“Wamangale Amabali Obuxoki”

IBHAYIBHILE izaliswe ngamava namabali angabantu. Asipheleli nje ekunandipheni ukuwafunda kodwa siyangenelwa kuwo. Umpostile uPawulos wabhalela ibandla lamaKristu eRoma: “Izinto zonke ezabhalwayo ngenxa engaphambili, zaye zibhalelwa okwethu ukufundiswa, ukuze sithi ngalo unyamezelo novuselelo lwezibhalo sibe nalo ithemba.”—Roma 15:4.

NoPawulos waba nesabelo ekubaliseni amava. IBhayibhile ithi ngoPawulos noBharnabhas ekuqukunjelweni kohambo lwabo lokuqala lokushumayela: “Befikile ke [kwa-Antiyokwe yelaseSiriya], balihlanganisa ibandla, balibikela oko zingako izinto awazenzayo uThixo enabo.” (IZenzo 14:27) Ngokungathandabuzekiyo abazalwana bakhuthazwa kakhulu ngala mava.

Noko ke, asingawo onke amava akhayo. Ephefumlelwe, uPawulos walumkisa uTimoti: “Wamangale amabali obuxoki ahlambela oko kungcwele nalawo abafazi abadala bawabalisayo.” (1 Timoti 4:7, NW) NoTito wambhalela ukuba amaKristu anyanisekileyo afanele ‘anganyamekeli zintsomi zabuYuda namithetho yabantu abayinikela umva inyaniso.’—Tito 1:14.

Yayingawaphi la mabali obuxoki, okanye iintsomi? Omabini la magama avela kwelesiGrike elithi myʹthos (“intsomi”). IThe International Standard Bible Encyclopaedia ithi eli gama lichaza “ibali (lonqulo) elinganxibelelananga nezinto zokwenene.”

Ihlabathi ngomhla kaPawulos lalizaliswe ngamabali anjalo. Ngokomzekelo kukho incwadi engaphefumlelwanga kaTobit, mhlawumbi eyabhalwa kwiminyaka engaphezu kwamakhulu amabini ngaphambi kwexesha likaPawulos. Eli bali libalisa ngoTobit, umYuda ozinikele elunqulweni, othi atyhaphake xa ubulongwe bentaka buthi buwele emehlweni akhe. Kamva, uthumela unyana wakhe, uTobias, ukuya kuphuthuma intlawulo. Endleleni, ngolwalathiso lwesithunywa sezulu, uTobias ufumana intliziyo, isibindi nenyongo yentlanzi. Ngokulandelayo udibana nomhlolokazi othi, nangona etshatile izihlandlo ezisixhenxe, ahlale enyulu ngenxa yokuba indoda nganye yabulawa yidemon ngobusuku bomtshato. Ngokukhuthazwa sisithunywa sezulu, uTobias utshata naye aze ayigxothe idemon ngokutshisa intliziyo nesibindi sentlanzi. Ngenyongo yentlanzi, uTobias kamva wabuyisela ukubona kukayise.

Ngokucacileyo, eli bali alinabunyaniso. Ngaphandle kokungaqheleki kwalo nokusekeleza kwalo inkolo, linesiphoso. Ngokomzekelo, ingxelo ithi uTobit waba lingqina lemvukelo yezizwe zangasentla nokugxothelwa kwamaSirayeli eNineve, ziganeko ezo ngokwembali yakwaSirayeli ezahlulwa yiminyaka engama-257. Kanti, eli bali lithi uTobit wayeneminyaka eli-112 ubudala ngexesha lokufa kwakhe.—Tobit 1:4, 11; 14:1, The Jerusalem Bible.

Iintsomi ezinjalo zikude ‘kumzekelo wamazwi aphilileyo’ nanobunyaniso owabhengezwa ngabakhonzi abathembekileyo bakaThixo. (2 Timoti 1:13) Ziveliswe yintelekelelo, zichasene nesibakala sembali, nqwa nento ebaliswa ngamaxhegokazi angahloneli Thixo. La ngamabali amaKristu awayemele awamangale.

Ukucikida Amazwi Enyaniso

Maninzi amabali afanayo namhlanje. UPawulos wabhala: “Kuba kuya kubakho ixesha abangayi kuyinyamezela imfundiso ephilileyo; . . . babeya kuzisonga zimke iindlebe kuyo inyaniso, baphambukele ke kuzo iintsomi.” (2 Timoti 4:3, 4) Kwiindawo ezithile zomhlaba, amabali okusebenza kwamandla angaphaya kwemvelo axhaphakile yaye ayathandwa. Ngoko ke, amaKristu ngobulumko ‘ayawacikida amazwi’ amabali onqulo ukuze abone ukuba ayavisisana kusini na neBhayibhile.—Yobhi 12:11, NW.

Ngokucacileyo, amaninzi akanjalo. Ngokomzekelo, kwiindawo ezininzi zehlabathi kuqhelekile ukuva amabali axhasa ingcamango yokuba umphefumlo womntu awufi. La mabali achaza indlela afa ngayo umntu, suka nje abonakale kwakhona ekumzimba wosana olusandul’ ukuzalwa, engumoya, esisilwanyana, okanye engumntu kwindawo eyahlukileyo.

Noko ke, iLizwi likaThixo libonisa ukuba imiphefumlo yabantu asiyiyo engenakufa; imiphefumlo iyafa. (Hezekile 18:4) Ngaphezu koko, iBhayibhile ithi abafileyo abanabo ubomi engcwabeni, abakwazi kucinga, kuthetha, okanye kwenza nantoni na. (INtshumayeli 9:5, 10; Roma 6:23) Ngenxa yoko, abo balukuhlwa ngamabali obuxoki akhuthaza ingcamango yokuba umphefumlo ungongenakufa, njengoko uPawulos watshoyo, ‘bayaphambuka’ kuyo “imfundiso ephilileyo” yeBhayibhile.

Amabali Okusebenza Kwamandla Angaphaya Kwawemvelo

Amanye amabali anikela ingqalelo kwizenzo zamagqwirha. Ngokomzekelo, kwiindawo zaseAfrika kuthiwa la magqwirha axhotyiswe ngamandla amakhulu, ayakwazi ukuziguqula wona okanye abanye babe zizirhubuluzi, iinkawu neentaka; ayakwazi ukuphaphazela emoyeni ukuze afeze uthumo lwawo; ayakwazi ukuthi gqi abuye athi shwaka; ayakwazi ukungena kuvaliwe; yaye ayakwazi ukubona izinto ezingcwatywe phantsi komhlaba.

Ukuba maninzi kwamabali anjalo, ndawonye nokukholelwa kuwo ngokubanzi, kusenokutyekela ekuphembeleleni abathile kwibandla lobuKristu ukuba nabo bakholelwe ukuba ayinyaniso. Basenokuqiqa ngelithi ngoxa abantu abaqhelekileyo bengenakuzenza izinto ezinjalo, abo bafumana amandla angaphaya kwawemvelo kwizidalwa zomoya, iidemon, banokuzenza. Kubonakala ukuba isizinzi sesi sigqibo yeyesi-2 kwabaseTesalonika 2:9, 10, ethi: “Kwalowo [ongenamthetho], ukufika kungokokusebenza kukaSathana, ngayo imisebenzi yonke yamandla, nemiqondiso, nezimanga zobuxoki, nangako ukulukuhla konke kokungalungisi kwabo batshabalalayo; ngenxa enokuba bengakwamkelanga ukuyithanda inyaniso, ukuze basindiswe.”

Ngoxa kuyinyaniso ukuba esi sibhalo sibonisa ukuba uSathana unako ukwenza imisebenzi yamandla, sikhankanya ukuba uSathana ukwangumyili ‘wemiqondiso nezimanga zobuxoki,’ ndawonye ‘nokulukuhla kokungalungisi.’ Ngokuvisisanayo, iBhayibhile imbonisa uSathana engumkhohlisi omkhulu ‘olilahlekisayo elimiweyo liphela.’ (ISityhilelo 12:9) Uyincutshe ekwenzeni abantu bakholelwe izinto ezingeyonyaniso.

Ngenxa yoku, kwanobungqina nokuvuma kwabo bebebandakanyeke ekusebenzelaneni nemimoya nobugqwirha ngokufuthi akunakufane kuthenjwe. Benyanisekile abo bantu basenokukholelwa ukuba babone, beve, okanye babe namava ezinto ezithile; kodwa, enyanisweni, abakhange. Ngokomzekelo, kukho abo bacinga ukuba baye banxibelelana nemimoya yabantu abafileyo. Kodwa bayaphazama, bakhohlisiwe, bangamaxhoba enkohliso ebusathanarha. IBhayibhile ithi abafileyo ‘bayehla baye kwelokuzola.’—INdumiso 115:17.

Ngenxa yembali kaMtyholi yenkohliso, enoba kuyintoni na ubunyaniso bamabali okusebenza kwamandla angaphaya kwawemvelo bukrokreleka kakhulu. Inkoliso iqanjwe ngenxa yeentelekelelo ezisekelwe kwiinkolo, ibaxwe ngokusoloko ibaliswa ngokuphindaphindiweyo.

Ukubaliswa ngokuphindaphindiweyo kweentsomi ezinjalo kuhambisela phambili izilangazelelo zoyise wobuxoki, uSathana uMtyholi. (Yohane 8:44) Zivuselela umdla kwizenzo zobugqi ezilisikizi kuYehova. (Duteronomi 18:10-12) Zibambisa abantu kumgibe woloyiko neenkolo. Akumangalisi ukuba uPawulos waluleka amaKristu ukuba ‘anganyamekeli zintsomi [“amabali obuxoki,” NW].’—1 Timoti 1:3, 4.

Ukugatya Ubungqina Beedemon

Noko ke, kuthekani ukuba amabali abonakala eyinyaniso? Maxa wambi kubaliswa amava emimoya okanye abo baqhelisela ukusebenzelana nemimoya bevuma ukongama kukaYehova nokuba nenyaniso kwamaNgqina akhe. Ngaba amaKristu afanele asasaze amabali anjalo?

Hayi, akafanele enjenjalo. IBhayibhile ithi xa oomoya abangcolileyo badanduluka bathi uYesu wayenguNyana kaThixo, ‘wabakhalimela kakhulu ukuba bangamtyhili.’ (Marko 3:12) Ngokufanayo, xa idemon evumisayo yanyanzelela intombazana ukuchaza uPawulos noBharnabhas ukuba “bangabakhonzi bakaThixo Osenyangweni” nabavakalisi bayo “indlela yosindiso,” uPawulos wawukhupha loo moya kuyo. (IZenzo 16:16-18) UYesu, uPawulos, okanye nawuphi na kubabhali beBhayibhile akazange aziyeke iidemon zingqinele iinjongo zikaThixo okanye abakhonzi bakhe abanyuliweyo.

Kwakhona, okuphawulekayo kukuba uYesu Kristu wayephile kummandla womoya ngaphambi kokuba eze emhlabeni. Wayemazi uSathana ngokobuqu. Kodwa, uYesu akazange acubhule abafundi bakhe ngamabali angemisebenzi kaSathana, engazange anikele nazinkcukacha ngoko uMtyholi wayenokukwenza nawayengenakukwenza. USathana needemon zakhe babengengobahlobo bakaYesu. Babeziindwayi, abavukeli, abakuthiyileyo oko kungcwele neentshaba zikaThixo.

IBhayibhile iyasixelela oko kufuneka sikwazi. Iyacacisa ukuba zingoobani na iidemon, indlela ezibalahlekisa ngayo abantu, nendlela esinokuziphepha ngayo. Ibonisa ukuba uYehova noYesu banamandla ngakumbi kunokuba zinjalo iidemon. Yaye isifundisa ukuba xa sikhonza uYehova ngokunyaniseka, oomoya abangendawo abanakusibangela nawuphi na umonakalo ohlala uhleli.—Yakobi 4:7.

Ngoko, anesizathu esifanelekileyo amaKristu sokuwamangala amabali obuxoki, amabali asuka nje aphumele ekukhuthazeni izilangazelelo zabo bachase uThixo. Kanye njengoko uYesu ‘wangqinela inyaniso,’ nabalandeli bakhe benjenjalo namhlanje. (Yohane 18:37) Ngobulumko bathobela esi siluleko seBhayibhile: “Into zonke eziyinene . . . zithelekeleleni ezo zinto.”—Filipi 4:8.

[Umfanekiso okwiphepha 31]

Zonke iimbonakaliso zobugqi zimele ziphetshwe ngokungqongqo ngamaKristu okwenyaniso