Ukwazi Unqulo Oluchanileyo Kuphelekwa Yimbopheleleko

“Banoyolo abo balivayo ilizwi likaThixo baligcine.”—LUKA 11:28.

1. Bakuba belufanisile unqulo oluchanileyo, ngabantu abanjani abakhela ubomi babo kulo?

UKULUFANISA nje kuphela unqulo oluchanileyo akwanele. Ukuba sithanda okulungileyo nokuyinyaniso, sakube silufumene, siya kwakhela ubomi bethu kulo. Unqulo lokwenyaniso aluyonto yokugcinwa engqondweni nje kuphela; luyindlela yobomi.—INdumiso 119:105; Isaya 2:3; thelekisa IZenzo 9:2.

2, 3. (a) UYesu wakubethelela njani ukubaluleka kokwenza ukuthanda kukaThixo? (b) Yiyiphi imbopheleleko anayo wonk’ ubani olwaziyo unqulo oluchanileyo?

² UYesu Kristu wakubethelela ukubaluleka kokwenza oko uThixo abonisa ukuba kukuthanda Kwakhe. Xa wayequkumbela oko kwaziwa ngokuba yiNtshumayelo yaseNtabeni, uYesu wazisa ukuba asingabo bonke ababembiza ngokuthi Nkosi (ngaloo ndlela abazibanga bengamaKristu) ababeya kungena eBukumkanini; kodwa kuphela ngabo benza ukuthanda kukaYise. Wathi, abanye babeya kungamkelwa ‘njengabenzi bokuchasene nomthetho.’ Kutheni kusithiwa bokuchasene nomthetho? Ngenxa yokuba njengokuba iBhayibhile isitsho, ukungakwenzi ukuthanda kukaThixo kusisono, yaye sonke isono sikokuchasene nomthetho. (Mateyu 7:21-23; 1 Yohane 3:4; thelekisa amaRoma 10:2, 3.) Umntu usenokulwazi unqulo oluchanileyo, usenokubancoma abo balufundisayo, yaye usenokuthetha kakuhle ngamalungu alo, kodwa naye unembopheleleko yokulusebenzisa ebomini bakhe. (Yakobi 4:17) Ukuba uyayamkela loo mbopheleleko, uya kufumanisa ukuba ubomi bakhe buya kutyetyiswa, yaye uya kufumana uvuyo angenakulufumana ngenye indlela.

³ Kwinqaku elandulelayo, siqwalasele iimpawu ezintandathu ezifanisa unqulo oluyinyaniso. Nganye yazo ayipheleli nje ngokusinceda sifanise unqulo oluchanileyo kodwa ikwabeka phambi kwethu ucelomngeni kwanamathuba. Njani?

Usabela Njani KwiLizwi LikaThixo?

4. (a) Njengoko abasebatsha beqalisa ukunxulumana namaNgqina kaYehova, yintoni kungekudala abayiphawulayo ngendlela amaNgqina ayisebenzisa ngayo iBhayibhile? (b) Ukondliwa kakuhle ngokomoya kubachaphazela njani abakhonzi bakaYehova?

⁴ Njengokuba amaNgqina kaYehova efundisisa iBhayibhile nabantu abasandul’ ukuba nomdla, abaninzi kwaba bantu batsha bakhawuleza baqonde ukuba oko bakufundiswayo kuvela eBhayibhileni. Xa kuphendulwa imibuzo yabo, abacatshulelwa izivumo zokholo zecawa, izithethe zabantu, okanye iimbono zabantu abadumileyo. Igunya iba liLizwi likaThixo. Xa besiya kwiHolo yoBukumkani, baphawula ukuba nalapho eyona ncwadi iphambili esetyenziswayo yiBhayibhile. Akuthabathi thuba lide ngaphambi kokuba abo bayifuna ngokwenene inyaniso baqonde ukuba oyena thunywashe uyintloko kuvuyo abalubonayo phakathi kwamaNgqina kaYehova sisibakala sokuba ondliwa kakuhle ngokomoya ngeLizwi likaThixo.—Isaya 65:13, 14.

5. (a) Luluphi ucelomngeni olubekelwa abo babukela amaNgqina kaYehova? (b) Banokuba nesabelo njani kuvuyo lwamaNgqina?

⁵ Ukuba uyakuqonda oku, usabela njani kuko? Ukuba uyakubona ukubaluleka kwako, akunakuthi ngokufanelekileyo ube ngumbukeli nje ongenzi nto, kwaye ungayi kufuna nokwenjenjalo. IBhayibhile ibonisa ukuba abo ‘baphulaphulayo nje qha’ kodwa ‘bengenzi oko likuthethayo ilizwi’ ‘bayazikhohlisa.’ (Yakobi 1:22, TE) Bayazikhohlisa kuba abaqondi ukuba kungakhathaliseki oko basenokukuthetha, ukungamthobeli kwabo uThixo kubonisa ukuba abamthandi ngokwenene. Ukuba uzibanga ukholwa kube kungekho misebenzi olo kholo lufile. (Yakobi 2:18-26; 1 Yohane 5:3) Ngokwahlukileyo koko, lowo ushukunyiswa luthando ngoYehova ukuba abe “ngumenzi womsebenzi” uya kuba “noyolo ekwenzeni kwakhe.” Ewe, kunjengokuba uYesu Kristu wachazayo, “banoyolo abo balivayo ilizwi likaThixo baligcine.”—Yakobi 1:25; Luka 11:28; Yohane 13:17.

6. Ukuba silixabisa ngokwenene iLizwi likaThixo, ngawaphi amathuba esiya kuzama ukuwaxhakamfula?

⁶ Olo vuyo luyendela njengoko ulwazi lwakho ngokuthanda kukaThixo lukhula yaye uzisebenzisa ngakumbi izinto ozifundayo. Ngaba uya kuzibhokoxa kangakanani ekufundisiseni iLizwi likaThixo? Amashumi amawaka abantu ababengakwazi ukufunda nokubhala baye bazibhokoxa ekufundeni ukufunda, oku bekwenza ngokukhethekileyo ukuze bakwazi ukufunda iZibhalo nokuzifundisa abanye abantu. Abanye bavuka kwangonyezi ntsasa nganye ukuze bachithe ixesha elithile suku ngalunye befunda iBhayibhile neencwadi eziluncedo ekufundisiseni iBhayibhile, ezinjengeMboniselo. Njengokuba wena ngokobuqu uqhubeka ufunda iBhayibhile okanye ujonga izibhalo ezicatshulwe kwezinye iincwadi zofundisiso, ngenyameko phawula imithetho nemiyalelo kaYehova, uze ufune ukuqonda imigaqo emininzi ekuzo esikhokelayo. Camngca ngoko nxalenye nganye ikutyhilayo ngoThixo, iinjongo zakhe, neenkqubano zakhe noluntu. Vumela ixesha lokuba oku kuxonxe intliziyo yakho. Qwalasela enoba kukho iindlela onokuzisebenzisa ngokuzeleyo ngazo iziluleko zeBhayibhile ebomini bakho.—INdumiso 1:1, 2; 19:7-11; 1 Tesalonika 4:1.

Ngaba Uzinikele Ngokupheleleyo KuYehova?

7. (a) Imfundiso kaBathathu Emnye iwachaphazele njani amalinge abantu okunqula uThixo? (b) Kusenokwenzeka ntoni xa umntu efunda inyaniso ngoYehova?

⁷ Kwizigidi zabantu, kuye kwee qabu zakufunda ukuba uThixo oyinyaniso akanguye uBathathu Emnye. Ingcaciso yokuba “uyimfihlelo” ayizange izanelise. Bezinokusondela njani kuThixo ongenakuqondwa? Ngenxa yaloo mfundiso, zatyekela ekungamkhathalelini uBawo (ogama lakhe zingazange zaliva ecaweni) zaza zanqula uYesu njengoThixo okanye zalathisela unqulo lwazo kuMariya (ezazifundiswe ukuba ‘wayenguMama kaThixo’). Kodwa iintliziyo zavuya xa omnye wamaNgqina kaYehova wavula iBhayibhile waza wazibonisa igama lobuqu likaThixo, elinguYehova. (INdumiso 83:18) Lachwayita gqitha elinye inenekazi laseVenezuela lakuboniswa igama likaThixo kangangokuba lalanga ngokoqobo iNgqina eliselula elalisabelana nalo ngale nyaniso ixabisekileyo laza lavuma ukuqhutyelwa isifundo seBhayibhile sekhaya. Xa abantu abanjalo befunda ukuba uYesu wathetha ngoYise ‘njengoThixo wam, uThixo wenu’ nokuba uYesu wabhekisela kuYise ‘njengokuphela koThixo oyinyaniso,’ bayaqonda ukuba oko iBhayibhile ikufundisayo ngoThixo akunto ingenakuqondwa. (Yohane 17:3; 20:17) Njengoko befikelela ekwazini iimpawu zikaYehova, baziva betsaleleka kuye, baqalise ukuthandaza kuye, baze bafune ukumkholisa. Uba yintoni umphumo?

8. (a) Zenze ntoni izigidi zabantu, ngenxa yothando lwazo ngoYehova nomnqweno wazo wokumkholisa? (b) Kutheni ubhaptizo lwamaKristu lubaluleke ngokwenene?

⁸ Kule minyaka ilishumi idlulileyo, ngabantu abazizi-2 528 524 kumazwekazi amathandathu nakwiziqithi ezininzi abaye bahlulela ubomi babo kuYehova baza bafuzisela oku kuzahlulela ngokubhaptizwa emanzini. Ngaba ubungomnye wabo, okanye ngaba ngoku uzilungiselela ukubhaptizwa? Ukubhaptizwa linyathelo elibalulekileyo ebomini bawo onke amaKristu okwenyaniso. UYesu wathuma abalandeli bakhe ukuba benze abafundi abantu bazo zonke iintlanga baze bababhaptize. (Mateyu 28:19, 20) Kwakhona kuyaphawuleka ukuba ngokukhawuleza nje emva kokubhaptizwa kukaYesu uYehova wathetha esezulwini, esithi: “Wena unguNyana wam oyintanda, endikholisiweyo nguwe.”—Luka 3:21, 22.

9. Ukuze sigcine ulwalamano olukholekileyo noYehova, kufuneka senze ntoni?

⁹ Ulwalamano olukholekileyo noYehova luyinto yokuxatyiswa. Ukuba unolwalamano olunjalo ngokuzahlulela nokubhaptizwa, phepha nantoni na eya kulonakalisa. Musa ukuvumela amaxhala obomi nokuxhalabela izinto eziphathekayo zilutyhalele kwindawo yesibini. (1 Timoti 6:8-12) Eneneni phila ngokuvisisana nesiluleko esikwiMizekeliso 3:6: “Uze umazi [uYehova] ezindleleni zakho zonke; wowulungelelanisa umendo wakho.”

Uthando LukaKristu Lukuchaphazela Ngokunzulu Kangakanani?

10. Kutheni ukunqula kwethu uYehova kungasibangeli simtyeshele uYesu?

¹⁰ Kambe ke, uxabiso olufanelekileyo ngoYehova njengokuphela koThixo oyinyaniso alubangeli ukuba umntu amtyeshele uYesu Kristu. Ngokuchasene noko, ISityhilelo 19:10 sithi: “Ubungqina bukaYesu bungumoya wesiprofeto.” Ukususela kwiGenesis ukuya kwiSityhilelo, iziprofeto eziphefumlelweyo zinikela iinkcukacha ngokuphathelele indima kaYesu Kristu kwinjongo kaYehova. Njengoko umntu eqhelana nezo nkcukacha, uba nombono obangel’ umdla ongagqwethekanga nongenazo iingcamango zobuxoki eziye zangumphumo weemfundiso zobuxoki zeNgqobhoko.

11. Ukufunda oko iBhayibhile ikufundisayo ngokwenene ngoNyana kaThixo kwalichaphazela njani elinye ibhinqa lasePoland?

¹¹ Ukuqonda inyaniso ngoNyana kaThixo kunokuba nomphumo onzulu emntwini. Kwaba njalo ngoDanuta, ibhinqa lasePoland. Wayenonxibelelwano namaNgqina kaYehova kangangeminyaka esibhozo, ekunandipha oko ayekufundisa, kodwa engalwenzi unqulo oluyinyaniso lube yindlela yakhe yobomi. Wandula ke wafumana incwadi ethi Oyena Mntu Ubalaseleyo Wakha Waphila, echaza ubomi bukaKristu ngendlela ekulula ukuyiqonda.a Ebusuku, wayivula le ncwadi, ezimisele ukufunda isahluko esinye nje kuphela. Noko ke, akazange ayibeke phantsi de kwaba ngesifingo, akuba eyigqibile. Zaphalala iinyembezi. Wabongoza esithi, “Yehova, ndixolele.” Ngenxa yoko wayekufundile, walubona ngokucace kunanini na ngaphambili uthando olwaboniswa nguYehova noNyana wakhe. Waqonda ukuba kangangeminyaka esibhozo wayebonise ukungabi nambulelo ngokuluphepha uncedo awayelunikwa nguThixo ngomonde. Ngowe-1993 wabhaptizwa efuzisela uzahlulelo lwakhe kuYehova olusekelwe kukholo kuYesu Kristu.

12. Ulwazi oluchanileyo ngoYesu Kristu lubuchaphazela njani ubomi bethu?

¹² ‘Ulwazi oluchanileyo ngeNkosi yethu uYesu Kristu’ lunxulumene nokuba ngumKristu okhutheleyo nonemveliso. (2 Petros 1:8) Uya kuba nenxaxheba ukusa kuwuphi umkhamo kuloo msebenzi, usabelana nabanye ngesigidimi soBukumkani? Ubungakanani boko abantu bakwaziyo ukukwenza buchatshazelwa ziimeko ezininzi. (Mateyu 13:18-23) Zimbi iimeko asinakuziguqula; ezinye sinako. Yintoni eya kusishukumisela ekuqondeni size sizenze ezo nguqulelo sinako ukuzenza? Umpostile uPawulos wabhala: “Uthando lukaKrestu lusongamele”; ngamanye amazwi, uthando awalubonisayo ngokuncama ubomi bakhe ngenxa yethu lubalasele kangangokuba njengokuba uxabiso lwethu ngalo lukhula, iintliziyo zethu ziya kushukunyiswa ngokunzulu. Ngenxa yoko, siyaqonda ukuba kuya kuba kokungafanelekanga ngokwenene ukuba sizibekele usukelo lokuzingca size ubukhulu becala siphilele ukuzanelisa. Kunoko, silungelelanisa iimeko zethu ukuze umsebenzi uKristu awafundisa abafundi bakhe ukuwenza siwubeke kwindawo yokuqala.—2 Korinte 5:14, 15, TE.

Ukwahluka Ehlabathini—Ukusa Kuwuphi Umkhamo?

13. Kutheni singamele sifune ukuba yinxalenye yonqulo oluzenze inxalenye yehlabathi?

¹³ Akunzima ukubona udumo iNgqobhoko nezinye iinkonzo ezizenzele lona ngenxa yokuba zifuna ukuba yinxalenye yehlabathi. Iimali zecawa ziye zasetyenziselwa ukuxhasa imvukelo. Abefundisi baye baba ngabanqolobi. Mihla le, amaphephandaba aba neengxelo zamahlelo onqulo alwayo kwiindawo ezahlukahlukeneyo zomhlaba. Izandla zabo zivuza igazi. (Isaya 1:15) Ibe ehlabathini lonke abefundisi bayaqhubeka bezama ukusebenzisa ezobupolitika. Abanquli bokwenyaniso abananxaxheba koku.—Yakobi 4:1-4.

14. (a) Yintoni esimele siyiphephe ngokobuqu ukuba siza kuqhubeka sahlukile ehlabathini? (b) Yintoni enokusinceda sikuphephe ukubanjiswa zizimo zengqondo nezinto ezenziwayo ehlabathini?

¹⁴ Kodwa ukwahluka ehlabathini kubandakanya okungakumbi kunoko. Kweli hlabathi kubalasele ukuthanda imali noko kunokuthengwa ngemali, ukunqwenela ukuduma, nosukelo olungapheliyo lokuzonwabisa, kunye nezinto ezifana nokungabakhathaleli ngokwenene abanye, ukuxoka nentetho engamanyala, ukuvukela igunya nokungakwazi ukuzeyisa. (2 Timoti 3:2-5; 1 Yohane 2:15, 16) Ngenxa yokungafezeki kwethu, maxa wambi ngandlel’ ithile sisenokubonisa ezithile zezo mpawu. Yintoni enokusinceda kumzabalazo wethu wokuyiphepha imigibe enjalo? Kufuneka sizikhumbuze ukuba ngubani na ophembelela konke oku. “Ihlabathi liphela lilele kongendawo.” (1 Yohane 5:19) Kungakhathaliseki ukuba ikhondo elithile lisenokubonakala linomtsalane kangakanani, kungakhathaliseki ukuba baninzi kangakanani abanye abantu abaphila ngaloo ndlela, xa siqonda ukuba lutshaba oluyintloko lukaYehova, uSathana uMtyholi, oliphembelelayo, siyayiqonda indlela elibi ngokwenene ngayo.—INdumiso 97:10.

Lunzulu Kangakanani Uthando Lwakho?

15. Uthando lokungazingci owaluphawulayo lwakunceda njani wafanisa unqulo oluchanileyo?

¹⁵ Xa wawuqalisa ukunxulumana namaNgqina kaYehova, uthando olukhoyo phakathi kwawo ngokungathandabuzekiyo waluthanda ngenxa yendlela olwahluke ngayo kumoya wehlabathi. Ukugxininiswa kothando lokungazingci kuyalwahlula unqulo lukaYehova kuzo zonke ezinye iindlela zokunqula. Kusenokwenzeka ukuba koku okwakuqinisekisayo ukuba amaNgqina kaYehova ngokwenene alunqulo oluchanileyo. UYesu Kristu wathi: “Ngayo le nto baya kwazi bonke, ukuba ningabafundi bam, ukuba nithe nathandana.”—Yohane 13:35.

16. Ngawaphi amathuba esisenokuba nawo njengabantu ngabanye okwenza banzi uthando lwethu?

¹⁶ Ngaba olo phawu nawe lukufanisa nje-ngomnye wabafundi bakaKristu? Ngaba zikho iindlela onokuba banzi ngazo ekuboniseni kwakho uthando? Ngaphandle kwamathandabuzo sonke sinako. Oku kuthetha okungakumbi kunokuba nobuhlobo kwabanye kwiHolo yoBukumkani. Yaye ukuba besibonisa uthando kwabo basithandayo kuphela, ngaba besiya kuba sahlukile ehlabathini? IBhayibhile isibongoza ithi: “Ngaphezu kweento zonke ke, yibani nothandano olunyamekileyo.” (1 Petros 4:8) Ngoobani esinokubonisa uthando olungakumbi kubo? Ngaba ngumzalwana okanye udade ongumKristu onemvelaphi eyahlukileyo kweyethu nowenza izinto ngendlela esicaphukisayo? Ngaba ngothile, ngenxa yokugula okanye ukwaluphala, ongakwaziyo ukubakho rhoqo kwiintlanganiso? Ngaba liqabane lethu lomtshato? Okanye, mhlawumbi, ngaba ngabazali bethu abalupheleyo? Bambi ababeqhuba kakuhle ekuboniseni iziqhamo zomoya, kuquka uthando, bavakalelwa kukuba babezifunda ngokutsha xa babejamelene neemeko ezinzima gqitha ezinokuvela xa benyamekela ngokupheleleyo ilungu lentsapho elingakwazi kuzenzela nto. Kambe ke, kwanaxa sijamelene nezi meko uthando lwethu lufanele lufikelele ngaphaya kwamalungu eentsapho zethu.

Ukunikela Ubungqina NgoBukumkani—Kubaluleke Kangakanani Kuwe?

17. Ukuba ngokobuqu siye sangenelwa kutyelelo lwamaNgqina kaYehova, ngoku sifanele sizive sishukunyiselwa ukwenza ntoni?

¹⁷ Indlela ebalulekileyo esilubonisa ngayo uthando ngabanye abantu kungokunikela ubungqina kubo ngoBukumkani bukaThixo. Linye kuphela iqela labantu elenza lo msebenzi uYesu wawuxela kwangaphambili. (Marko 13:10) NgamaNgqina kaYehova. Siye sangenelwa ngokobuqu kuwo. Ngoku kulilungelo lethu ukunceda abanye. Ukuba sinembono kaThixo ngalo mbandela, lo msebenzi uya kuba ngobalulekileyo ebomini bethu.

18. Ukufunda incwadi ethi AmaNgqina KaYehova—Abavakalisi BoBukumkani BukaThixo kunokusichaphazela njani isabelo sethu ekunikeleni ubungqina ngoBukumkani?

¹⁸ Ingxelo echulumancisayo ngendlela isigidimi soBukumkani esiye sasiwa ngayo kwezona ndawo zikwanti zomhlaba ebudeni bale mihla yokugqibela ibaliswa kwincwadi ethi AmaNgqina KaYehova—Abavakalisi BoBukumkani BukaThixo. Ukuba ikho ngolwimi lwakho, nceda uyifunde. Yaye njengokuba usenjenjalo, phawula ngokukhethekileyo zonke iindlela abantu abaye banesabelo ngazo ekunikeleni ubungqina ngoBukumkani. Ngaba bakho onokuxelisa imizekelo yabo? Sonke sivulelekelwe ngamathuba amaninzi. Ngamana uthando lwethu ngoYehova lungasishukumisela ekuwasebenziseni kangangoko.

19. Singenelwa njani xa sisamkela imbopheleleko epheleka ukwazi unqulo oluchanileyo?

¹⁹ Xa sizibhokoxa ngolo hlobo ekwenzeni ukuthanda kukaYehova, sifumana impendulo kumbuzo othi, Iyintoni injongo yobomi? (ISityhilelo 4:11) Asisafathuli, sivakalelwa singento. Awukho umsebenzi onokuzinikela kuwo oya kukunika ulwaneliseko olungakumbi njengokuba kunjalo ngokuzibhokoxa ngentliziyo iphela enkonzweni kaYehova uThixo. Yaye elinjani lona ukuzuka ikamva olifunjathelwe koku! Ubomi obungunaphakade obanelisayo kwihlabathi lakhe elitsha, apho siya kukwazi ukusebenzisa amandla ethu ngokupheleleyo ngokuvisisana nenjongo yothando uThixo awaludalela yona uluntu.

[Umbhalo osemazantsi]

Ubuya Kuphendula Uthini?

◻ Kutheni kubalulekile ukuba unqulo luyamkele iBhayibhile njengeLizwi likaThixo luze lumbeke uYehova njengoThixo oyinyaniso?

◻ Unqulo oluyinyaniso lufundisa ntoni ngendima kaYesu njengoMhlawuleli?

◻ Kutheni amaKristu efanele ahlale ahlukile ehlabathini yaye abe nothando lokungazingci?

◻ Ukunikela ubungqina ngoBukumkani kunayiphi indima kunqulo oluchanileyo?

[Imifanekiso ekwiphepha 16]

Ubhaptizo linyathelo elibalulekileyo ekwamkeleni iimbopheleleko zonqulo lokwenyaniso. Nyanga nganye, abantu abamalunga nama-25 000 ehlabathini lonke bathabatha elo nyathelo

Rashiya

Senegal

Papua New Guinea

U.S.A.

[Umfanekiso okwiphepha 17]

Ukwabelana nabanye ngenyaniso yeBhayibhile yinxalenye yonqulo lokwenyaniso

U.S.A.

U.S.A.

Brazil

Hong Kong