Ezi Ndaba Zilungileyo Zimele Zishunyayelwe Kuqala

“Kumele ukuthi ke ukuqala kuvakaliswe iindaba ezilungileyo ezi kuzo zonke iintlanga.”—MARKO 13:10.

1, 2. Luluphi uphawu olwahlula amaNgqina, ibe ngoba?

KUTHENI amaNgqina kaYehova ezingisa kangaka ekushumayeleni? Ngokuqinisekileyo saziwa emhlabeni wonke ngobulungiseleli bethu basekuhleni, enoba kukwindlu ngendlu, ezitratweni, okanye xa sidibana nabantu ngokungacwangciswanga. Ngazo zonke izihlandlo ezifanelekileyo, sizichaza njengamaNgqina size ngobuchule sizame ukudlulisela iindaba ezilungileyo eziligugu kuthi. Eneneni, sinokuthi obu bulungiseleli buluphawu olusahlulayo!—Kolose 4:6.

² Khawufan’ ucinge nje ngoku—nanini na abantu bebona kwindawo abahlala kuyo iqela lamadoda, abafazi nabantwana abanxibe kakuhle bephethe iibrifkheyisi, ngokuqhelekileyo yintoni abayicingayo kuqala? Ngaba bacinga ukuba, ‘Nango ke, esiza kwakhona la maKatolika (okanye la maOthodoki)!’ okanye, ‘Nango esiza kwakhona la maPentekoste (okanye la maBhaptizi)!’ Akunjalo. Abantu bayazi ukuba ezo nkonzo azinalo ilungiselelo lokuba iintsapho ziphela ziphume ziye kwenza ubulungiseleli bendlu ngendlu. Mhlawumbi amaqela athile onqulo ayabathuma “abavangeli” abathile isithutyana seminyaka emibini kwimimandla ethile, kodwa amalungu aqhelekileyo akabi nanxaxheba kubulungiseleli obunjalo. NgamaNgqina kaYehova kuphela aziwa emhlabeni wonke ngenzondelelo yawo ekudluliseleni isigidimi sawo kwabanye ngazo zonke izihlandlo ezifanelekileyo. Ibe aziwa ngamaphephancwadi awo, IMboniselo noVukani!—Isaya 43:10-12; IZenzo 1:8.

Ukwahluka Kubefundisi BeNgqobhoko

3, 4. Ngokufuthi abefundisi beNgqobhoko baboniswa njani kumajelo eendaba?

³ Ngokwahluke gqitha, iingxelo eziphuma ezindabeni ziye izihlandlo ngezihlandlo zabonisa ukuba abefundisi kumazwe athile baxhaphaza abantwana ngokwesini, ngoosomaqhingana abaziphethe kakubi, yaye banobuqhetseba. Imisebenzi yabo yenyama nobomi babo bobutofotofo bubonakala kubantu bonke. Omnye umqambi odumileyo wakuchaza kakuhle oku kwingoma yakhe enomxholo othi “Ngaba UYesu Wayenganxiba IRolex [iwotshi yegolide exabiso likhulu] Kwinkqubo Yakhe Kumabonwakude?” Ubuza lo mbuzo: “Ngaba uYesu ebengangenelela kwezobupolitika ukuba ebenokubuyela Emhlabeni Kwakhona? Abe Nekhaya lesibini ePalm Springs [indawo yabantu abazizityebi eKhalifoniya] aze azame ukubufihla ubutyebi Bakhe?” Hayi indlela afaneleke ngayo amazwi kaYakobi: “Nadla ubuncwane emhlabeni apha, naxhamla iziyolo, nazondla iintliziyo zenu njengamhla kuxheliweyo.”—Yakobi 5:5; Galati 5:19-21.

⁴ Ukuqhogana kwabefundisi nabezobupolitika kwanokude bazigqatse xa kukho unyulo kubonisa ukuba bangababhali nabaFarisi banamhlanje. Kwangaxeshanye, kumazwe anjengeUnited States neKhanada, iinkonzo ziyabetheka mpela ngasemalini ngenxa yeendleko eziphakamileyo zokumangalelwa nokugwetywa kwabefundisi, okubangelwa kukuziphatha kakubi kwabefundisi ngokwesini nabantwana nabantu abakhulu.—Mateyu 23:1-3.

5. Kutheni abefundisi beNgqobhoko bengangqinekanga ‘bengumkhonzi othembekileyo noqondayo’?

⁵ Ngokuchanileyo, uYesu wayenokuthi kubefundisi bomhla wakhe: “Yeha, nina babhali, baFarisi, bahanahanisindini! Ngokuba nifana namangcwaba aqatywe ifutha, athi abonakale emahle okunene ngaphandle, kanti ngaphakathi azele ngamathambo abafileyo nokungcola konke. Ngokukwanjalo nani ngaphandle okunene nibonakala kubantu ningamalungisa, kanti ngaphakathi nizele luhanahaniso nokuchasene nomthetho.” Ngaloo ndlela, uThixo akanikanga abefundisi beNgqobhoko, enoba ngamaKatolika, amaProtestanti, amaOthodoki, okanye abo bangekho kwimvaba ethile, uthumo lokushumayela iindaba ezilungileyo. Abangqinekanga ‘bengumkhonzi othembekileyo noqondayo’ owaxelwa kwangaphambili.—Mateyu 23:27, 28; 24:45-47.

Kutheni Iindaba Ezilungileyo Zimele Zishunyayelwe Kuqala?

6. Ziziphi iziganeko eziza kwenzeka kungekudala?

⁶ Kwinkcazelo yakhe engqalileyo yomyalelo kaYesu wokushumayela iindaba ezilungileyo kuzo zonke iintlanga, nguMarko kuphela osebenzisa igama elithi “kuqala.” (Marko 13:10; thelekisa uMateyu 24:14.) Inguqulelo kaJ. B. Phillips ifundeka ngolu hlobo: “Ngaphambi kokuba isiphelo sifike ivangeli imele ivakaliswe kuzo zonke izizwe.” Ukusetyenziswa kwegama elithi “kuqala” njengesihlomelo kubonisa ukuba kumele kulandele ezinye iziganeko emva komsebenzi wokuhambisa ivangeli emhlabeni wonke. Ezo ziganeko ziya kuquka imbandezelo enkulu nolawulo lukaKristu lobulungisa kwihlabathi elitsha elithenjisiweyo.—Mateyu 24:21-31; ISityhilelo 16:14-16; 21:1-4.

7. Kutheni uThixo efuna iindaba ezilungileyo zishunyayelwe kuqala?

⁷ Ngoko kutheni uThixo efuna iindaba ezilungileyo zishunyayelwe kuqala? Esinye isizathu kukuba unguThixo onothando, osesikweni, onobulumko namandla. Ekuzalisekeni kwamazwi kaYesu abhalwe kuMateyu 24:14 nakuMarko 13:10, sinokufumana imbonakaliso echukumisayo yezi mpawu zikaYehova. Makhe sihlolisise ngokufutshane nganye kuzo size sibone indlela ezinxulumene ngayo nokushunyayelwa kweendaba ezilungileyo.

Iindaba Ezilungileyo Nothando LukaYehova

8. Ukushunyayelwa kweendaba ezilungileyo kuyimbonakaliso yothando lukaThixo njani? (1 Yohane 4:7-16)

⁸ Ukushumayela iindaba ezilungileyo kulubonisa njani uthando lukaThixo? Okokuqala, ngenxa yokuba azisosigidimi esibhekiswe kuhlanga okanye kwiqela elinye kuphela. Ziindaba ezilungileyo zazo “zonke iintlanga.” UThixo uyayithanda intsapho engabantu kangangokuba wathumela uNyana wakhe okuphela kwamzeleyo emhlabeni ukuze abe lidini lentlawulelo yezono zoluntu lonke, kungekuphela nje uhlanga olunye. Umpostile uYohane wabhala: “Wenjenje uThixo ukulithanda kwakhe ihlabathi, ude wancama uNyana wakhe okuphela kwamzeleyo, ukuze bonke abakholwayo kuye bangatshabalali koko babe nobomi obungunaphakade. Kuba uThixo akamthumanga uNyana wakhe ehlabathini, ukuze aligwebe ihlabathi; wamthuma ukuze ihlabathi lisindiswe ngaye.” (Yohane 3:16, 17) Ngokuqinisekileyo iindaba ezilungileyo, isigidimi esithembisa ihlabathi elitsha loxolo, imvisiswano, nokusesikweni, zibubungqina bothando lukaThixo.—2 Petros 3:13.

Iindaba Ezilungileyo Namandla KaYehova

9. Kutheni uYehova engasebenzisanga iinkonzo ezinamandla zeNgqobhoko ukushumayela iindaba ezilungileyo?

⁹ Amandla kaYehova abonakaliswa njani ngokushunyayelwa kweendaba ezilungileyo? Khawuqwalasele oku, ngoobani abasebenzisayo ukuphumeza olu thumo? Ngaba ibizezona ntlangano zinamandla kwiNgqobhoko, njengeCawa yamaRoma Katolika okanye amahlelo aphambili amaProtestanti? Hayi, ukubandakanyeka kwazo kwezobupolitika kuzenze azawufanelekela lo msebenzi. (Yohane 15:19; 17:14; Yakobi 4:4) Ubutyebi bazo nempembelelo yazo kudidi olulawulayo akumvuyisi uYehova uThixo, njengokuba engavuyiswa nazizifundo zabo zakwalizwi ezisekelwe kwizithethe. Akufunekanga mandla abantu ukuze kwenziwe ukuthanda kukaThixo.—Zekariya 4:6.

10. Ngoobani uThixo abakhethe ukuba bashumayele?

¹⁰ Kunjengokuba umpostile uPawulos watshoyo kwincwadi yakhe eya kwibandla laseKorinte: “Kuba luboneni ubizo lwenu, bazalwana, ukuba azizininzi izilumko ngokwenyama, ababaninzi abanamandla, akamaninzi amanene. UThixo usuke wanyula izinto ezibubudenge zehlabathi, ukuze azidanise izilumko; nezinto ezingenamandla zehlabathi usuke uThixo wazinyula, ukuze azidanise izinto ezomeleleyo; nezinto zehlabathi ezingenabuntu, nezingento yanto, wazinyula uThixo, nezingathi azikho, ukuze aziphuthise izinto ezikhoyo; ukuze kungaqhayisi namnye umntu emehlweni akhe.”—1 Korinte 1:26-29.

11. Ziziphi izibakala ezenze amaNgqina angakhethekileyo?

¹¹ Ambalwa gqitha amalungu azizityebi kakhulu phakathi kwamaNgqina kaYehova yaye ngokuqinisekileyo akakho aphambili kwezobupolitika. Ukuba ngoondilele kwawo ngokungqongqo kwimicimbi yezobupolitika kuthetha ukuba akanakuba nampembelelo kwezobupolitika. Ngokuchasene noko, ngokufuthi ebengamaxhoba entshutshiso ekrakra exhokonxwa ziinkokeli zonqulo nezobupolitika ebudeni bale nkulungwane yama-20. Ukanti, phezu kwako nje ukuchaswa kwawo ngokukrakra ngabaxhasi bobuNazi, bobuFasi, bobuKomanisi, bobunashinali nabonqulo lobuxoki, amaNgqina akanelanga nje kukushumayela iindaba ezilungileyo ehlabathini lonke kodwa aye anda kakhulu.—Isaya 60:22.

12. Kutheni amaNgqina ephumelela?

¹² AmaNgqina athi ibangelwe yintoni impumelelo yawo? UYesu wabathembisa oku abafundi bakhe: “Niya kwamkela ke amandla, akubon’ ukuba uMoya oyiNgcwele uhlile phezu kwenu; nibe ngamangqina am eYerusalem, kwanakulo lonke elakwaYuda nelaseSamariya, kude kuse nasekupheleni komhlaba.” Ngoko, wawuya kuba yintoni kanye umthombo wempumelelo yawo? UYesu wathi: “Niya kwamkela ke amandla, akubon’ ukuba uMoya oyiNgcwele uhlile phezu kwenu.” Ngokufanayo namhlanje, ngamandla avela kuThixo, kungekhona ubuchule babantu, aye aba ngundoqo kwimpumelelo yamaNgqina kubulungiseleli bawo basemhlabeni wonke. Esebenzisa abona bantu babonakala bengenamandla, uThixo ufeza owona msebenzi mkhulu wokufundisa embalini.—IZenzo 1:8; Isaya 54:13.

Iindaba Ezilungileyo Nobulumko BukaYehova

13. (a) Kutheni amaNgqina ekhonza ngokuzithandela yaye engafuni ntlawulo? (b) UYehova uluphendule njani ugculelo lukaSathana?

¹³ Iindaba ezilungileyo zishunyayelwa ngabasebenzi bokuzithandela. UYesu wathi: “Namkele ngesisa, yiphani ngesisa.” (Mateyu 10:8) Ngoko ke, akukho namnye kumaNgqina kaYehova ohlawulwayo ngokukhonza uThixo, ibe akafuni ntlawulo. Eneneni, akukho nkongozelo kwiintlanganiso zawo. Ngenkonzo yawo yokuzinikela ngokungazingci, ayakuvuyela ukwenza uThixo akwazi ukuphendula ummangaleli wakhe, uSathana uMtyholi. Lo mchasi kaThixo ungumoya eneneni uthe abantu abanakumkhonza uThixo xa bengaqhutywa kukuzingca. Ngobulumko bakhe uYehova uvelise impendulo engenakuphikiswa kugculelo lukaSathana—izigidi zamaNgqina akhe anyanisekileyo angamaKristu zishumayela iindaba ezilungileyo kwindlu ngendlu, ezitratweni nangokungacwangciswanga.—Yobhi 1:8-11; 2:3-5; IMizekeliso 27:11.

14. Buyintoni ‘ubulumko obusemfihlekweni’ uPawulos abhekisela kubo?

¹⁴ Obunye ubungqina bobulumko bukaThixo ekubangeleni ukuba kushunyayelwe iindaba ezilungileyo kukuba isithembiso soBukumkani yimbonakaliso yobulumko bukaThixo. Umpostile uPawulos wabhala: “Ke sithetha ubulumko phakathi kwabagqibeleleyo, ubulumko ke obungebubo obeli phakade, nobabaphathi beli phakade ababhangayo. Sithetha ubulumko bukaThixo obusemfihlekweni, obo ke bufihlakeleyo, awathi uThixo ngenxa engaphambili, kwangaphambi kwawo amaphakade, wabumisela uzuko lwethu.” Obo ‘bulumko busemfihlekweni’ bubhekisela kwindlela kaThixo yobulumko yokuphelisa imvukelo eyaqala e-Eden. Ubulumko baloo mfihlelo ingcwele batyhilwa kuYesu Kristu, onendima ephambili kwiindaba ezilungileyo zoBukumkani bukaThixo.a—1 Korinte 2:6, 7; Kolose 1:26-28.

Iindaba Ezilungileyo Nokusesikweni KukaThixo

15. Sazi njani ukuba uYehova unguThixo wokusesikweni? (Duteronomi 32:4; INdumiso 33:5)

¹⁵ Ngokuphathelele okusesikweni sikubona ngokukodwa ukubaluleka kwegama elithi “kuqala” kuMarko 13:10. UYehova nguThixo wokusesikweni okuxutywe nobubele obunothando. Ngomprofeti wakhe uYeremiya uthi: “Oqhayisayo makaqhayise ngale nto yokuba endiqiqa, endazi mna ukuba ndinguYehova, owenza inceba [“ububele obunothando”], nesiko [“nokusesikweni”], nobulungisa, ehlabathini; ngokuba ndinanze ezo zinto; utsho uYehova.”—Yeremiya 9:24, thelekisa iNW.

16. Sinokuzekeliswa njani isibakala sokuba okusesikweni kufuna kunikelwe isilumkiso kuqala?

¹⁶ Ukuba sesikweni kukaYehova kuboniswa njani ngokushunyayelwa kweendaba ezilungileyo? Makhe sizekelise ngomama owenze ikeyiki yetshokolethi emnandi eza kutyiwa xa kufike iindwendwe kamva ngaloo mini. Ukuba uyishiya kwitafile yasekhitshini engabaxelelanga abantwana bakhe ukuba iya kutyiwa nini, abantwana bakhe baya kutyekela ekwenzeni ntoni ngokwemvelo? Sonke sakha sangabantwana! Ukho umntwana oza kufuna ukuyiva! Ngoko ukuba umama ebengalumkisanga, akayi kuba nasizathu sivakalayo sokufuna ukohlwaya. Kwelinye icala, ukuba uchaza ngokucacileyo ukuba loo keyiki iya kutyiwa kamva xa iindwendwe zifikile ibe ngoko ke ayifanele ichukunyiswe, ngoko ulumkise ngokucacileyo. Ukuba akathotyelwa, unelungelo lokuthabatha inyathelo elingqongqo nelisesikweni.—IMizekeliso 29:15.

17. UYehova ukubonise njani okusesikweni ngendlela ekhethekileyo ukususela ngowe-1919?

¹⁷ Ngokusesikweni kwakhe, uYehova akayi kuyigweba le nkqubo yezinto ingendawo engathanga ayilumkise ngokufanelekileyo kuqala. Ngoko ke, ngokukodwa ukususela ngowe-1919, emva kokuba imfazwe yehlabathi yokuqala iqalise ukuba ‘nenimba,’ uYehova uye wathumela amaNgqina akhe ukuba atyhutyhe wonke umhlaba evakalisa iindaba ezilungileyo ngenzondelelo. (Mateyu 24:7, 8, 14) Iintlanga azinakuthi ngokufanelekileyo azisivanga esi silumkiso sikhethekileyo.

Umhlaba Ugutyungelwe Ngokubanzi Kangakanani?

18. (a) Bubuphi ubungqina obukhoyo bomsebenzi wamaNgqina kwimimandla ekwanti? (b) Yiyiphi eminye imizekelo oyaziyo?

¹⁸ Indlela onempumelelo ngayo lo msebenzi wokufundisa emhlabeni wonke inokubonwa kwincwadi ethi Last Places—A Journey in the North. Umbhali wayo ubalisa ukuba xa wayehlola iitshati zaselwandle efuna ukubona isiqithi esikude saseFoula, esinye seZiqithi zeShetland ngentla kweSkotlani, ezi tshati zabonisa ukuba “eso siqithi sijikelezwe zii-WKS (wrecks [iinqanawa ezizikileyo]), ii-RKS (rocks [amatye]), ii-LDGS (ledges [iingqaqa]) nee-OBS (obstructions [izinto ezixabileyo]).” Ezi “zazilumkisa umatiloshe onomdla ukuba ahambele kude. Amanzi angqonge iFoula ayesoyikeka gqitha, nto leyo eyayisenza esi siqithi singathandeki koomatiloshe, abakhenkethi, kwanakubasebenzi ababethunyelwa nguKumkanikazi, kodwa kungekhona kumaNgqina kaYehova—njengokuba ndabonayo kwiintsuku ezimbalwa.” Wahlabela mgama: “Kanye njengokuba ayegqogqa amatyotyombe ezixeko ezikhulu naMazwe Asakhasayo efuna amaguquka, ngokufanayo alusasaza ukholo lwawo kwisiqithi esikwanti saseFoula.” Wavuma ukuba ummi walapho, uAndrew, wayeshiyelwe IMboniselo kumnyango wakhe kwiinyanga ezithile ngaphambili. Wandula ke wongezelela wathi: “Kwiveki elandelayo ndabona umbhalo [kaVukani! ngesiDanish] eFaeroe [iziqithi ezikwiNorth Sea] yaye emva kweenyanga ezimbini umbhalo [weMboniselo yesiDanish] eNuuq, eGreenland.” Obunjani bona ukuba namandla ubungqina bomsebenzi wenzondelelo wamaNgqina kaYehova kwimimandla yasemantla!

Yintoni Eshukumisela AmaNgqina Ukuba Aqhubeke?

19, 20. (a) Yintoni eshukumisela amaNgqina kaYehova ukuba aqhubeke eshumayela? (b) Yiyiphi imibuzo eza kuphendulwa ngokulandelayo?

¹⁹ Kakade ke, ukushumayela kwindlu ngendlu kubantu ongabaziyo akuyondlwan’ iyanetha, kungakhathaliseki ukuba ubani ebeliNgqina kangangeminyaka emingaphi. Ngoko yintoni enceda la maKristu ukuba aqhubeke? Luzahlulelo lwawo lobuKristu nokuziva enembopheleleko. UPawulos wabhala: “Kuba xa ndithi ndizishumayele iindaba ezilungileyo, andinaqhayiya; kuba ndimelwe kukuzishumayela. Yeha ke mna, ukuba ndisuka ndingazishumayeli iindaba ezilungileyo!” AmaKristu okwenyaniso anesigidimi esizuzisa ubomi, ngoko anokusigcina kuwo njani? Umgaqo wetyala legazi ngenxa yokungalumkisi xa kukho ingozi sisizathu esishukumisela ukushunyayelwa kweendaba ezilungileyo.—1 Korinte 9:16; Hezekile 3:17-21.

²⁰ Ngoko, zishunyayelwa njani iindaba ezilungileyo? Uyintoni undoqo wokuphumelela kwamaNgqina? Ziziphi iinkalo zobulungiseleli nentlangano yawo ezinceda ukuwafanisa njengonqulo lokwenyaniso? Inqaku lethu elilandelayo liza kuyiphendula loo mibuzo.

[Umbhalo osemazantsi]

Uyakhumbula Na?

◻ Yintoni eyahlula amaNgqina kaYehova kubefundisi?

◻ Ukushumayela kulubonisa njani uthando, amandla, nobulumko bukaThixo?

◻ Ukushunyayelwa kweendaba ezilungileyo kukubonisa njani ukuba sesikweni kukaThixo?

◻ Yintoni eyenza amaNgqina kaYehova aqhubeke kubulungiseleli bawo?

[Imifanekiso ekwiphepha 15]

Kungakhathaliseki ukuba abantu bakwanti kangakanani, amaNgqina kaYehova afuna ukufikelela kubo