Abavakalisi BoBukumkani Bayabalisa
“UThixo Akamkhethi Wabuso Bamntu”
KWIMINYAKA engamakhulu alishumi elinesithoba eyadlulayo, umpostile ophefumlelweyo uPetros wabhala: “UThixo akamkhethi wabuso bamntu; kwiintlanga zonke, lowo umoyikayo, asebenze ubulungisa, wamkelekile kuye.” (IZenzo 10:34, 35) Phakathi kwamaNgqina kaYehova kukho abantu bazo zonke iintlanga neemvelaphi zonqulo. Banqwenela ubulungisa, yaye bayamoyika uThixo. Bonke aba uYehova ubamkelela kwibutho lehlabathi elitsha, ngokomzekelo, njengoko wenzayo komnye umfazi waseChad.
Lo mfazi wayenganelisekanga lunqulo lwakhe. Kwiminyaka ethile ngaphambilana wayefumene incwadi ethi Ubutsha Bakho—Ukufumana Okona Kulungileyo Kubo, epapashwe ngamaNgqina kaYehova, waza wasixabisa isiluleko esihle esasikuloo ncwadi. Kwaqaliswa isifundo seBhayibhile, yaye wayesoloko efumaneka ngamathuba okufundisisa. Noko ke, xa wayekhuthazelwa ukuya kwiintlanganiso kwiHolo yoBukumkani, wayengavumi. Kwakutheni? Nangona umyeni wakhe wayengakuchasanga ukuba afundisise, wayengamvumeli ukuba aye kwiintlanganiso kwiHolo yoBukumkani.
Xa lo mfazi wayefuna ukuya kwindibano yesiphaluka, iNgqina elalimqhubela isifundo labonisa umyeni wakhe ucwangciso, libalaselisa isiluleko esihle esasiza kunikelwa kuloo ndibano. Wamvumela umfazi wakhe ukuba aye “nje kube kanye.” Waya yaye walunandipha gqitha ucwangciso. Emva kokuba echazele umyeni wakhe ngoko akufundileyo, wamvumela ukuba aye nakwezinye iintlanganiso. Wachukunyiswa sisibakala sokuba ibandla libunjwe ngabantu beentlanga ezahlukeneyo abakhathalelene ngokunzulu. Kamva waya kwindibano yesithili yaye wamangaliswa kukubona abantwana bakhe besingathwe ngamaNgqina asuka kwamanye amazwe. La maNgqina ayesitya nabo yaye ebaphethe njengentsapho yawo. Le yeyona nto yambangela ukuba aguquke.
Kodwa emva koko kwabakho inkcaso. Nangona wayeneentloni ngokwemvelo, waqalisa ukugqabaza kwiintlanganiso yaye emelana ngenkalipho namazwi enkcaso avela kwizalamane nakubamelwane bakhe. Nangona wayehleli iminyaka emininzi nomyeni wakhe, babetshate isintu kuphela. Wayeza kuwuqala ngaphi umbandela wokuba batshate ngokusemthethweni? Emva kokuba ezityande igila kuYehova ngomthandazo, wathetha nomyeni wakhe, owathi wayeza kukhe akuhlolisise oko. Ekugqibeleni wavuma, yaye eso sibini satshata ngokusemthethweni.
Indodakazi yakhe eyayihlala nabo yabangela iingxaki ezininzi, kodwa indoda yaba ngakwicala lomfazi wayo. Kwandula ke batyelelwa nguyise womyeni. Wayalela unyana wakhe ukuba ahlukane nomkakhe, njengoko eluguqule unqulo lwakhe. Lo tata wamxelela unyana wakhe ukuba wayeya kuyihlawula ilobola “yomfazi olunge ngakumbi.” Unyana wakhe wamphendula wathi: “Nakanye, andisokuze ndiyenze loo nto. Ungumfazi olungileyo. Ukuba ufuna ukuhamba, leyo yimeko eyahlukileyo, kodwa andisayi kumgxotha.” Umfazi wakhe wayemhlonela kakhulu uyisezala, ibe uyisezala waba neentloni yindlela yena aye waziphatha ngayo. Noko ke, xa wabuyela kwilali ahlala kuyo, wabhalela unyana wakhe, ngesi sihlandlo esenza izisongelo .zokugqibela. Wathi ukuba unyana wakhe akafuni ukumgxotha umkakhe, akasenguye unyana wakhe. Nangesi sihlandlo unyana waba ngakumkakhe. Khawucinge indlela anokuba wavuya ngayo lo mfazi xa ebona ukuba umyeni wakhe akagungqi koko akuthethayo.
Ngoku oonyana babo ababini bayakuthanda ukupheleka unina xa esiya kwiHolo yoBukumkani. Bade bacela amaqhina kuyise, kuba bebona ukuba bonke abazalwana abanikel’ iintetho bayawanxiba. Namhlanje lo mfazi ngudade obhaptiziweyo.
Ungomnye wamaNgqina kaYehova onwabileyo angama-345 aseChad avakalisa iindaba ezilungileyo zoBukumkani bukaYehova nakuqondayo ukuba, ngokwenene, “uThixo akamkhethi wabuso bamntu.”