Hlala Usenza Izinto Ozifundileyo
“Ziqheliseleni izinto enazifundayo naza nazamkela, naziva, nazibona kum; yaye uThixo woxolo uya kuba nani.”—FILIPI 4:9.
1, 2. Ngokuqhelekileyo, ngaba iBhayibhile isenempembelelo kubomi babantu abazigqala bengamakholwa? Cacisa.
“BAYA Besanda Abantu Abakholwayo, Kodwa Imilinganiselo Yokuziphatha Iya Iwohloka.” Lo mxholo wephacana elithi Emerging Trends wawushwankathela imiphumo yohlolisiso olwalwenziwe eUnited States. Kubonakala ukuba kwelo lizwe abantu abaya ecaweni nabathi unqulo lubalulekile ebomini babo baya besanda. Noko ke, le ngxelo ithi: “Phezu kwawo nje la manani mahle, abemi abaninzi baseMerika bayakuthandabuza ukuba unqulo luyabaphembelela abantu abathile noluntu ngokubanzi.”
2 Le meko ayikho kweli lizwe kuphela. Ehlabathini lonke, abantu abaninzi abathi bayayamkela iBhayibhile yaye bayakholwa abazivumeli ukuba iZibhalo zibe yimpembelelo yokwenene kubomi babo. (2 Timoti 3:5) Intloko yeqela labaphengululi yathi: “Sisayixabisa iBhayibhile, kodwa ukuchitha ixesha siyifunda, siyifundisisa yaye siyisebenzisa—leyo yinto ephelelwe lixesha.”
3. (a) IBhayibhile ibaphembelela njani abo baba ngamaKristu okwenene? (b) Abalandeli bakaYesu basisebenzisa njani isiluleko sikaPawulos esibhalwe kweyabaseFilipi 4:9?
3 Noko ke, oku akunjalo kumaKristu okwenyaniso. Ukusebenzisa kwawo isiluleko esivela kwiLizwi likaThixo kuye kwaguqula indlela acinga ngayo nendlela azenza ngayo izinto. Yaye abonakalisa ubuntu obutsha nto leyo eye yaphawulwa nangabanye abantu. (Kolose 3:5-10) Kubalandeli bakaYesu, iBhayibhile asiyoncwadi nje yokuhombisa. Ngokwahlukileyo koko, umpostile uPawulos wathi kumaKristu aseFilipi: “Ziqheliseleni izinto enazifundayo naza nazamkela, naziva, nazibona kum; yaye uThixo woxolo uya kuba nani.” (Filipi 4:9) AmaKristu enza okungakumbi kunokwamkela nje inyaniso ekwiLizwi likaThixo. Enza oko akufundileyo, aqhubeka esebenzisa isiluleko seBhayibhile—entsatsheni, emsebenzini, ebandleni nakuzo zonke ezinye iinkalo zokuphila.
4. Kutheni kungelula ukusebenzisa imithetho kaThixo?
4 Akulula ukusebenzisa imithetho nemigaqo kaThixo. Siphila kwihlabathi elisemandleni kaSathana uMtyholi, iBhayibhile embiza ngokuba ‘nguthixo wale nkqubo yezinto.’ (2 Korinte 4:4; 1 Yohane 5:19) Ngoko ke, kubalulekile ukuba siyiphaphele nantoni na enokusithintela ukuba sigcine ingqibelelo kuYehova uThixo. Sinokuyigcina njani ingqibelelo?
Bambelela ‘Kumzekelo Wamazwi Aphilileyo’
5. Athetha ukuthini amazwi kaYesu athi: ‘Qhubeka undilandela’?
5 Enye inkalo yokwenza oko sikufundileyo ibandakanya ukubambelela ngokunyaniseka kunqulo lokwenyaniso, phezu kwako nje ukuchaswa ngabangakholwayo. Akuyondlwan’ iyanetha ukunyamezela. UYesu wathi: “Ukuba nabani na ufuna ukundilandela, makazincame, athabathe isibonda sakhe sentuthumbo aze aqhubeke endilandela.” (Mateyu 16:24) UYesu akazange athi sifanele simlandele iveki, inyanga okanye unyaka kuphela. Kunoko wathi ‘Qhubeka undilandela.’ Amazwi akhe abonisa ukuba asinakuba ngabafundi bakhe ngamathuba athile okanye sizinikele kuye namhlanje, ngomso asisathethi loo nto. Ukubambelela kunqulo lokwenyaniso ngokunyaniseka kuthetha ukuba sinyamezela ngokuthembeka kwikhondo esilinyulileyo, enoba sekumnyam’ entla. Sinokukwenza njani oko?
6. Yintoni umzekelo wamazwi aphilileyo amaKristu enkulungwane yokuqala awawufunda kuPawulos?
6 UPawulos wabongoza idlelane lakhe uTimoti: ‘Bambelela [kumzekelo] wamazwi aphilileyo owaweva kum ngokholo nothando olukuKristu Yesu.’ (2 Timoti 1:13) Wayethetha ukuthini uPawulos? Igama lesiGrike eliguqulelwe ngokuthi “umzekelo” libhekisela kumfanekiso owenziwa ngumzobi. Nangona ungenankcukacha zingako, lo mfanekiso ucacile kangangokuba nomntu owujongileyo unokuyibona loo nto uzama ukuyibonisa. Ngokufanayo, umzekelo wenyaniso uPawulos awawufundisa uTimoti nabanye wawungenzelwanga ukuba unikele impendulo engqalileyo kumbuzo ngamnye umntu anokucinga ngawo. Sekunjalo, le mfundiso inikela ukhokelo olwaneleyo—iimfundiso ezisisiseko—ukuze abantliziyo zinyanisekileyo bakuqonde oko uYehova akufunayo kubo. Kakade ke, ukuze bakholise uThixo kufanele bahlale bebambelele kumzekelo wenyaniso ngokwenza oko bakufundileyo.
7. AmaKristu abambelela njani kumzekelo wamazwi aphilileyo?
7 Kwinkulungwane yokuqala, abantu abanjengoHimenayo, uAleksandire noFileto babebalaselisa iingcamango ezingavisisaniyo ‘namazwi aphilileyo.’ (1 Timoti 1:18-20; 2 Timoti 2:16, 17) AmaKristu enkulungwane yokuqala ayenokukuphepha njani ukulahlekiswa ngabawexuki? Ngokufundisisa ngenyameko imibhalo ephefumlelweyo aze ayisebenzise ekuphileni kwawo. Abo balandela umzekelo kaPawulos nabanye abathembekileyo baye bakwazi ukubona baza bachasa nantoni na engavisisaniyo nomzekelo wenyaniso abaye bawufundiswa. (Filipi 3:17; Hebhere 5:14) Kunokuba ‘bagule ngengqondo ziimbuzwano nokuxambulisana ngamazwi,’ baqhubeka behamba ngekhondo elifanelekileyo lokuhlonela uThixo. (1 Timoti 6:3-6) Senza okufanayo xa sihlala sisebenzisa iinyaniso esizifundileyo. Hayi indlela okulomeleza ngayo ukholo ukubona izigidi ezikhonza uYehova emhlabeni zibambelele ngokuqinileyo kumzekelo wenyaniso yeBhayibhile eziyifundisiweyo.—1 Tesalonika 1:2-5.
Wachase ‘Amabali Obuxoki’
8. (a) USathana uzama njani ukulwenza buthathaka ukholo lwethu namhlanje? (b) Sisiphi isilumkiso sikaPawulos esifumaneka kweyesi-2 kuTimoti 4:3, 4?
8 USathana uzama ukusenza singayigcini ingqibelelo yethu ngokutyala amathandabuzo ngoko sikufundisiweyo. Namhlanje, njengakwinkulungwane yokuqala, abawexuki nabanye bazama ukulwenza buthathaka ukholo lwabanyanisekileyo. (Galati 2:4; 5:7, 8) Maxa wambi basebenzisa ijelo leendaba ukusasaza inkcazelo engachananga okanye nede ibe bubuxoki ngeemfundiso neenjongo zabantu bakaYehova. UPawulos walumkisa esithi bambi babeya kuyifulathela inyaniso. Wabhala: “Kuya kubakho ixesha laxa bengayi kuyinyamezela imfundiso ephilileyo, kodwa basuke ngokweminqweno yabo baziqwebele abafundisi bokubanyumbaza iindlebe; baya kuyifulathela inyaniso, baphambukele kumabali obuxoki.”—2 Timoti 4:3, 4.
9. Wayecinga ntoni uPawulos xa wayethetha ‘ngamabali obuxoki’?
9 Kunokuba babambelele kumzekelo wamazwi aphilileyo, bambi babenyumbazwa ‘ngamabali obuxoki.’ Yayingawaphi la mabali obuxoki? Mhlawumbi uPawulos wayecinga ngeentsomi ezingaqhelekanga, njengezo zifumaneka kwincwadi engaphefumlelwanga kaTobit.a Kwakhona la mabali obuxoki ayesenokuba ayequka iingcamango ezazibangela umdla nekungekho nto iqinisekileyo ngazo. Kwakhona, bambi—“ngokweminqweno yabo”—kusenokwenzeka ukuba ngokuchuliweyo balahlekiswa ngabo babengayithobeli imigaqo kaThixo okanye abo babegxeka ababekhokela ebandleni. (3 Yohane 9, 10; Yude 4) Enoba babejamelene nayiphi na imiqobo, kubonakala ukuba abanye babekhetha ubuxoki kuneenyaniso zeLizwi likaThixo. Kungekudala bayeka ukwenza izinto ababezifundisiwe, ngenxa yoko bafa ngokomoya.—2 Petros 3:15, 16.
10. Ngawaphi amabali obuxoki akhoyo kwezi mini, yaye uYohane wayibonisa njani imfuneko yokulumka?
10 Namhlanje sinokukuphepha ukwamkela amabali obuxoki ukuba siyakucikida size sikukhethe ngenyameko oko sikuphulaphulayo noko sikufundayo. Ngokomzekelo, ngokufuthi amajelo eendaba akhuthaza ukuziphatha okubi. Abantu abaninzi bakhuthaza abanye ukuba bakholelwe ukuba uThixo akanakwaziwa okanye akakho. Abahlalutyi abaqatha bayayigculela iBhayibhile ngelithi ayiphefumlelwanga nguThixo. Yaye abawexuki namhlanje bazama ukutyala amathandabuzo ukuze balwenze buthathaka ukholo lwamaKristu. Ngokuphathelele iingozi ezazinokubangelwa ngabaprofeti bobuxoki kwinkulungwane yokuqala, umpostile uYohane walumkisa: “Zintanda, musani ukuwakholelwa onke amazwi aphefumlelweyo, kodwa wavavanyeni amazwi aphefumlelweyo ukuze nibone enoba aphuma kuThixo kusini na, kuba kuye kwavela abaprofeti bobuxoki abaninzi ehlabathini.” (1 Yohane 4:1) Ngoko ke sifanele silumke.
11. Yiyiphi enye indlela esinokuzivavanya ngayo enoba siselukholweni kusini na?
11 Ngokuphathelele oku, uPawulos wabhala: “Hlalani nizivavanya enoba niselukholweni kusini na.” (2 Korinte 13:5) Lo mpostile wasibongoza ukuba sihlale sizivavanya ukuze sibone enoba sisabambelele kwiimfundiso zobuKristu kusini na. Ukuba sityekele ekuphulaphuleni abo bakhalazayo, sifanele sizihlolisise ngenyameko. (INdumiso 139:23, 24) Ngaba sityekele ekubahlabeni amadlala abantu bakaYehova? Ukuba kunjalo, kutheni? Ngaba sikhathazwe ngamazwi okanye ngoko kwenziwe ngothile? Ukuba kunjalo, ngaba siye sacingisisa nzulu ngalo mbandela? Nakuphi na ukubandezeleka esijamelana nako kule nkqubo yezinto kokwexeshana. (2 Korinte 4:17) Nokuba sijamela nezilingo ezithile ebandleni, ngaba sifanele siyeke ukukhonza uThixo? Ukuba ikho into esicaphukisileyo, ngaba bekungayi kuba kuhle ukuyicombulula loo ngxaki zise siyishiyele kuYehova?—INdumiso 4:4; IMizekeliso 3:5, 6; Efese 4:26.
12. Abantu baseBhereya basimisela njani umzekelo omhle?
12 Kunokuba sibe ngabathanda ukuhlaba amadlala, masibonakalise uxabiso olunzulu ngenkcazelo esiyifumana kwisifundo sobuqu nakwiintlanganiso zebandla. (1 Korinte 2:14, 15) Yaye kunokuba silithandabuze iLizwi likaThixo, hayi indlela ekububulumko ngayo ukuba nesimo sengqondo sabantu baseBhereya benkulungwane yokuqala ababezihlolisisa ngenyameko iZibhalo! (IZenzo 17:10, 11) Ngoko ke, masenze oko sikufundayo, siwachase amabali obuxoki size sibambelele enyanisweni.
13. Sinokuwasasaza njani amabali obuxoki singaqondanga?
13 Kukho olunye uhlobo lwamabali obuxoki esifanele silulumkele. Iingxelo ezininzi zidla ngokusasazeka nge-E-mail. Kufuneka siwalumkele amabali anjalo, ingakumbi ukuba asiyazi indawo avela kuyo. Enoba sithunyelelwa amava okanye ibali elithile ngumKristu owaziwayo, kusenokwenzeka ukuba loo mntu akayazi ngokupheleleyo loo nkcazelo. Yiloo nto kubalulekile ukuba sikulumkele ukuphindaphinda okanye ukudlulisela inkcazelo esingenabungqina bayo. Ngokuqinisekileyo besingenakuphindaphinda “iintsomi zobuhedeni,” okanye “amabali obuxoki ahlambela oko kungcwele.” (1 Timoti 4:7; New International Version) Ekubeni nathi sinyanzelekile ukuba sithethe inyaniso kwabanye, kububulumko ukuphepha nantoni na enokwenza ukuba sithi singaqondanga sisasaze ubuxoki.—Efese 4:25.
Iinzuzo Zokuthetha Inyaniso
14. Ziziphi iinzuzo ezifumaneka ngokwenza izinto esizifunde kwiLizwi likaThixo?
14 Ukwenza oko sikufundayo kufundisiso lobuqu lweBhayibhile nakwiintlanganiso zamaKristu kuya kusenza sifumane iinzuzo ezininzi. Ngokomzekelo, sisenokufumanisa ukuba siba nolwalamano oluhle namanye amakholwa. (Galati 6:10) Xa sisebenzisa imigaqo yeBhayibhile, isimo sethu sengqondo siba sihle ngakumbi. (INdumiso 19:8) Ngaphezu koko, ngokwenza oko sikufundayo, ‘sihombisa imfundiso kaThixo’ yaye sinokutsalela abanye kunqulo lokwenyaniso.—Tito 2:6-10.
15. (a) Omnye oselula wayibonakalisa njani inkalipho ukuze anikele ubungqina esikolweni? (b) Ufunde ntoni kula mava?
15 Phakathi kwamaNgqina kaYehova kukho abantu abaselula abaninzi abenza oko bakufundileyo kwisifundo sabo sobuqu seBhayibhile nakwiimpapasho zamaKristu kwakunye nokuya rhoqo kwiintlanganiso zebandla. Indlela entle abaziphatha ngayo inikela ubungqina kubafundisi-ntsapho nakwabanye abafundi esikolweni. (1 Petros 2:12) Khawucinge ngoLeslie, intombazana eneminyaka eli-13 ubudala eUnited States. Uyavuma ukuba wayedla ngokukufumanisa kunzima ukuthetha nabo afunda nabo ngokholo lwakhe, kodwa ngenye imini oko kwaguquka. “Eklasini kwakuthethwa ngendlela abantu abazama ngayo ukuthengisa izinto. Enye intombazana yaphakamisa isandla yaza yathi, ngokomzekelo, amaNgqina kaYehova.” NjengeNgqina, uLeslie wenza ntoni? Uthi: “Ndaluthethelela ukholo lwam, endicinga ukuba oko kothusa wonke umntu, ekubeni ndingumntu othuleyo esikolweni.” Inkalipho kaLeslie yaphumela entwenini? ULeslie uthi: “Ndakwazi ukuhambisa incwadana enemifanekiso nephecana kuloo mfundi, ekubeni wayeneminye imibuzo.” Hayi indlela ekumele ukuba uYehova uvuya ngayo xa abaselula abenza oko bakufundayo besiba nenkalipho yokunikela ubungqina esikolweni!—IMizekeliso 27:11; Hebhere 6:10.
16. AmaNgqina aselula aye azuza njani kwiSikolo Sobulungiseleli Sobuthixo?
16 Omnye umzekelo ngokaElizabeth. Ukususela xa wayeneminyaka esixhenxe nasebudeni balo lonke ixesha awayekwisikolo samabanga aphantsi, le ntombazana iselula yayimemela abafundisi-ntsapho bayo kwiHolo yoBukumkani ngalo lonke ixesha inesabelo kwiSikolo Sobulungiseleli Sobuthixo. Ukuba umfundisi-ntsapho wayengaphumelelanga, uElizabeth wayeshiyeka ukuphuma kwesikolo aze anikele intetho yakhe kumfundisi-ntsapho. Kunyaka wakhe wokugqibela kwisikolo samabanga aphakamileyo, uElizabeth wabhala ingxelo enamaphepha alishumi ngeenzuzo zeSikolo Sobulungiseleli Sobuthixo yaye wayinikela le ngxelo kubafundisi-ntsapho abane. Kwakhona wacelwa ukuba abonise indlela yokunikela intetho kwiSikolo Sobulungiseleli Sobuthixo, yaye wakhetha umxholo othi “Kutheni UThixo Evumele Ubungendawo?” UElizabeth uye wazuza kucwangciso lwemfundo yeSikolo Sobulungiseleli Sobuthixo samaNgqina kaYehova. Ungomnye wabaselula abangamaKristu abaninzi abadumisa uYehova ngokwenza izinto abaye bazifunda kwiLizwi lakhe.
17, 18. (a) IBhayibhile inikela siphi isiluleko ngokuphathelele ukunyaniseka? (b) Enye indoda yavakalelwa njani yihambo yokunyaniseka yomnye wamaNgqina kaYehova?
17 IBhayibhile ibongoza amaKristu ukuba aziphathe ngokunyaniseka kwizinto zonke. (Hebhere 13:18) Ukunganyaniseki kunokulonakalisa ulwalamano lwethu nabanye yaye, okubaluleke ngakumbi, noYehova. (IMizekeliso 12:22) Ukuziphatha kwethu ngokunyaniseka kubonisa ukuba siyazenza izinto esizifundileyo, yaye oku kuye kwenza abaninzi banentlonelo engakumbi ngamaNgqina kaYehova.
18 Phawula umzekelo wejoni ekuthiwa nguPhillip. Walahlekelwa yitsheki engabhalwanga sixa samali kodwa eyayityobelwe yaye wayengakwazi oku de yabuyiselwa kuye ngeposi. Le tsheki yafunyanwa ngomnye wamaNgqina kaYehova, yaye iphepha elalinamathiselwe kuyo lalisithi iinkolelo zonqulo zalowo uyifumeneyo ziye zamenza ukuba ayibuyise. UPhillip wamangaliswa. Wathi: “Ngewayeyitshayele yonke imali yam ezii-$9,000!” Ngesinye isihlandlo wakhe wadana xa wabelwa umnqwazi ecaweni. Kuyabonakala ukuba, elinye irhamente lalithabathe umnqwazi wakhe, ngoxa umntu angamaziyo wayebuyise itsheki exabisa amawaka eedola! Liyinyaniso elokuba, amaKristu anyanisekileyo azisa uzuko kuYehova uThixo!
Hlala Usenza Oko Ukufundileyo
19, 20. Sizuza njani ngokwenza ngokuvisisana nezinto esizifunde eZibhalweni?
19 Abo benza oko bakufunde kwiLizwi likaThixo bavuna iinzuzo ezininzi. Umfundi uYakobi wabhala: “Umntu oqondela kumthetho ogqibeleleyo wenkululeko, nalowo uzingisayo kuwo, yena lowo, ngenxa yokuba uye, akaba ngovayo aze alibale, kodwa waba ngumenzi womsebenzi, uya kuba noyolo ekuwenzeni kwakhe.” (Yakobi 1:25) Ewe, ukuba senza ngokuvisisana nezinto esiye sazifunda eZibhalweni, siya kuba nolonwabo lokwenene yaye siya kukwazi ukuhlangabezana neengxaki zobomi. Ngaphezu koko, siya kufumana iintsikelo zikaYehova nobomi obungunaphakade!—IMizekeliso 10:22; 1 Timoti 6:6.
20 Ngoko ke, hlala uzibhokoxa ekufundisiseni iLizwi likaThixo. Hlanganisana ngokuthe rhoqo nabanquli bakaYehova, uze inikele ingqalelo kwizinto ezifundiswa kwiintlanganiso zamaKristu. Yenza oko ukufundayo, uqhubeke ukusebenzisa, yaye ‘uThixo woxolo uya kuba nawe.’—Filipi 4:9.
[Umbhalo osemazantsi]
a Incwadi kaTobit, ekusenokwenzeka ukuba yabhalwa ngenkulungwane yesithathu ngaphambi kweXesha Eliqhelekileyo, iquka amabali eenkolelo zomYuda ogama linguTobias. Kuthiwa wayekwazi ukufumana amandla okuphilisa nokugxotha iidemon ngokusebenzisa intliziyo, inyongo, nesibindi sentlanzi enkulu.
Ngaba Usakhumbula?
• Yintoni ‘umzekelo wamazwi aphilileyo’ yaye sinokubambelela njani kuwo?
• Ngawaphi ‘amabali obuxoki’ esifanele siwachase?
• Ziziphi iinzuzo ezifunyanwa ngabo benza oko bakufunde kwiLizwi likaThixo?
[Umfanekiso okwiphepha 17]
AmaKristu enkulungwane yokuqala ayenokukuphepha njani ukulahlekiswa ngabawexuki?
[Imifanekiso ekwiphepha 18]
Amajelo eendaba anokuhlwayela amathandabuzo, ngokusebenzisa i-Internet, nabawexuki bezi mini
[Umfanekiso okwiphepha 19]
Akubobulumko ukusasaza iingxelo esingaqinisekanga ngazo
[Imifanekiso ekwiphepha 20]
Emsebenzini, esikolweni nakwezinye iindawo, amaNgqina kaYehova enza oko akufunde kwiLizwi likaThixo