Ukuzinyaswa NguThixo Ongenakuxoka

NGOKUBALISWA NGUMARY WILLIS

Imiphumo yokudodobala kwezoqoqosho ehlabathini lonke yayifikelele kwimima-ndla ekwanti yeNtshona Ostreliya ngowe-1932. Ngaloo nyaka, xa ndandineminyaka eli-19 kuphela, mna noEllen Davies safumana isabelo sokuya kushumayela kummandla owawugubungela malunga nezikwekhilomitha ezili-100 000. Sasiza kuqala kwidolophana yaseWiluna, malunga neekhilomitha ezingama-950 kumntla-mpuma wekhaya lethu ePerth, ikomkhulu leNtshona Ostreliya.

ENDLELENI eya apho, mna noEllen sasikhwele kwikhareji elikhwela abasebenzi bakaloliwe kunye negadi enobuhlobo. Njengoko uloliwe wayemisa kwisikhululo ngasinye kumgaqo kaloliwe, ngobubele le gadi yayisixelela ixesha esasiza kulihlala apho. Oku kwasivulela ithuba lokuba sihle size sinikele ubungqina kubantu abahlala kwezo ndawo zikwanti zikumgaqo kaloliwe. Ekugqibeleni safika kwidolophu yabembi-mgodi iWiluna kubhudla uqhwithela.

Noko ke, isikhululo sikaloliwe saseWiluna sasiphantse sibe malunga neekhilomitha ezintathu ukusuka edolophini. Akukho namnye kuthi owayomelele, yaye sasineebhokisi zeencwadi ezintathu ezinzima kunye neesutikheyisi ezimbini. Sasiza kwenza ntoni? Sabophelela intonga ebhokisini waza ngamnye wabamba kwelinye icala laloo ntonga. Ngale ndlela ezi bhokisi sazithutha nganye nganye. Saquqa sibuyelela izihlandlo ezisixhenxe ukuze sithwale ezo bhokisi zintathu neesutikheyisi zethu kumgama oziikhilomitha ezintathu ukuya kuloo dolophu. Sasiphumla ngokufuthi kuba izandla zethu zazibuhlungu gqitha.

Phezu kwalo nje uthuli, izandla ezibuhlungu nokudinwa kwemilenze, salunandipha olo celomngeni nolo hambo luyingozi. Sobabini sasivakalelwa kukuba uYehova wayenathi, yaye wayesizimasa ukuze sihlangabezane nesi siqalo sinamagingxigingxi sokuya kushumayela kwiindawo ezikwanti. Kungentsuku zatywala sayibona intsikelelo yakhe emsebenzini wethu, kuba imigudu esayenzayo kolo hambo yaphumela ekubeni uBob Horn oselula amkele inyaniso yeBhayibhile. Kuyasivuyisa ukuba uBob wakwazi ukuchitha iminyaka ethile kwinkonzo yaseBheteli waza waqhubeka ekhonza uYehova ngokuthembeka phantse iminyaka engama-50 de kwasekufeni kwakhe ngowe-1982.

Ukusuka eWiluna sasebenza kwiindawo ezazisendleleni yethu emalunga neekhilomitha ezingama-725 ukuya eGeraldton eselunxwemeni. Ukusuka apho sabuyela ePerth. Maxa wambi ebusuku sasilala kwizindlu zokulinda ezikhal’ ibhungane ezisesikhululweni sikaloliwe yaye ngesihlandlo esithile sada salala kwisitha sefula esisecaleni komgaqo kaloliwe.

Sasihamba nesingxobo somqamelo esasifakwe amaqebengwane enziwe ngomgubo wengqolowa. Ayekuphela kwento esasiyitya kwisiqingatha sokuqala sohambo lwethu. Ngamathub’ athile sasifumana ukutya ngokuhlamba izitya nemigangatho kwizindlu zabaqeshi nakumagumbi okutyela. Ngamanye amaxesha sasisebenza ligqats’ ubhobhoyi sisikha iiertyisi okanye iimbotyi. Iminikelo esasiyinikwa ngabantu abanomdla besamkela uncwadi lweBhayibhile yayisinceda kwiindleko zethu.

Okwandomelezayo ukuze ndihlale ndinokholo kuYehova ndize ndihlangabezane ngolonwabo neemeko ezininzi ezinzima ngezo ntsuku yaba ngumzekelo noqeqesho endalufumana kumama ndisemncinane.

Ilifa LobuKristu

Umama wayenokholo olomeleleyo kuMdali, yaye ndikhumbula ndisemncinane, wayedla ngokuthetha ngaye kuthi sisengabantwana. Noko ke, ukholo lwakhe lwavavanywa ngokulusizi kukufa komnakwethu owayeneminyaka esixhenxe ubudala kwingozi eyayihlasimlis’ umzimba eyenzeka esikolweni. Kodwa kunokuba amqumbele uThixo, umama waqalisa ukuyifundisisa ngokunyanisekileyo iBhayibhile. Ukuba kwakunokwenzeka, wayefuna ukufunda isizathu sokuba kwenzeke iintlekele ezinjalo. Iphulo lakhe lokufuna inyaniso yeBhayibhile lavuzwa, ibe ekuqaleni kweminyaka yee-1920 wafuzisela uzahlulelo lwakhe kuThixo oyinyaniso, uYehova, ngokubhaptizwa emanzini.

Ukususela ngoko ukuya phambili, xa wayexubusha nathi ngokufuthi wayegxininisa kwindlela aqiniseke ngayo amadinga kaThixo. Wayesoloko esibongoza ukuba sikhumbule ukuba enoba kunokwenzeka ntoni na, ‘uThixo akanakuxoka.’ (Tito 1:2) Ngenxa yoko, mna nodade wethu kunye nabanakwethu ababini, kunye neentsapho zethu nabazukulwana, namhlanje singabadumisi bakaYehova uThixo. Abatshana bam ababini, uAlan noPaul Mason, bakhonza njengabaveleli abahambahambayo.

Umnqweno Wasebutsheni Wokuhambisa Ivangeli

Ndandingengomfundi ukrelekrele yaye ngowe-1926, xa ndandineminyaka eli-13 ndasishiya isikolo. Sekunjalo, ndandinomnqweno onzulu wokwabelana nabanye ngoko ndandikufunde eBhayibhileni. UTata wayecinga ukuba andifundanga ngokwaneleyo ukuba ndinganceda nawuphi na umntu, kodwa uMama wathi: “Nokuba abantu ubaxelela nje kuphela ngemfazwe esondelayo yeArmagedon yaye abalulamileyo baya kuwudla ilifa lo mhlaba, oko kuya kububhengeza uBukumkani bukaThixo.” Ngoko kwiminyaka yam yokuqala yeshumi elivisayo ndaqalisa ukuba nesabelo kumsebenzi wokushumayela kwindlu ngendlu, nangona ndingazange ndibhaptizwe de kwangowe-1930. Kungekudala emva koko, ndaqalisa umsebenzi wokuhambisa ivangeli ixesha elizeleyo kummandla ongqonge iPerth.

Kunyaka olandelayo, ngowe-1931, saqalisa ukusebenzisa igama lethu elitsha elithi amaNgqina kaYehova. Noko ke, abaninimzi abaninzi abazange bakwamkele ukusebenzisa kwethu eli gama lingcwele likaThixo yaye babesabela ngenkohlakalo. Kodwa ndaqhubeka kubulungiseleli phezu kwazo nje iimeko ezingathandekiyo endandidibana nazo. Ndandiqinisekile ukuba uThixo akaxoki xa ethembisa ukuba abakhonzi bakhe ‘banokuxhomekeka ekomeleleni abakuphiwa nguye.’—1 Petros 4:11; Filipu 4:13.

Ukufanisa “Isihlwele Esikhulu”

Ngowe-1935, ndafumana isabelo sokuya kwelinye icala lelizwekazi elikhulu laseOstreliya. Ngaloo ndlela, kangangeminyaka emva koko ndakhonza njengomlungiseleli onguvulindlela kwimimandla engqonge isithili saseNew England esikwilizwana laseNew South Wales, malunga neekhilomitha ezingama-4 000 ukusuka kwindawo eyayifudula ilikhaya lam iPerth.

Ukuza kuthi ga ngoko ndandithabatha kwimifuziselo yesonka esingenagwele newayini ebomvu kwiSikhumbuzo sokufa kukaYesu esenziwa minyaka le. Nangona oku kwakugqalwa njengento efanelekileyo, ngokukodwa kubalungiseleli bexesha elizeleyo abanenzondelelo, andizange ndeyiseke ukuba ndandinethemba lasezulwini. Kwandula ke, ngowe-1935, sabekelwa elubala ukuba kwakuhlanganiswa isihlwele esikhulu esinethemba lokuphila ngonaphakade emhlabeni. Abaninzi bethu bavuyiswa kukwazi ukuba sasiyinxalenye yeso sihlwele sikhulu, yaye sayeka ukuthabatha kwimifuziselo. (Yohane 10:16; ISityhilelo 7:9) Inyaniso yeBhayibhile yayisiya ikhanya ngokukhanya, kanye njengokuba uYehova wathembisayo.—IMizekeliso 4:18.

Iindlela Ezintsha Zokushumayela

Phakathi kwiminyaka yee-1930, saqalisa ukusebenzisa iigramafoni kubulungiseleli bethu. Ngaloo ndlela, iibhayisekile zethu ezomeleleyo kwakufuneka zifakelwe izinto zokuthwala ngemva nangaphambili kungekuphela nje iigramafoni ezinzima kodwa namacwecwe kwaneebhegi zethu zoncwadi. Kwakufuneka ndibe nenyameko engakumbi xa ibhayisekile yam yayizele ngumthwalo kuba ukuba yayinokuwa, yayinzima kakhulu ukuba ndingayiphakamisa kwakhona!

Kwakhona malunga nelo lixa saqalisa oko kwakubizwa ngokuba yimingcelele yokunikela inkcazelo. Njengoko sasisehlisa izitrato ezikhulu zezo dolophu, sasinxiba iiplacards, okanye iibhodi ezinemibhalo ethimba ingqalelo. Lo msebenzi ndawufumanisa uluvavanya ngokukodwa ukholo, ngokukodwa xa ndandibanjiwe ndaza ndavalelwa ubusuku bonke kwisisele esincinane kwidolophu yaseLismore. Kwandibangel’ iintloni ukuziswa enkundleni ngosuku olulandelayo ndingakhange ndivunyelwe nokuba ndikame intloko yam! Kodwa kwakhona uYehova wandizimasa njengoko wayethembisile. Elo tyala lachithwa kuba ekuphela kwento elalindibek’ ityala ngayo elo polisa lalindibambile kukuba iplacard yam yayithetha kakubi ngonqulo lwalo.

Ukubuyela ENtshona

Ekuqaleni kweminyaka yee-1940, umsebenzi wam wokushumayela njengovulindlela wandibuyisela kwiidolophu zasemaphandleni ezikwiNtshona Ostreliya. Apha ndaqhubeka ndinandipha amava endingenakuwalibala neentsikelelo zokomoya. Ngoxa ndandikwisabelo sam saseNortham, ndadibana nomfazi ongaphangeliyo owayexakekile, uFlo Timmins, malunga neekhilomitha ezili-11 ngaphandle kwedolophu. Wamkela incwadi ethi Reconciliation, yaye kungekudala waba liNgqina likaYehova uThixo elizahluleleyo. Nangoku usakhuthele kwinkonzo yoBukumkani, nentombi yakhe, eyayineminyaka emine kuphela ngoko, yakhula yaza yaba ngumlungiseleli onguvulindlela okhethekileyo.

Kodwa kwakukho amanye amava angenakulibaleka. Ngasihlandlo sithile, mna neqabane lam lobuvulindlela sasinqumla kwibhulorho yaseNortham ngenqwelwana yethu etsalwa lihashe, xa ngephanyazo elo hashe laphala ngamendu amakhulu, lisibangela ukuba soyike gqitha njengoko sasinqumla phezu kwaloo manzi oMlambo iAvon ayelatyuza ngezantsi. Emva komgama ophantse ube ngaphezu kwekhilomitha, elo hashe lasithoba isantya.

Umtshato Nentsapho

Ngowe-1950, ndatshata noArthur Willis, naye owayenguvulindlela kangangeminyaka emininzi. Sahlala kwidolophu esemaphandleni ekwilizwe laseNtshona Ostreliya ePingelly, apho sasikelelwa ngonyana, uBentley, nentombi, uEunice. Xa abantwana babesele beza kugqiba esikolweni, uArthur wagqiba kwelokuba abhalise njengovulindlela kwakhona. Umzekelo omhle kayise wabakhuthaza abantwana bethu ukuba baqalise ubuvulindlela obuthe ngxi besakufaneleka.

Ngokufuthi uArthur wayehamba naba bantwana baye kushumayela kwimimandla yasemaphandleni ekude. Ngezihlandlo ezithile, babengahlali ekhaya kangangeveki okanye nangaphezulu, behlala ententeni ubusuku ngabunye. Xa bengekho, ndandihlala ekhaya ukuze ndinyamekele ishishini lefenishala lentsapho, nto leyo eyayisenza ukuba bobathathu bakwazi ukuba ngoovulindlela.

Ubulungiseleli Phakathi KwaBemi Bomthonyama

Ngenye intsasa kanye emva kokuba intsapho yam ibuyile kuhambo lwayo lwasemaphandleni, safikelwa lundwendwe esingalulindelanga. Olu ndwendwe yayingomnye waBemi Bomthonyama, owasibuza oku: “Ndenzeni ukuze ndibuyiselwe?” Ekuqaleni sasididekile. Wandula ke uArthur wakhumbula ukuba lo mntu wayeyindoda eyakhutshelwa ngaphandle kwibandla lamaKristu kwiminyaka emininzi eyadlulayo ngenxa yokunxila. Ukususela ngoko yaduma ngokuba yindlamanzi nangokuzenzela amatyala.

UArthur wayichazela oko kwakufuneka ikwenze ukuze ibuyiselwe kwintlangano kaYehova ecocekileyo. Yathi gwiqi yaphuma ingakhuphanga nelimdaka, yaye sonke sasizibuza ukuba yayiza kwenza ntoni. Akukho namnye kuthi owayekulindele oko kwenzekayo kwiinyanga ezimbalwa ezalandelayo. Phantse zazingakholeleki iinguqulelo ezenziwa yiloo ndoda! Ayizange iphelele nje ngokoyisa ingxaki eyayinayo yobhelu lomsele kodwa yayityelela nabantu beso sithili, ibakhumbuza ngamatyala ayo, yandule ke iwahlawule onke loo matyala yayinawo! Namhlanje kwakhona ingumzalwana elukholweni, yaye kangangethuba elithile iye yakhonza njengomlungiseleli onguvulindlela.

Kwakukho aBemi Bomthonyama abaninzi ePingelly, yaye sasinandipha ubulungiseleli obanelisa gqitha, sinceda aba bantu bathobekileyo bafunde baze bamkele inyaniso yeLizwi likaThixo. Hayi indlela okuye kwalomeleza ngayo ukholo lwam ukuba ndiye ndanenxaxheba ekuncedeni aBemi Bomthonyama abaninzi baseOstreliya bafunde inyaniso!

EPingelly kwaqaliswa ibandla, yaye ekuqaleni, inkoliso yamalungu alo yayingaBemi Bomthonyama. Kwafuneka uninzi lwabo silufundise ukufunda nokubhala. Kuloo minyaka yokuqala babecalucalulwa kakhulu, kodwa ngokuthe ngcembe abantu abahlala edolophini babahlonela aBemi Bomthonyama abangamaNgqina ngenxa yendlela ecocekileyo abaphila ngayo nangokuba bengabemi abathembekileyo.

Uncedo LukaYehova Olungasileliyo

Umyeni wam endimthandayo, uArthur, oye wakhonza uThixo ngokuthembekileyo kangangeminyaka engama-57, wafa ekuqaleni kowe-1986. Bonke oosomashishini basePingelly nabantu beso sixeko babemhlonela kakhulu. Kwakhona, uYehova wandizimasa, wandinika amandla okukuthwala oku kulahlekelwa kwenzeke ngephanyazo.

Unyana wam, uBentley, ukhonza njengomdala emantla eNtshona Ostreliya, apho yena nenkosikazi yakhe, uLorna, baye bakhulisela khona intsapho yabo enyanisweni. Omnye umthombo wovuyo olukhulu kum kukuba intombi yam, uEunice, ukuza kutsho kulo mhla iye yaqhubeka nenkonzo yexesha elizeleyo. Yona nomyeni wayo, uJeff, bakhonza njengoovulindlela. Ngoku ndihlala nabo yaye ndisikelelwe ngokuba ndikwazi ukuba nguvulindlela ongumncedani ixesha elingasikelwanga mda.

Ngaphezu kweminyaka engama-60, ndiye ndakubona ukuzaliseka kwedinga likaYehova lokomeleza abakhonzi bakhe aze abancede bakwazi ukuhlangabezana nazo naziphi iimeko ekusenokufuneka bajamelane nazo. Usinika konke esikufunayo ukuba asimthandabuzi okanye sibonise ukungabi naluxabiso. Ukholo lwam luye lomelezwa njengoko ndiye ndasiva isandla sikaThixo sisebenza ndaza ndayibona indlela ayithulula ngayo intsikelelo yakhe kwanangaphezu koko sinokukuqonda. (Malaki 3:10) Ngokwenene, uThixo akanako ukuxoka!

[Umfanekiso okwiphepha 27]

UMary ngowe-1933

[Imifanekiso ekwiphepha 29]

UMary noArthur kwiminyaka yamva