Ukukholisa UThixo Naxa Iimeko Zitshintshile

NGABA iimeko zakho zitshintshile? Ngaba ukufumanisa kunzima ukuyamkela imeko okuyo? Abaninzi kuthi bakhe bakuloo meko okanye baya kuba kuyo ngenye imini. Ukufunda ngabantu ababephila ngaphambili ababekhe bajamelana neengxaki kunokusinceda sibone iimpawu ezinokuba luncedo.

Ngokomzekelo, cinga ngoDavide owatyhubela kwiingxaki ezininzi. Wayeseyinkwenkwana engumalusi xa wathanjiswa nguSamuweli ukuba abe ngukumkani. Wathi esemncinane walwa nengxilimbela yomFilisti enguGoliyati. (1 Sam. 17:26-32, 42) UDavide oselula wabizwa ukuba aye kuhlala kwindlu yasebukhosini kaKumkani uSawule, waza wamiselwa njengomphathi-mkhosi. UDavide wayengazange akhe ayicinge nokuyicinga into yokuba iimeko zakhe zaziya kutshintsha ngolu hlobo, ibe wayengayilindelanga into eyayiza kwenzeka emva koko.

Izinto zazingasahambi kakuhle phakathi kukaDavide noSawule. (1 Sam. 18:8, 9; 19:9, 10) Exhalabele ubomi bakhe, kwafuneka uDavide aphile njengembacu kangangeminyaka. Naxa wayenguKumkani wakwaSirayeli, iimeko zakhe zatshintsha kakhulu, ingakumbi xa wakrexezayo waza wasifihla isono sakhe ngokubulala umntu. Ngenxa yezono zakhe, intsapho yakhe yehlelwa ziintlekele. Enye yezo ntlekele, yaba kukuvukela kukanyana wakhe uAbhisalom. (2 Sam. 12:10-12; 15:1-14) Sekunjalo, emva kokuba uDavide eguqukile kwizono zakhe zokukrexeza nokubulala, uYehova wamxolela waza uDavide waqhubeka ekholisa uThixo.

Nezakho iimeko zisenokutshintsha. Ukugula, iimeko zezoqoqosho okanye iingxaki zentsapho—kwanezenzo zethu—zinokutshintsha ubomi bethu. Ziziphi iimpawu ezinokusinceda sikwazi ukumelana nezi ngxaki?

Indlela Ukuthobeka Okusinceda Ngayo

Ukuthobeka kuquka ukuba nentlonelo. Xa sithobeke ngokwenene asiyi kuziphakamisa size sibajongele phantsi abanye. Ukungazijongeli phantsi iimpawu ezintle zabanye nempumelelo abanayo ebomini, kuya kusinceda sibazi kakuhle. Ngokufanayo, ukuthobeka kuya kusinceda sisiqonde isizathu sokuba sehlelwe zizinto ezisehlelayo size sifumane nendlela yokuhlangabezana nazo.

Unyana kaSawule uYonatan, ungumzekelo omhle. Iimeko zakhe zatshintsha ngenxa yezinto ezingaphaya kwamandla akhe. Xa uSamuweli waxelela uSawule ukuba uYehova uya kubuhlutha ubukumkani kuye, wayengathethi ukuba uYonatan uza kuba ngukumkani. (1 Sam. 15:28; 16:1, 12, 13) Kunokuba akhethe uYonatan ukuba abe ngukumkani olandelayo wakwaSirayeli, uThixo wakhetha uDavide. UYonatan wachaphazeleka ngandlel’ ithile kukungathobeli kukaSawule. Nangona uYonatan wayengenatyala, wayengazukungena ezihlangwini zikayise. (1 Sam. 20:30, 31) Wenza ntoni ke uYonatan? Ngaba wamqumbela waza wammonela uDavide? Akunjalo. Nangona wayemdala yaye enamava kunoDavide, uYonatan walithobela igunya lakhe. (1 Sam. 23:16-18) Ukuthobeka kwamnceda waqonda ukuba uDavide wayesikelelwe nguThixo yaye akazange ‘azicingele ngaphezu koko amelwe kukuzicingela ngako.’ (Roma 12:3) UYonatan wayesazi ukuba uYehova ulindele ntoni kuye yaye wakwamkela oku.

Eneneni, kuye kube nzima xa iimeko zitshintshile. Kukho ixesha apho uYonatan kwafuneka akhethe phakathi kwamadoda amabini awayesondele kuwo. Enye yawo yayingumhlobo wakhe uDavide, owayekhethwe nguYehova ukuba abe ngukumkani. Enye yayinguSawule, uyise, owayegatyiwe nguYehova kodwa owayesaqhubeka engukumkani. Le meko imele ukuba yayimkhathaza uYonatan njengoko wayezama ukukholisa uYehova. Ukutshintsha kweemeko zethu kunokusixhalabisa. Kodwa ukuba sizama ukwazi imbono kaYehova, siya kuhlala sinyanisekile kuye nangona sijamelene notshintsho ebomini bethu.

Ukubaluleka Kokuzithoba

Ukuzithoba kuthetha ukuzazi iintsilelo zethu. Ukuzithoba nokuthobeka zizinto ezimbini ezingafaniyo. Umntu othobekileyo usenokungazazi iintsilelo zakhe.

UDavide wayezithobile. Nangona uYehova wayemkhethile ukuba abe ngukumkani, kwadlula iminyaka ngaphambi kokuba uDavide angene esihlalweni sakhe. Ayikho indawo eBhayibhileni echaza ukuba uYehova wamxelela uDavide isizathu sokuba kuthathe ixesha ngaphambi kokuba ahlale etroneni. Sekunjalo, ayizange imkhathaze loo nto. Wayezazi iintsilelo zakhe, yaye wayesazi ukuba uYehova owayeyivumele le meko ukuba iqhubeke, wayeya kuzilungisa izinto. Ngoko uDavide akazange ambulale uSawule enoba oko kwakuya kusindisa ubomi bakhe, yaye wanqanda uAbhishayi xa wayefuna ukumbulala.—1 Sam. 26:6-9.

Maxa wambi kusenokwenzeka into esingayiqondiyo ebandleni okanye esivakalelwa kukuba ayilungiswanga ngeyona ndlela efanelekileyo. Ngaba siya kuyamkela into yokuba uYesu yiNtloko yebandla yaye usebenzisa iqumrhu labadala ukuze alikhokele? Ngaba siya kuzithoba kuba sisazi ukuba ukuze simkholise uYehova sifanele silindele kuye ukuba asikhokele esebenzisa uYesu Kristu? Ngaba siya kulinda ngokuzithoba naxa kunzima ukwenjenjalo?—IMize. 11:2.

Ukululama Kusinceda Sibe Nesimo Sengqondo Esihle

Ukululama kukuba nomoya wobulali. Kuyasinceda ukuba sikwazi ukunyamezela ngomonde singacaphuki, singabi nanzondo okanye ingqumbo. Kunzima ukululama. Okubangel’ umdla kukuba, kwenye indinyana eseBhayibhileni ‘abalulamileyo bomhlaba’ bakhuthazwa ukuba ‘bafune ululamo.’ (Zef. 2:3) Ukululama kunxulumene nokuthobeka nokuzithoba, kodwa kukwaquka ezinye iimpawu ezinjengokulunga nobulali. Umntu olulamileyo uyalwamkela uqeqesho nolwalathiso nto leyo enokumenza akhule ngokomoya.

Ukululama kunokusinceda njani sikwazi ukujamelana nokutshintsha kweemeko zethu? Mhlawumbi uye waphawula ukuba abantu abaninzi abaluthandi utshintsho. Eneneni, lunokusivulela amathuba okuba siqeqeshwe ngakumbi nguYehova. Oku sinokukubona kubomi bukaMoses.

Xa wayeneminyaka engama-40 ubudala, uMoses wayesele eneempawu ezintle. Wayekuxhalabele oko kwakufunwa ngabantu bakaThixo yaye wayenomoya wokuzincama. (Heb. 11:24-26) Sekunjalo, ngaphambi kokuba athunywe nguYehova ukuba akhulule uSirayeli eYiputa, uMoses wajamelana nemiqobo eyamenza walulama nangakumbi. Kwafuneka asabe eYiputa aze aye kuhlala kwaMidiyan iminyaka engama-40 esenza umsebenzi ophantsi wokuba ngumalusi. Waba yintoni umphumo? Yonke le nto yabuphucula ubuntu bakhe. (Num. 12:3) Wafunda ukwenza ukuthanda kukaYehova kube yeyona nto ibalulekileyo ebomini bakhe.

Ukuze siqonde indlela uMoses awayelulame ngayo, masibone okwenzekayo xa uYehova wathi uza kulugatya uhlanga olwalungamthobeli aze enze inzala kaMoses ibe luhlanga olunamandla. (Num. 14:11-20) UMoses waluthethelela olo hlanga. Amazwi akhe abonisa ukuba kunokuba axhalabele iimfuno zakhe, wayexhalabele igama likaThixo nempilo-ntle yabazalwana bakhe. Kwakufuneka umntu olulamileyo ukuze enze lo msebenzi kaMoses wokukhokela nokuba ngumlamleli wolo hlanga. UMiriyam noAron bambombozelela uMoses, nangona ingxelo yeBhayibhile isithi ‘wayeyeyona ndoda ilulamileyo kubantu bonke.’ (Num. 12:1-3, 9-15) Kubonakala ukuba ngenxa yokululama uMoses wakunyamezela ukumbombozela kwabo. Kwakuza kuba njani ukuba uMoses wayengalulamanga?

Ngesinye isihlandlo, uYehova wanika amadoda athile umoya wakhe ukuze akwazi ukuprofeta. UYoshuwa, owayesebenza kunye noMoses, wayevakalelwa kukuba la maSirayeli ayelisebenzisa kakubi igunya lawo. Kwelinye icala, uMoses wayenembono kaYehova ngezinto yaye wayengenaxhala lokulahlekelwa sisigxina sakhe. (Num. 11:26-29) Ngaba uMoses wayeya kulamkela eli lungiselelo likaYehova litsha ukuba wayengalulamanga?

Ngenxa yokululama uMoses wakwazi ukulisebenzisa kakuhle igunya elikhulu nesabelo awayesinikwe nguThixo. UYehova wathi makaye kwiNtaba yeHorebhe aze eme phambi kwabantu. UThixo wathetha kuMoses esebenzisa ingelosi waza wammisela njengomlamleli womnqophiso. Ukululama kukaMoses kwamnceda walamkela olu tshintsho lukhulu nokuba aqhubeke ekholisa uThixo.

Kuthekani ngathi? Ukuze sikhule kufuneka silulame. Bonke abantu bakaThixo abanikwe amalungelo bafanele balulame. Ukululama kusinceda singabi nekratshi xa iimeko zethu zitshintsha kodwa sibe nesimo sengqondo esifanelekileyo. Indlela esilujonga ngayo olu tshintsho ibalulekile. Ngaba siya kulwamkela? Ngaba siya kulujonga njengethuba lokuphucula ubuntu bethu? Mhlawumbi elo iya kuba lithuba elihle lokuba sihlakulele ukululama!

Ziya kusoloko zitshintsha iimeko zethu. Ngamanye amaxesha kunzima ukuqonda isizathu sokuba izinto zisenzeka ngendlela ethile. Ukusikelwa kwethu umda nokudimazeka kunokwenza kube nzima ukujonga izinto ngendlela uYehova azijonga ngayo. Sekunjalo, iimpawu ezinjengokuthobeka, ukuzithoba nokululama ziya kusinceda sizamkele iimeko ezitshintshayo size sihlale sikholisa uThixo.

[Amagama acatshulweyo akwiphepha 4]

Xa sithobeke ngokwenene asiyi kuziphakamisa

[Amagama acatshulweyo akwiphepha 5]

Ukuze sikhule kufuneka silulame

[Umfanekiso okwiphepha 5]

UMoses wayejamelene neemeko ezamnceda walulama nangakumbi