Musa Ukusondela Xa Kusenokubakho Ingozi

BAMBALWA abantu abayiphaphele ngaphezu koomatiloshe ingozi. Bamele bahlale beyiphaphele imozulu, amaza, nendlela esondele ngayo inqanawa yabo elunxwemeni. Xa amaza kunye nomoya ududulela inqanawa ngaselunxwemeni, oomatiloshe bajongana nomsebenzi onzima yaye baba sengozini.

Phantsi kwezi meko—ezibizwa ngokuba kukubhudlela komoya ngaselunxwemeni—umatiloshe uhlala egcine umgama omkhulu phakathi kwesikhephe sakhe nonxweme, ngokukodwa ukuba isikhephe eso sihamba ngokuqhutywa ngumoya kuphela. Incwadi enika imiyalelo yokuqhuba inqanawa ithi ‘ukufunyanwa luqhwithela olubhudlela ngaselunxwemeni mhlawumbi yeyona ngxaki inkulu’ asenokuzifumanisa ekuyo umatiloshe. Kucetyiswa ntoni? ‘Ungaze usivumele isikhephe sakho sibe kwingxaki enjalo.’ Eyona ndlela ikhuselekileyo yokukuphepha ukuntlitheka kwisidibi sentlabathi okanye kunxweme olunamatye kukuhlala ukude kwindawo enengozi.

AmaKristu amele ahlale eziphaphele iingozi ezinokuwenza ophukelwe ngumkhombe wokholo lwawo. (1 Timoti 1:19) Kule mihla, iimeko azintle kwaphela ukuba ubani angahlala ehamba ngekhondo elithe tye. Kanye njengokuba isikhephe sisenokuphambukiswa ngumoya kwanamaza, ngokufanayo ubomi bethu bokuzahlulela bunokuphambuka ngenxa yomlo ongapheliyo esikuwo nenyama yethu engafezekanga nokusoloko sihlohlwa umoya weli hlabathi—ngoku ophantse ufane noqhwithela oluze ngamandla.

Indoda Eyayiphila Ubomi Obusengozini

Hayi indlela ekulula ngayo ukuzibona sele usemanzini okomoya ayingozi!

Khawucinge ngomzekelo woko kwenzeka kufuphi namanzi amaninzi aphakathi kweenduli, uLwandle Olufileyo. Sithetha ngomzekelo kaLote. Isigqibo awasenzayo sokuhlala eSodom samzisela iingxaki ezininzi kwanosizi olungathethekiyo. Emva kwengxabano eyayiphakathi kwabalusi babo, uAbraham noLote bavumelana kwelokuba bahlale kwimimandla eyahlukahlukeneyo. Sixelelwa ukuba, uLote wakhetha ukuhlala kuMmandla waseYordan waza wamisa intente yakhe phakathi kwezixeko zaloo Mmandla. Kamva, wakhetha ukuhlala eSodom, nakubeni indlela ababephila ngayo abantu baseSodom yayimenza buhlungu.—Genesis 13:5-13; 2 Petros 2:8.

Kwakutheni ukuze uLote aqhubeke ehlala kweso sixeko sidume ngokuziphatha kakubi esasimcaphukisa kakhulu uYehova nesaside sibangele isimbonono kubantu abahlala kufutshane naso? ISodom yayisisixeko esinobutyebi, yaye ngokungathandabuzekiyo umfazi kaLote wayezinandipha iingenelo zezinto eziphathekayo zokuphila zeso sixeko. (Hezekile 16:49, 50) Mhlawumbi noLote wayetsalwa yimeko yezoqoqosho ehambele phambili yaseSodom. Enokuba sasiyintoni na isizathu sokuhlala kwakhe apho, ngewayemke ngokukhawuleza kunokuba wenzayo. Kuphela ngumyalelo ongxamisekileyo wezithunywa zezulu zikaYehova owabangela ukuba ekugqibeleni intsapho kaLote isabe kummandla onengozi.

Ingxelo yeGenesis ithi: “Izithunywa zamngxamisa uLote ngesifingo, zathi, Vuka, thabatha umkakho, neentombi zakho zombini, aba banokufumaneka, hleze ubhebhethwe ngobugwenxa balo mzi.” Kodwa kwanasemva kweso silumkiso singxamisekileyo, uLote “wazilazila.” Ekugqibeleni izithunywa zezulu ‘zabamba isandla sakhe, nesandla somkakhe, nesandla seentombi zakhe zombini; uYehova emvela, zamkhupha, zamyeka, ngaphandle komzi.’—Genesis 19:15, 16.

Bakuphumela ngaphandle kwesixeko, izithunywa zezulu zanikela imiyalelo yokugqibela kwintsapho kaLote: “Zisindise ngenxa yomphefumlo wakho. Musa ukubheka emva kwakho, musa ukuma kuwo wonke lo mmandla; zisindise ngokuya entabeni, hleze ubhebhethwe.” (Genesis 19:17) Nangelo xesha, uLote wacela ukuba avunyelwe aye kwisixeko esikufuphi sakwaTsohare kunokuba awushiye ngokupheleleyo loo mmandla. (Genesis 19:18-22) Ngokucacileyo, uLote wayemadolw’ anzima ukuhambela kude kangangoko kunokwenzeka kwindawo enengozi.

Besendleleni esinge kwaTsohare, umfazi kaLote wakhangela ngasemva kwisixeko saseSodom, ngokucacileyo elangazelela izinto awayezishiye ngasemva. Ngenxa yokungayisi so imiyalelo yezithunywa zezulu, waphulukana nobomi bakhe. ULote—indoda elilungisa—ekunye neentombi zakhe wasinda kwintshabalalo yeso sixeko. Kodwa onjani wona umvuzo awawufumanayo ngokukhetha ukuhlala kufuphi nendawo enengozi!—Genesis 19:18-26; 2 Petros 2:7.

Hambela Kude Nendawo Eyingozi

Amava abuhlungu kaLote abonisa oko kunokwenzeka ukuba siyasondela okanye siyaziziliza ukumka kwimeko eyingozi. Ukuba nobulumko kuya kusenza, njengoomatiloshe abanobuchule, singaze sizivumele sibe sengxakini enjalo. Ziziphi ezinye iinkalo eziyingozi esifanele sihlalele kude nazo? Wambi amaKristu aye akhukuliseka ngenxa yokubandakanyeka kakhulu kwimisebenzi yezoshishino, ngokuhlakulela ubuhlobo obusondeleyo nezinxulumani zehlabathi, okanye ngokutsaleleka ngokweemvakalelo kumntu wesini esahlukileyo ngoxa bengakulungelanga ukutshata.

Kwimeko nganye kwezi, ikhondo lobulumko kukuzigcina sikude kwindawo eyingozi. Ngokomzekelo, ngaba siziphaphele iingozi zokomoya ezinokubangelwa koko kubizwa ngokuba ngamathuba ancumisayo ebesinokuwaphathelwa zezoshishino? Bambi abazalwana baye bazibhokoxa kwezoshishino nto leyo ebangele ukuba balahlekelwe ziintsapho zabo, yimpilo yabo neembopheleleko zabo zobuthixo. Maxa wambi umgibe uba yindlela imali enokubangela ubani aphile ubomi obutofo-tofo ngayo. Ngamanye amaxesha iba lucelomngeni lokuvavanya ubuchule babo kwezoshishino. Bambi basenokuqiqa ngelithi intshukumisa yabo kukuqesha abanye abazalwana okanye kukuba bakwazi ukunikela ngokuyintabalala ngakumbi kumsebenzi owenziwa ehlabathini ngokubanzi. Mhlawumbi bacinga ukuba xa ishishini labo liqhuba kakuhle, baya kuba nexesha elingakumbi lezilangazelelo zoBukumkani.

Yiyiphi eminye yale migibe? Imeko engazinzanga yezoqoqosho kunye ‘nesihlo’ zinokuwutshonisa umsebenzi weshishini ocetywe kakuhle. (INtshumayeli 9:11) Ukulwisana namatyala amakhulu kunokubangela intlungu yaye kusenokuthabathel’ indawo imicimbi yokomoya. Kwanaxa ishishini liqhuba kakuhle, kusenokwenzeka ukuba liya kuthabatha ixesha elininzi namandla akho okucinga, yaye lisenokubangela ukuba unxulumane kakhulu nabantu behlabathi.

Omnye umdala ongumKristu waseSpeyin wayesengxakini enkulu kakhulu engokwemali xa inkampani yeinshorensi yamthembisa ngomsebenzi onomtsalane. Nangona ayekho amathemba okwenza imali eninzi njengommeli weinshorensi ozisebenzelayo, ekugqibeleni wasikhaba ngawo omane eso sicelo. Uthi: “Kwakungelula ukwenza eso sigqibo, kodwa ndivuyiswa kukuba andizange ndivume. Phakathi kwezinye izinto, ndandingathandi ukwenza imali—kwanangendlela engangqalanga—kubantu endikhonza kunye nabo. Yaye nangona ndandiyithanda loo mbono yokuzisebenzela, kwakuza kufuneka ndihambe umgama omde ndize ndichithele ixesha elininzi kuloo msebenzi. Ngokuqinisekileyo oko kwakuya kuthetha ukuyityeshela intsapho yam nebandla. Ngaphezu kwako konke, ndeyisekile kukuba ukuba ndandisamkele eso sicelo, ngendandingazange ndikwazi ukubulawula ubomi bam.”

Akakho umKristu ofuna ukungakwazi ukulawula ubomi bakhe. UYesu wabonisa imiphumo eyintlekele yokuthabatha ikhondo elinjalo ngokubalisa umzekeliso wendoda eyaqokelela ubutyebi obuninzi ukuze iphumle ize iphile ubomi obungenazingxaki. Kodwa kwangobusuku eyafikelela ngabo kwisigqibo sokuba ekugqibeleni yayiziqwebele imali eyaneleyo, yamnabel’ uqaqaqa. UYesu walumkisa, “Unjalo lowo uziqwebela ubutyebi, engenabutyebi kuThixo.”—Luka 12:16-21; thelekisa uYakobi 4:13-17.

Kwakhona simele sihlale sikulumkele ukunxulumana ngokugqithiseleyo nabantu behlabathi. Mhlawumbi isenokuba ngummelwane, umhlobo ofunda naye, umntu osebenza naye, okanye umntu okunye naye eshishinini. Sisenokuqiqa ngelithi, ‘Uyawahlonela amaNgqina, uziphethe kakuhle yaye ngezihlandlo ezithile siyathetha ngenyaniso.’ Sekunjalo, amava abanye abonise ukuba ekuhambeni kwexesha sisenokude sizifumanise sikhetha ukunxulumana nomntu onjalo wehlabathi kunokunxulumana nomzalwana okanye udade wethu wokomoya. Ziziphi ezinye zeengozi ezinokubangelwa bubuhlobo obunjalo?

Sisenokuqalisa ngokuluthabatha lula ungxamiseko lwamaxesha esiphila kuwo okanye sibe nomdla ngakumbi kwizinto eziphathekayo kunezinto zokomoya. Mhlawumbi, ngenxa yokoyika ukungamkholisi umhlobo wethu wehlabathi, siya kude sinqwenele ukwamkeleka ehlabathini. (Thelekisa eyoku-1 kaPetros 4:3-7.) Kwelinye icala, umdumisi uDavide wakhetha ukunxulumana nabantu abathanda uYehova. Wabhala oku, “Ndiya kulazisa igama lakho kubazalwana bam, ndikudumise phakathi kwebandla.” (INdumiso 22:22) Siya kukhuseleka ukuba sixelisa umzekelo kaDavide, sifune ubuhlobo nabantu abanokusakha ngokomoya.

Elinye ikhondo eliyingozi kukutsaleleka ngokweemvakalelo kumntu wesini esahlukileyo ngoxa ubani engakulungelanga ukutshata. Ingozi isenokuvela xa ubani etsaleleka kuthile onomtsalane, oncokola kamnandi nonoburharha nesimo sengqondo esifanayo. Ubani usenokukunandipha ukuba kunye naye, eqiqa ngelithi, ‘Ndiyakwazi endimele ndikwenze nendimele ndingakwenzi. Singabahlobo nje kuphela.’ Sekunjalo, zakuvuseleleka iimvakalelo akuyondlwan’ iyanetha ukuzilawula.

UMary, udade oselula otshatileyo, wayekunandipha ukuba kunye noMichael.a Wayengumzalwana olungileyo kodwa kwakunzima ukuba azenzele abahlobo. Babenezinto ezininzi abafana ngazo, yaye babefumanisa ukuba banokuqhulana. UMary wayeyivuyela ingcamango yokuba lo mzalwana ungatshatanga wayezityand’ igila kuye. Kungekudala, oko kwakubonakala kububuhlobo obumsulwa kwaba kukutsaleleka okunzulu ngokweemvakalelo. Baqalisa ukuchitha ixesha elininzi ngakumbi kunye baza ekugqibeleni babandakanyeka ekuziphatheni okubi. Enesingqala uMary uthi, “Ndandimele ukuba ndiyiqonde kwasekuqaleni ingozi. Bathi bakukhula ubuhlobo, bafana nomgxobhozo wentlabathi owaya usitshonisa ngokunzulu ngakumbi.”

Masingaze sisilibale isiluleko seBhayibhile esithi: “Intliziyo inenkohliso ngaphezu kweento zonke, . . . ngubani na onokuyazi?” (Yeremiya 17:9) Intliziyo yethu enenkohliso, njengamaza aqhubela isikhephe esiqhutywa ngeseyile ematyeni, inokusiqhubela kulwalamano lokweemvakalelo olubangela intlekele. Siyintoni isicombululo? Ukuba awukulungelanga ukutshata, cinga ngokusebenzela ukugcina iimvakalelo zakho zikude kulowo unomtsalane kuye.—IMizekeliso 10:23.

Ukuzikhulula Nokuzigcina Ukude Nengozi

Kuthekani ukuba sizifumanisa sesisengozini yokomoya? Oomatiloshe, xa umoya namaza ubadudulela ngaselunxwemeni olunamatye, bazabalazela ukuyiqhubela phakathi elwandle inqanawa yabo, okanye bayijikele ngakwicala oza ngakulo umoya, de bafike emanzini azolileyo. Ngokufanayo, simele sizabalazele ukuzikhulula. Ngokuthobela isiluleko seZibhalo, ngokunyanisekileyo sithandazele uncedo lukaYehova size sifune uncedo kubazalwana abangamaKristu aqolileyo, sinokubuyela kwikhondo elikhuselekileyo. Kwakhona siya kusikelelwa ngoxolo lwengqondo nolwentliziyo.—1 Tesalonika 5:17.

Enokuba iimeko zethu ziyintoni na, senza ngobulumko ukuzinxwema ‘kwizinto zehlabathi.’ (Galati 4:3, NW) Ngokwahlukileyo kuLote, uAbraham wakhetha ukuhlala kude namaKanan awayethanda izinto zehlabathi, kwanaxa oko kwakuthetha ukuhlala ezintenteni kangangeminyaka emininzi. Mhlawumbi wayengenazo izinto ezithile ezibubunewunewu bezinto eziphathekayo, kodwa indlela yakhe yokuphila eqhelekileyo yamkhusela ngokomoya. Kunokuba aphukelwe ngumkhombe wokholo lwakhe, waba nguyise “wabo bonke abakholwayo.”—Roma 4:11.

Njengoko singqongwe leli hlabathi lizingcayo ‘elimoya’ walo ubhudla ngamandla, simele silandele umzekelo kaAbraham. (Efese 2:2) Ukuba siyavuma uYehova asikhokele kuyo yonke imicimbi, uya kusisikelela ngokusikhusela ngokunothando. Siya kuvakalelwa ngendlela awayevakalelwa ngayo uDavide xa wathi: “Uyawubuyisa umphefumlo wam; undikhaphela ezindleleni zobulungisa ngenxa yegama lakhe. Inene, ndiya kulandelwa kokulungileyo nenceba yonke imihla yobomi bam, ndihlale endlwini kaYehova imihla emide.” Alithandabuzeki elokuba, ukuhamba “ezindleleni zobulungisa,” kunokutyekela ezindleleni eziyingozi, kuya kukuzisela iintsikelelo ezingunaphakade.—INdumiso 23:3, 6.

[Umbhalo osemazantsi]

[Umfanekiso okwiphepha 24]

Ukuba awukulungelanga ukutshata, gcina iimvakalelo zakho zikude kuthile onomtsalane kuye