Ubomi Nobulungiseleli BukaYesu

Umqondiso wemihla yokugqibela

NGOKU kusemva kwemini ngoLwesibini. Njengoko uYesu ehleli kwiNtaba yeMinquma, ekhangele kwitempile esezantsi kwakhe, uPetros, uAndreya, uYakobi noYohane beza kuye ngasese. Baxhalabele itempile, ekubeni uYesu esandul’ ukuprofeta esithi’akusayi kusala litye phezu kwelitye kuyo.’

Kodwa ngokucacileyo banokungakumbi ezingqondweni zabo njengoko besiya kuYesu. Kwiiveki ezimbalwa ngaphambilana, uye wathetha ‘ngobukho,’ bakhe ngexesha “atyhileka ngalo uNyana womntu.” Yaye kwisihlandlo esingaphambilana, ubaxelele ‘ngokupheliswa kwephakade eli.’ Ngoko abapostile bafuna ukuqonda.

Bathi, “Sixelele ukuba ziya kubakho nini na ezo zinto [zikhokelela ekutshatyalalisweni kweYerusalem netempile yayo]; uya kuba yini na umqondiso wokufika kwakho, nowokupheliswa kwephakade eli?” Enyanisweni, umbuzo wabo untluntathu. Okokuqala, bafuna ukwazi ngokupheliswa kweYerusalem netempile yayo, emva koko malunga nokufika kukaYesu ekumandla oBukumkani, yaye okokugqibela ngokupheliswa kwayo yonke le nkqubo yezinto.

Kwimpendulo yakhe ende, uYesu uziphendula zontathu ezi nxalenye zalo mbuzo. Unikela umqondiso obonakalisa ixesha lokupheliswa kwenkqubo yezinto yamaYuda; kodwa ubaxelela okungakumbi. Kwakhona unikela umqondiso owawuya kubenza bakuphaphele abafundi bakhe bexesha elizayo ukuba baphila ebudeni bexesha lobukho bakhe nasekupheleni kwayo yonke le nkqubo yezinto.

Njengoko iminyaka iqengqeleka, abapostile baqalisa ukuphawula ukuzaliseka kwesiprofeto sikaYesu. Ewe, kanye ezo zinto wayezixele kwangaphambili ziqalisa ukwenzeka kwimihla yabo. Ngaloo ndlela, amaKristu aphila kwiminyaka engama-37 kamva, ngowama-70 C.E., ayiwafikelanga engalindele intshabalalo yenkqubo yamaYuda netempile yayo.

Noko ke, ubukho bukaKristu nokupheliswa kwenkqubo yezinto akwenzeki ngowama-70 C.E. Ubakho kumandla akhe oBukumkani emva kwethuba elide kamva. Kodwa nini? Ukuqwalaselwa kwesiprofeto sikaYesu kuyakutyhila oku.

UYesu uxela kusengaphambili ukuba kuya kubakho “iimfazwe namarhe eemfazwe.” “Uhlanga luya kuvukelana nohlanga,” yaye kuya kubakho iindlala, iinyikima zomhlaba neendyikitya zokufa. Abafundi bakhe babeya kuthiywa baze babulawe. Kwakuya kuvela abaprofeti ababuxoki baze balahlekise abaninzi. Ukuchasa umthetho kwakuya kwanda, yaye uthando lwabaninzi lwaluya kuphola. Kwangaxeshanye, iindaba ezilungileyo zoBukumkani bukaThixo ziya kushunyayelwa kulo lonke elimiweyo zibe bubungqina kuzo zonke iintlanga.

Nangona isiprofeto sikaYesu sazaliseka ngomlinganiselo othile ngaphambi kokutshatyalaliswa kweYerusalem ngowama-70 C.E., ukuzaliseka kwaso okuyintloko kuqhubeka ebudeni bobukho bakhe nokupheliswa kwale nkqubo yezinto. Ukuphinda sizihlolisise ngenyameko iziganeko zehlabathi ukususela ngowe-1914 kutyhila ukuba iziprofeto zikaYesu zamanqam bezizaliseka ngokuyintloko ukususela ngaloo nyaka.

Enye inxalenye yomqondiso eyanikelwa nguYesu kukubonakala ‘kwesikizi lesiphanziso.’ Ngowama-66 C.E. eli sikizi lesiphanziso labonakala ngokohlobo’lwemikhosi yokurhawula’ yaseRoma eyarhangqa iYerusalem yaza yaludiliza udonga lwetempile. “Isikizi” lalime kwindawo elalingamele kuma kuyo.

Kwinzaliseko eyintloko yalo mqondiso, isikizi lesiphanziso liluManyano Lwezizwe nelandela lalo, iZizwe Ezimanyeneyo. Le ntlangano yoxolo lwehlabathi igqalwa yiNgqobhoko njengemela uBukumkani bukaThixo. Elinjani lona isikizi! Ngoko ke, ngexesha elifanelekileyo, amagunya ezobupolitika anxulumene neZizwe Ezimanyeneyo aya kuyijikela iNgqobhoko (efuziselwa yiYerusalem) yaye aya kuyiphanzisa.

Ngaloo ndlela uYesu waxela kwangaphambili esithi: “Kuya kubakho imbandezelo enkulu, ekungazanga kubekho injalo kwasekuqalekeni kwehlabathi, kwada kwaba kalokunje, ekungasayi kubuye kubekho injalo.” Ngoxa ukutshatyalaliswa kweYerusalem ngowama-70 C.E. enyanisweni kwakuyimbandezelo enkulu, ekwabulawa kuyo abantu abangaphezu kwesigidi, yayingeyombandezelo inkulu engaphezu koMkhukula wehlabathi lonke womhla kaNowa. Ngoko ukuzaliseka okuyintloko kwale nxalenye yesiprofeto sikaYesu kuseza kwenzeka. Mateyu 24:2-22; 13:40, 49; Marko 13:3-20; Luka 21:7-24; 19:43, 44; 17:20-30; 2 Timoti 3:1-5.

◆ Yintoni ephembelela umbuzo wabapostile, kodwa ngokucacileyo yintoni enye abanayo ezingqondweni zabo?

◆ Yiyiphi inxalenye yesiprofeto sikaYesu eyazalisekiswa ngowama-70 C.E., kodwa yintoni engazange yenzeke ngoko?

◆ Isiprofeto sikaYesu saba nayiphi inzaliseko yokuqala, kodwa sizaliseka nini ngokuyintloko?

◆ Liyintoni isikizi lesiphanziso kwinzaliseko yalo yokuqala neyokogqibela?

◆ Kwakutheni ukuze imbandezelo enkulu ingabi nenzaliseko yayo yokugqibela ngokutshatyalaliswa kweYerusalem?