AmaNgqina KaYehova Ehlabathini Lonke—IRiphabliki YeePhilippines
IZIQITHI ezinamaxethuka ezikummandla weenjiko ezingama-7 083 ezenza iRiphabliki yeePhilippines ziyinxalenye engaphezulu yolundi lwentaba egqunywe ngamanzi.a Yaye abemi bakwiiPhilippines abazizi-62 000 000 bathanda ukuthetha phantse nangawuphi na umbandela. Lo moya wobuhlobo ubangela ukuba le ndawo ibe yintsimi etyebileyo yokunikela ubungqina ngoBukumkani.
Ukunikela Ubungqina Esikolweni
Kwisiqithi saseMasbate, umfundi oselula owayekwisikolo samabanga aphakamileyo wakwazi ukunikela ubungqina kumfundisi-ntsapho wakhe nakwabo wayefunda nabo kuvavanyo lwemibuzo ephendulwa ngokuthi yinyaniso okanye bubuxoki. Unikela le ngxelo:
“Esasimele sikuphendule kwakusithi, ‘Ukuba uThixo uyandithanda, akayi kundizisela iingxaki okanye andibangele ndibandezeleke.’ Xa umfundisi-ntsapho wam wayehlola amaphepha ethu, wafumanisa ukuba bonke ngaphandle kwam babephendule ngokuthi yinyaniso. Umfundisi-ntsapho wandivumela ukuba ndichazele abo ndandifunda nabo isizathu sokuba ndiphendule ngokuthi bubuxoki. Ndathi asingoThixo owayesibangela iingxaki, nangona ekuvumela ukubandezeleka yaye esivumela sivavanywe. Ndisebenzisa iBhayibhile yam, endiyiphatha ngalo lonke ixesha esikolweni, ndaqiqa nabo ndifunda nabo ngamazwi akweyoku-1 kaYohane 4:8 athi, ‘uThixo uluthando.’ Emva kokuba ndicacisile, umfundisi-ntsapho wam wayeyisekile, wabetha kancinane phezu kwedesika yakhe, waza wathi: ‘UMarilou uchanile.’ Ndim kuphela owayichanayo impendulo yalo mbuzo ndaza ndafumana awona manqaku aphakamileyo.”
Isigidimi SoBukumkani Sikho Kuyo Yonke Indawo
Ngoxa wayenesabelo kubulungiseleli bendlu ngendlu komnye ummandla weePhilippines, uvulindlela othe ngxi (umvakalisi wexesha elizeleyo weendaba ezilungileyo) wadibana nomama wabantwana abathathu abancinane. Lo mfazi wabonisa umdla wokwenyaniso kwisigidimi soBukumkani, yaye oku kwenza kwaba lula ukuqalisa isifundo seBhayibhile kunye naye. Nangona umyeni wakhe engazange ayithande into yokuba wayefumana izifundo zeBhayibhile, ngokukodwa kumaNgqina kaYehova, isifundo saqhubeka.
Le ndoda yayifudusela kwesinye isixeko intsapho yayo, icinga ukuba oku kuya kuluphelisa unxulumano lomfazi wayo namaNgqina. Noko ke, kungentsuku zatywala amfumana lo mfazi, waza wasiqalisa kwakhona isifundo sakhe seBhayibhile. Kakade ke, umyeni wakhe wacaphuka ngokwenene. Nasemsebenzini wakhe wayesesemsindweni, waza wawukhuphela kumntu awayelungisa inqwelo-mafutha yakhe. Le ndoda yayingazi ukuba lo mntu wayengomnye wamaNgqina kaYehova.
Eli Ngqina lacacisa ukuba kwakuya kuba yingenelo kwintsapho yonke ukuba umfazi wayo wayeqhubeka nokufunda iBhayibhile. Wayenokuqalisa ukusebenzisa imigaqo yeBhayibhile kanye apho ekhayeni lakhe. Kwacetyiswa nokuba indoda nayo yayiya kungenelwa ekufundeni ngoBukumkani bukaThixo.
Waba yintoni umphumo wale ngxubusho? Umfazi wale ndoda wafumana inkululeko engakumbi yokufundisisa iBhayibhile, ibe le ndoda yagqiba kwelokuba ibuyisele intsapho yayo kwikhaya layo langaphambili. Apho lo mfazi wenza inkqubela ngokomoya ukusa kwinqanaba lokuba abe ngumvakalisi woBukumkani ongabhaptizwanga. Umyeni wakhe naye wamkela isifundo seBhayibhile, yaye yonke le ntsapho yaqalisa ukubakho kwiintlanganiso zamaKristu.
[Umbhalo osemazantsi]
a Ukuze ufumane inkcazelo eyongezelelekileyo, bona IKhalenda YamaNgqina KaYehova Yowe-1994.
[Ibhokisi ekwiphepha 8]
IINKCUKACHA ZELIZWE
Unyaka Wenkonzo We-1993
INANI ELIYINCOPHO LABANIKELA UBUNGQINA: 116 576
ISILINGANISO: INgqina elinye kubemi 549
ABEBEKHO ESIKHUMBUZWENI: 357 388
UMLINGANISELO WABAVAKALISI ABANGOOVULINDLELA: 22 705
UMLINGANISELO WEZIFUNDO ZEBHAYIBHILE: 94 370
INANI LABABHAPTIZIWEYO: 7 559
INANI LAMABANDLA: 3 332
IOFISI YESEBE: EMANILA
[Umfanekiso okwiphepha 9]
Ukunikela ubungqina kwindawo yentengiso kuzisa imiphumo emihle
[Umfanekiso okwiphepha 9]
Iofisi yesebe yeWatchtower Society eManila