla sikaThixo, nakubeni lusenokubonakala lubuhlungu okomzuzwana.—INdumiso 25:9; Hebhere 12:4-11.
Ubulali abunanto yakwenza nemfundo okanye isigxina sikabani ebomini. Noko ke, abo banemfundo enomsila okanye abemi kakuhle ngezinto zehlabathi bavakalelwa kukuba bayakufanelekela ukuzenzela izigqibo kwinto yonke, kwanakwimibandela yonqulo. Oku kunokubathintela ekuvumeleni omnye umntu abafundise okuthile okanye ekwamkeleni isiluleko nasekwenzeni iinguqulelo eziyimfuneko ebomini babo. Bambi abazizityebi ngezinto eziphathekayo basenokuba nengcinga ephosakeleyo yokuba unqabiseko lwabo luxhomekeke kwizinto zabo eziphathekayo. Ngenxa yoko, ababoni mfuneko yobutyebi bokomoya obuvela kwiLizwi likaThixo, iBhayibhile.—Mateyu 4:4; 5:3; 1 Timoti 6:17.
Khawucinge ngababhali, abaFarisi nababingeleli abakhulu bomhla kaYesu. Ngesinye isihlandlo xa amadindala ababewathume ukuba aye kubamba uYesu abuya ngaphandle kwakhe, abaFarisi bathi: “Ningaba nilahlekisiwe nani na? Kubaphathi nakubaFarisi kungaba kukho mntu ukholiweyo kuye yini na? Olu luntu lungawaziyo umthetho luqalekisiwe.” (Yohane 7:45-49) Ngamany’ amazwi, kubo, ngababengenalwazi nababengafundanga kuphela ababezizidenge ngokwaneleyo ukuba bakholelwe kuYesu.
Nakuba kwakunjalo, abanye abaFarisi batsalelwa enyanisweni, ibe bade bakhusela uYesu namanye amaKristu. Phakathi kwaba kwakukho uNikodemo noGamaliyeli. (Yohane 7:50-52; IZenzo 5:34-40) Emva kokufa kukaYesu, ‘iqela elikhulu lababingeleli lalilulamela ukholo.’ (IZenzo 6:7) Ngokungathandabuzekiyo owona mzekelo ubalaseleyo yayingowompostile uPawulos. Wafundiswa ezinyaweni zikaGamaliyeli waza waba ngumxhasi wobuYuda owayefunde wayityekeza nowayehlonelwa. Noko ke, ekuhambeni kwexesha wasabela ngokuthobeka kubizo lukaKristu Yesu waza waba ngumlandeli wakhe onenzondelelo.—IZenzo 22:3; 26:4, 5; Galati 1:14-24; 1 Timoti 1:12-16.
Konke oku kubonisa ukuba ingakhathaliseki imvelaphi kabani okanye indlela asenokuba uvakalelwa ngayo ngoku ngesigidimi esivela eBhayibhileni, amazwi kaZefaniya asasebenza. Ukuba ubani ufuna ukwamkeleka kuThixo aze akhokelwe liLizwi lakhe, kufuneka abe nolulamo.
Abo ‘Bafuna Ubulali’ Namhlanje
Izigidi zabantu emhlabeni wonke ziyasabela kwiindaba ezilungileyo zoBukumkani. AmaNgqina kaYehova veki nganye aqhuba izifundo zeBhayibhile ezingaphezu kwezigidi ezine kumakhaya abantu abanjalo. Aba baneemvelaphi ezininzi nezahlukahlukeneyo yaye iimeko zabo zezoqoqosho nezentlalo zahlukahlukene. Sekunjalo, into ekhoyo kubo bonke kukuba bathobeke ngokwaneleyo ukuba bamkele isigidimi seBhayibhile esaziswa kubo nguthile emakhayeni abo okanye kwezinye iindawo. Abaninzi babo benza inkqubela entle kuba bakulungele ukwenza umgudu ukuze boyise imiqobo esendleleni yabo. Ewe, baphakathi ‘kwabalulamileyo belizwe’ namhlanje.
Ngokomzekelo, phawula imeko kaMaria waseMexico. Wafundela ubugqwetha eyunivesithi ibe wayemi kakuhle ngokwasemalini ngenxa yelifa awalifumanayo. Ngenxa yoku, waqalisa ukuba nengqondo ephangaleleyo eyamguqulela, njengoko esitsho, ekubeni ngumntu “onemvukelo, okrwada, onekratshi nongakholelwayo kubukho bukaThixo.” UMaria ukhumbula oku: “Ndandicinga ukuba yonke into yayinokuconjululwa ngemali yaye uThixo wayengabalulekanga. Enyanisweni, ndandivakalelwa kukuba wayengekho kwaukubakho.” Esongezelela wathi: “Kum icawa yayibubudenge ibe yayiyinto nje eyimfuneko ekuhlaleni.”
Kamva, uMaria waphawula iinguqulelo ezithile kumza wakhe emva kokuba ebe ngomnye wamaNgqina kaYehova. UMaria wachaza esithi: “Wayesoyikeka gqitha, kodwa ngoku ube ngumntu onoxolo nolungileyo. Izizalwana zathi wayengumshumayeli yaye ufunda iBhayibhile, ibe ngenxa yeso sizathu wayengasaseli okanye aleqeke emva kwamabhinqa. Ngoko ndandifuna aze ukuze afunde iBhayibhile kunye nam kuba ndandicinga ukuba ngale ndlela ndandiza kufumana uxolo nenzolo nto ezo endandizifuna ngamandla.” Umphumo waba kukuba uMaria amkele isifundo seBhayibhile kwisibini esingamaNgqina.
Kwakukho izinto ezininzi ekwakufuneka ezoyisile, ibe kwakhona kwakunzima gqitha ngaye ukwamkela imigaqo yeBhayibhile yobuntloko njengoko kwakufuneka ethobele indoda yakhe. Kodwa wenza iinguqulelo ezinkulu kubomi nakwisimo sakhe sengqondo. Evuma wathi: “Ndicinga ukuba ukususela mhla abazalwana bangena ekhayeni lam baza bazisa uncedo lukaYehova, kuye kwakho ulonwabo, inzolo nentsikelelo kaThixo ekhayeni lam.” Namhlanje, uMaria uliNgqina likaYehova elizahluleleyo, nelibhaptiziweyo.
Ekulandeleni unqulo lokwenyaniso, kukho enye inkalo apho ukuba nobulali, okanye ukungabi nabo, kuba nendima ebalulekileyo. Amaxesha amaninzi, umfazi entsatsheni uyayamkela inyaniso aze afune ukukhonza uThixo, sekunjalo indoda ingavumi. Mhlawumbi kunzima ngamanye amadoda ukwamkela ingcinga yokuba ngoku kukho uthile—uYehova uThixo—umfazi wakhe amele amthobele. (1 Korinte 11:3) Umfazi waseChihuahua, eMexico, wacela ukuqhutyelwa isifundo seBhayibhile, ibe ekuhambeni kwexesha yena nabantwana bakhe abasixhenxe bangena enyanisweni. Kuqala indoda yakhe yachasa. Kwakutheni? Kuba yayingafuni intsapho yayo ishumayele kwindlu ngendlu, inika abantu uncwadi lweBhayibhile. Kuyabonakala ukuba yavakalelwa kukuba oku kwakuya kuyithoba isidima. Noko ke, intsapho yayo, yema ngokuqinileyo kwisigqibo sayo sokukhonza uThixo. Ekuhambeni kwexesha le ndoda yaqalisa ukubona ixabiso lokwamkela ilungiselelo likaThixo. Kodwa kwadlula iminyaka eli-15 ngaphambi kokuba izahlulele kuYehova.
Kulo lonke elaseMexico, kusekho iindawo ezininzi apho abemi basekuhlaleni baneelwimi zabo zomthonyama zesi-Indiya namasiko abo. Isigidimi seBhayibhile siyafikelela kwaba bantu ibe siyabanceda baphucule umgangatho wabo wentlalo, njengoko abanye befunda ukulesa nokubhala ngoxa befunda inyaniso. Noko ke, isibakala sokuba aba bantu benemfundo encinane okanye benezinto eziphathekayo ezimbalwa asithethi kuthi ngokuyimfuneko baya kusamkela ngakumbi isigidimi. Ikratshi lobuhlanga nokubambelela ngamandla kwizithethe maxa wambi zenza kube nzima ngabanye ukwamkela inyaniso. Kwakhona oku kuchaza isizathu sokuba kwezinye iidolophana zaseIndiya, abo bayamkelayo inyaniso ngokufuthi betshutshiswa ngabanye abemi. Ngoko ubulali bufuneka ngeendlela ezininzi.
Sabela Ngobulali
Kuthekani ngawe siqu? Ngaba uyasabela kwinyaniso yeLizwi likaThixo? Okanye ngaba kunzima ngawe ukwamkela ezinye iinyaniso zeBhayibhile? Mhlawumbi uya kufuna ukuzihlolisisa ukuze ubone oko kukuthintelayo. Ngaba uphazanyiswa kukuba abantu abaninzi abatsaleleka enyanisweni benemvelaphi ephantsi? Ngaba ikratshi lobuqu libandakanyekile kwindlela ocinga ngayo? Kulungile ukucinga ngamazwi ompostile uPawulos athi: “UThixo usuke wanyula izinto ezibubudenge zehlabathi, ukuze azidanise izilumko; nezinto ezingenamandla zehlabathi usuke uThixo wazinyula, ukuze azidanise izinto ezomeleleyo; nezinto zehlabathi ezingenabuntu, nezingento yanto, wazinyula uThixo, nezingathi azikho, ukuze aziphuthise izinto ezikhoyo; ukuze kungaqhayisi namnye umntu emehlweni akhe.”—1 Korinte 1:27-29.
Ngaba ubuya kungavumi ukuthabatha ubutyebi ngenxa nje yokuba ubufumene kwisitya esenziwe ngodongwe nesiphantsi? Nakanye! Sekunjalo, leyo yindlela uThixo akhetha ukusinika ngayo iLizwi lakhe lenyaniso nelisindis’ ubomi, njengoko umpostile uPawulos echaza: “Obu butyebi sibuphethe ngezitya zodongwe, ukuze incamisa yamandla ibe yekaThixo, ingaphumi kuthi.” (2 Korinte 4:7) Ubulali nokuthobeka buya kusinceda sibone ixabiso lokwenene lobutyebi ingezizo nje ‘izitya zodongwe,’ okanye abameli abangabantu, ababudlulisela kuthi. Ngokwenza njalo, siya kwandisa amathuba ‘okusitheliswa ngemini yomsindo kaYehova’ size sibe phakathi kwabalulamileyo abaya ‘kuwudla ilifa umhlaba.’—Zefaniya 2:3; Mateyu 5:5.