“Uya Kuba Yini Na Umqondiso Wobukho Bakho?”
“Ziya kubakho nini na ezo zinto; uya kuba yini na umqondiso [“wobukho bakho,” NW], nowokupheliswa kwephakade eli?”—MATEYU 24:3.
1, 2. Yintoni ebonisa ukuba abantu banomdla kwikamva?
INKOLISO yabantu inomdla kwikamva. Ngaba unjalo nawe? Kwincwadi yakhe ethi Future Shock, uNjingalwazi Alvin Toffler waphawula “ukwanda ngokukhawuleza kweentlangano ezizinikele ekufundisiseni ngekamva.” Wongezelela wathi: ‘Sibone ukuyilwa kwamaziko eenkcuba-buchopho alungiselelwe ukufunda ngekamva; ukuvela koolindixesha abachaza ikamva eNgilani, eFransi, eItali, eJamani naseUnited States; ukwanda kwezifundo zaseyunivesithi ezingokuxela ikamva.’ Lo kaToffler waqukumbela wathi: “Kambe ke, akukho bani ‘unokulazi’ ngokupheleleyo ikamva.”
2 Incwadi ethi Signs of Things to Come ithi: “Ukuchaza ikamva lomntu ngokujonga imigca esesandleni, ukuvumisa ngokusebenzisa ibhola yegilasi, ukuvumisa ngeenkwenkwezi, ukuvumisa ngamakhadi okuxela ithamsanqa, i-I Ching zonke ezi ziindlela zobugcisa ezintsonkothileyo zokusibonisa oko sisenokukuphathelwa likamva.” Kodwa kunokuphethukela kwiindlela zabantu, senza kakuhle xa sikhangela kumthombo onokuthenjwa—uYehova.
3. Kutheni kufanelekile ukulufuna kuThixo ulwazi ngekamva?
3 UThixo oyinyaniso wathi: “Njengoko ndicinge ngako, koba njalo; njengoko [“ndigqibe,” NW] ngako, koma ngolo hlobo.” (Isaya 14:24, 27; 42:9) Ewe, uYehova uye wakwazi ukuchazela uluntu ngoko kuya kwenzeka, ngokufuthi esebenzisa abantu njengezithethi zakhe. Omnye waba baprofeti wabhala: “Ayikhe yenze into iNkosi uYehova, ingathanga iluhlakaze ucweyo lwayo kubakhonzi bayo abaprofeti.”—Amosi 3:7, 8; 2 Petros 1:20, 21.
4, 5. (a) Kutheni uYesu enokuba luncedo ngokuphathelele ikamva? (b) Nguwuphi umbuzo oneenxalenye eziliqela owabuzwa ngabapostile bakhe?
4 UYesu Kristu wayengoyena mprofeti kaThixo ubalaseleyo. (Hebhere 1:1, 2) Makhe sinikele ingqalelo kwesinye seziprofeto zikaYesu eziphambili esichaza kwangaphambili izinto ezenzekayo ngoku sithethayo. Esi siprofeto sikwasinceda siqonde oko kuza kwenzeka kungekudala njengokuba le nkqubo ingendawo ikhoyo iphela yaye uThixo ezisa iparadisi emhlabeni endaweni yayo.
5 UYesu wazingqina engumprofeti. (Marko 6:4; Luka 13:33; 24:19; Yohane 4:19; 6:14; 9:17) Ngaloo ndlela, siyaqondakala isizathu sokuba, ngoxa wayehleli kwiNtaba yemiNquma ekhangele iYerusalem, abapostile bakhe bambuze ngekamva bathi: “Ziya kubakho nini na ezo zinto; uya kuba yini na umqondiso [“wobukho bakho,” NW] nowokupheliswa kwephakade eli?”—Mateyu 24:3; Marko 13:4.
6. UMateyu 24, noMarko 13, noLuka 21 bahlobene njani; yaye nguwuphi umbuzo esifanele sibe nomdla ngokunyanisekileyo kuwo?
6 Umbuzo wabo nempendulo kaYesu uya kuzifumana kuMateyu isahluko 24, kuMarko isahluko 13, nakuLuka isahluko 21.a Kwiinkalo ezininzi ezi ngxelo ziyasekelana, kodwa azifani. Ngokomzekelo, nguLuka kuphela okhankanya ‘iindyikitya zokufa kwiindawo ngeendawo.’ (Luka 21:10, 11; Mateyu 24:7, NW; Marko 13:8) Ngokusengqiqweni ke, sifanele sibuze, Ngaba uYesu wayexela kwangaphambili iziganeko ezaziya kwenzeka ngexesha lokuphila kwabo babemphulaphule kuphela, okanye ngaba waquka nexesha lethu kwanoko kuseza kwenzeka kwikamva?
Abapostile Babefuna Ukwazi
7. Yintoni abapostile ababeyibuza ngokukhethekileyo, kodwa impendulo kaYesu yagubungela okungakanani?
7 Kwiintsuku ezimbalwa ngaphambi kokubulawa kwakhe, uYesu wathi uThixo wayeyishiyile iYerusalem, ikomkhulu lamaYuda. Eso sixeko netempile yaso ezukileyo zaziya kutshatyalaliswa. Bandula ke abathile babapostile bacela ‘umqondiso wobukho bukaYesu nowokuphela kwenkqubo yezinto.’ (Mateyu 23:37–24:3) Ngokungathandabuzekiyo, ngokuyintloko babecinga ngenkqubo yamaYuda neYerusalem, ngenxa yokuba babengabuqondi ubungakanani boko kwakuseza kwenzeka. Kodwa kwimpendulo yakhe uYesu wakhangela ngaphaya koko kwenzeka de kwaba ngowama-70 C.E. xa amaRoma atshabalalisa iYerusalem.—Luka 19:11; IZenzo 1:6, 7.
8. Ziziphi ezinye zezinto uYesu awazixela kwangaphambili?
8 Njengokuba usenokufunda kwezi ngxelo zintathu zeencwadi zeVangeli, uYesu wathetha ngohlanga luvukela uhlanga, ubukumkani buvukela ubukumkani, ukunqongophala kokutya, iinyikima zomhlaba, izinto ezoyikekayo nemiqondiso ezulwini. Kwiminyaka ephakathi kwexesha uYesu awawunikela ngalo loo mqondiso (33 C.E.) nokutshatyalaliswa kweYerusalem (66-70 C.E.), kwakuya kuvela abaprofeti bobuxoki nooKristu bobuxoki. AmaYuda ayeya kutshutshisa amaKristu, awayeshumayela isigidimi sikaYesu.
9. Isiprofeto sikaYesu sazaliseka njani ngenkulungwane yokuqala yeXesha Eliqhelekileyo?
9 Ezi nkalo zomqondiso zenzeka ngokwenene, njengoko nombhali-mbali uFlavius Josephus ekungqina oko. Ubhala ukuba kwanangaphambi kokuba amaRoma ahlasele, ooMesiya bobuxoki babephembelela imvukelo. Kwakukho iinyikima ezoyikekayo kwaYuda nakwezinye iindawo. Kwakuqhambuka iimfazwe kwiindawo ezininzi zoBukhosi baseRoma. Ngaba zazikho iindlala ezinkulu? Ewe, zazikho. (Thelekisa IZenzo 11:27-30.) Kuthekani ngomsebenzi wokushumayela ngoBukumkani? Ngowama-60 okanye ngowama-61 C.E., xa kwabhalwa incwadi yabaseKolose, ‘ithemba leendaba ezilungileyo’ zoBukumkani bukaThixo laliviwe ngokubanzi eAfrika, eAsia naseYurophu.b—Kolose 1:23.
“KWANDULE KE” Ukufika Ukuphela
10. Kutheni sifanele siliphaphele igama lesiGrike elithi toʹte, yaye iyintoni intsingiselo yalo?
10 Ngeendlela ezithile, uYesu wachaza iziganeko njengezaziya kwenzeka ngokulandelelana. Wathi: “Ezi ndaba zilungileyo zobukumkani ziya kuvakaliswa . . . , kwandule ke ukufika ukuphela.” Ngokufuthi xa iiBhayibhile zesiNgesi zisebenzisa igama elithi “kwandule ke” ngokulula nje zithetha ukuthi “ngoko ke” okanye “kodwa.” (Marko 4:15, 17, NW; Mr 13:23, NW) Noko ke, kuMateyu 24:14, igama elithi “kwandule ke” lisekelwe kwisihlomelo sesiGrike esithi toʹte.c Iingcali zesiGrike zithi utoʹte “sisihlomelo esibonisa ixesha” esisetyenziselwa “ukuchaza oko kuza kulandela emva kwexesha” okanye “ukuchaza isiganeko esilandelayo.” Ngoko ke, uYesu waxela kwangaphambili ukuba kwakuya kushunyayelwa ngoBukumkani kuze kwandule ke (‘emva koko’ okanye, ‘ngokulandelayo’) kufike ‘isiphelo.’ Esiphi isiphelo?
11. UYesu wayalathisela njani ingqalelo kwiziganeko ezazinxulumene ngokuthe ngqo nokutshatyalaliswa kweYerusalem?
11 Enye indlela esazaliseka ngayo esi siprofeto sikaYesu inokubonwa kwiziganeko ezakhokelela ekupheleni kwenkqubo yamaYuda. Iimfazwe, iinyikima, ukunqongophala kokutya, nezinye izinto, uYesu awazixela ngenx’ engaphambili zenzeka ebudeni bethuba lamashumi amathathu eminyaka. Kodwa, ukususela kuMateyu 24:15, kuMarko 13:14 nakuLuka 21:20, sifunda ngeziganeko ezaziya kwenzeka xa intshabalaliso yayisondele, xa isiphelo sasisele sisemnyango.—Phawula umgca omnye ongamachaphaza kwisicangca.
12. Imikhosi yamaRoma yayibandakanyeke njani ekuzalisekeni kukaMateyu 24:15?
12 Esabela kwimvukelo yamaYuda ngowama-66 C.E., amaRoma awayekhokelwa nguCestius Gallus eza kuhlasela iYerusalem, asirhangqa eso sixeko esasigqalwa singcwele ngamaYuda. (Mateyu 5:35) Phezu kwako nje ukuhlasela kwamaYuda eziphindezela, imikhosi yamaRoma yatyhudisa yangena kweso sixeko. Ngaloo ndlela yaqalisa ‘ukuma endaweni engcwele,’ njengoko uYesu wayexele kwangaphambili kuMateyu 24:15 nakuMarko 13:14. Kwandula ke kwenzeka into eyayingalindelekanga. Nangona ayesirhangqile esi sixeko, ngequbuliso amaRoma arhoxa. Ngokukhawuleza amaKristu akuqonda ukuzaliseka kwesiprofeto sikaYesu, yaye oku kurhoxa kwawanika ithuba lokusaba kwelakwaYuda asabele ezintabeni ezingaphesheya kweYordan. Ezembali zithi enjenjalo.
13. Kutheni amaKristu akwaziyo ukuthobela isilumkiso sikaYesu sokusaba?
13 Kodwa ukuba amaRoma ayerhoxile ekuyirhangqeni iYerusalem, sasiyintoni isizathu sokuba nabani na asabe? Amazwi kaYesu ayebonise ukuba okwenzekayo kwakububungqina bokuba ‘ukuphanziswa kweYerusalem kwakusondele.’ (Luka 21:20) Ewe, ukuphanziswa. Waxela kwangaphambili ‘imbandezelo ekwakungazange kubekho injalo kwasekuqalekeni nekungasayi kubuya kubekho injalo.’ Malunga neminyaka emithathu enesiqingatha kamva, ngowama-70 C.E., ngokwenene iYerusalem yafikelwa ‘yimbandezelo enkulu’ xa kwafika imikhosi yamaRoma ngaphantsi koNjengele Titus. (Mateyu 24:21; Marko 13:19) Kodwa, kutheni uYesu wayichaza le mbandezelo njengenkulu kunayo nayiphi na eyayikho ngaphambili okanye eyayiya kulandela?
14. Kutheni sinokuthi oko kwenzeka eYerusalem ngowama-70 C.E. ‘kwakuyimbandezelo enkulu’ eyayingazange ibekho ngaphambili nengekenzeki ukususela ngoko?
14 IYerusalem yayitshatyalalisiwe ngamaBhabhiloni ngowama-607 B.C.E., yaye kuye kwaqhubeka neminye imilo emanyumnyezi kweso sixeko kule nkulungwane yethu. Sekunjalo, okwenzeka ngowama-70 C.E. kwakuyimbandezelo enkulu ngendlela ekhethekileyo. Kwiphulo elathabatha malunga neenyanga ezintlanu, abaphumi-mkhosi bakaTitus bawoyisa amaYuda. Babulala malunga nesi-1 100 000 baza bathabathela ekuthinjweni phantse ali-100 000. Ngaphezu koko, amaRoma ayitshabalalisa iYerusalem. Oku kwangqina ukuba inkqubo yamaYuda yonqulo eyayifudula yamkelekile eyayisekelwe kwitempile yayiphele ngokusisigxina. (Hebhere 1:2) Ewe, iziganeko zowama-70 C.E. ngokufanelekileyo zazinokugqalwa ‘njengembandezelo ekwakungazange kubekho injalo [kweso sixeko, kolo hlanga, nakuloo nkqubo] kwasekuqalekeni kwehlabathi, nekungasayi kubuya kubekho injalo.’—Mateyu 24:21.d
Njengokuba Kwakuprofetiwe, Kwakuseza Kulandela Okungakumbi
15. (a) UYesu waxela kwangaphambili ziphi iziganeko ezaziya kwenzeka emva kwembandezelo yaseYerusalem? (b) Ngenxa yoko kubhalwe kuMateyu 24:23-28, simele sigqibe kwelithini ngokuzaliseka kwesiprofeto sikaYesu?
15 Noko ke, uYesu akazange akuphelelisele kwimbandezelo yenkulungwane yokuqala oko wakuxela kwangaphambili. IBhayibhile ibonisa ukuba kuninzi okwakuya kulandela loo mbandezelo, njengokuba kuboniswa ngokusetyenziswa kwegama elithi toʹte okanye “kwandule” kuMateyu 24:23 (NW) nakuMarko 13:21. (NW) Kwakuya kulandela ntoni emva kowama-70 C.E.? Emva kwaloo mbandezelo kwinkqubo yamaYuda, kwakuya kuvela ooKristu nabaprofeti bobuxoki abangakumbi. (Thelekisa uMarko 13:6 nese-13:21-23.) Imbali iyangqina ukuba abantu abanjalo baye bavela kwiinkulungwane ezisemva kokutshatyalaliswa kweYerusalem ngowama-70 C.E., nangona bengakhange babalahlekise abantu abaphaphileyo ngokomoya nabebelindele “ubukho” bukaKristu. (Mateyu 24:27, 28, NW) Sekunjalo, ezi zinto ezenzeka emva kwembandezelo enkulu yowama-70 C.E. zibonisa obunye ubungqina bokuba uYesu wayekhangele ngaphaya kwaloo mbandezelo, eyayikukuzaliseka kokuqala kuphela.
16. ULuka 21:24 wongezelela yiphi inkalo kwesi siprofeto sikaYesu, yaye oku kubaluleke ngantoni?
16 Ukuba uMateyu 24:15-28 noMarko 13:14-23 sibathelekisa noLuka 21:20-24, sifumana into yesibini ebonisa ukuba oko uYesu wakuxela kwangaphambili kwakudlulela ngaphaya kokutshatyalaliswa kweYerusalem. Khumbula ukuba nguLuka kuphela okhankanya iindyikitya zokufa. Ngokufanayo, nguye kuphela oqukumbela eli candelo ngala mazwi kaYesu: “NeYerusalem inyathelelwe phantsi ziintlanga, ade azaliseke amaxesha eentlanga.”e (Luka 21:24) AmaBhabhiloni amsusa ukumkani wokugqibela wamaYuda ngowama-607 B.C.E., yaye emva koko, iYerusalem, eyayimela uBukumkani bukaThixo, yanyathelelwa phantsi. (2 Kumkani 25:1-26; 1 Kronike 29:23; Hezekile 21:25-27) KuLuka 21:24, uYesu wabonisa ukuba le meko yayiya kuqhubeka ixesha elide de kufike ixesha lokuba uThixo amisele uBukumkani kwakhona.
17. Yintoni eyesithathu ebonisa ukuba isiprofeto sikaYesu sasiza kufikelela kwixesha elalikude kwikamva?
17 Nantsi eyesithathu into ebonisa ukuba uYesu wayekhangele nakwinzaliseko eyayikude kwikamva: Ngokutsho kweZibhalo, uMesiya wayemele afe aze avuswe, aze ke ahlale ngakwesokunene sikaThixo de uYise amthume ukuba aphume eseyisa. (INdumiso 110:1, 2) UYesu wathetha ngokuba kwakuya kufuneka ahlale kwesokunene sikaYise. (Marko 14:62) Umpostile uPawulos wangqina ukuba uYesu ovusiweyo wayengakwesokunene sikaYehova elinde ixesha awayeya kuba nguKumkani noMgwebi kaThixo ngalo.—Roma 8:34; Kolose 3:1; Hebhere 10:12, 13.
18, 19. ISityhilelo 6:2-8 sivisisana njani nesiprofeto esifanayo esikwiincwadi zeVangeli?
18 Ukuze sifumane eyesine neyokugqibela into ebonisa ukuba isiprofeto sikaYesu esingokupheliswa kwenkqubo yezinto sidlulela ngaphaya kwenkulungwane yokuqala, sinokutyhila kwiSityhilelo isahluko 6. Ebhala emva kwamashumi eminyaka emva kowama-70 C.E., umpostile uYohane wachaza umbono ochukumisayo wabakhweli bamahashe. (ISityhilelo 6:2-8) Lo mbono usisiprofeto ‘wemini yeNkosi’—imini yobukho bakhe—uchaza le nkulungwane yethu yama-20 njengexesha leemfazwe eziphawulekayo (ISi 6 indinyana 4), ukusasazeka kokunqongophala kokutya (ISi 6 indinyana 5 neyesi-6), “nesibetho esibulalayo” (ISi 6 indinyana 8, NW). Ngokucacileyo, oku kuyafana noko uYesu wakuthethayo kwiincwadi zeVangeli yaye kungqina ukuba isiprofeto sakhe sinenzaliseko engakumbi kule ‘mini yeNkosi.’—ISityhilelo 1:10.
19 Abantu abanolwazi bayavuma ukuba umqondiso oyintlanganisela owaxelwa kwangaphambili kuMateyu 24:7-14 nakwiSityhilelo 6:2-8 ububonakala ukususela kwixesha lokuqhambuka kwemfazwe yehlabathi yokuqala ngowe-1914. AmaNgqina kaYehova ebevakalisa emhlabeni wonke ukuba sithetha nje isiprofeto sikaYesu sizaliseka okwesibini yaye ngendlela enkulu ngakumbi, njengoko sinokubona ngeemfazwe zenkohlakalo, iinyikima ezitshabalalisayo, iindlala ezibulalayo, nokuxhaphaka kwezifo. Ithetha ngale ngongoma yokugqibela, iU.S.News & World Report (kaJulayi 27, 1992) yathi: “Ubhubhani onguGawulayo . . . ubulala izigidi zamaxhoba yaye kungekudala usenokuba sesona sibetho sibangela ilahleko nesiyintlekele embalini. UkuFa Okumnyama kwasuba malunga nezigidi ezingama-25 zemiphefumlo ebandezelekileyo ngenkulungwane ye-14. Kodwa ngonyaka wama-2000, ngabantu abazizigidi ezingama-30 ukuya kwizigidi ezili-110 abaya kuba beneHIV, intsholongwane ebangela uGawulayo, nani elo elinyuke ukusuka kwabazizigidi ezinokuba li-12 namhlanje. Ukuba unyango alunakufumaneka, ngokuqinisekileyo bonke aba baya kufa.”
20. Ukuzaliseka kokuqala kukaMateyu 24:4-22 kwakuya kuquka ntoni, kodwa yiyiphi enye inzaliseko ecacayo?
20 Ngoko, simele sigqibe ngelithini ngempendulo kaYesu kumbuzo wabapostile? Isiprofeto sakhe sazichaza ngokuchanileyo iziganeko ezaziya kukhokelela zize ziqhubeke nasebudeni bokutshatyalaliswa kweYerusalem, yaye sakhankanya ezinye izinto ezaziya kulandela owama-70 C.E. Kodwa inkoliso yoku yayiza kuzaliseka kwakhona yaye ngendlela enkulu ngakumbi kwixesha elizayo, ikhokelele kwimbandezelo enkulu eyayiya kuphelisa le nkqubo ikhoyo ingendawo yezinto. Oku kuthetha ukuba oko kwaxelwa kwangaphambili nguYesu kuMateyu 24:4-22, kwanakwiingxelo ezifanayo ezikuMarko noLuka, kwazaliseka ukususela ngowama-33 C.E. ukusa phambili ukutyhubela imbandezelo yowama-70 C.E. Kodwa, kwaezo ndinyana zaziya kuzaliseka okwesibini, kuze kubekho nembandezelo enkulu ngakumbi kwikamva. Le nzaliseko ingakumbi iyaqhubeka sithetha nje; siyibona mihla le.f
Zikhokelela Kwintoni?
21, 22. Sizifumana phi ezinye iziprofeto ezibonisa ukuba kwakuza kwenzeka nezinye izinto?
21 UYesu akazange asiqukumbele isiprofeto sakhe ngokukhankanya abaprofeti bobuxoki abenza imiqondiso yenkohliso ebudeni bexesha elide ngaphambi kokuba “azaliseke amaxesha eentlanga.” (Luka 21:24; Mateyu 24:23-26; Marko 13:21-23) Wahlabela mgama waza wathi kwakuya kwenzeka nezinye izinto ezothusayo, izinto ezaziya kubonwa emhlabeni wonke. Ezi zaziya kunxulunyaniswa nokuza koNyana womntu esemandleni nasebuqaqawulini. UMarko 13:24-27 ukukuqhubeka kwesiprofeto sakhe:
22 “Ngaloo mihla, emveni kwayo loo mbandezelo, liya kusuka ilanga lenziwe mnyama, ithi nenyanga ingabukhuphi ubumhlophe bayo; zithi neenkwenkwezi zezulu zivuthuluke; athi namandla asemazulwini azanyazanyiswe. Baya [“kwandula ke ukumbona.” NW] uNyana woMntu esiza esemafini, enamandla amakhulu nobuqaqawuli. Uya [“kwandula ke ukuzithuma,” NW] izithunywa zakhe, abahlanganisele ndawonye abanyulwa bakhe, baphume kumacala omane omoya, kuthabathela esiphelweni sehlabathi kuse esiphelweni sezulu.”
23. Kutheni sinokulindela ukuba uMateyu 24:29-31 azaliseke kudala emva kwenkulungwane yokuqala yeXesha Eliqhelekileyo?
23 UNyana womntu, uYesu Kristu ovusiweyo, akazange eze ngaloo ndlela inobuqheleqhele emva kokutshatyalaliswa kwenkqubo yamaYuda ngowama-70 C.E. Ngokuqinisekileyo azizange zimqonde zonke iintlanga zomhlaba, njengokuba uMateyu 24:30 ephawula, yaye nezithunywa zezulu azizange ziwahlanganise onke ngoko amaKristu athanjisiweyo emhlabeni wonke. Ngoko le nxalenye yongezelelekileyo yesiprofeto sikaYesu esiphawulekayo yayiya kuzaliseka nini? Ngaba iziganeko eziqhubekayo sithetha nje emhlabeni wonke zizalisekisa yona, okanye, kunoko, ngaba iyindlela kaThixo yokusinceda siqonde izinto esisenokuzilindela kwikamva elisondeleyo? Ngokuqinisekileyo simele sifune ukwazi kuba uLuka unikela ingxelo yesiluleko sikaYesu esithi: “Zakubon’ ukuba ezi zinto ziyaqala ukuhla, sukani nime, niziphakamise iintloko zenu, ngenxa yokuba iyasondela inkululeko yenu.”—Luka 21:28.
[Imibhalo esemazantsi]
a Iinxalenye zezi zahluko zinokufunyanwa kwisicangca esikwiphepha 14 nele-15; imigca engamachaphaza iphawula amacandelo ahambisanayo.
b Ukuze ufumane ukucatshulwa kwazo ngokwembali ezi ziganeko, bona IMboniselo kaJulayi 15, 1970, iphepha 319-21.
c Igama elithi toʹte livela ngaphezu kwezihlandlo ezingama-80 kuMateyu (izihlandlo ezisi-9 kwisahluko sama-24) yaye livela izihlandlo ezili-15 kwincwadi kaLuka. UMarko wasebenzisa igama elithi toʹte izihlandlo ezithandathu kuphela, kodwa kwezine zezo zihlandlo kubandakanyeke “umqondiso.”
d Umbhali waseBritani uMatthew Henry wagqabaza wathi: “Ukutshatyalaliswa kweYerusalem ngamaKaledi kwakukubi gqitha, kodwa kwakungento xa kuthelekiswa noku. Aphantse atshabalala onke . . . amaYuda.”
e Abaninzi babona ingxelo kaLuka igxininisa kokwahlukileyo emva koLuka 21:24. UGqr. Leon Morris uphawula oku: “UYesu uhlabela mgama athethe ngamaxesha eeNtlanga. . . . Ngokwembono yabaphengululi abaninzi ngoku ingqalelo iguqukela ekuzeni koNyana womntu.” UNjingalwazi R. Ginns uyabhala: “Ukuza KoNyana Womntu—(Mat 24:29-31; Mar 13:24-27). Ukukhankanywa ‘kwamaxesha eeNtlanga’ kuyintshayelelo yalo mbandela; imbono [kaLuka] ngoku idlulela ngaphaya kokutshatyalaliswa kweYerusalem iye kwikamva.”
f UNjingalwazi Walter L. Liefeld uyabhala: “Ngokwenene sinako ukuthi oko uYesu wakuxela ngenx’ engaphambili kwenzeka ngamanqanaba amabini: (1) iziganeko zowama-70 A.D. ezazibandakanya itempile kunye (2) nezo zexesha elaliya kufika kamva, ezichazwe ngamazwi afihlakele ngakumbi.” Amagqabaza ahlelwe nguJ. R. Dummelow athi: “Inkoliso yeengxaki ezinzima zale ntetho ibalaseleyo iyanyamalala xa kuqondwa ukuba iNkosi yethu kuyo yayingabhekiseli kwisiganeko esinye kodwa kwezibini, yaye esokuqala sasifuzisela esesibini. . . . Esama-21:24 [kuLuka] ngokukodwa, esithetha ‘ngamaxesha eeNtlanga,’ . . . sibonisa ixesha elide phakathi kokuwa kweYerusalem nokuphela kwehlabathi.”
Uyakhumbula Na?
◻ Impendulo kaYesu kumbuzo okuMateyu 24:3 yazaliseka njani ukuya kutsho kowama-70 C.E.?
◻ Ukusetyenziswa kwegama elithi toʹte kusinceda njani sisiqonde isiprofeto sikaYesu?
◻ Ngenkulungwane yokuqala yayikho ngayiphi ingqiqo “imbandezelo enkulu” engazange ibekho ngaphambili?
◻ ULuka ubhekisela kweziphi iinkalo ezimbini ezikhethekileyo zesiprofeto sikaYesu ezisibandakanyayo namhlanje?
◻ Ziintoni ezibonisa ukuba kukho ukuzaliseka kwesibini okukhulu ngakumbi kwesiprofeto esikuMateyu 24:4-22?
[Isicangca esikwiphepha 14, 15]
4 “UYesu wathi kubo, Lumkani ningalahlekiswa mntu. 5 Kuba baninzi abaya kuza egameni lam, besithi banguKristu, balahlekise into eninzi. 6 Niya kuthi ke nive iimfazwe namarhe eemfazwe; lumkani ningabi navuso, kuba zonke ezo zinto zimele ukuhla; kanti kona ukuphela akukabikho.
7 “Kuba uhlanga luya kuvukelana nohlanga, nobukumkani buvukelane nobukumkani; kuya kubakho iindlala, . . . nezinyikimo zomhlaba kwiindawo ngeendawo. 8 Zonke ke ezo zinto zikukuqaleka kwenimba.
9 “[“Baya kwandula ke abantu baninikele,” NW] ekubandezelweni, banibulale; niya kuthiywa ziintlanga zonke ngenxa yegama lam. 10 [“Bandule ke babe,” NW] baninzi abaya kukhutyekiswa, banikelane, bathiyane. 11 Kwaye kuya kuvela abaprofeti ababuxoki babe baninzi, balahlekise abantu abaninzi. 12 Nangenxa yokwanda kokuchasa umthetho, luya kuphola uthando lwabaninzi. 13 Ke onyamezeleyo kwada kwaba sekupheleni, lowo uya kusindiswa. 14 Zaye ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.
-----------------------------------------------------------------
15 “Xa ke ngoko nithe nalibona isikizi lesiphanziso, ekwakuthethwa lona ngoDaniyeli umprofeti, limi endaweni engcwele (olesayo makaqiqe), 16 [“mabandule ke,” NW] abakwelakwaYuda basabele ezintabeni. 17 Ophezu kwendlu makangehli aye kuthabatha into endlwini yakhe; 18 nosentsimini makangabuyeli emva aye kuthabatha iingubo zakhe. 19 Yeha ke, abamithiyo nabanyisayo ngaloo mihla! 20 Thandazani ke, ukuba intsabo yenu ingabi khona ebusika nangesabatha. 21 Kuba [“kuya kwandula ke kubekho,” NW] imbandezelo enkulu, ekungazanga kubekho injalo kwasekuqalekeni kwehlabathi, kwada kwaba kalokunje, ekungasayi kubuye kubekho injalo. 22 Kanjalo ukuba ibingayi kuthi loo mihla inqanyulelwe, bekungayi kubakho nyama isindayo; ngenxa ke yabanyuliweyo, loo mihla iya kunqanyulelwa.
-----------------------------------------------------------------
23 “[“Kwandule ke,” NW], ukuba ubani uthe kuni, Nanku apha uKristu, nokuba uthe, Nankuya phaya, musani ukukholwa. 24 Kuba kuya kuvela ooKristu ababuxoki, nabaprofeti ababuxoki, benze imiqondiso emikhulu nezimanga, ngokokude bathi, ukuba bekunokwenzeka, balahlekise nabanyuliweyo. 25 Yabonani, ndinixelele ngenxa engaphambili. 26 Ukuba ngoko bathi kuni, Nanko entlango, musani ukuphuma niye. Nokuba bathi, Nanko emagumbini, musani ukukholwa. 27 Kuba kwanjengokuba umbane uthi uphume empumalanga, ubonakale kude kuse entshonalanga, kuya kuba njalo nokufika [“ubukho,” NW] koNyana woMntu. 28 Kuba apho sukuba sikhona isidumbu, aya kuhlanganisana khona amaxhalanga.
-----------------------------------------------------------------
-----------------------------------------------------------------
29 “Kwaoko ke, emveni kwembandezelo yaloo mihla, ilanga liya kwenziwa mnyama, ithi nenyanga ifiphale, zithi neenkwenkwezi ziwe ezulwini, athi namandla amazulu azanyazanyiswe. 30 Uya [“kwandula ke ukubonakala,” NW] umqondiso woNyana womntu ezulwini; [“zandule ke zimbambazele,” NW] zonke izizwe zomhlaba, zimbone uNyana woMntu esiza phezu kwamafu ezulu, enamandla, nobuqaqawuli obukhulu. 31 Wozithuma izithunywa zakhe zasemazulwini, zinexilongo elisandi sikhulu, zihlanganisele ndawonye abanyulwa bakhe, baphume kumacala omane omoya, kuthabathela esiphelweni sezulu, kude kuse kwesinye isiphelo salo.”
5 “Ke uYesu waqala ukuthi, Lumkani ningalahlekiswa bani; 6 kuba baninzi abaya kuza egameni lam, besithi banguye uKristu, balahlekise into eninzi. 7 Xa nithe neva iimfazwe namarhe eemfazwe, musani kuba navuso; kuba ezo zinto zimelwe kukuhla, ukanti kona ukuphela akukabikho.
8 “Kuba uhlanga luya kuvukelana nohlanga, nobukumkani buvukelane nobukumkani; kuya kubakho iinyikima zomhlaba kwiindawo ngeendawo; kuya kubakho neendlala neenkathazeko; ziingqaleko ke zenimba ezo.
9 “Zilumkeleni ke okwenu; kuba baya kuninikela ezintlanganisweni zamatyala, nityatyulwe ezindlwini zesikhungu, nimiswe phambi kwabalawuli nookumkani ngenxa yam, kube bubungqina kubo. 10 Kumele ukuthi ke ukuqala kuvakaliswe iindaba ezilungileyo ezi kuzo zonke iintlanga. 11 Xa sukuba ke benirhola beya kuninikela, musani ukuyixhalela kwangaphambili into eniya kuyithetha, ningacamangi nokucamanga nto. Into enithe nayinikwa ngelo xa, thethani yona; kuba asinini enithethayo, nguMoya oyiNgcwele. 12 Ke kaloku, umzalwana uya kunikela umzalwana ekufeni, aze uyise anikele umntwana, bathi nabantwana bavukelane nabazali, bababulalise; 13 nithiywe ngabantu bonke, ngenxa yegama lam. Ke onyamezelayo kude kube sekupheleni, lowo wosindiswa.
-----------------------------------------------------------------
14 “Ke kaloku, xa nithe nalibona isikizi lesiphanziso, ekwakuthethwa lona ngoDaniyeli umprofeti, limi apho lingamele kuba khona (olesayo makaqiqe), [“mabandule ke,” NW] abo bakwaYuda basabele ezintabeni. 15 Ophezu kwendlu ke makangehli aye endlwini, angangeni aye kuthabatha into endlwini yakhe. 16 Nalowo usentsimini makangabuyeli emva, aye kuthabatha ingubo yakhe. 17 Yeha ke abamithiyo nabanyisayo ngaloo mihla! 18 Thandazani ke, ukuze intsabo yenu ingabi khona ebusika. 19 Kuba yona loo mihla iya kuba yimbandezelo, engazanga ibekho enjalo kwasekuqalekeni kwendalo awayidalayo uThixo, kwada kwakalokunje; engasayi kubuya ibekho. 20 Kanjalo ukuba iNkosi ibingayinqamlelanga loo mihla, bekungayi kubakho mntu usindayo; koko ithe ngenxa yabanyulwa ebanyulileyo, yayinqamlela imihla leyo.
-----------------------------------------------------------------
21 “[“Kwandule ke,” NW], ukuba ubani uthe kuni, Nanku apha uKristu, nokuba uthe, Nankuya phaya, musani ukukholwa nguye; 22 kuba kuya kuvela ooKristu ababuxoki, nabaprofeti ababuxoki, benze imiqondiso nemimangaliso yokulahlekisa nabanyuliweyo, ukuba bekunokwenzeka. 23 Lumkani ke nina; yabonani, ndinixelele izinto zonke ngenxa engaphambili.
-----------------------------------------------------------------
-----------------------------------------------------------------
24 “Ngaloo mihla, emveni kwayo loo mbandezelo, liya kusuka ilanga lenziwe mnyama, ithi nenyanga ingabukhuphi ubumhlophe bayo; 25 zithi neenkwenkwezi zezulu zivuthuluke; athi namandla asemazulwini azanyazanyiswe. 26 Baya [“kwandula ke ukumbona,” NW] uNyana woMntu esiza esemafini, enamandla amakhulu nobuqaqawuli. 27 Uya [“kwandula ke ukuzithuma,” NW] izithunywa zakhe, abahlanganisele ndawonye abanyulwa bakhe, baphume kumacala omane omoya, kuthabathela esiphelweni sehlabathi kuse esiphelweni sezulu.”
8 “Wathi ke yena, Lumkani ningalahlekiswa; kuba baninzi abaya kuza egameni lam, besithi, banguye uKristu; ewe, ixesha lisondele; ngoko musani ukubalandela. 9 Xa nithe neva iimfazwe neziphithiphithi, musani ukunkwantya; kuba ezo zinto zimele ukuthi zihle kuqala; sona ke isiphelo asiyi kuba kwaoko.
10 “Wandula wathi kubo, Uhlanga luya kuvukelana nohlanga, nobukumkani buvukelane nobukumkani. 11 Kuya kubakho iinyikima zomhlaba ezinkulu kwiindawo ngeendawo, neendlala, neendyikitya zokufa; kuya kubakho izinto ezoyikekayo, kwanemiqondiso emikhulu evela ezulwini.
12 “Ngaphambili ke kwazo zonke ezo zinto, baya kunisa izandla, banitshutshise, beninikela ezindlwini zesikhungu nasezintolongweni, nisiwe phambi kookumkani neerhuluneli ngenxa yegama lam. 13 Oko ke kuya kuthi kube bubungqina kuni. 14 Kumiseni ngoko ezintliziyweni zenu, ukuba ningakucingi ngaphambili ukuziphendulela. 15 Kuba mna ndiya kuninika umlomo nobulumko, abangayi kuba nako ukubuphikisa nokumelana nabo, bonke abanichasileyo. 16 Ke kaloku niya kunikelwa nangabazali, nangabazalwana, nayimizalwane, nazizihlobo, kubekho nabababulalayo kuni; 17 nithiywe ngabantu bonke ngenxa yegama lam. 18 Akusayi kutshabalala nonwele olu entlokweni yenu. 19 Ekunyamezeleni kwenu noyizuza imiphefumlo yenu.
-----------------------------------------------------------------
20 “Xa nithe nayibona iYerusalem irhawulwe yimikhosi, [“nandule ke nazi,” NW] ukuba kusondele ukuphanza kwayo. 21 [“Mabandule ke,” NW] abakwelakwaYuda basabele ezintabeni, nabo baphakathi kwayo mabaphume bemke, nabo basemaphandleni mabangangeni kuyo. 22 Ngokuba yimihla yempindezelo leyo, ukuze kuzaliseke konke okubhaliweyo. 23 Yeha ke, abamithiyo nabanyisayo ngaloo mihla; kuba kuya kubakho ingxakeko enkulu phezu kwawo umhlaba, nengqumbo kwaba bantu; 24 bawe ngohlangothi lwekrele, bathinjwe, basiwe kuzo zonke iintlanga,
-----------------------------------------------------------------
neYerusalem inyathelelwe phantsi ziintlanga, ade azaliseke amaxesha eentlanga.
-----------------------------------------------------------------
-----------------------------------------------------------------
25 “Kuya kubakho imiqondiso elangeni nasenyangeni nasezinkwenkwezini; nasemhlabeni kubekho ukuxinezeleka kweentlanga, zithingaza; lugquma ulwandle namaza; 26 abantu besifa kukoyika nakukulindela izinto ezilizelayo elimiweyo; kuba amandla ezulu aya kuzanyazanyiswa. 27 Baya kwandula ke ukumbona uNyana woMntu, esiza ngelifu, enamandla nobuqaqawuli obukhulu. 28 Ke kaloku, zakubon’ ukuba ezi zinto ziyaqala ukuhla, sukani nime, niziphakamise iintloko zenu, ngenxa yokuba iyasondela inkululeko yenu.”
[Umfanekiso okwiphepha 10]
Imbandezelo yowama-70 C.E. yayiyeyona inkulu yakha yenzeka eYerusalem nakwinkqubo yamaYuda